Mark 14

Sa Inondae Angongat Ḵan Jesus

(Mat. 26:1-5; Luk. 22:1-2; Jhn. 11:45-53)

1Duwan aḻgaw ya asiyot Gayagayan da Judyu we ngannonda Nallausan#14:1 Sa annae Gayagayan ni Nallausan we gangganason da Judyu, iḵagasmoḵda nangiligsiyan Apudyus atta danaḵḵoḻdae nammusassu'd Egypt atte timpun Moses. Nanggaḵay ḵad anghel we nangongat atta losane panguḻu we abenge laḻaḵi'd Egypt, nilausana da boḻoy da Judyu we naḵuan da lewanganda si daḻan ni ubbu we karnero Exodus12. Tinawone gangganasonda ḵad waḻun aḻgawe gangganasonda. Pun da Judyu, adu we ili naḻpuwanda ya nandadatongda'd Jerusalem we umoy maḵagayagaya si annae ngannonda Nallausan. ya sa Gayagayae ngannonda Tinapaye Naippun Yeastna. Da papangat da papadi ya da mimistulun ni lintog, singsingngitda inondae anoḵma ḵan Jesus we adipun maigammu ta gongatonda. 2Ḵananda, “Adi taḵu iyaspuḻ si gayagaya ta adi magulu da tagu.”

Sa Nangisigan Ni Bubai Atte Bangbanglu We Nard

(Mat. 26:6-13; Jhn. 12:1-8)

3Sa inninggawan da Jesus ad Bethany, naḵaḵanda'ḵ ḵuwanda Simon we naleprosy si awe. Nanḵaḵaḵanda ḵad, dummatong bubai ye innawitna napan-ige nard we ampatoge bangbanglu we naigga si ban-oge angange alabaster. Bintaḵna suḵop ni angang woḵ inisigna si uḻun Jesus.

4Da udum ḵad, summangada woḵ ḵananda'tte sin-ossaossa ḵan dida, “Ngaipana tangtanggaon? 5Ingnginana oḵyan aḵ naḵapatgasutane palata ta maatod atta ḵapus.” Pun sinangsang-anda bubai.

6Yaḵon ḵanan Jesus, “Sinnamaḻna! Ngaipayu dellawon ḵingwan ni sanate bubai? Sa ḵingwana ḵan saḵon ambaḻubaḻu. 7Te patilayune anna da ḵapus ḵan diḵayu, ḵad taḵon ay ngai ye aḻgaw lamogyu badangan dida. Yaḵon saḵon ḵad, adiyaḵpun patilayun anna ḵan diḵayu. 8Ḵingwana ḵaḻabbongana. Inisigna bangbanglu si long-agḵu ta misagana'tte milibonaḵ. 9Ibagaḵ ḵan diḵayu ḵatuttuwaan, dinumane miwaḻagawagan ni Ambaḻu we Damag atte losane lubung, maug-uggud ḵingwan ni annae bubai ta angiḵagasmoḵanda ḵan siya.”

Sa Naḵatuḻagan Judas We Angituyuḵ Ḵan Jesus

(Mat. 26:14-16; Luk. 22:3-6)

10Aḵ Judas Iscariot osa'tta nasawaḻan aḵ duwae disipulun Jesus, ummoy atta papangat da papadi ta antutuḻaganda inonae angituyuḵ ḵan Jesus ḵan dida. 11Amod pagay layadda'tte dingngoḻda woḵ inkaridae angitodda'ḵ pilaḵ. Pun insaḻad Judas we ang-angngit si gundawaynae angituyuḵ ḵan siya.

Sa Angisaganaanda Si Anungus Ni Maḵaḵananda Ḵan Jesus

(Mat. 26:17-25; Luk. 22:7-13, 21-23; Jhn. 13:21-30)

12Sa umunae aḻgaw dummatong Gayagayan da Judyu we ngannonda Tinapaye Naippun Yeastna, ḵad sadi nangisidaanda si ubbun ni karnero para'tte Gayagayae ngannonda Nallausan. Pun ummoy da disipuluna ḵan siya woḵ ḵananda, “Dinu piome inḵani angisaganaan atte ḵanon taḵu si Gayagayae ngannon taḵu Nallausan?”

13Pun imbuun Jesus da duwa'tta disipuluna woḵ ḵanana ḵan dida, “Inḵayu'tte siyudad ḵad nu dumatong ḵayu, abotonyu laḻaḵi ye umoy anaḵdu. 14Ḵad mitun-ud ḵayu ḵan siya'tte boḻoye ayana ḵad ḵananyu'tte simboḻoy, ‘Paimus ni mistulu taḵu ḵan siḵa nu dinu kuwartu we anḵaḵananda'tta disipuluna atte timpun ni Gayagayae ngannon taḵu Nallausan?’ 15Ipuyutna ḵan diḵayu daḵoḻe kuwartu'tte ngatu we misaganaan da ḵasapuḻan taḵu. Isaganayu da ḵanon taḵu sidi.”

16Pune sadi, ummoy da duwa'tta disipuluna'tte siyudad. Pun tuttuwa da losane imbagan Jesus ḵan dida. Pun insaganada da ḵanonda si Gayagayae ngannonda Nallausan.

17Lummabi ḵad, ummoy da Jesus ya da disipuluna'tte sadi ye boḻoy. 18Sa anḵaḵaḵananda ḵanan Jesus, “Ibagaḵ ḵan diḵayu ḵatuttuwaan, awad de osa ḵan diḵayu we maḵaḵane angituyuḵ ḵan saḵon.”

19Bummaduuḻ da disipulu woḵ nasin-ossadae nangibaga ḵan siya ḵanane, “Daḵampun ḵan saḵon.”

20Ḵanana, “Osa ḵan diḵayu we nasawaḻan aḵ duwa, sa maḵasawsaw ḵan saḵon atte tinapay si annae maḻuḵung. 21Te saḵone Abeng Di Tagu, ḵasapuḻane matoyaḵ te siya impaigilin Apudyus atte awe. Yaḵon ḵaddagu tagu we angituyuḵ ḵan saḵon. Unoyna adi niyanaḵ.”

Sa Anungus Ni Naḵaḵanan Jesus Atta Disipuluna

(Mat. 26:26-30; Luk. 22:14-20; 1Co. 11:23-25)

22Anḵaḵaḵanda ḵad, innaḻan Jesus tinapay woḵ nanggappiya ḵan Apudyus. Binisbisaḵna woḵ innatodna ḵan dida woḵ ḵanana, “Aḻanyu. Annaya long-agḵu.”

23Pun innaḻana bos sintasae bayase grape woḵ nanggappiya ḵan Apudyus. Naabus ḵad, innatodna ḵan dida woḵ losanda ininum. 24Ḵanan Jesus, “Sana daḻaḵe amanoḵnoḵ atte Baru we Tuḻag Apudyus atta tagu. Nu matoyaḵ, pumoy-as daḻaḵ ta mapakawan da adu we tagu. 25Ibagaḵ ḵan diḵayu ḵatuttuwaan, adiyaḵpun ḵasin uminum atte bayase grape inggana si aḻgawe maḵainumaḵ ḵan diḵayu'tte ḵaḵḵopyae bayase grape atte ampangatan Apudyus.”

26Naabus ḵad, ḵinantada ḵantae pammadayaw ḵan Apudyus asidaot umoyon atte Beleg Olives.

Sa Nangibag-an Jesus Si Amuḵlitan Peter Ḵan Siya

(Mat. 26:31-35; Luk. 22:31-34; Jhn. 13:36-38)

27Anadtaddaḻanda ḵad, ḵanan Jesus atta disipuluna, “Losan ḵayu umawid ya ummabusaḵ. Te ḵanan ni nigili ye Ugud Apudyus, ‘Gongatoḵ anangḵon atta karnero ḵad masinasinada.’#14:27 Zechariah 13:7. 28Yaḵon umuliyaḵ ḵad, umunaaḵ umoy atte probinsiya'd Galilee nu diḵayu.”

29Ḵanan Peter, “Taḵon ay nu tenan da buḻunḵu siḵa, adiḵpun paat siḵa tenan.”

30Ḵanan Jesus, “Ibagaḵ ḵan siḵa ḵatuttuwaan, daampun ḵawitan anullaḵuḵ aḵ madam-an taḻun, amiḵluwom saḵon puḵlitan.”

31Pun ḵanan Peter we nangipatut, “Taḵon ay nu ḵasapuḻane maḵaḵatoyaḵ ḵan siḵa, adiḵpun paat puḵlitan siḵa.” Pun ḵaḵna bos imbagan da udume disipulu.

Sa Nalluwaḻuwan Jesus Ad Gethsemane

(Mat. 26:36-46; Luk. 22:39-46)

32Dummatong ḵad da Jesus ya da disipuluna'tte igawe ngannonda Gethsemane, ḵanana, “Tumuḵdu ḵayu yan sina ta iyyaḵ alluwaḻu.” 33Pun inayagana da Peter, James ya aḵ John woḵ naḵaoyda. Inggan ni sadi, amod de binimbinsawna ya nasaliduduwan somsomoḵna. 34Pun ḵanana ḵan dida, “Amod de sigab ni somsomoḵḵu we isun di siya iḵatoyḵu. Inggaw ḵayu'tte anna ta pasig ḵayu ansasaggana.”

35Bummattawa'ḵ aḵit woḵ nalluḵbube nalluwaḻu, nu maḵwa adi oḵyan mapagatupan ampaḵaḻamane maḵwa ḵan siya. 36Ḵanana, “Ama, lamognu ḵoon da ngaiman, nu maḵwa oḵyan, iligsim saḵon si annae ampaḵapaḵaḻamaḵ. Yaḵon daḵampun si pinioḵ maḵwa yaḵon sa piniom.”

37Nipauli ḵad atte nanenana'tta tuḻu we disipuluna, indasana didae masusuyop. Pun ḵanana ḵan Peter, “Simon, masusuyopḵa ḵamman? Ngaipayu adi maattomane adi masuyop aḵ sin-orasan? 38Adi ḵayu masusuyop yaḵon alluwaḻu ḵayu ta adi ḵayu masulisug. Te ampigsa somsomoḵyu yaḵon anḵuya da long-agyu.”

39Ummoy ḵasin nalluwaḻu'ḵ Jesus we isun ni luwaḻuna'tte damu. 40Nipauli ḵad atta disipuluna, anna bose nasuyopda te adidapun maḵaanuse mapuyatan. Pun ippun igammuda si isongbatda ḵan siya. 41Pun ummoy ḵasin nalluwaḻu. Piḵluna ḵade nipauli, ḵanana'tta disipuluna, “Na! Ngaipa ḵayu gay sissiyae masusuyop ḵan umiillong? Sadin! Dummatong timpu we inḵoddong Apudyus we saḵone Abeng Di Tagu, mipuḻangaḵ atta ḵabasbassuḻan. 42Lumibbat ḵayu ta intaḵun. Ilanyu, annate umali angituyuḵ ḵan saḵon.”

Sa Nanoḵmaanda Ḵan Jesus

(Mat. 26:47-56; Luk. 22:47-53; Jhn. 18:3-12)

43Sissiya ḵade an-uguugud aḵ Jesus, nadanatong aḵ Judas we osa'tta nasawaḻan aḵ duwae disipuluna. Adu da nibuḻun ḵan siyae nampaḵ-odon aḵ ispada ḵan pang-oḵ. Da papangat da papadi, da mimistulun ni lintog ya da pallakayon da Judyu nangibuun ḵan dida. 44Inggaw sinyale intuḻag Judas ḵan dida ta imatunanda'ḵ Jesus. Ḵanana, “Sa iyyaḵ ogoḵan, sanat doḵmaanyu ta itallayyu ya guwaḻdaanyu.”

45Dummatongda ḵad, daguse ummoy ḵan Jesus woḵ ḵanana, “Mistulu, kumustaḵa?” Pun inogoḵana. 46Naabus ḵad, dinoḵmaanda'ḵ Jesus. 47Yaḵon inuḵput ni osa'tta ataḵtaḵdog sidi ispadana woḵ binaḵagna ingan ni musassun ni ḵangatuwane padi woḵ naḵaan.

48Ḵanan Jesus ḵan dida, “Tulisanaḵ ḵamman ta ummali ḵayu we ampaḵ-odon aḵ ispada ḵan pang-oḵe umoy anoḵma ḵan saḵon? 49Inaḻgawe annaaḵ ḵan diḵayu'tte paway ni templo we antuttudu yaḵon adiyupun saḵon dinoḵmaan. Yaḵon naḵwa da losan ta mituttuwa nigili'tte Ugud Apudyus.” 50Imbagan ḵad ay Jesus, ummawid da disipuluna woḵ natenan.

51Inninggaw babaḻu we nitun-ud ḵan Jesus we nanḵagoy atte itaḵe sinnun. Dinoḵmaan da suḻdadu, 52yaḵon iwaḻsina ḵagoyna woḵ ummawide amboboddang.

Sa Nanumaḻyaanda Ḵan Jesus

(Mat. 26:57-68; Luk. 22:54-55, 63-71; Jhn. 18:13-14, 19-24)

53Pun intallayda'ḵ Jesus woḵ inniyoyda'tte boḻoy ni ḵangatuwane padi ye nandaḵdaḵngan da papangat da papadi, da pallakayon da Judyu ya da mimistulun ni lintog. 54Naktay aḵ Peter inggana'ḵ dummatong si paway ni boḻoy ni ḵangatuwane padi. Pun naḵatuḵdu'tta guwaḻda woḵ naḵaanidu.

55Da papangat ḵad da papadi ya da losane ḵuḵunsisaḻ, singsingngitda inondae angidaḻum ḵan Jesus ta awad anggadingandae angongat ḵan siya. Yaḵon ippun indasanda 56te taḵon ay nu adu da nangitaḵdoḻe nantultulli'tte mipanggob ḵan siya, adipun nan-uunud imbagada.

57Inninggaw da udume summiḵad ta taḵdoḻanda woḵ ḵanandae nantultulli, 58“Dingngoḻni inugudnae dadailona annae templo we ḵingwan da tagu ya taḵadona si unog di tuḻun aḻgaw osae templo we daḵampun aḵ tagu anaḵad.” 59Taḵon ay nu ḵatti, adipun os nan-uunud taḵdoḻda.

60Pun tummaḵdog ḵangatuwane padi'tte sinagungda woḵ ḵanana ḵan Jesus, “Ngai isongbatnu'tta sanae ipabasuḻda ḵan siḵa?” 61Yaḵon gummiginnoḵ. Ḵanan os ni ḵangatuwane padi, “Siḵa ḵad ain Kristu we Abeng ni madaydayawe Apudyus?”

62Ḵanan Jesus, “On, saḵon. Sa umali ye aḻgaw, ilanyu saḵone Abeng Di Tagu we tutuḵdu'tte madawinan Apudyus we maḵabooḻ. Ḵad asiyu bos ilan umaliyaḵe mibuḻun atta libuu'd langit.”#14:62 Psalm 110:1; Daniel 7:13.

63Dingngoḻ ḵad ni ḵangatuwane padi insongbatna, pinissayna silupna'tte sangana woḵ ḵanana, “Ngaipa taḵu ḵasapuḻan da udum aḵ anaḵdoḻ? 64Anna paye dingngoḻ taḵu inugudnae iyisuna long-agna ḵan Apudyus! Ngai ḵasomsomḵanyu?” Pun losanda ḵinoddongane ḵaḻabbonganae matoy.

65Nagangput ḵad, insaḻad da udume nanuptuppa ḵan siya woḵ binungutda atana woḵ ḵabiḵbiḵunganda. Ḵananda, “Nu lamognu pugtuwan, ibagam ḵan diḵani nu ngai da namiḵung ḵan siḵa?” Da nangguwaḻda ḵad os, nilipalipaḵda.

Sa Namuḵlitan Peter Ḵan Jesus

(Mat. 26:69-75; Luk. 22:56-62; Jhn. 18:15-18, 25-27)

66Aḵ Peter ḵad, sissiya'tte paway woḵ lummaus babaḻasange sammilun ni ḵangatuwane padi. 67Innilana ḵad aḵ Peter we nan-aannidu, ḵanana, “Siḵa osa'tta buḻun Jesus we iNazareth.”

68Yaḵon pinuḵlitana woḵ ḵanana, “Ippun igammuḵ si sanate ibagam! Adiḵpun os maawatan!” Pun ummoy atte igid ni paway si lewangan woḵ nanullaḵuḵ ḵawitan.

69Sa babaḻasang ḵade sammilu, innilana ḵasin aḵ Peter woḵ ḵanana'tta ataḵtaḵdog, “Sa andi ye tagu, siya osa ḵan dida.” 70Pinuḵlitan pagay os Peter ḵasin.

Napanos ḵad, ḵanan da ataḵtaḵdog, “Tuttuwae siḵa osa ḵan dida te naḻpuḵa'tte probinsiya'd Galilee.”

71Yaḵon amo ḵanan Peter, “Dusaonaḵ ḵan Apudyus nu antultulliyaḵ! Isapataḵe ippun igammuḵ si sanae tagu we ibagbagayu.”

72Daguse impigwan ni ḵawitane nanullaḵuḵ woḵ inḵagasmoḵ Peter imbagan Jesus we ḵanana, “Daampun ḵawitan anullaḵuḵ aḵ madam-an taḻun, amiḵluwom saḵon puḵlitan.” Pun adipun maḵaḵasḵasmoḵ woḵ umibiibil.

अहिले सेलेक्ट गरिएको:

Mark 14: kml

हाइलाइट

शेयर गर्नुहोस्

कपी गर्नुहोस्