Mark 15

Sa Nipuḻangan Jesus Ḵan Pilate

(Mat. 27:1-2, 11-14; Luk. 23:1-5; Jhn. 18:28-38)

1Wiḵwiḵis ḵad, nandatdatong da papangat da papadi, da pallakayon da Judyu, da mimistulun ni lintog ya da losane ḵuḵunsisaḻ woḵ nantutuḻagda nu ngai ḵoonda ḵan Jesus. Nagangputda ḵad nantutuḻag, binaḻudda. Pun intallayda woḵ impuḻangda ḵan Gobernor Pilate.

2Ḵanan Pilate, “Siḵa ḵamman Arin da Judyu?”

Ḵanan Jesus, “Siya imbagam.”

3Da papangat ḵad da papadi, adu da impabasuḻda ḵan Jesus. 4Ḵanan Pilate, “Didingngoḻnu ḵamman da adu we impabasuḻda ḵan siḵa? Naippun ḵamman isongbatnu?” 5Yaḵon adipun ogon summongbat aḵ Jesus, pun amo nataag aḵ Pilate.

Sa Naḵoddongan Jesus Aḵ Matoy

(Mat. 27:15-26; Luk. 23:13-25; Jhn. 18:39-40; 19:4-16)

6Sa ugalin Pilate atte Gayagayae ngannonda Nallausan, puḵayana osa'tta baḻude ḵodawon da adu we tagu. 7Sa sadi ye timpu, inggaw osa'tta baḻude ginnumngat si naḵagubatanda si gubilnu. Barabbas ngadanna. 8Pun nandatdatong da amode tagu si inggawan Pilate woḵ ḵindawdae puḵayana osa'tta baḻud te siya ugalina. 9Ḵanan Pilate, “Pionyu we puḵayaḵ Arin da Judyu?” 10Inimusna anna te inigammunae impuḻang da papangat da papadi'ḵ Jesus ḵan siya gapu'tte aposda.

11Yaḵon da papangat da papadi, sinoḻgagda da amode tagu ta ḵodawondae mapuḵayan aḵ Barabbas daḵampun ḵan Jesus. 12Ḵanan os Pilate ḵan dida, “Nu ḵaḵnat, ngai ḵooḵ ḵan Jesus we ngannonyu Arin da Judyu?”

13Ḵanandae nanugtug-uy, “Paipattoḻnu atte kros!”

14Pun ḵanan Pilate, “Ngaipa? Ngai ḵad ain ḵingwana?”

Yaḵon amo ḵanandae nanugtug-uy, “Paipattoḻnu atte kros!”

15Pun pinuḵayan Pilate aḵ Barabbas te pionae mat-op da amode tagu. Pun impaap-aplitna'ḵ Jesus, nagangput pun impuḻangna'tta suḻdadu ta ipattoḻda'tte kros.

Sa Nangang-angyagan Da Suḻdadu Ḵan Jesus

(Mat. 27:27-31; Jhn. 19:2-3)

16Illonoḵ da suḻdadu'ḵ Jesus atte boḻoy ni gobernor woḵ dinagupda da losane asinsuḻdaduda. 17Sinilupanda'ḵ Jesus si dilaage isunan silup di ari. Pummaliḵugda bos atte naḻasiyane waḵaḻ woḵ imbaḻangatda ḵan siya. 18Nagangput ḵad, agindadayawda woḵ ḵananda, “Matataguḵae Arin da Judyu!” 19Inapliaplitda uḻuna si pauḻ ya tinuppatuppaanda ḵad nanalluḵuda ḵan siyae agindadayaw. 20Inabusda ḵad inang-angyag, ḵinaanda dilaage langgoyode insilupda woḵ iggada ḵuwana pagaye silup. Pun innaḻada ta umoyda ipattoḻ atte kros.

Sa Nipattoḻan Jesus Atte Kros

(Mat. 27:32-44; Luk. 23:26-43; Jhn. 19:17-27)

21Sa inggawanda si daḻan, inabotda'ḵ Simon we iCyrene, sa aman da Alexander ḵan Rufus we naḻpu'tta ili ye umoy si siyudad. Impatutdae buḵudona de kros Jesus. 22Pun intallayda'ḵ Jesus ad Golgotha we sa piona ḵanan “Lugar ni Battuḵag.” 23Dummatongda ḵad sidi, ittanda oḵyan aḵ Jesus atte bayase ḵinamsanda'tte myrrh we ampalin-awa'tte ansigab yaḵon ummadina. 24Pun impattoḻda'tte kros woḵ nambisbisaḵanda silupna woḵ nambubbunutda nu ngai ḵan dida angaḻa.

25Suminaḻ nangilansaanda ḵan Jesus. 26Inninggaw nigili ye sa nipabasuḻ ḵan siyae ḵanana, “Arin da Judyu.” 27Inninggaw os da duwae tulisane impattoḻda dida'tta krosda, sa osa'tte madawinanna ya sa osa'tte madawigina. 28Sadi nituttuwaan ni Ugud Apudyus we ḵanana, “Niyiyap atta ḵabasbassuḻan.”#15:28 Isaiah 53:12.

29Ḵad da tagu we lummaus, ḵanandae siwwiwiggiwige nangang-angyag ḵan Jesus, “Atoḵapay! Siḵa nangibagae dadailom templo ya taḵadom si tuḻun aḻgaw, 30taguwom long-agnu ya dumoḻaḵa si sanate kros!”

31Pun da papangat da papadi ya da mimistulun ni lintog, ḵananda'tta sin-ossaossae nangang-angyag ḵan siya, “Tinaguna da udume tagu yaḵon adinapun lamog taguwon long-agna. 32Dumoḻa ud oḵyan sinsadi'tte kros sanate Kristu we Arin da ganaḵ Israel ta ilan taḵu ḵad, amati taḵu.” Taḵon ay da tulisane nipattoḻ si daḻnig Jesus, isuna bose inang-angyagda'ḵ Jesus.

Sa Natoyan Jesus

(Mat. 27:45-56; Luk. 23:44-49; Jhn. 19:28-30)

33Anna ḵade mumamatuḵ, gummiḵbot losane ili inggana'ḵ ummag-agaw. 34Pun ummag-agaw ḵad, nampoḵaw aḵ Jesus woḵ ḵanana, “Eloi, Eloi, lema sabachthani?” Sa piona ḵanan, “Apudyusḵu, Apudyusḵu, ngaipam saḵon an-awidan?”#15:34 Psalm 22:1.

35Dingngoḻ ḵad da udume ataḵtaḵdog sidi, ḵananda, “Dongngonyu ḵad! Poḵawana'ḵ Profeta Elijah!” 36Nanoddaḵ osa ḵan didae ummoy nangaḻa'tte isun di ḵapose napnu si ḵilom woḵ impaḵawna'tte pagpag ni pauḻ woḵ indawdawna si sungad Jesus ta susupona. Ḵanana, “Uwayon taḵu ta ilan taḵu nu umali'ḵ Profeta Elijah we angopas ḵan siya'tte kros.”

37Pun napapḵaaw aḵ Jesus woḵ naḵaan angosna. 38Baag-en nanḵagwa napissay kortinan ni templo, nisaḻad ad ngatu inggana'd doḻa.#15:38 Sa sanae kortina awad atte Ḵasantuwane partin ni templo. Abus ḵangatuwane padi'ḵ maḵwae lumnoḵ te mibelange sana igaw Apudyus. Nanḵagwa napissay kortina ta angipailae maḵwae umadani da losane tagun Apudyus gapu ta natoy aḵ Jesus para'tta losane basuḻ taḵu. 39Sa ḵapitan da suḻdadu we nangitotollong si nanḵaḵatoy Jesus ḵanana, “Sa annate tagu tuttuwae Abeng Apudyus.”

40Inninggaw os da bubai ye nan-oottap. Dida da Mary Magdalene ya aḵ Mary ye inan da Joses ḵan James we nginadananda'ḵ ḵaabengan ya aḵ Salome. 41Sa inggawana'tte probinsiya'd Galilee, nibuḻunda ḵan Jesus ya nanserbida ḵan siya. Inninggaw os da adu we udume bubai ye nibuḻun ḵan siya'd Jerusalem.

Sa Nilibonan Jesus

(Mat. 27:57-61; Luk. 23:50-56; Jhn. 19:38-42)

42Lummabi ḵad si ansaganaan da Judyu para'tte umillongane sa mabigat, 43inggaw aḵ Joseph we iyArimathea we intuḻodnae ummoy ḵan Pilate ta ḵodawona ladag Jesus. Aḵ Joseph, osa'tta madaydayawe pangat da Judyu we nanguuway atte dumaḵngan ni ampangatan Apudyus.

44Nataag aḵ Pilate atte dingngoḻnae natoy aḵ Jesus. Pun inayagana kapitan da suḻdadu ta imusona nu tuttuwa. 45Ḵanan pun ni kapitane tuttuwae natoy, iyyunud Pilate we aḻan Joseph ladagna. 46Pun ummoy ngummina'ḵ Joseph atte itaḵe sinnun woḵ ummoyna inopas ladag Jesus atte kros. Binadabadana'tte itaḵe sinnun woḵ illibonna si liyange ḵaḵḵopyae natiḵitiḵane batu. Nagangput ḵad, niligadna daḵoḻe batu ta maomban liyang. 47Inninggaw os da Mary Magdalene ya aḵ Mary ye inan Joses we nangila si nilibonan Jesus.

अहिले सेलेक्ट गरिएको:

Mark 15: kml

हाइलाइट

शेयर गर्नुहोस्

कपी गर्नुहोस्