مرقس 1

سِيذْنَا يَحْيَى يسوْجَاذ اَبْرِيذ إِ لْمَسِيح

1أَمزْوَارُو ن لْإِنْجِيل ن عِيْسَى لْمَسِيح مِّيس ن أَربِّـي. 2مَامّش يقَّار لْكِتَاب ن نَّبِي إِشَعْيَا:

<أَقَا تْسكِّيغ-د يج ن اَرَّسُوْل ينُو زَّاثش،

حمَا اَذ يسوْجذ اَبْرِيذ نّش.

3ثْمِيجَّا تْڒَاغَا ذِي ڒخْڒَا:

سْوجْذث اَبْرِيذ إِ سِيذِي أَربِّـي،

ݣّث يبْرِيذن نّس نِيشَان.>

4يُوْسَا-د يَحْيَى غَار ڒخْڒَا. ئِتْبشَّر يوْذَان حمَا اَذ تُوْبن اَذ تْوَاطهَّارن س وَامَان حمَا اَذ تْوَاغْفَرنْت ڒْمُعْصِيَاث نْسن. 5تَاسن-د غَارس مَارَّا يمزْذَاغ ن ثْمُوْرْث ن يَهُوْذِيَا ذ مَارَّا يمزْذَاغ ن ثنْدِينْت ن لْقُدْس، تعْتَارَافن س ڒْمُعْصِيَاث نْسن، يَحْيَى يتْطهَّار-يثن س وَامَان ذݣ يِغْزَار ن لْأُرْدُن. 6أَرُّوْض ن يَحْيَى خذْمن-ث س شْعَر ن وڒْغم، خ نّصّ نّس يجّن ن ؤُحزَّام ن يِيْڒم. ئِتتّ ثْمُوْرْغِي ذ ثَامَّانْت ثَحُوْرّشْت. 7ئِتْحدَّاث يقَّار: "منْبَعْد إِ نش اَذ د يَاس يجّن يجْهذ خَافِي، وَار سْذِيْهِيدْجغ نش اَذ اَذْرغ حمَا اَذَاس فسْيغ ؤُڒَا ذ يفِيْڒَان ن ثْسِيْڒَا نّس. 8نش طهَّارغ-كنِّيو س وَامَان، نتَّا اَكنِّيو يطهَّار س أَرُّوْح يقدّْسن."

سِيذْنَا يَحْيَى يتْطهَّار إِ سِيذِيثْنغ عِيْسَى س وَامَان

9ذِي ڒِيَّام نِّي يُوْسَا-د عِيْسَى زݣ وبِيلَاج ن نَاصِرَا إِي يدْجَان ذِي ثْمُوْرْث ن لْجَلِيل، يطهَّار-يث يَحْيَى س وَامَان ذݣ يِغْزَار ن لْأُرْدُن. 10وَامِي د يُوْڒِي زݣ وَامَان، ڒخْدّنِّي يࢲْرَا اَجنَّا ينُوْرْزم، ذ أَرُّوْح ن أَربِّـي يهوَّا-د خَاس يݣَّا اَم يِجّن ن ثذْبِيرْث. 11ذ يجّن ن ثْمِيجَّا زݣ وجنَّا ثقَّار: "شك ذ ممِّي يعِيزّن، نش فَرّْحغ زَّايَك."

12ڒخْدّنِّ ي يُوْوِي-ث أَرُّوْح نِّي غَار ڒخْڒَا. 13ئِكَّا ذِنِّي اَرْبعِين يُوْم يتْجرَّاب-يث شِّيطَان. أَقَاث مَانِي دْجَان ڒُوْحُوْش، تْسخَّارنْت خَاس لْمَلَائِكَاث.

سِيذِيثْنغ عِيْسَى ئِتْڒَاغَا-د إِ يمحْضَارن نّس يمزْوُوْرَا

14وَامِي حبّْسن يَحْيَى، يُوْيُوْر عِيْسَى يرُوْح غَار ثْمُوْرْث ن لْجَلِيل، ئِتْبشَّر ذِنِّي س لْإِنْجِيل ن أَربِّـي. 15ئِقَّار-اَسن: أَقَا ڒْوقْث ثُوْوض-د، ڒْمُلْك ن أَربِّـي يُوْذس-د. تُوْبث، أَمْنث س لْإِنْجِيل.

16عِيْسَى وَامِي يݣُّوْر خ شّطّ ن ڒبْحَر ن لْجَلِيل، ئِࢲْرَا سِمْعَان ذ وُوْمَاس أَنْدْرُوُس نطَّرن ثْرَاشَّا ذِي ڒبْحَر مِينْزِي نِثْنِي ذ يحدْجَاقن ن يسڒْمَان. 17ينَّا-ٱسن عِيْسَى: "ذْفَارم-اَيِي-د، أَقَا ڒخُّو إِي كنِّيو غَا اَرّغ ذ يحدْجَاقن ن يِوْذَان." 18ڒخْدّنِّي سمْحن ذِي ثْرَاشِّيوِين نْسن ذْفَارن-ث. 19ئِعْذُو شْوَايْت اَغِيرِين، ئِࢲْرَا يَعْقُوْب ذ يُوْحَنَّا نِثْنِي ذ ثَارْوَا ن زَبَادِي، أَقَاثن ذِي ثْغَرَّابُوْت عدّْڒن ثِرَاشِّيوِين. 20ڒخْدّنِّي يڒَغَا-يَاسن-د عِيْسَى، سمْحن ذِي بَابَاثْسن زَبَادِي إِݣ يدْجَان ذِي ثْغَرَّابُوْت اَك يخدَّامن نّس، ذْفَارن-ث.

سِيذِيثْنغ عِيْسَى يسُوْفُوْغ يجّن ن جّنّ ذ اَعفَّان

21ؤُذْفن غَار وبِيلَاج ن كَفرْنَاحُوْم. ذِي نْهَار ن سّبْث ن لْعِبَادَا يُوْذف عِيْسَى ذِي ثمْزِيذَا ن أَيث-إِسْرَائِيل يبْذَا يسڒْمَاذ ذِنِّي. 22تْعجّْبن ذݣ وسڒْمذ نّس ڒَاحقَّاش غَارس سُّلْطَا إِي زِي يسڒْمَاذ، وَار يدْجِي بُو اَمشْنَاو يمْسڒْمَاذن ن شَّرِيعَا. 23ڒخْدّنِّي ؤُفِين ذِي ثمْزِيذَا نِّي يجّن ن بْنَاذم ذَايس جّنّ ذ اَعفَّان. ئِڒَاغَا س جّْهذ جّنّ نِّي 24ينَّا-ٱس: "مِين ثْرزُّوْذ زَّايْنغ آ عِيْسَى نَاصِرِي؟ مَا ثُوْسِيذ-د اَخَانغ ثقْضِيذ؟ نش قَا سّْنغ مِين ثعْنِيذ؛ شك ذ لْعَظِيم ن أَربِّـي!"

25ئِنْهَا-ث عِيْسَى ينَّا-ٱس: "سْتُوْك شك، فّغ زَّايس!"

26ئِسرْجِيجَاي-يث جّنّ نِّي اَعفَّان يعيّض س يِجّن ن ثْمِيجَّا ثمْغَر يفّغ زَّايس. 27ذهْشن مَارَّا يوْذَان نِّي نَّان إِ وَايَاوْيَا: "مِين يعْنَا مَانَايَا؟ أَسرْمذ-أَ ذ جْذِيذ، ذَايس سُّلْطَا! يتْأَمَر ؤُڒَا ذ جْنُون يعفَّانن، تݣّن-اَس اَرَّاي." 28ڒخْدّنِّي ينْتَاشَر ڒخْبَار نّس ذِي مْكُڒ اَمْشَان ذِي جْوَايه ن لْجَلِيل.

سِيذِيثْنغ عِيْسَى يسْݣنْفَا ثَذْݣّْوَاڒْث ن سِمْعَان

29وَامِي د يفّغ زِي ثمْزِيذَا نِّي، يُوْسَا-د غَار ثدَّارْث ن سِمْعَان ذ أَنْدْرُوْس اَكِذس يَعْقُوْب ذ يُوْحَنَّا. 30يُوْفَا ثَذكّْوَاڒْث ن سِمْعَان ثزّڒ ذِي ثَاسُّوْث ذَايس ثِمسِّي. ڒخْدّنِّي عَاوْذن-اَس خَاس. 31ئِقَارّب غَارس يطّف-يت زݣ وفُوْس نّس يسْݣَعّذ-يت-يد. ثفّغ-يت ثْمسِّي، ثكَّر ثبْذَا تْسخَّار خَاسن.

32وَامِي ثغْڒِي ثْفُوْشْت غَار ثْمدِّيث، ؤُوِين-د غَارس مَارَّا يِنِّي يهڒْشن ذ يِنِّي ذِي دْجَان جْنُون، 33مُوْنن مَارَّا أَيثْبَاب ن وبِيلَاج ذِنِّي غَار ثوَّارْث. 34ئِسْݣنْفَا اَطَّاس ن يمهْڒَاش ذَايْسن لْأَنْوَاع ن ڒهْڒَاشَاث. ئِسُوْفغ اَطَّاس ن جْنُوْن، وَار ثن يجِّي شَا اَذ سِّيوْڒن مِينْزِي جْنُوْن-أَ سّْنن مِين يعْنَا.

35ثِيوشَّا نّس زِيش وَامِي عَاذ وَار يصْبِيح شَا ڒْحَاڒ، ئِكَّر يفّغ يرُوْح غَار يِجّن ن ومْشَان يخْڒَا، ئِتْࢲَادْجَا ذِنِّي. 36يرْزُو خَاس سِمْعَان ذ يِنِّي كِذس يدْجَان. 37وَامِي ث ؤُفِين نَّان-اَس: "مَارَّا رزُّون خَاك."

38ينَّا-ٱسن: "يَالَّاهِيث اَكِذِي، أَ نْرَاح غَار ڒدْشُوْرَاث نّغْنِي يُوْذْسن حمَا اَذ حدّْثغ ؤُڒَا ذِنِّي. خ مَانَايَا مِيخف د ؤُسِيغ." 39ئِرُوْح يتْحدَّاث ذِي ثمْزِيذَاوِين ن أَيث-إِسْرَائِيل ذِي مَارَّا ثَمُوْرْث ن لْجَلِيل يسُوْفُوْغ جْنُوْن.

سِيذِيثْنغ عِيْسَى يسْݣنْفَا يجّن يهْڒش س جْذَام

40يُوْسَا-د غَار عِيْسَى يجّن يهْڒش ذَايس جْذَام. يوْضَا خ يفَادّن نّس يحشّم-يث ينَّا-ٱس: "شك مڒَا ثخْسذ، ثْزمَّرذ اَذَايِي ثسِّيصْفِيذ."

41ئِقّس-اَس إِ عِيْسَى، ئِحَاذَا-ث س وفُوْس نّس ينَّا-ٱس: "وَاه نش خْسغ، شك قَا ثْݣنْفِيذ!"

42ذݣ ومْشَان يكّس-اَس جْذَام نِّي يذْوڒ يصْفَا. 43ڒخْدّنِّي ئِسّكّ-يث عِيْسَى يوصَّا-ث اَطَّاس 44ينَّا-ٱس: "خْزَر، وَار تْخبَّر حَدّ." ينَّا-ٱس: "رُوْح غَار ڒفْقِي سظْهَار-اَس يخف نّش. اݣّ صّذْقث نِّي إِي زِي يوصَّا مُوْسَى حمَا اَغَارْسن ثِيڒِي شْهَاذث خ مِين يوقْعن."

45وَلَكِن نتَّا مِين يݣَّا؟ ئِرُوْح يبْذَا يسَّاوَاڒ اَطَّاس، ئِسُوْفغ ڒخْبَار اَڒ وَامِي يذْوڒ عِيْسَى وَار يزمَّر اَذ يَاذف غَار شَا ن وبِيلَاج بْڒَا مَا ٱذ يسْنُوْفَّر يخف نّس. تُوْغَا لَابُد يتْغِيمَا ذݣ يمُوْشَان يخْوَان، وَلَكِن وَاخَّا اَمنِّي يوْذَان تَاسن-د غَارس ذِنِّي زِي مَارَّا يمُوْشَان.

अहिले सेलेक्ट गरिएको:

مرقس 1: ريف

हाइलाइट

शेयर गर्नुहोस्

कपी गर्नुहोस्