Luke 20

Sa Ḵaḻabbongan Jesus

(Mat. 21:23-27; Mrk. 11:27-33)

1Sin-aḻgawan ḵad, nantuttudu'ḵ Jesus atte paway ni templo woḵ iwwaḻagawagna Ambaḻu we Damag. Pun ummoy ḵan siya da papangat da papadi, da mimistulun ni lintog ya da pallakayon da Judyu. 2Ḵananda ḵan siya, “Ibagam ud ḵan diḵani nu ngai ḵaḻabbongame angwa'tta anna? Ngai nangitod ḵan siḵa si annae ḵaḻabbongam?”

3Pun ḵanan Jesus we summongbat ḵan dida, “Anna ud imusoḵ ḵan diḵayu. Songbatanyu saḵon, 4dinu naḻpuwan ni ḵaḻabbongan John we Ambobonyag? Aḵ Apudyus baḵon nu da tagu?”

5Pun ḵanandae nan-uugud, “Ngai isongbat taḵu? Nu ḵanan taḵu we, ‘Naḻpu ḵan Apudyus,’ ḵanana ḵan ditaḵu we, ‘Ngaipayu adi pinati nu?’ 6Yaḵon nu ḵanan taḵu we, ‘Naḻpu'tta tagu,’ aaddi ye batubatuwon ditaḵu'tta losane tagu inggana'ḵ matoy taḵu te pinatin da losane profeta'ḵ John.” 7Pun ḵanandae summongbat, “Naippun igammuni nu ngai nangitod.”

8Pun ḵanan Jesus ḵan dida, “Nu ḵaḵnat, umadiḵ os ibaga nu ngai nangitod si ḵaḻabbongaḵe angwa'tta sana.”

Sa Pani Atta Gumagammole

(Mat. 21:33-46; Mrk. 12:1-12)

9Pun inug-uggud Jesus annae pani'tta adu we tagu woḵ ḵanana, “Inninggaw tagu we nammuḻa'ḵ amoamode grape si lutana. Pun impatangḵonna'tta udume gumagammole woḵ ummoy atte adayu we ili'ḵ nabayag. 10Dummatong ḵad timpu we ambuḻasanda'tta de grape, imbuun ni sinḵuwa osa'tta sammiluna'ḵ umoy angaḻa si billayna. Yaḵon dummatong ḵad, inap-aplit da gumagammole woḵ pinaḻyawdae awwakwakkay. 11Pun ḵasinna bos imbuun osa'tta sammiluna yaḵon isuna bose inap-aplitda ya ḵingwada da ḵababbain ḵan siya woḵ pinaḻyawdae awwakwakkay. 12Piḵlun ḵad di sammilu we imbuunna, sinugasugatda woḵ imballuda'tte lasin ni mumuḻḻaan atta de grape. 13Pun ḵanan ni sinḵuwa'tte mumuḻḻaan atta de grape, ‘Ngai ḵooḵ? Ibuunḵu abengḵu we ay-ayatoḵ, patganda nin ain abengḵu.’ 14Yaḵon innilan ḵad da gumagammole, ḵanandae nantutuḻag, ‘Annaya angilaḵsun si annae mumuḻḻaan atta de grape. Gongaton taḵu ta anḵuwa taḵu laḵsunna.’ 15Pun pinaḻyawda'tte lasin ni sadi ye mumuḻḻaan atta de grape woḵ gingngatda.”

Ḵanan Jesus, “Ngai nin ay ḵoon ni sinḵuwa'tte mumuḻḻaan atta de grape atta gumagammole? 16Dumatong ḵad, gongatona dida ya impaayyuwanna'tta udume tagu mumuḻḻaan atta de grape.”

Dingngoḻ ḵad da tagu sana, ḵananda, “Adi oḵyan maḵwa da ḵaḵna!”

17Ḵanan Jesus we nangimumuskoḻ ḵan dida, “Ngai ḵad ain pion ni nigili ye Ugud Apudyus ḵanan?

“ ‘Sa batu we indiyan da nantaḵad aḵ boḻoy,

siya nambalinon Apudyus aḵ ḵapatogane batu

we amapagdot atte boḻoy.’#20:17 Psalm 118:22.

18Ngaimane maottag si annae batu magomogomoḵ ya sa tagu we maottagan ni sanae batu magabugabuḵe isun di gabu.”

Sa Mipanggob Atte Bugis

(Mat. 22:15-22; Mrk. 12:13-17)

19Dingngoḻ ḵad da mimistulun ni lintog ya da papangat da papadi sanae pani, pionda doḵmaane dagus aḵ Jesus te inigammudae inugudna pani'ḵ mibusuḻ ḵan dida. Yaḵon naḵimtanda'tta tagu. 20Pun inuuwwayda gundawaydae anoḵma ḵan siya. Ḵingwada ḵad, tinangdananda da udume laḻaḵi ya nangibuunda'ḵ umoy anipusiput ḵan Jesus ya ipailadae isudan mataḻgodan. Yaḵon sa planuda, an-im-imusda ḵan Jesus ta awad ḵad isongbatna'ḵ anggadingandae angidaḻum ḵan siya, asidaot doḵmaan ya ummoyda impuḻang si gobernor. Te sa gobernor anna ḵaḻabbonganae anguwis. 21Pun ḵananda ḵan Jesus, “Mistulu, igammuni ye tuttuwa losan da ibagam ya ustu da ituttudum. Ḵad igammuni bose ippun laḵlaḵsigom aḵ tagu te siya ituttudum ḵatuttuwaan mipanggob si pinion Apudyus we ḵoon da tagu. 22Pun ibagam ud ḵan diḵani nu lisalisonni lintog Moses nu ambayad ḵani'tta bugis atte Emperor ad Rome? Ambayad ḵani baḵon nu umadini?”

23Yaḵon inigammun Jesus siḵapda woḵ ḵanana ḵan dida, 24“Angipaila ḵayu ḵan saḵon aḵ osae palata. Ngai simbosaḻ ya singngadan si anna?”

Ḵanandae summongbat, “Aḵ Emperor.”

25Ḵanan Jesus ḵan dida, “Nu ḵaḵnat, ittonyu ḵan Emperor da ḵuwana ḵad ittonyu bos ḵan Apudyus da ḵuwana.”

26Pune sadi, ippun indasanda'ḵ anggadinganda'tta imbagan Jesus atte sinagung da tagu woḵ naabus ḵad gummiginnoḵda te nataagda si insongbat Jesus.

Sa Im-imus Atte Umuliyan Da Matoy

(Mat. 22:23-33; Mrk. 12:18-27)

27Pun ummoy da udume Sadducee#20:27 Da Sadducee dida da grupu we ḵaaduwan da padi ye ampangat atte templo. Sa ḵasomsomḵanda'tta long-agda nangatngatuda nu da udume tagu ya da udume padi. Da patiyonda ḵan ḵoḵoḵḵonda nisabali'tta Pharisee. Amo ummanda pas-oman gubilnun da iRome ta naippun sumullagi'tta iRome ya da Judyu. ḵan Jesus woḵ nan-imusda ḵan siya. Dida osae grupun da Judyu we adipun amati ye umuli da matoy. 28Pun ḵananda ḵan siya, “Mistulu, sa lintog taḵu we inggilin Moses ḵanana, ‘Nu awad laḻaḵi'ḵ angasawa ya natoye ippun abengda, ḵasapuḻane asaw-on os ni sunudna baḻu. Ḵad nu awad abengda, mibelang aḵ abeng ni natoy.’#20:28 Deuteronomy 25:5-6. 29Pun inninggaw da pitu we ansusunude lallaḻaḵi. Nangasawa panguḻu yaḵon natoy atte daandapun maganaḵ. 30Pun sa ḵumagwae sunudna inasawana baḻu woḵ natoy ose ippun abengda, 31ya isuna bos atte ḵumaḵlu inggana si ḵumapitu. Ḵatti ḵingwan da sadi ye ansusunud, inasawada baḻu, pun nanḵaḵatoyda losane ippun ganaḵda. 32Anungusna ḵad, natoy os baḻu. 33Sa umali ye aḻgaw atte umuliyan da natoy, ngai ḵan dida ustu we sin-asawa'tte annae bubai te losanda inasawa?”

34Ḵanan Jesus ḵan dida, “Da tagu'd luta si sanae timpu, an-as-asawada. 35Yaḵon da tagu we ibelang Apudyus we labbongnae umuli ya midoga ḵan siya'd langit si umali ye timpu, adidapun an-as-asawa. 36Te adidapun ogon matoye isun da anghel we adidapun ogon matoy ya dida da abeng Apudyus te ummulida.

37“Taḵon ay aḵ Moses pinanoḵnoḵana umuliyan da natoy. Te sa inggilin Moses si mipanggob atte umapuapuye ḵayu we ḵanana, aḵ Apu siya Apudyus da Abraham, Isaac ya aḵ Jacob.#20:37 Exodus 3:6,15. 38Aḵ Apudyus ḵad, siya Apudyus da matattagu, daḵampun aḵ Apudyus da natoy te da losane amati, matattaguda si antotollongna.”

39Pun ḵanan da udume mimistulun ni lintog, “Mistulu, tuttuwa da insongbatnu.” 40Inggana'tte sadi, naippun ogon maḵaituḻode an-imus ḵan Jesus.

Sa Mipanggob Ḵan Kristu

(Mat. 22:41-46; Mrk. 12:35-37)

41Pun ḵanan Jesus ḵan dida, “Ngaipada ḵanane aḵ Kristu ganaḵ Ari David? 42Te aḵ Ari David we mismu, ngannona aḵ Kristu Apuḵ si inggilina'tte iblun da de Psalm.

“ ‘Ḵanan Apudyus atte Apuḵ:

Tumuḵduḵa'tte madawinanḵu

43inggana'ḵ oḻgoḵ

da ḵabusuḻnu.’#20:43 Psalm 110:1.

44Pun nu ḵanan Ari David we aḵ Kristu Apuna, ngai inonae ganaḵna bos nu?”

Da Mimistulun Ni Lintog

(Mat. 23:1-36; Mrk. 12:38-40)

45Nandodongngoḻ ḵad da losane tagu ḵanan Jesus atta disipuluna, 46“Ummanyu'tta mimistulun ni lintog te piondae alliḵliḵwose ansisillup atta langgoyod. Ampilida'tta ḵabaḻuwane tutuḵduwan atta sinagoga ya pionda bose mapatganda'tta ampakumusta ḵan dida'tta lugar we andaḵdaḵngan da adu we tagu. Ḵad pipionda midayawda nu awad gayagaya. 47Te allelawonda da baḻu ta aḻanda da ḵuḵuwada ya da boḻoyda ḵad anduanduwonda da luwaḻuda si sinagung da adu we tagu ta analingodda'tta ḵoḵoḵḵonda. Sa umali ye aḻgaw amo nadagdagson dusada.”

अहिले सेलेक्ट गरिएको:

Luke 20: kml

हाइलाइट

शेयर गर्नुहोस्

कपी गर्नुहोस्