Mark 13

Sa Mipanggob Si Madadailan Ni Templo

(Mat. 24:1-2; Luk. 21:5-6)

1Lummawa ḵad aḵ Jesus atte paway ni templo, ḵanan ni osa'tta disipuluna, “Mistulu, ilam ḵad da andi ye ambabaḻu we batu we nangwada'tte templo ya da boḻoy.”

2Ḵanan Jesus, “Ilanyu sinsadi da annae danaḵḵoḻe boḻoy. Yaḵon sa umali ye aḻgaw, maamin miwaḵas da sana ya naippun mabun-an taḵon ay ossaane batu.”

Sa Ampaḵaḻaman Atte Umali Ye Aḻgaw

(Mat. 24:3-14; Luk. 21:7-19)

3Pun nanagadada'tte Beleg Olives woḵ tummuḵdu'ḵ Jesus we nansinagung si paway ni templo. Unipun ummadani ḵan siya da Peter, James, John ya aḵ Andrew woḵ ḵananda, 4“Apu, ḵamaan ni maḵwaan ni imbagam ḵan diḵani ḵan ngai sinyale angigammuwanni ye madam-an mituttuwaanda?”

5Ḵanan Jesus, “Ummanyu ta adi ḵayu maallelaw. 6Te sa umali ye aḻgaw, adu da tagu we umali ya usaronda ngadanḵu ya ang-angwadae dida Kristu, gapu si ḵanandae ‘Saḵon Kristu,’#13:6 Kristu - sa piona ugudon siya pinilin Apudyus aḵ Anagu ya An-ari. ḵad adu da tagu we allelawonda. 7Ḵad nu dongngonyu we awad gubat atta adani ḵan adayu we ili, adi ḵayu umogyat te ḵasapuḻane maḵwa da sana. Yaḵon daampun yan anungus ni lubung. 8Te anggugubat yan da adu we ili ya da adu we gubilnu. Ḵad awad os da lunig ḵan inggi atta adu we ili. Yaḵon da sana, isun ni misaḻdan da losane ampaḵaḻamane isuna bubai ye anggumut.

9“Ummanyu te doḵmaanda ḵan idaḻum diḵayu'tta ḵuḵunsisaḻ#13:9 Sa de Greek, da ḵuḵunsisaḻ ngannonda Sanhedrin. Sana isun ni korti ye andaḵdaḵngan da papangat da papadi, da papangat da Judyu ya da mimistulun ni lintog ta dida anḵuwis. ya aplitonda diḵayu'd daḻom atta sinagoga. Gapu'tte pammatiyu ḵan saḵon, midaḻum ḵayu bos atta gobernor ya da ari ḵad maittan ḵayu'ḵ gundawaye angiwaḻagawag atte Ambaḻu we Damag ḵan dida. 10Ḵasapuḻane umuna yan mibaga Ambaḻu we Damag atta losane ili'tte luta asiyot anungus ni lubung. 11Ḵad nu sumaḻyaonda diḵayu, adi ḵayu ambinsaw atta isongbatyu yaḵon ibagayu da ngaimane mipaigammu ḵan diḵayu si sadi ye timpu. Te daḵampun ḵan diḵayu maḻpuwan ni ibagayu yaḵon sa Ispiritu Santu.

12“Awad os da udume ituyuḵ da sunudda'tta papangat ta gongatonda dida. Ḵaḵna bos atta ama, ituyuḵda bos da abengda'tta papangat ta gongatonda bos dida. Busuḻon os da abeng da amada ḵan inada ḵad pagongatda bos dida. 13Sasangngaan os diḵayu'tta losane tagu gapu ḵan saḵon. Yaḵon ngaimane angiyattom atta losane ampaḵaḻaman ya gogomgomana pammatina, matagu'ḵ inggana.”

Sa Madadailana'd Jerusalem

(Mat. 24:15-28; Luk. 21:20-24)

14Pun pinagatupan Jesus woḵ ḵanana, “Nu ilanyu ḵaog-ogyate dumadaile sisiḵad si lugar we ippun oḵyan ḵaḻabbonganae inggaw,#13:14 Daniel 9:27; 11:31; 12:11. maawatan oḵyan da ambasa. Pun da inggaw atte probinsiya'd Judea, umawidda oḵyan atta bebbeleg. 15Sa tagu we awad si otop ni boḻoyna, umawid oḵyane dagus ta mataguwana ya adi mataḵtaḵe lumogsade umoy angaḻa'tta ḵuḵuwana. 16Sa awad atte pappayaw, ḵasapuḻane adi oḵyan mataḵtaḵe mipauli si boboḻoye umoy angaḻa'tta silupna. 17Sa sadi ye aḻgaw, ḵaddagu da mabugi ya da antagibi. 18Iluwaḻuyu ta sa ampaḵaḻaman adi oḵyan miyaspuḻ si ageled. 19Te sa sadi ye timpu umamdan ampaḵaḻaman, naippun paat miyisuwana inggan ni naḵwaan ni lubung inggana sinsana, ḵad naippun os miyisuwana'tte umali ye aḻgaw. 20Ḵad nu adin Apu pinaabobba da aḻgaw, naippun tagu'ḵ matagu. Yaḵon gapu'tte ḵadaguna'tta pinilinae taguna, pinaabobbana sadi ye aḻgaw.”

21Ḵanan os Jesus, “Sa sadi ye timpu, nu awad ḵananae, ‘Ilanyu, annaya Kristu,’ baḵon nu, ‘Andiya,’ adiyu patiyon. 22Te ampaila da umallelawe tagu ya ibagadae dida Kristu ya awad os da angibagae dida profeta. Ḵad angipailada'tta nakaskasdaaw ta amanoḵnoḵe awad ḵabooḻanda ta allelawonda da tagu, taḵon ay da pinilin Apudyus, nu maḵwa. 23Yaḵon ummanyu te inggallapuḵ binagbagaan diḵayu mipanggob atta losane banag si daanda maḵwaan.”

Sa Umaliyan Ni Abeng Di Tagu

(Mat. 24:29-31; Luk. 21:25-28)

24Pinagatupan Jesus woḵ ḵanana, “Nu magangput ampaḵaḻamanda, gumiḵbot init. Sa soḻag ḵad, adipun ogon allangḻang. 25Maottag da bituwone maḻpu'd langit ḵad miyugayug da losane awad ad langit.#13:24-25 Isaiah 13:9-13; 24:21-23; 34:4; Ezekiel 32:7-8; Joel 2:10, 31; 3:15; Amos 8:9. 26Ḵad ilanda saḵone Abeng Di Tagu we umali ye midoga'tta libuu.#13:26 Daniel 7:13-14. Ḵad ilanda bos ummamdane ḵabooḻaḵ ḵan ḵinapaddan ni ḵinaapudyusḵu. 27Ḵad ibuunḵu da anghelḵu'tta losane dugyun ni lubung ta umoyda dagupon da losane pinilin Apudyus we taguna.”

Sa Maadaḻ Atte Ḵayu We Fig

(Mat. 24:32-35; Luk. 21:29-33)

28Ḵanan os Jesus, “Annaya somsomḵonyu mipanggob atte ḵayu we fig ta an-adaḻanyu. Nu ilanyu we alloḻota da pangada ya summimitda, igammuyu we madam-an dagun. 29Ḵad nu ilanyu bose maḵwa da losane imbagaḵ, igammuyu we madam-an mipauliyaḵ. 30Ibagaḵ ḵan diḵayu ḵatuttuwaan, sissiyae matattagu da udume tagu si annae lunap atte mituttuwaan da losane imbagaḵ ḵan diḵayu. 31Amungtu losan da awad ad langit ya sina'd luta yaḵon adipun amungtu da ugudḵu.”

Sa Dumaḵngan Ni Abeng Di Tagu

(Mat. 24:36-44)

32Pinagatupan Jesus woḵ ḵanana, “Naippun angigammu'tte aḻgaw baḵon nu timpu we mituttuwaanda. Taḵon ay da anghel ad langit, ippun igammuda. Ḵad taḵon ay saḵone Abeng Apudyus ippun os igammuḵ. Te ippun udum aḵ angigammu, abus aḵ Apudyus we Ama. 33Pun ummanyu ya pasig ḵayu naḵasagana te ippun igammuyu nu ḵamaan ni maḵwaanda. 34Mipaniyaḵ atte ansagsaganae umoy si adayu we ili. Ipaayyuwanna boḻoyna'tta sammiluna, ḵad ittona biyang ni sin-ossaossa'tta ustu we ḵewaaḻda. Ḵad bilinona angguwaḻda ta adi masuyop. 35Pun ansagana ḵayu te ippun igammuyu nu ḵamaan ni mipauliyaḵe simboḻoy, ḵugḵugab, gawallabi, madam-an taḻun, baḵon nu wiḵwiḵis. 36Ḵad nu madanatongaḵ, adiḵ oḵyan odasan diḵayu we masusuyop. 37Da sanae imbilinḵu ḵan diḵayu, ibilinḵu bos atta losane tagu ta ansagana ḵayu losan.”

अहिले सेलेक्ट गरिएको:

Mark 13: kml

हाइलाइट

शेयर गर्नुहोस्

कपी गर्नुहोस्