ሉቃስት ወንጌል 15
15
ፈወነ 15
ድዝ ችጝሸው ቢገይዝ ተከድ
(ማቲ. 18፡12-14)
1ላው ግርየ ቀረጥ ቀቨቍዝመ ኽጥያትኝጥዝ እየሱስ ክንሳንድ ወሽጥጘ ጝጐ ኣኽቭሽጝ ተርጝ ዊን። 2ወሪትት ኽግ ክንሰጢዝመ ፈሪሳኒዝም፦ «እን እጅርድ ኽጥያትኝጥድዛት ለምረኵ፤ ጛጅቅም ዀኵ» ይጛ ኣጕርምርምጥጘ ኪርም።
3ጘጝም እኒን ተከድ ዊግቱ፦ 4«ክታማኽሊስ ላ ቢቅ ፃየው እጅር ጛጊስ ላው ቢገ ድዛን ፃይጭርጝን ፃይጨድ ድሪል ማል እድየን ድዘው ቢገድየንት ችጝጢስቅ ደምዝጠ ፊረው ኣየውመ? 5ችጛንድም ጭቕጘ ዲስ የው ጝጅውሪዝ መውር ነሰኵ። 6ጝጝን ችጘጘም ጝወደጃኒዝመ ጝግፂዝ ላው ፃቭ ጭጝ፦ ‹ድዘው ይቢገድ ችጛንስቅ ዲስ የርኩን፤ ክትንም ዲስ ይጥን› የኵ። 7እኒዝጘም ንስኻ ጥወነው በንዛቍ ፃይጭርጝን ፃይጨ ፃድቃኒስ ሽ፣ ንስኻ ጥወው ላው ኽጥያትኘዝቍዝ ሲመይስ ዲስተ ኣቐኵ የኵን።»
ድዝ ችጝሸው ሳንቲሚዝ ተከድ
8እንደ ገነም እንት ዩ፦ «ቍርሸዝቍ ፅቃ ሳንቲማን ፃይረይ እውነ ፅቃይስ ላይ ሳንቲም ድዝራን መቭራት ኣቭርኽዝር ጝርጝንድ ጂዝር ችጝቲስቅ ቐናዝር ደምዝረይ ኣይረይመ? 9ችጝራንድም ጝርወደጃኒዝመ ጝርግፂዝ ላው ፃቭር ጭጝር፦ ‹ድዝረይ ይሳንቲምሸየንት ችጛንስቅ ዲስ የርኩን፤ ክትንም ዲስ ይጥን› የች። 10እኒዝጘም ንስኻ ጥወው ላው ኽጥያትኘዝቍዝ እደረት መላካንድ ዲስ ይጘኵ።»
ድዝ ችጝሸው ዅሪዝ ተከድ
11እንዝ ግረ ቈሽ እንት ዩ፦ «ሊጘ ዅል ፃየው ላው እጅር ዊኑ። 12ጛጊስ እጥንድየን ጚርት፦ ‹ኣየ! ክኻፍቲስ ይችጘው ይፊንተድየንት ኣድልድር ነቅ› ዩ፤ ኣይርድም ጝኻፍትድ ጝቝርስ ኣድል ይዉ።#ሉቃ. 5፡19-30። 13እንዝ ግረ እድ እጥን እፈረድ ዊቱ ሳብጥ የጘ ኣድልሽ ችጘው ጊንዝቭድቅ ጥቅል ፃይ እለ እክል ኻግር ፊሩ፤ ጝጊስም ጝጊንዝቭድቅ ጊነዝ ማግጣ ቢክንዙ። 14እጝቅትቅ ቢትን ኣብዘት እግረ እድ ኻግሪል ኽየው ኰር ጥዉ፤ ጘጝም ጭቕጘ ቺግርሹ። 15ኣቓንስቅም ጘጝ ኻግሪዝቊስ ላው እጅርል ፊር ኣልቱ፤ እድ እጅርድም ለምር ኣሰመ ምቓ ፃቩ። 16እፈረድም ጭቕጘ ግድርዳንስቅ ኣሰምጥድ ዅጘው ኻስረይስ ዅ ጝጊዝውድ እቻዝጠ በና ዊኑ፤ ኣነጚ ጝት እኳ ይወውም ችጚየው። 17እግረ ግን እዘን ቅም እንት ያ ኻስቭጠ ኪርሙ፦ ‹ይርት ጝኒል ዋቐ ኣርጭጥድቅ ጛይ ሚ እቭትጝ ቲርፍዘቍድፈ! ያን ግን እንል ግድርዝ ክጨ ጕኩን። 18ነስየስ ጕ ይርትል ፊጥ እንት ይጨ፦ ኣየወ! እደረትም ክትም ቢድልኩን። 19ነስየ ክዅር ይሽጨ ጥውጨቅም፤ ዊገድ ግን ክኣርጪስ ላዊዝጘ ፃቭር ቓል ይጨ› ዩ።
20እንዝ ግረ ጕ ጚርትል ፊሩ፤ ጚርም ጝዅር ተራንድ ገነ እለይስ ከስ ቓላንድ ገነይስጝቀ ኣርኽርኹ፤ ጝጐም ውጥያ ፊር ጝዅርት ቕልመድ ጣጥም ፃይ እምቑ። 21እፈረድም፦ ‹ኣየወ! እደረትም ክትም ቢድልኩን፤ ነስየ ክዅር ይሽጨ ጥውጨቅም› ዩ። 22ኣይርድ ግን ጝኣገልጋያንዛት ጭጝ፦ ‹ቃዚጥን ሸገ ኣልቨድ ነስርን ሲስጥን፤ ጝናኒል ቃጠ፣ ጝልኵጣኒልም ፃብጣን ዱጥን! 23ሰወው ሲዘድ ነስርን ዝውጥን፤ ዅናም ዲስ ይነ። 24እን ይዅርድ ክር ዊኑ፤ ነን ግን ቓድኩ፤ ድዝ ዊኑ፤ ነን ግን ችጝሽኩ› ዩ። ጛይም ዲስ ይጥጘ ኪርም።
25ኣይንድ ጝሽ ኽየው እፈረድ ቺዝጝል ውላቕ ግሪ ዊኑ፤ ጝጝኒል ዋጥራንድም መሰጝቈዝመ ጅመዝዙ ድመዝ ወሹ። 26ኣርጪስም ላውድየንት ጭጝ፦ ‹እን ወጨው ጅመድ ወረጘዙ የጝ?› የው ዋቕሩ። 27ኣርሸድም፦ ‹ክዝን ተርኩ፤ ኪርም ጝት ዲግተዝመ ዳኽነዝ ችጛንስቅ ሰወው ሲዘ ዝውኩ› የው ድቁ። 28ኣይንድ እድ ኽየው እፈረድ ኻልክሽ ጝኒል ጥወቅ ዩ፤ ኣይርድም ፍ ጡጠ ማጥን ጨዉ። 29እፈረድ ግን ጚርት እንት የው ዊግቱ፦ ‹ያን እንቝጠ ዚምን በረይዝጘ ኣቕ ክጭስ ቅምጭኩን፤ ክት ኣዝረዊስቅ እግርገ የርም ኣርቐቅ፤ ክት ግን ይፃምጥጅቅ ዲስ ይጨ ማጥን ላው ወጠጢ እኳ ነይርም ኣርቓር። 30እኒን ክዅርድ ኣቓንድ ክጊንዝቭድቅ ጝገልምጥ ጅቅ ዅ ኣብዝ ተራንድ ሰወው ሲዘድ ማልዱ› ዩ። 31ኣይርድም፦ ‹ይዅር ቈደይ! ክት ኣራንድ ዊትርቅ ይጅቅ የጝ ፅብረውድ፤ ይውድቅ ኩ የጝ። 32እኒን ክዝንድ ግን ክር ዊኑ፤ ነን ግን ቓድኩ፤ ድዝ ዊኑ ነን ግን ችጝሽኩ፤ ኣቓንስቅም ጭቕጘ ዲስ ይነ ጥውሸኵ› ዩ።»
अहिले सेलेक्ट गरिएको:
ሉቃስት ወንጌል 15: ኽምጣኣኪ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
