Yhn 16
16
A ntiro wa Muyimeli
1Nin'wibyeli timhaka leto akuva n'wingatxhuki n'wikhunguvanyeka. 2Vatan'wihlongola amasinagogeni; na swone a nkama wata lowu mun'wana-ni-mun'wana lweyi atakan'widlaya atakapimisa leswaku atirela Xikwembu Nkulukumba. 3Vatayentxa swoleswo hikusa avativanga Tatana, nambi mine. 4Kambe nin'wibyeli leswo akuva loko nkama lowo wutlhasa, n'witaswidrimuka leswaku nin'wibyelile swone. Anin'wibyelanga leswo akusunguleni, hikusa afa nahali na n'wine. 5Kambe swoswi nimuka ku lweyi anirumiki. Kutani akuna mhunu amakari kwenu lweyi anivutisaka, aku: umuka kwini xana? 6Kambe leswi nin'wibyeliki leswo, a kuvaviseka kukone a timbilwini tenu. 7Kambe nan'wibyela xihlayelamfuri nili i swinene ku n'wine akuva ni muka, hikuva loko ningamuki, a Mutxhaveleli angaka angati ku n'wine; Kasi loko nisuka ku n'wine, nitan'wirumela yene. 8#Fanisa ni Mnt 24:25. Na yene kutaku loko atlhasile, atakholwisa misava leswaku xihono xikone, ni kululama kukone ni kuyavanyisa kukone. 9#Lavisa 8:21-24; 9:14; 15:22-24. A xihono, hikuva avapfumelanga ku mine; 10a kululama hikuva nimuka ku Tatana, n'wine n'wingahanivoni; 11a kuyavanyisa, hikuva a mufumi wa misava leyi ayavanyisiwile.
12Neheni swakutala nifanelaka kun'wibyela swone, kambe swoswi an'wina kuswibyatrha. 13Kambe yelweyo ataku loko atile, wunga Moya wa xihlayelamfuri, atan'wifambisa axihlayelamfurini hinkwaxu. Hikuva angaka angavulavuli ha swake, kambe hinkwaswu leswi atakaswiyingela ataswihlaya, na kone atan'witivisa ni leswi switakahumelela. 14Atanitwalisa, hikuva leswi atakan'witivisa swone, atava aswikumi ku mine. 15Hinkwaswu leswi Tatana anganaswu, i swanga. Hi laha ningahlaya leswaku leswi atakan'witivisa swone, ataswikuma ku mine.
Ntrhaku ka kuvaviseka kuta kutrhava
16Antrhaku ka nkamanyana, n'wingahandrivoni; kambe ntrhaku ka nkamanyana, n'witanivona. Hikusa niya ku Tatana
17A van'we ku vadondrisiwa vavutisana, vaku: Xana ahlaya yini, loko aku: Ntrhaku ka nkamanyana, n'wingahanivoni, kambe ntrhaku ka nkamanyana n'witanivona xana? Nileswi aliki: Hikusa niya ku Tatana? 18Vatlhela vaku: Ahlaya yini loko aku Ntrhaku ka nkamanyana xana? Ahiswitivi leswi ahlayaka swone!
19Yesu aswitiviki leswaku vadjula kumuvutisa, aku ku vone: Xana n'wivutisana hinkonta ya leswi nin'wibyeliki niku: Ntrhaku ka nkamanyana, n'winganivoni, kambe ntrhaku ka nkamanyana n'witanivona, xana? 20Nihlayelamfuri nili ku n'wine: n'witabongosa n'widrila, kambe misava mitatrhava. N'wine n'witavaviseka kambe kuvaviseka kwenu kutandruluka kutrhava. 21Loko wansati adjula kuphuluka awavaviseka, hikusa nkama wutlhasile; kambe loko aphuluki n'wana, angahadrimuki kuxaniseka kwake hikola ka kutrhava, hi leswi kuphulukiwiki mhunu misaveni. 22Switanu na n'wine: n'wavaviseka swoswi, kambe nitatlhela nin'wivona, kutani a timbilu tenu titatrhava; na kone akuna mhunu lweyi atakan'wisusela kutrhava kwenu.
23Hi siku ledro, n'winganivutisi ntxhumu. Nihlayelamfuri nili ku n'wine: Hinkwaswu leswi n'witakakombela ku Tatana hi vito dranga atan'winyika. 24Kutlhasa swoswi, an'wisangana kombela ntxhumu hi vito dranga; kombelani, n'witanyikiwa, akuva kutrhava kwenu kuhetiseka.
Yesu ahlula misava
25Nin'wibyeli leswo hi swifaniso; Kambe a nkama wata, lowu ningahatikivulavula ha swifaniso, kambe nitan'witivisa swa Tatana alivaleni. 26Asikwini ledro n'witakombela hi vito dranga; kambe anin'wibyeli leswaku nitakhongota Tatana hinkonta yenu; 27hikuva Tatana hi ntshima yake awan'wirandra hinkwenu hi leswi n'wine n'winirandriki, n'wiva n'wipfumela leswaku nipfi ku Xikwembu Nkulukumba. 28Nisuki ku Tatana, nita misaveni; swoswi nitlhela nisiya misava, nimuka ku Tatana.
29A vadondrisiwa vakwe vaku ku yene: Ahaa! Swoswi uvulavula alivaleni; awahavulavuli hi swifaniso. 30Swoswi hayingelisisa leswaku utiva hinkwaswu, kolahu aswifaneli leswaku mhunu akuvutisa ntxhumu. Hikola ka leswo, hapfumela leswaku upfa ku Xikwembu Nkulukumba. 31Yesu avayangula, aku: Swoswi n'wapfumela xana? 32Vonani, a nkama wata, ni swoswi wutlhasile, lowu n'witakahangalasiwa, mun'wana-ni-mun'wana a tlhelo drakwe, n'winisiya nili vuswanga. Kambe anivuswanga, hikusa Tatana ana mine. 33Nin'wibyeli leswo akuva n'wivani kurula ku mine. Amisaveni leyi n'witavani nhlomulu, kambe tiyani ntamu, mine nihluli misava.
अहिले सेलेक्ट गरिएको:
Yhn 16: NTX2007
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Xironga New Testament with Psalms © Bible Society in Mozambique, 2007.
