ሉቃስት ወንጌል 14
14
ፈወነ 14
እየሱስ ቅዳምሲንቭት ግርየዝ ፅውዝጅነ ቓዘጘ።
1እየሱስም ላው ቅዳምሲንቭት ግርየዝ ፈሪሳነ ኻልቅጢስ ላዊዙ ጝኒል ሚ ዅጠ ጥዉ፤ ጝግል ዊነቍድም ፃቨውድቅ ቓልጥጘ ትክ ይጝ ጝት ጝት ቓልጛ ዊን። 2ኣይንድም ጝጊዝውድ ጝሰውነትድቅም ኣቕረው ፅውዝጅነ እጅር እየሱስት በዊል ዊኑ። 3እየሱስም ወሪትት ኽግ ኣርቐቲዝመ ፈሪሳኒዝ፦ «ቅዳምሲንቭት ግርየዝ ፅውዝጅነ ቓዘነው ወሪትት ኽግድ ፊቅደኵመ ፍቅዳው?» የው ዋቕሩ። 4ጛይ ግን ውርቅ ዊሲጝቀ ዝም ይ፤ ጘጝም ፅውዝጅነ እጅርድየንት ጝናኒዝ ፃይ ቓዝ ሲነቭትሱ።
5ጛትም፦ «እስቲ ክታጊስ ጝዅርድ ዊንም ጝቢረድ ቅዳምሲንቭት ግርየዝ ቢል ጥዋን በውዝ ውጢ ፊሳው እጅርድ ኣው የጝ?» የው ዋቕሩ።#ማቲ. 12፡11። 6ጛይ ግን ውረውረ ዊሰነው ዊገም ችጚየቍ።
ትኽትነዝመ ኣቭኑዘነውዝ
7እየሱስም ጝግል ጭጝሸቍ ኣብንድ ንየ ኪብረው ጐይተይል ጐይጥጘ ቀድምድምሽጛንድ ቓል፣ ጛጭስ ተከዝ እንት የው ዊግቱ። 8«ላው እጅር ክት ቅየንል ጭጝሽ፣ ቀድምድምሽር ንየ ኪብረው ጐይተይል ጐይተ፤ ምናልቫች ክጊስ ኪብረው ላየ እጅር ጭጝሽ ዊንሽ፣ 9ክታቪሉትቅ ጭጘው እጅርድ ተር፦ ‹እኒን ጐይተድየንት እን እጅሪዝ ሊቅ› ይጠ የጝ፤ ክትም ኣይንድ ኣይቭትራ ሳ ዝጥቅ ይር ጐይትር። 10ዊገድ ግን ጭጝሽር ፊትራንድ ሳ ዝጥቅ የው ጐይተይል ጐይ፤ ክት ጭጘው እጅርድም ተር፦ ‹ያን ቀነውወ! ጕ ንየ ኪብረው ጐይተይል ጐይ› ይጡ፤ ክትም ኣይንድ ክጅቅ ጐየቍ እቂዝቅ በዊል ኪብርትር። 11ምላሰንድድም ጝቕምት ንየስ ንየስ ሸውድቅ ዝጥቅ ይጡ፤ ጝቕምት ዝጥቅ ሸውድቅ ግን ንየስ ንየስ ይጡ።»#ማቲ. 23፡12፤ ሉቃ. 18፡14።
12እድ ጭጘው እጅርድየንት ቈሽ እንት ዩ፦ «ምዘትም ኣነ ድረይ ኣስልዳንድ ጛይም ጝታልቭነ ዊስጥጘ ጝታቲረዝ ጭጛይጘጘ፣ ክወደጃንድ ዊንም ክፅንድ ዊንም ክዚምዳንድ ዊንም ኻፍታመን ክግፅድ ጭጝተ። 13ዊገድ ግን ድግስ ኣስልዳንድ ድኽድ፣ ቈማጣንድ፣ ኻካዛንድ ኻርብድ፣ ጭጝ። 14እኒንት ፃቭርሽ በርክሽረር ኣትር፤ ጛይ ክልቭነድ ዊሰነው ኣቅም እጀቍ ኣጛንስቅ፣ ፃድቃኒዙ ክርጘይስ ጐነይዝ ኰር እደረ ክልቭነድ ዊስጡ።»
ኽየው ድግስዙ ተከድ
(ማቲ. 22፡1-10)
15መዲል ጐይጝ ዊነቊስም ላውድ እየሱስ ዊግተው ዊገድ ወሽ፦ «እደረት ምጝግስቲዝ ኰር መዲል ኣልት ዀው እጅር ውርጘ ቀቫሸዋ» ዩ። 16እየሱስም፦ «ላው እጅር ኽየው ድግስ ኣስል ንቕፀቍ እቅ ጭጙ። 17ድረይ ዀነ ሰትድ ችጛንድም፦ ‹እጝቅቅ ኣስልሽኩ ላቝጥን ጡጥን› የው ድቍጠ ማጥን ጝኣገልጋይድየንት እድ ጭጝሸቍ እቂል እፃቑ። 18እድ ጭጝሸቍድ ግን እዳጥጘ በንጝ፣ ጝታይታምላሰነ ፋጥርጥጘ ክርም፤ በውረድ፦ ‹ገነ ነን ቺዝጝ ጅቫንስቅ ጝት ቓልጨ ፊጨ የጝ፤ ኣለቀይ ቂይምሽረር› ዩ። 19ላውድ ቈሽ፦ ‹ኣኰ ፅምር ቢል ጅቫንስቅ ጛት ፊትነር የጝ፤ ሚቻውም፤ ኣለቀይ ቂይምሽረር› ዩ። 20ላውድ ቈሽ፦ ‹ገነ ነን እውነት ድው ኣስን ኣቓንስቅ ተጨ ቸለቅም› ዩ።
21እፃሸው ኣገልጋይድም ጝጝን ዋጥር እን ዊገድቅ ወነይዝ ድቁ፤ ወነድም ኻልክሽ፦ ‹ለው ቃሲ! ኻትመይዝቍ ፈራቐቍ ጒደንጢዝመ ኣፀቍ ዲቈዲቈነቍ ጒደንጢዝቅ ፊጥ! ድኽድ፣ ቈማጣንድ፣ ኻርብድ፣ ኻካዛንድቅ ነስር እንል ዲ› ዩ። 22ኣገልጋይድም ዋጥር ተር፦ ‹ኣደረወ! ክት ኣዝረውድቅ ፋፅምኩን፤ ጐይተድ ግን ገነ እቻቒየውም› ዩ። 23ወነድም ጝኣገልጋይድ፦ ‹ይጝንድ እቻጠ ማጥን ጒደንጢልም ኣነ ኻፅሊልቅ ፊትር ችጝረቍድቅ ቓናዝር ጭጝ። 24እዛይ በውገ ጭጝሸቍ እቂስ ላው እኳ ይድግስድ ጣማውም የኵን› ዩ።»
እየሱስት ቲክነናንድ ኪፍልዘው ምስዋትነትድ
(ማቲ. 10፡37-38)
25ንቕፀው ኽዝቭም እየሱስ ጅቅ ላብጠ ፃጛ ዊኑ፤ ጘጝም ኽዝቪዝጐ ዋጥር እንት የው ዊግቱ። 26«ኣውማው ይጐ ተረው እጅር ፅብሽ ጚርስመ ጝኘስ፣ ጝውነስመ ጝቝርስ፣ ጝፅንስመ ጝቕምት ርዅየድቅ እኳ እዳቒጝቀ ይጊስ ዲቍስ ቀነው ኣቐውዝየ ይክንደተ ኣጠ ቸላውም።#ማቲ. 10፡37። 27ጝሚከረ ሚስቅልድየንት መውር ይግርገይል ቲክናው ኣውማው እጅርድቅ ይክንደተ ኣጠ ቸላውም።
28«ክታጊስ ላው እጅር ዲቭር ጝን ተስጠ በናን ተሰነዊስ በውገ፦ ‹ጊንዝቫንድ ኣጥቍመ ኣቓቍ?› የው ኻስቫው እጅርድ ኣው የጝ? 29ሚስርትድ ሚስርተት ግረ ፋፅመነ ብሽ ግን ቓለቍድቅ እቘርጥቍ። 30‹እን እጅርድ ተስጠ ኪርም ፋፅመነ ቡ› ይጛ ቂልድጥቍ።
31«ዊንስ ቈሽ ላው ንጕስ ላየ ንጕስ ጅቅ ኣጭነ ጋጥምጠ በናን፣ ለርን ሽኽ ዊተድር ፃይ ተረው ንጕስድየንት ፅቃ ሽኽ ዊተድርዝ ማኽተነው ቸለው ኣቕሽ ጋጥመነዊስ በውገ ጐይ ማኽራውድ ኣው የጝ? 32ጝኣቅሚዝ ንየ ኣቕሽ ግን ጝፃለትድ ገነ እክል ፅባ እቅ እፃቕ በውግስ እርቅ ዋቕረኵ። 33እኒዝጘ ቈሽ ክታጊስ ጝፃየውድየንትቅ በራው ኣውማው እጅር ፅብሽ ይክንደተ ኣጠ ቸላውም።
34«ጭውጥረ ቀሰው የጝ፤ ኣነጚ ጭውጥረ ጝጣምነድ ባን ጝጣምነድ ኣወሽን የጝ ጣምሰነው ቸልሸውድ? 35እነየው ጭውጥረድ ዘቭዝም ኣነ ዛረዝ ጣቅማው ኣቓንስቅ እለ ቢዘ የጝ ማልጘውድ፤ ነስየ ወሸው ቀርዝ ፃየውድቅ ወሽነ።»
अहिले सेलेक्ट गरिएको:
ሉቃስት ወንጌል 14: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
