MATIUS 7
7
Ijeije Etai Mana
1Ikii me ijeije te etai; ikii maija ijeije ti kite-tita.
2Ikii ijeije tita kidi danite, okeija maija ijeije kitai, daana ikii jaebijadojake menii kodo danite kijaebijadojake kiniitai kouja.
3Magijo ka aki keneka ka peka duba jimu puugee jadomakai, kodeja aki kidaa peka duba ka kemoma dou beu?
4Juwa, kawe dani tijake aki kenekaapa eteete mana, ’Kowaa ke, aki peka duba jimu puugee kaadijawiine,’ etii. Tijake dodou, akija peka duba kemoma topi no.
5Kowaa ke, matabe bagee, akija peka duba kemoma badijawii tiga tijake ewaida dojake aki keneka peka duba ka jimu puugee kodo jaadijawii.
6Jikoo agijo dodi te menii; daana agakato agijo ekina jumaapa te emigimakai. Kou kei ti-toojogo bado ka daimijake jokouga kijake ego kigona tidoke na kojoka.
7Ediimidowei, ikii motiita no. Ubadowei, ikii domakaita no. Damo tugu-tugu tidowei; damo kijakebadoke taita no.
8Ediimija bagee utoma motii kouja, daana ubaja bagee domakai, daana damoutoopa tugu-tugu tija bageepa damo jakebadoke taita.
9Ikii jupi meime, kou danite jokame goti ediimi-toojogo mogo menii?
10Juwa, kou danite udi ediimi-toojogo ugenija menii?
11Okai kouja kou danite ikii peu bagee ikii jokaaneepa enaa agijo menii epi kipa, beu ma ko beu, epaawado ka Ikiitai ediimija bageepa enaa agijo meniitagi.
12Okai kouja me ka kijakei tai ikii ide gai danite, ikii na jakei tai. Kii ke Musaja dijo douja mana ma, tikauwa ka gokobaki tijawiidaiga wegai tita bageeja ka kapogeije ma kouja.
Epaawado ka Jakimakita Makiida Wadoujo Kai
13Ikii tipi damouga wadoujo kai. Damo ko ibo kouja, daana ita ko kapo kouja peu tapa uwe-tai; daana koudaiga me wedaba wakoujo kai.
14Damo ko tipi, daana ita maija akakobome, ajii tai tapa uwetaida ko, daana me wija dani to domakai.
15Puja mana wude-tai bageidoopa make ikii akaato munii. Okei domba ebepeka dani ikeepa mei, kodeja okeija munouga kodaa wojake ego jago jina dani.
16Akiuta uta gojake gaja. Me ka edu maida poo duwaja, mee? Daana ijó pija maida ara uta duwaja, mee?
17Kou dani maija enaa uti gakita enaa uta goja. Kodeja peu uti peu uta goja.
18Enaa uti ka peu uta te goja; daana peu uti enaa uta te goja.
19Pija gakita enaa uta gojawii beu daniija kobimakijake bodija jookogai.
20Okai kouja akiuta uta gojake gaja.
21Me gakita ko beu aneepa ’Tuhan, Tuhan’ naabate-tai bagee epaawado ka jakimakita makiida wadoujo kai. Kodeja epaawado ka Naitai kidaa gata dimi ekowa-tai bagee to.
22Putu naago kodo me wedaba aneepa ’Tuhan, Tuhan’ eniitai; eneete mana ko, ’Beu, mee? akeeka dubaiga inii mana wudeetege, daana akeeka dubaiga enija jaemigimakeetege, daana akeeka dubaiga ego takuu-takuu agijoudo wedaba kei teetege kodo.’
23Tijake ani okeepa ewaa tapa etiita, ’Ani ki ikii kidou beu bagee. Aneepa make uwijake tei, kowaa kei, peu kei te-tai bagee.’
24Okai kouja meija anija mana muto najuwijake dijo dopi, okai dimi jago me idaana ka mogo wado owaa migita dani bukaa.
25Tijake edi epaipo ma uwo degii ma, jajaukija umina puu tijake ma owaa kidi wagigoo. Kodeja okai bogomai beu, mogo maida kabo makijawita kouja.
26Daana meija anija mana muto juwijake dijo te dopi, okai dimi beu me idaana ka i wado owaa migita dani bukaa.
27Tijake edi epaipo ma uwo degii ma, jajaukija umina puu tijake ma owaa kidi wagigoo. Tijake bogomijake umina bogomigo-makidoke tai.”
28Jesus kei mana muto wegajawijake okaija etopita mana muto kodo meido ego takuu-takuu umina tai.
29Okaija etopita kodo bida jago me bukaa danite etopai kouja, kapogeije epi bagee dani bukaa ko beu.
अहिले सेलेक्ट गरिएको:
MATIUS 7: EKG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
