Lk 11
11
Yesu adondrisa a kukhongota
(Mt 6:9-13; 7:7-11)
1Nkama un'wana Yesu akukhongoteni kwake ku un'wanyana mbangu, loko ahetile, mun'we ku vadondrisiwa vakwe aku ku yene: Hosi, hi dondrise kukhongota, swanga hileswi Yohana Mubabatisi angadondrisa a vadondrisiwa vakwe. 2Yesu aku ku vone: Loko n'wikhongota, hlayani n'wiku:
Tatana
a vito draku adrihlawuliwe.
Awute a Mfumu waku.
3Hihanane a swakuda sweru swa siku drin'wana ni drin'wana.
4Hidrivalele a swihono sweru,
swanga hi leswi na hine hi drivalela mun'wana-ni-mun'wana
lweyi angani nandru ku hine.
Nakone ungahitrike hiwela mindringweni.
5Yesu ayengesa aku ku vone: Kungaku loko a mun'we ku n'wine ani nakulobye, aya ku yene a makari ka vusiku, aku: Nakulori, nivoleke a makati mararu, 6hikusa a nakulori lweyi wa mufambi ahambukeli ku mine, kambe anina swakumufihluta ha swone. 7Hinga pimisani loko lweyi anga ndlwini angamuyangula aku: Unganikarate! Mfuri a nyangwa yipfaliwile, a vatrongwana vanga vana mine avunan'wini. Aninakupfuka nikuhanana makati.
8Yesu ayengeta aku: Nan'wibyela nili, nambi loko angaka angapfuki amunyika a makati, a vugamu atapfuka amunyika hinkwaswu leswi aswidjulaka, angali hikuva nakulobye, kambe ali hikuva angahatimukarata. 9Hikola ka leswo nili ku n'wine, kombelani n'witanyikiwa hi Xikwembu Nkulukumba, djulani n'witaswikuma, gongondrani n'witapfuleliwa. 10Hikusa lweyo ni lweyo lweyi akombelaka awanyikiwa; lweyi adjulaka awaswikuma; ni lweyi agongondraka atapfuleliwa. 11Xana tatana ku n'wine hi wini, lweyi anhaka loko a n'wanakwe akombela a kati angamunyikaka a ribye? Ni loko akombela nhlampfi, xana angamunyika a nyoka matrhan'wini ya nhlampfi xana? 12Kumbe loko akombela a tandra, angamunyikaka mubalana xana? 13Nambi n'wine n'wingalava vamfani n'wiswikotaka a kuhanana a vanenu leswi swinene, angopfu Tatana lweyi wa le Tilweni atanyika a Moya wakuxwenga ku lava vakombelaka ku yene!
Yesu na Belzebule
(Mt 12:22-30; Mrk 3:20-27)
14Yesu afa ahlongola a demoni ledri afaka drili mbheveve. A demoni dritiki drahuma, a mhunu lweyo asungula a kuvulavula. A switrhungu swihlamala. 15Kambe a van'we ku vone vaku: Ahlongola mademoni hi ntamu wa Belzebule, mufumi wa mademoni. 16A van'wana nangweso vamudringa vakombela a xikombiso lexi xipfaka ku Xikwembu Nkulukumba. 17Kambe Yesu hi kutiva amiyanakanyu yavu, aku ku vone: A mfumu un'wana ni un'wana lowu wutravukaniki hi le makari, wutandruluka hula, ni tiyindlu ta kone tiwelana henhla. 18Naye Sathana ke loko atravukanisiwi hi le makari, xana a mfumu wakwe wutayimisa kuyini? Leswi n'wiliki nihlongola mademoni ha Belzebule. 19Ke, loko mine nihlongola mademoni ha Belzebule, xana a vanenu vamahlongola ha mani? Hileswo-ke hi vone vatakava vatremi venu. 20Kambe loko nihlongola a mademoni hi ntamu wa Xikwembu Nkulukumba, hileswaku a Mfumu wa Xikwembu Nkulukumba wutlhasile swoswi ku n'wine. 21Lweyi wa ntamu loko ahlomile, alavelela a yindlu yake, a nhlengwe yake yitrhamisekile swinene, 22kambe loko lweyi amutlulaka hi ntamu ata, amuhlula, amutekela ni swihlomo leswi afaka a dumbi swone, ayava ni leswi aswiwutliki ku yene. 23Lweyi angeke na mine, alwa na mine, naye lweyi wakuka anga nhlengeleti na mine, awa hangalasa.
Moya lowumfani loko wutlhela wu buya
(Mt 12:43-45)
24Yesu aya mahlweni aku: Loko a moya lowu mfani wuhumi mhunwini, wutifambela hi mimbangu leya kuwoma, wuyadjula kuwisa; wunga kukumi, wuku: Nitabuyela andlwini yanga leyi ninga huma ku yone. 25Wutiki wata, wuyikuma na yikukuliwile, yiva yilongisiwa. 26Wahanga famba wuyatitekela min'wana mimoya ya ntlhanu na mibiri leyi miwutlulaka hikuva mimfani, minhingena, miyatrhama kone. A mahanyela ya mhunu lweyo mahanga biha kutlula lawa ya kusungula.
Nkateko
27Yesu aku aheta kuhlaya leswo, lweyi wansati, axitrhungwini atlakuxa ritu aku ku yene: Akatekile lweyi akubelekiki, ava akuyan'wisa. 28Kambe Yesu aku: Ngopfu vakatekile lava vayingelaka Ritu dra Xikwembu Nkulukumba vava vadribekisa.
Yesu, xikombiso xa Xikwembu Nkulukumba
(Mt 12:38-42; Mrk 8:11-12)
29A switrhungu loko swihlengeletani ku Yesu, asungula kuvabyela aku: A lixaka ledri i lixaka ledrimfani; dridjula xikombiso, kambe dringaka dringa nyikiwi xikombiso, loko xinge xikombiso xa muprofeta Yona. 30Hikusa swanga heswi Yona angava xikombiso xa Xikwembu Nkulukumba ku va-le-Ninivha, hi swoswo naye N'wana wa Mhunu atava xikombiso ku lixaka ledri. 31A mufumi wa xisati wa le nyingitimu ata sekeleka, akuyavanyiseni, kun'we ni vavanuna va lixaka ledri, atavayavanyisa, hikusa apfi vugan'wini bya misava, atatayingela vutlhari bya Salomoni, kasi akone kola lweyi atlulaka Salomoni. 32A vavanuna vale Ninivha vatasekeleka, akuyavanyiseni, kun'we ni lixaka ledri, vadriyavanyisa hikusa vandrulukile loko vakhongoteliwa hi Yona. Kasi akone kola lweyi atlulaka Yona!
Livaningo ni munyama
(Mt 5:15; 6:22-23)
33Akuna mhunu lweyi, loko alumeki motre, awubekaka lomu kakufihleka, kumbe ahansi ka xihundru. Awubeka ahenhla, akuva lava nhingenaka vavona ku vaninga ka wone. 34A motre wa miri yaku i tihlu draku. Loko a tihlu draku drili drinene, a miri yaku hinkwayu mitavaningiwa. Kambe loko dribihile, nayo miri yaku mi le munyameni. 35Tivone-ke, suka akuvaninga loku kunga ndreni kwaku, kuva munyama. 36Loko a miri yaku hinkwayu mivaningiwa, kungena mbangu wakuva munyameni, mitavaningiwa hinkwawu swanga hi loko a motre wuvaninga hi kuvaninga ka wone.
Yesu asola vafarisi ni vadondrisi va Nawu
(Mt 23:1-36; Mrk 12:38-40)
37Yesu aku na ahavulavula, amun'we wa mufarisi a mukhongota kuyada na yene. Anhingeniki atrhama kudeni. 38Kambe lweyi wa mufarisi, loko amuvona, ahlamala hi leswi angarangangakiki a hlamba a mavoko na angasanganada. 39Kambe Hosi yiku ku yene: Hileswo n'wine vafarisi n'wibasisa ahandle ka ntrheko ni mbaka, kasi andreni kwenu kutali hivuyivi ni vubihi. 40Masinge ndrun'wine! Xana lweyi angahamba a swale handle angahambanga ni swalendreni xana? 41Hananani swisiwana kusungula ku leswi n'winganaswu, hi kone n'witaka basiseliwa hinkwaswu. 42Kambe yowee n'wine vafarisi! Hikusa n'winyika a swa vukhume bya ximbowana ni bya muhensa ni timbowa hinkwatu, kasi n'widrela kululama ni lirandru dra Xikwembu Nkulukumba! Afa swifanekela a kuyentxa mintxhumu leyo n'wingaswitriki ni kuyentxa yin'wana. 43Yowee n'wine vafarisi! N'wirandraka vutrhamu bya kuranga amasinagogeni ni kulosiwa a tihubyini. 44Yowee n'wine, vatrali ni vafarise vamandrendre, n'wifana ni maxira lawa yakuka mangavoneki, a vhanu vafambaka a henhla ka wone na vangaswitivi!
45Amun'we ku vadondrisi va Nawu aku ku yene: Mudondrisi, hikuhlaya leswo wahikhunguvanyisa na hine. 46Yesu aku: Yowee na n'wine vadondrisi va Nawu, hikusa n'wirwexa a vhanu a mintrhwalu leyi ya kuka mingarwaleki, kasi n'wine an'wimikhumbi nihi litiho drin'we drenu. 47Yowee n'wine, hikusa n'wiyaka a maxira ya vaprofeta lava a vatatana venu vangavadlaya. 48Hileswo-ke n'witimboni ta leswaku n'wapfumela mintiro ya vatatana venu, hikusa vone vavadlayile, n'wine n'wiyaka maxira. 49Hilaha-ke na byo vutivi bya Xikwembu Nkulukumba byihlayiki byiku: Nitavarumela vaprofeta ni vapostola, a van'we vata vadlaya, vataxanisa van'wana; 50Akuva ku lixaka ledri kudjuliwa ngati ya hinkwavu vaprofeta, leyi yingahalatiwa kusukela akutumbuluxiweni ka misava, 51akusungula hi ngati ya Abele, a kuyatlhasa angatini ya Zakariya, lweyi angadlayiwa a makari ka vuhiselo bya timhamba ni mbangu wa Vuhlawuleko. Ahina! Nan'wibyela nili: Xikwembu Nkulukumba atakhatisa a lixaka ledri dra nguva leyi.
52Yowee n'wine, vadondrisi va Nawu hikusa n'wisusi mpfungulu wa kutiva vukhongoti n'wine n'winganhingeni, kutani n'wisivela ni van'wana lava vadjulaka kunhingena.
53Yesu na ahahuma, a vadondrisi va Nawu ni vafarisi vasungula kumukarata ngopfu, vamuvutisa a swivutiso leswi swakutala, 54vamureya vatakuma hi vutlhari a ritu ledri drihumaka a non'wini wakwe.
अहिले सेलेक्ट गरिएको:
Lk 11: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
