Luka 7
7
1Evasi tani hāḍanga hallee lōkutaki nenze wēkhi ḍāju Kapernahumu tāna wātesi.
2ē wēḍa ro sohe muhetimugulutaki zīwu gatti gotteesi roosi nōmeri gattasi āhi hāki daggire āha maẓẓesi.
3mugulu Jesu bakkiti wenziwaha, evasi wāhiwaha tani gotteenaï othali inzihi evanaï lākinanaki Judunga kazzarai evani tāna panḍitesi.
4evari Jesu tāna wāhiwaha:— nī walla ī mēlu pātali evasi pāḍa ānasi.
5evasi mā lōku zīwu kīhihi, mange sunagōgu tānuĕ dospi kittesi inzihi evani tulle wessiwaha hāree battimāliteri.
6lakka Jesu evari tulle zakke haẓẓesi. evasi ē izzo daggire wātati mugulu tani tōneskani messiwaha:— mīmbu evani tāna haẓẓiwaha:— prabhutī! wahu kodda koddaani; nīnu nā izzo wānai pāḍaātatee ăoni.
7ēdānataki nī tāna wājali pāḍa ātatee inzihi nānu āza kodda hilloo; ātihe zōkoḍi mātromi hello hījamu embatiĕ nā gotteesi ottinesi.
8nānuwa adhikāromitaki lobāḍitatee; nange dandulōku manneri, nānu roonaï halmu iẓẓihe hannesi, roonaï wāmu iẓẓihe wānesi, nā gottii idāni kēpamu iẓẓihe kīnesi inzihi nānu westi lehe evani tulle weh’du inzihi evaraï panḍitesi.
9Jesu ī hāḍanga wenziwaha evani bakki iẓintromi āhiwaha tani zēẓo wāhi manni samuhomi bakki wenḍiwaha:— Ishraelu lōni ātiwa iẓẓi kazza wishwāsomi nānu meh’atee inzihi mī tulle wessi manzaï.
10panḍitari izzo wenḍe wātati ē gotteesi othitasi āha mannani mesteri.
11ēḍāju evasi Nāinu inni ro nāto hazzi manzaliĕ evani shishungee hāra zana samuhomiĕ evani tulle hazzi maẓẓeri.
12evasi ē nātoti kottata wātati, hātasi roosi pangata dēka ōtasi ātēsi. evani tallitaki īvasi roosiĕ mrīesi, ēdi rāndi; ē nātoti lōku hāra zāna ēdāni tulle andaha maẓẓeri.
13prabhu ēdāni messiwaha, ēdāni muhe karma āhiwaha:— līanika! inzihi ēdāni tulle wessiwaha daggire wāhiwaha ē gēra dijaliĕ dēki mannari nitteri.
14evasi:— kokkatī! ningamu inzihi nī tulle wessi manzaï inzaliĕ
15ē hātasi ningiwaha kuggiwaha zōlali māthesi; evasi evanaï evani tallinaki herpitesi.
16bahētari azzi āhi:— mā lōni kazzā gūrū hōẓa mannesi inzihiĕ Paramushreela tani lōkutaki darshanomi daja kījatesi inzihiĕ Paramushreeni mahima wēkheri.
17evani kosomiti ī samācharomi Judaja waẓẓee, suttupattuti dēshomi waẓẓee wengite.
18Johanu shishunga ī sangatika bahee evanaki punpi kitteri.
19embatiĕ Johanu tani shishungaña rīaraï ārhiwaha:— wānati nīnukī? māmbu ōḍe rooni kōsomi kāẓali walle? inzihi wenzali evaraï prabhu tāna panḍitesi.
20ē lōku evani tāna wāhiwaha:— wānati nīnukī ātihe ōḍe roonaki māmbu kānai kī? inzihi wenzali baptismomi hīni Johanu mammaa nī tāna panḍatesi inzihi westeri.
21ē gāḍekatee evasi dukhanganiĕ, bīsanganiĕ pōlaa pēnka gatti hāra zānee othiwaha, hāra zāna guḍilangani mespi kittesi.
22embatiĕ evasi:— mīmbu hazziwaha mestaniĕ westaniĕ Johanutaki weh’du. guḍilanga meh’nani pāti manneri, sottanga tāki manneri, kushtudukhagattari othitari āhi manneri, bēranga wenzi manneri, hātari nikhari āhi manneri, pēḍangaki suwarta wēkhnai āne.
23nā bakkiti ḍājuēski aagattasi bōlu pānasi inzihi evaraki utromi hittesi.
24Johanu kōska hazzi ḍāju evasi Johanu kōsomi zana samuhomi tulle īleāhi wessa māthesi:— mīmbu ēnaa messali zāḍata hazza manzeri? gālitaki wītimanni dandikī?
25ōḍe ēnaa hēka haẓẓeri? sannomi himborka huẓẓitanaïkī? īdikō ōza manni himborka huẓẓiwaha sukhomiti nīḍinari ōḍu ilkaña manneri.
26ātihe ōḍe ēnaa bēẓi haẓẓeri? gūruïki? hăa samma gūru kiha kazzanaï inzihi mī tulle wessi manzaï.
27īdikō nānu nā dūtati ninge ōkhee panḍi manzaï, evasi nī nōkita nī zīju mliphanesi
inzihi imbaani kōsomi rāẓitai āha manneā evasiĕ ī Johanu.
28ījaska walla zarnātari lōni Johanu kiha kazzasi imbaasi hilluusi. ātiwa Paramushreeni rāzomita ūñatasi evani kiha kazzasi inzihi mī tulle wessi manzaï.
29lōku bahēe sunkomigattariĕ (Johanu bōdha) wenziwaha, evasi hitti baptismomi pātari āhi Paramushreela nājomi gattasi inzihi ōpiteri samma
30parisajungee dharmashāstromi gūrkee evani hāte baptismomi pān’anaha, tami bakki Paramushreeni mliphi onpungani ūña mesteri.
31lakka ī wēḍati mānēi nānu ēniti pōlh’ii; evari imbinanaki pāḍa āha manneri?
32hāta sahaḍangaña kugga manzihi:— minge pīruḍi ūkitomi samma mīmbu ēndu ēnḍaateri, līwi kittomi samma mīmbu līpu līateri inzihi rooni tulle roosi wessa koddihi hātki āni kokkari lehe manneri.
33baptismomi hīni Johanu he’era tinnaanaha drāksharasomi unna anaha wātesi lakka:— īvasi pōlaa pēnu astasi inzihi mīmbu inzi manzeri.
34mānēi mrīesi tinzihi unḍihi wātesi lakka mīmbu:— īdikō īvasi rānda karuwu bījee unnasiĕ, sunkomangakiĕ pāpungakiĕ tōneesi inzeri.
35ātihe ghnānomi ghānomi inzihi ēḍāni tulleti bahētari bakkiti tīrpu pāne iẓẓesi.
36parisājungaña roosi tani tulle rānda tinzali inzihi evanaï kōritesi, evasi ē parisājuuni izzo hazziwaha dāḍi kugga manzaliĕ
37ē nāto manni ro dushtu īja, Jesu parisajuni izzo rāndaki kugga mannesi inzihi punziwaha, ro bharneta nehi ganda ēju taẓi wāhiwaha
38ḍāju bakki evani pā’ananga tāna niẓẓiwaha līhihi kanḍru tulle evani pā’anangani ūthiwaha tani trāju bānangati zēza tusiwaha evani pā’anangani londa koddihi ē nehi ganda gatti ēju evaska muhe wākhe.
39evanaï hātiti parisajuusi ēdāni messiwaha:— īvasi gūrū ātihe tannaa dīgiti ī īja imbaaiā ēnidaiā punzee mannesi, ēdi dushtu gattai inzihi tani lōni tānu inzakodditesi.
40ēdānaki Jesu:— Simonutī! nī tulle ro hāḍa wessali maïni inzihi evani tulle wessaliĕ evasi:— gūrūtī weh’mu iẓẓesi.
41embatiĕ Jesu:— waddi hīni roonaki rīari bākigattari maẓẓeri. evari lōni roonaki pāsa sohi dēnāramuka ōḍe roonaki pāsa doso dēnāramuka hīnai maẓẓe.
42ē waddi tīrzali evari tāna ēnaiwa hillaate lakka evasi rīaraki zarpitesi. lakka īvari lōni imbassi evanaï aggāḍa zīwu kīnesiā westamu inzihi weẓẓesi.
43ēdānaki Simonu:— evasi imbaanaki aggāḍa zarpitesiā evasiĕ inzihi nange tōẓi manzane inzihi wessaliĕ evasi:— nīnu manni lehe onpiti inzihi evani tulle wessihi
44ē īja bakki wenḍiwaha Simonu tulle īle iẓẓesi:— ī ījani nīnu messi manzi. nānu nī izzota wājaliĕ nīnu nā pā’anangki ēju hījaati samma īdi tani kanḍru tulle nā pā’ananga ūthiwaha tani trāju bānanga tulle zēzate.
45nīnu nannaa londawa aati samma nānu bitri wāti tānatiĕ īdi nā pā’ananga londiwīnani pissee hillee.
46nīnu nīju tulle nā trāju rubbaati samma īdi nā pā’anangki nehi ganda ēju wākhe.
47ēdi hāree zīwu notte lakka ēdāni hāreka pāpunga zarpitaï āha mannu inzihi nī tulle wessi manzaï. imbaanaki ūña zarpitai āha manneā, evasi ūñee zīwu kīnesi inzihi wessihi
48nī pāpunga zarpitaï āha mannu inzihi ēdāni tulle westesi.
49embatiĕ evani tulle rānda dāḍita kugga mannari:— papungani zarpini īvasi imbaasi? inzihi tāmbu tāmbue onpa mātheri.
50ēdānaki evasi:— nī wishwāsomi ninnaa rakshinẓite, samadhānomi gattati āhi hallamu inzihi ē ījani tulle westesi.
अहिले सेलेक्ट गरिएको:
Luka 7: KUVI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Published by the British and Foreign Bible Society in 1916.
