Luke 19

Da Jesus Ḵan Zacchaeus

1Anna ḵade lausan da Jesus ad Jericho, 2inggaw baḵnange pangat da andadagup atta bugis, sa ngadanna ḵad Zacchaeus. 3Piona oḵyan ilan nu ngai'ḵ Jesus yaḵon naippun inona te adu da tagu ya siya ḵad os ansoḵba. 4Pun ummuna nanoddaḵ nu da Jesus woḵ ummoy ḵummaḻab atte ḵayu we sycamore ta awad inonae angila ḵan siya nu lumaus.

5Niduum ḵad aḵ Jesus atte ḵummaḻaban Zacchaeus, nantangad ḵan siya woḵ ḵanana, “Zacchaeus, agagame an-osog te ḵasapuḻane andawosaḵ si boḻoynu sinsadi.”

6Pun nan-osoge dagus aḵ Zacchaeus ya amod pagay layadnae nammangili ḵan Jesus. 7Yaḵon da losane nangila ḵanandae singngongonot, “Ngaipa umoy pamangili si boḻoy ni andi ye ḵabasbassuḻan?”

8Pun tummaḵdog aḵ Zacchaeus woḵ ḵanana ḵan Apu Jesus, “Apu, ittoḵ gogwan da ḵuḵuwaḵ atta ḵapus. Nu awad tagu'ḵ nan-igabaḵ, ipauliḵ aḵ angimpat ḵan siya ḵaadun ni inigabḵu.”

9Pun sa ḵanan Jesus atta tagu si mipanggob ḵan Zacchaeus, “Sinsadi, tinagun Apudyus da annae simbaḻyan atte madusaanda'tta basuḻda te tuttuwae ganaḵ os Abraham gapu'tte pammatina. 10Te saḵone Abeng Di Tagu, ummaliyaḵ ta iyyaḵ sington ḵan taguwon da nataḻaḵe tagu.”

Da Naittan Aḵ Pilaḵ

(Mat. 25:14-30)

11Sissiya ḵade andodongngoḻ da tagu ḵan Jesus, inug-uggudna annae pani te madam-anda'd Jerusalem ḵad ḵanandapun nu daguse misaḻad ampangatan Apudyus. 12Pun ḵanana, “Inninggaw nangatu we tagu we ummoy atte adayu we ili ta umoyna awaton nadutuḵana'ḵ an-ari ya mipauli. 13Anna ḵade madam-an ayonana, inayagana da simpuḻu'tta sammiluna woḵ linnobna dida'ḵ pilaḵe buḻawan woḵ ḵanana, ‘Paaduwonyu da sanate pilaḵ inggana'ḵ mipauliyaḵ.’

14“Yaḵon summanga da ḵailiyana ḵan siya, pun nangibuunda'ḵ udume tagu'ḵ mitun-ud ḵan siyae umoy angibaga'tte osae anutuḵ ḵan siya'ḵ an-ari ye ḵanana, ‘Adinipun paat pione siya an-arini.’ 15Yaḵon siya pagay nadutuḵan aḵ an-ari woḵ angulin.

“Dummatong ḵad, impaayagna da sammilunae nangittana'tta pilaḵ ta imusona nu piga nagalansiyada. 16Dummatong ḵad de ummuna, ḵanana, ‘Apu Ari, sa pilaḵe innatodnu ḵan saḵon, simpuḻu nagalansiyaḵ.’ 17Ḵanan ni Ari, ‘Ambaḻu ḵingwam. Ambaḻuḵae sammilu. Gapu ta mataḻgodanḵa'tte aḵite intaḻgodḵu ḵan siḵa, ampangatoḵ siḵa'tta simpuḻu we siyudad.’

18“Ummoy os ḵumagwa woḵ ḵanana, ‘Apu Ari, sa pilaḵe innatodnu ḵan saḵon, lima nagalansiyaḵ.’ 19Ḵanan os ni Ari, ‘Nu ḵaḵnat, ampangatoḵ siḵa'tta limae siyudad.’

20“Pun ummoy os ḵumaḵlu woḵ ḵanana, ‘Apu Ari, annaya innatodnu we pilaḵ. Binusdongḵu si luput woḵ inggappotḵu, 21te maḵimutaḵ ḵan siḵa te sangngaanḵa. Ḵad aḻam daḵampun aḵ nallingtam ya apitom os daḵampun aḵ immuḻam.’ 22Ḵanan ni Ari, ‘Lawwengḵae sammilu! Sa imbagam siya anguwisḵu ḵan siḵa. Iniiggammume sangngaanaḵ ya aḻaḵ daḵampun aḵ nallingtaḵ ya apitoḵ os daḵampun aḵ immuḻaḵ. 23Ngaipam adi imbangku pilaḵḵu ta nangulinaḵ ḵad, awad oḵyan intuḻ-ayna?’

24“Pun ḵanana'tta sadi ye ataḵtaḵdog, ‘Aḻanyu sanate pilaḵ ḵan siya ta ittonyu'tte nangdon si simpuḻu we pilaḵ.’

25“Ḵananda, ‘Apu, awad os simpuḻu ḵan siya!’

26“Ḵanan ni ari, ‘Annaya ibagaḵ ḵan diḵayu, ngaimane awad ḵan siya te mataḻgodan, ad-adu maatod ḵan siya. Yaḵon ngaimane adipun mataḻgodan, taḵon ay aḵite awad ḵan siya, maḵaan. 27Yaḵon nu mipanggob os atta ḵabusuḻḵu we adi maḻyad ḵan saḵon aḵ an-arida, idatongyu dida sina ta gongatonyu dida si sinagungḵu.’ ”

Sa Nanaydayawanda Ḵan Jesus Ad Jerusalem

(Mat. 21:1-11; Mrk. 11:1-11; Jhn. 12:12-19)

28Naabus ḵad da pani ye imbagan Jesus ḵan dida, ummuna nanagada'd Jerusalem. 29Madam-anda ḵad ad Bethphage ya ad Bethany si Beleg Olives, pinaunana da duwa'tta disipuluna, 30Ḵanana, “Inḵayu si umasi ye ili. Ḵad nu dumatong ḵayu, odasanyu nipungode donkey ye daampun aḵ maḵabayuwan. Ḵad uḵasanyu ya idatongyu sina. 31Nu awad angimus ḵan diḵayu we ḵanana, ‘Ngaipayu uḵasan sanat?’ Ḵananyu, ‘Ḵasapuḻan ni Apu.’ ”

32Pun ummoyda woḵ tuttuwa da losane imbagan Jesus ḵan dida. 33Anna ḵade uḵasanda taḵodna, ḵanan da sinḵuwa, “Ngaipayu uḵasan?”

34Ḵananda, “Ḵasapuḻan ni Apu.” 35Pune sadi, inniyoyda ḵan Jesus woḵ iyyap-apda da taḵḵop da silupda'tte odog ni donkey woḵ nangabayuwonda'ḵ Jesus.#19:35 Isaiah 62:11; Zechariah 9:9 Sa donkey isunan ban-oge ḵabayu, sanat ḵabayuda'tte awe. 36Pune sadi, nangabayu ḵad aḵ Jesus atte donkey ye umoy ad Jerusalem, da tagu we inninggaw sidi iyyap-apda da taḵḵop da silupda'tte ḵaḻsae ayon Jesus ta idayawda ḵan pasaaḻonda.

37Madam-anda ḵad ad Jerusalem si daḻane an-osog si Beleg Olives, amod layad da amode disipuluna woḵ insaḻaddae nangidangsoḻ atta gingadae angidaydayaw ḵan Apudyus gapu'tta losane nakaskasdaawe innilada. 38Ḵananda, “Madaydayaw oḵyan Ari ye umali ye imbuun Apudyus!#19:38 Psalm 118:26. Lin-awa'd langit. Madaydayaw aḵ Apudyus we ḵangatuwan!”

39Pun da udum atta Pharisee ye nidoga'tta adu we tagu, ḵananda ḵan Jesus, “Mistulu, paginḵom da annae disipulum.”

40Yaḵon ḵanan Jesus, “Annaya ibagaḵ ḵan diḵayu, nu guminoḵda, mipasani da annae batu andaydayaw ḵan saḵon.”

Sa Nangibilan Jesus Atta IJerusalem

41Madam-an ḵad da Jesus ad Jerusalem, innilana sanae siyudad woḵ naḵaibil gapu si daguna. 42Pun ḵanana, “Diḵayu we iJerusalem, inigammuyu ḵad oḵyan da sana malin-awaan ḵayu. Yaḵon sinsadi, adiyupun lamog imatunan te nitataḻuda. 43Sa umali ye aḻgaw, liḵubon diḵayu'tta ḵabusuḻyu ya sondonda da losane maoy ta naippun inonyu we umawid. Ḵad umadanida ḵan diḵayu si losane suli. 44Aminonda dadailon iliyu ya da losane tagu. Ḵad maamin miwalis da sana ta naippun mabun-an taḵon ay ossaane batu si igawna te adiyupun binigbig umaliyan Apudyus we anagu ḵan diḵayu.”

Sa Namaḻyawan Jesus Atta Allaḵlaḵu Atte Templo

(Mat. 21:12-17; Mrk. 11:15-19; Jhn. 2:13-22)

45Dummatong ḵad aḵ Jesus ad Jerusalem, ummoy si paway ni templo woḵ insaḻadnae nampaḻyaw atta allaḵlaḵu, 46woḵ ḵanana, “Nigili'tte Ugud Apudyus we ḵanana, ‘Sa boḻoyḵu boḻoye luluwaḻuwan da tagu.’#19:46 Isaiah 56:7. Yaḵon nambalinonyu'ḵ inggawan da tulisan.”#19:46 Jeremiah 7:11.

47Inaḻgawe nantuttudu'ḵ Jesus atte paway ni templo. Da papangat da papadi, da mimistulun ni lintog ya da udume papangat da Judyu, singsingngitda nu ngai inondae ampagongat ḵan siya. 48Yaḵon ippun inonda te da losane tagu, pipiondae anodongngoḻ atta losane ibagana.

अहिले सेलेक्ट गरिएको:

Luke 19: kml

हाइलाइट

शेयर गर्नुहोस्

कपी गर्नुहोस्