Mrk 15
15
Yesu amahlweni ka Pilatu
(Mt 27:1-2,11-14; Lk 23:1-5; Yhn 18:28-38)
1Amixweni, a vaprista lava vakulu vahlengeletana, ni vakulu va tiko ni vadondrisi va Nawu, ni hinkwaswu swiro swa huvu akuva vatrema a mhaka ya Yesu. Ntrhaku ka kumutrimba vamuteki vayamunyiketa ku Pilatu. 2Kutani Pilatu amuvutisa aku: U Hosi ya va-Yuda, xana? Yesu amuyanguli aku: Uhlayelamfuri. 3Swanga hi leswi a vaprista lava vakulu afaka vamurambela hi swakutala, 4Pilatu atlhela amuvutisa aku: Awuyanguli ntxhumu hi leswinyingi vakurambelaka ha swone? 5Kambe Yesu angayangulanga ntxhumu, Pilatu ahlamala ngopfu.
Yesu ayavanyiseliwa lifu
(Mt 27:15-26; Lk 23:13-25; Yhn 18:39—19:16)
6Hi ntolovelo ankameni wa nkhuvu wa Paska, Pilatu afa avantrhunxela mubohiwa mun'we, lweyi afaka a vhanu vamukombela. 7Ke afa kuna mun'we, lweyi afaka vaku i Barabasi. Afaka abohiwi kun'we ni vapfuxi va dzolonga hikuva, vadlayi mhunu adzolongeni droledro. 8A xitrhungu xitrhindrekela, xikombela Pilatu leswaku antrhunxa mubohiwa mun'we, swanga hi ntolovelo wavu. 9Kolahu avavutisa aku: Xana n'wirandra akuva nin'wintrhunxela Hosi ya va-Yuda xana? 10Hikusa afa aswitiva swinene leswaku a vaprista lava vakulu afa vanyiketi Yene hi matrhoho. 11Kambe a varangeli va vaprista vahlohlotela a xitrhungu akuva xikombela leswaku antrhunxa Barabasi. 12Pilatu atlhela avavutisa aku: Kutani nitayentxa yini hi mhunu lweyi n'wiliki i Hosi ya va-Yuda? 13Kutani a xitrhungu xibandlukana xiku: Muvambe! 14Pilatu asindrisi aku: Ayentxi yini xa kubiha? Kolahu a vhanu vatshima kubandlukana vaku: Muvambe! 15Kutani Pilatu, antrhunxa Barabasi hikuva afaka anavela kutrhavisa xitrhungu. Ntrhaku arumi kupswhitiwa Yesu na avanyiketa akuva avambiwa.
A masotxha matreketrela Yesu
(Mt 27:27-31; Yhn 19:2-3)
16A masotxha mamuyisa alinxonxeni andlwini ya vufumi, kutani va vitana kone a butrhu hinkwadru. 17Vamuyambexa a xiyambalu xa libungu, vakondla ni hara ya mitwa vamubehela anhlokweni. 18Kutani vasungula a kumulosa vaku: Xawani Hosi ya va-Yuda! 19Hi nkama wolowo afa vamuba hi nkhavi, vamuthukela mari, vawa hi matrolo vamugandrela.
20Ntrhaku vamutreketrela, vamususa xiyambalu lexi xa libungu, vamuyambexa swiyambalu swake. Hi kulandra vamuteka vayamuvamba.
Kuvambiwa ka Yesu
(Mt 27:32-44; Lk 23:26-43; Yhn 19:17-27)
21Andleleni vakumi wanuna mun'we na apfa masin'wini, kutani vamusindrisa kubyatrha a xihambanu xa Yesu, a vito valiki i Simoni mu-Kirene anga tatana wa Alexandre na Rufu. 22#Lavisa Mt 27:33 ni xikombiso. Vayisi Yesu ambangwini lowu valiki i Gologota, swidjulaka kuhlaya leswaku Pala. 23Vamunyiki a vhinyo ledri patraniki ni muri lowu valiki i mira, kambe Yesu anganwanga. 24#Lavisa Mps 22:19. Hi kulandra vamuvamba axihambanwini. Kutani vayavelana swiyambalu swake, ntrhaku kakuva vaswihlahluva hi pswhampswha, akuva vatavona leswaku mun'wana-ni-mun'wana atakuma yini.
25Afa wuli nkama wa vuraru#15:25 A nkama wa vuraru wa mixo, kuhlayiwa a 09h00 amahlayeleni yeru. wa mixo, loko vamuvamba. 26A henhla ka xihambanu vabeki papela ledri dritraliwiki a mhaka ya kutremeliwa kwake ledri driliki: A HOSI YA VA-YUDA. 27Kutani vavambi kun'we na Yene a tinsulavoya tibiri, yin'we axineneni xakwe, yin'wana aximantrhini. [ 28Xileswo kuhetiseki a Matralwa lawa maliki: Avambiwi kun'we ni swidohi.]#15:28 A ndrimana leyi ayikumeki ku matralwa yakuhlawa ya khale. Lavisa Lk 22:37, Ezy 53:12.
29 # Lavisa Mps 22:8; Mrk 14:58; Yhn 2:19. Lava afaka vahundra kone afa vamuruketela, na vamuhlakahlela tinhloko, vaku: Ha! Wene mubutrhuti wa Tempele, uva uyiyaka ha masiku mararu! 30Tihuluxe-ka, uxika axihambanwini! 31Na vone a vaprista lava vakulu, ni vadondrisi va Nawu, afa vamutreketrela, na vabyelana vaku: Ahanyisi van'wana, Yene ahluleka kutihanyisa! 32Axike axihambanwini, Yene Kriste, Hosi ya Israyele, akuva hiswivona, hiva hipfumela. Na vone vayivi vabiri, lava vavambiwiki kun'we na Yene, afa vamuruka.
Kufa ka Yesu
(Mt 27:45-56; Lk 23:44-49; Yhn 19:28-30)
33Kusukela ku nkama wa vuntlhanu na mun'we kuvani munyama amisaveni hinkwayu, kukondra kuva nkama wa vuntlhanu na mune#15:33 A minkama ya vuntlhanu na mun'we ni nkama wa vuntlhanu na mune, kuhlayiwa a minkama ya 12h00 ni 15h00, hi kulandrana ka yone, amahlayeleni yeru. 34#Lavisa Mps 22:2 Kuhlayiwaka hi Xiaramu. Kutani, hi nkama wolowo wa vuntlhanu na mune Yesu abandlukana hi ritu dra kutlakuka aku: Eloyi, Eloyi, lama Sabaktani? Loko switlhamuxeliwa hileswaku: Xikwembu Nkulukumba wanga, Xikwembu Nkulukumba wanga, xana unitrikeli yini? 35Avan'we ku lava afaka vali kone, loko vaswiyingela, vaku: Lavisani! Avitana Eliya! 36#Fananisa ni Mps 69:22. Kolahu mun'we atrutruma, ayatranisa xiponji hi nhlowa, axitlhoma alihlangeni, amunwisa, na aku: Trikani hitavona kumbe Eliya atatamuhawula! 37Kambe Yesu abongosiki, anyiketa a moya, kutani afa. 38#Lavisa Khm 26:31-33. A kapulana dra Tempele drihandruka hi le makari, kusukela henhla kuyatlhasa ahansi.
39Kolahu a ndruna ya dzana,#15:39 Murangeli wa ntlawa wa dzana (100) dra masotxha. leyi yiyimiki amahlweni ka xihambanu, yivona leswi afisiki xiswone Yesu, yiku: Kunene, lweyi afa ali Yene a N'wana wa Xikwembu Nkulukumba! 40Afa kuni vavasati va kukari lava afaka valavisa hi le kule. Amakari kwavu afa kuna Maria wa Magadala, na Maria mamana wa Yakobe, lweyi ntrongo, na Yosefa, na Salome. 41Vavasati lava afaka valandra Yesu, ni kumutirela loko ahafambela Galileya. Nakone afa kukumeka van'wana vanyingi lava afaka va ntlhantukeli na Yene kukondra vayatlhasa Yerusalema.
Kulahliwa ka Yesu
(Mt 27:57-61; Lk 23:50-56; Yhn 19:38-42)
42A dambu afa driya kupeleni hi nkama wa kutibekisela savata, 43kuhumelela Yosefa lweyi wa le Arimateya. Afa ali mun'we wa xiro xa huvu, wa kukhensiwa ngopfu, nakone afa alavisela kuta ka Mfumu wa Xikwembu Nkulukumba. Atiyisa mbilu aya ku Pilatu, akuva amukombela ntrumbu wa Yesu. 44Kambe Pilatu ahlamala hi kuyingela leswaku kutani afile, aleleta kuvitaniwa a ndruna ya dzana akuva ayivutisa kumbe xana afa afi khale. 45Ntrhaku kakuva akumi ntlhamuxelo, hikola ka ndruna ya dzana, anyikela a ntrumbu ku Yosefa wa le Arimateya. 46Lweyo ayihawula a ntrumbu axihambanwini awutrondriyela hi kapulana ledri afaka adrixavile. Ntrhaku ayawubeka axireni ledri afaka drikehliwi aribyeni, apfingula ni ribye drikulu asiva a nyangwa ya xira. 47Kambe Maria Madalena, na Maria mamana wa Yosefa, afa valavisa lomu abekiwaka kone.
अहिले सेलेक्ट गरिएको:
Mrk 15: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
