ሉቃስት ወንጌል 13
13
ፈወነ 13
ንስኻዙ ጭጝን
1ኣይንድም እቅ ተርጝ፦ «ገሊለትቍ እቅ ምስዋይት ኣልስጛ ሲጝቀ ቢላጠውስ ጛት ቍዉ፤ ጝታብርድም ጝታምስዋይቲጅቅ ዲቭልቁ» ይጝ እየሱስስ ጂጝዝ። 2ጘጝም እንት የው ዊሱ፦ «እደስለ እንዛይ ገሊለት እቅድ እንቝጠ ሚከረ ችጘውድ ላጥ ገሊለት እቂስቅ ኽጥያትኝጥ ኣጛንስቅመ ይርንኵኑ? 3ኣየቍም የኵን፤ ንስኻ ጥዊርነውዝየ ክትንም እጝቅቅ ጝታጘ ድዝርነቅ የጝ። 4ዊንስ ቈሽ ሰሊዀምት ግምብድ ጝታዲጊል ፋይር ክረቍ ፅጭ ሰውጠ እቅድ እየሩሳልየም ፅበቍ እቂስቅመ ጛይ ወሰቍ ኽጥያትኝጥ ይርንኵርኑ? 5ኣየቍም የኵን፤ ንስኻ ጥዊርነውዝየ ክትንም እጝቅቅ ጝታጘ ድዝርነቅ የጝ።»
6እንዝ ግረ ቈሽ እኒን ተከድ እንት የው ዊግቱ፦ «ላው እጅር ጝወይኒዙ ቺዝጚል በለስ ዘፍት ቲክል ዊኑ፤ ጘጝም እቸን በለስየንቲስ ፍር ችጝጭር የው ማርቕፅ ፊራን ውርም ችጚጝቀ እዳቑ። 7እንዝ ግረ ጝኣታክልቲዝ ሊምደተድየንት፦ ‹እንወ እኝቸን በለስየንቲስ ፍር ችጝጭር የር ሻቘ ምት ዋጥርጥራን ውርም ችጚቀር፤ ኣቓንስቅም ነስየ ቀቭር ማል፤ ውር ማጥን የጝ ዝቨድ ጨቅራ ፅብረውድ?› ዩ። 8ሊምደተድ ግን፦ ‹ኣደረወ እስቲ ጝርጅልወድ ኲትኵትጪስቅ፣ ዛረም ዚስጪስቅ ንጭት ኣምረየንት በጭ! 9ኣምር ኣሽ ፍርዝርሽ ቀሰው የጝ፤ ኣለዝየ ግን ቀቭትር›» ዩ።
እየሱስ ቅዳምሲንቭት ግርየዝ ጐቫጥ እውነት ቓዘጘ
10እየሱስም ቅዳምሲንቭት ግርየዝ ላው ምኵራቭል ክንሳ ዊኑ። 11ጝግልም ፅጭ ሰውጠ ምት ምሉ ርኵስ መንፈስዝ ፃይሽረይ ፅውዝጅነ እውነ ዊንች፤ ጚይም ጝርይውድ ጐቫጥ ኣቓንስቅ ጭቅ ይን ቓለነው ቸላይም ዊንች። 12እየሱስም ጝርት ቓል በር ጭጝ፦ «እውነ ክተ ክፅውዘይስ ቓድርኵሩ» ዩ። 13ጝናንድም ጝርዲጊል እቝሩ፤ ኣይንድም ቀጥ ይር ችብርች፤ እደረትም ሚዝየንዝች።
14ምኵራቪዝ ኻልቀድ ግን እየሱስ ቅዳምሲንቭትዝ ቓዛንስቅ ኻልክሽ፦ «ሰቭ ሰራሽጥነ ጥውሸቍ ዋልጠ ግርቅ እኵ፤ ጛይ ግርቂዝ ተትርና ቓድጥንጚ፤ ቅዳምሲንቭትዝ ኣቓውም» የው ኽዝቪዝ ዊግቱ።#ዘፀ. 20፡9-10፤ ዘዳ. 5፡13-14። 15እየሱስም ዊስ፦ «እፈ ተክዘጥ ክታትርነ! ክትንስ ክታቢረድ ዊንም ክታድዃረድ መድሪስ እክስርን ኣቝ ዚስትርነ ፊስርነቅ ኣይርነቅመ? 16እደስለ እኝቸን እውነየን ኣቭርኻምት ዚረ ኣቕር ፅብራ፣ ፅጭ ሰውጠ ምት ምሉ ሲጣንዝ እፁሽር ፅብረይሸን፣ ቅዳምሲንቭት ግርየዝ እኪተ ጥውሻውመ?» ዩ። 17እኒንት ዊግታንድም ጝት ተቃውምሽጛ ዊነቍድቅ ኣይቭት፤ ኽዝቭድ ግን ጘጝ ሰራሸው ዲንቅሰው ሰቪዝቍዝ ዲስ ዩ።።
ስናፍጭ ዚረት ተክድ
(ማቲ. 13፡31-32፤ ማር. 4፡30-32)
18እንዝ ግረ እየሱስ፦ «እደረት ምጝግስትየን ውር ተክረይ ጚ? ውር ጅቅስ ተክዝጭር? 19እጅር ፊስ ጝቺዝጚል ፊዘይ ስናፍጭት ተከች፤ ጚይም ሊግዝር ዘፊዝጘ ኣቲ፤ ዚልቅድም ጝር ጫፊል ሲፍር» ዩ።
20ቈሽም፦ «እደረት ምጝግስትት ውርዝ ተክዝጭር? 21ላይ እውነ እጝቅቅ ምጭትጠ ማጥን ሸውን እቭለ ግዘን ፊስር ሊውስረው ሚጨድ ተከች» ዩ።
ኣፅረይ ሚረየን
(ማቲ. 7፡13-14፤21-23)
22እንዝ ግረ እየሱስ እየሩሳልየም ትጐ ፊራንድ ችጘው ኻጥመይዝመ ኪዊዝቅ ክንሳ ዲቁ። 23ኣይንድም ላው እጅር ኣልት፦ «ኣደረወ! ቓደቍድ ዊትቍ እቅ ጭቝመ?» የው ዋቕሩ፤ እየሱስም እንት የው ዊሱ፦ 24«ኣፅረይ ሚረየንስ ጡትርነ ማጥን ልቕርጥን፤ እማንዝ የኵን! ንቕፀቍ እቅ ጡጥጘ በንጘኵ፤ ግን ቸላቍም። 25ጝኒዝ ወነድ ጕ ሚረድ ቘልፈት ግረ ክትን ቢዘይል ችብትርን፦ ‹ኣደረወ! ኣደረወ! ኣለቀይ ብዝ› ይርና ቢለድ ኰኳዝትርነ ኪርምትርንቅ፤ ጘጝ ግን፦ ‹ክትን ኣውታይ ኣቕርነጘ ኣርቐቅም› የው ዊስጡ። 26ክትንም፦ ‹ክጅቅ ዅን ዝይንኵኑን፣ ይናኣርወይልም ክንስርኵሩ› ይትርነ ኪርምትርንቅ። 27ጘጝም እንደ ገነ፦ ‹ክትን ኣውታይ ኣቕርነጘ ኣርቐቅም፤ እፈ ጭቕ ክታትርነ! እድጐ እክልጥን› ይጡ።#መዝ. 6፡8። 28ኣቭርኻምት፣ ይሳቅት፣ ያይቈቭት፣ ነቭያታንድዛትቅም እደረት ምጝግስቲል ቓልድርናንድ ክትን ግን ቢዘይል ሊቭርን እዳቕርናንድ ኣይንድ ክትን ሊዝርና ክታእርቍጣንድ ገጫዝትርንቅ።#ማቲ. 22፡13፤ 25፡30። 29ንቕፀቍ እቅ ምስራቂስ ምራቪስ ሰምየኒስም ደቩቪስም ተርጝ እደረት ምጝግስቲዝ መድል ጐይጥቍ።#ማቲ. 8፡11-12። 30ኣቓንስቅም እገጢስ በውጥ፣ በውጢስ ቈሽ እገጥ ኣቐቍ እቅ እኵ።»#ማቲ. 19፡30፤ 20፡16፤ ማር. 10፡31።
እየሱስ እየሩሳልየምት ማጥን ኻዝነጘ
(ማቲ. 23፡37-39)
31ኣይንድም ፈሪሳኒስ ላው ላውድ እየሱስ ትጐ ተርጝ፦ «ኺረውድስ ክት ቍውጡ ደምዘኵ፤ እኒስ ጕር ፊጥ» ይ። 32እየሱስም እንት ዩ፦ «እቸን ቘፅለየንስ ፊትርን፦ ‹ንጭስመ ኣምርስ ጋኒናን ፊስጭር ፅውዝጅንጥድም ቓዝጭር፤ ሸወትረ ግርየይዝም ይኻስቨውድየንት ፋፅምጭር፤ የኵ› ይርን ድቍጥን። 33ዊገድ ግን ንጭ፣ ኣምር፣ ኣምርት ግረ፣ እየሩሳልየም ፊጭር ምላሰንድም ነቭይ እየሩሳልየምትልጚ ላየ ብጣል ክርጠ ጥውሻውም።
34«እየሩሳልየም! እየሩሳልየም! ነቭያታንድዛት ቁረር ክተ! ክጐ እፃሸቅድዛትም ቕርጘዝ ድድብረር ክተ! ጂርወ ጝርጨጭንድ ጝርኪፊዝ ኣቒል ኣኽቭራንትጘ ክቝርድዛት ኣኽቭጨ ዋቐን በን ዊኑን? ክትን ግን እምቢ ይርኑ። 35ኣቓንስቅም ክታጝንድ በድመ ኣቕ እዳጡ፤ ነስየ፦ ‹ኣደረት ሽዝ ተረውድ በርክሸው የጝ› ይትርኒስቅ ይት ሊጘት ቓላይርነቅም የኵን።» #መዝ. 118፡26፤ የር. 22፡5።
अहिले सेलेक्ट गरिएको:
ሉቃስት ወንጌል 13: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
