MATIUS 6
6
Dijo Do-tai Manaido Maida Make
1Epeepite gaawe tai: Ikiija ka dijo do-taido kodo me jumaapa nido-tijake ko te kei tai. Kou danite kou kei tipa ko, epaawado ka Ikiitaija petege te domakai.
2Kojoka aki menija gaa kou mana kodo kiida kouda emeeme te tai, matabe bagee ka sembahjang owaa duba ma, itaidaiga ma kei teigai danite ko, me ka ibo nijaike-tijake. Beu maa kou ani kitii, okeija ka petege topi.
3Kodeja aki kou danite agijo menipe ko, etikaato gane ka menita agijo akaato gane ko epi te kai.
4Tijake akija menii agijo ewaa tapa te ke-tita, daana te domakija agijo do-tai Akaitai kidaa abu kapaitagi.
5Daana aki sembahjang tipe, matabe bagee dani te tai. Okei sembahjang owaa duba ma, itaija akaweida ma joonijake sembahjang tai ide kouja, me ka peka nido-tijake. Beu maa kou ani katii, okeija ka petege topi.
6Kodeja aki ki sembahjang tipe, akija kugu duba jokoujo kijake damo jekamijawii. Tijake te edomake Akaitai kidiipa sembahjang tai. Daana te domakija agijo do-tai Akaitai kidaa abu kapaitagi.
7Kodeja ikii sembahjang tipa, mana muto eneene te tai, ojaa bagee ka kei tai danite. Okeija ka gai ko, mana wedaba kou ko nijajuwija ko gai.
8Ikii okei dani te tai. Ikii ediimai beu gaa kodaa Ikiitai kidi ikiija gai peu agijoudo epi kouja.
9Okai kouja ikii kii danite sembahjang tai:
Epaawado ka Iniitai, akeeka ibo awii.
10Akija jakimakita makiida mei.
Akija dimi gaja makiida kei tijawii,
Epaawado maija kei tita danite.
11Ito naago ka naija agijo tiki tiki niimai.
12Iniija peu awitaido ipa nijaikai,
Inii maija peepu nitai bagee ipa ejaikai danite.
13Gaado tapa ti nimejawii,
Kodeja peu tapa make nipipikajawii.
Jakimakita makiida ma, bida bokouto ma, ajiipi bokouto ma.
Aki ipuwe to kouja, kii kidi imo to togoo.
14Kou danite ikii peepu kitai bagee ipa ejaikipa, epaawado ka Ikiitai maija ikiija ka peepu tijawitaido ipa kijaikai.
15Kodeja kou danite ikii peepu kitai bagee ipa te ejaikipa, Ikiitai maija ikiija ka peepu tijawitaido ipa ti kijaikai.
16Kou danite ikii te nai dijo dopa ko, matabe bagee nogimidoke dani te tai. Okeija ebepeka akapaka tijawii kouja, okei te nai dijo doote ega-tijake. Beu maa kou ani kitii, okeija ka petege topi.
17Kodeja aki ki te nai dijo douja gaa dagi maida jeboo tuumijake ebepeka witogai.
18Tijake aki te nai dijo doote ko me idaana ma te kado-tijake, kodeja te edomake Akaitai kidaa to, daana te domakija agijo do-tai Akaitai kidaa abu kapaitagi.
Tonawi Agijoudo
19Makiida ka tonawi agijoudo kotuu te timakai; jina nai ma, tó jakii ma ka peu awe-taida, daana oma bagee owaa kebajake oma mote-taida kouja.
20Kodeja epaawado ka tonawi agijoudo kotuu timakai; kouda ko jina ka te nojake, daana tó te jakijake peu te kijaida, daana oma bagee owaa te kebajake oma te motijaida.
21Akija tonawi agijo to-taida kodaa akija dimi tadu atii kouja.
22Má jato ka lampu kou ko peka kodo. Kou danite akija peka enaa kipa ko, akija má jato maija aweida.
23Kodeja kou danite peka peu kipa, akija má jato maija bunita to. Okai kouja kou danite aki duba ka aweida kodo bunita kipa, beu maa kou, bunita umina kodo.
24Me ka ibo wijaapa te ejuwija; me idaana be egajake joko ka ei egai kouja. Juwa, me idaana ki ejakimakijake joko ka kidi daba ejaikai. Ikii Ugatame ma Mammon#6:24 mege dimi ma enaida te ejakimakija.
Umi-tou Tija Maida Make Gaagaa Mana
25Okai kouja ani kitii, ikiija umi-tou tija maida make ko gaagaa te tai. Kawo ka naija agijo ko nai juwa, uwo juwa, má maida ka makii agijo juwa manaido kodo. Beu, mee? naija agijo ma ko umi-tou tija ko ibo. Daana makii agijo ma ko má jato ko ibo.
26Dodowei, wadouga jawina bedoudo, okei pi kigii tai na beu, uta duwai na beu, owaa duba naija agijo makii na beu, daana epaawado ka Ikiitaija emunai. Beu, mee? bedoudo ma ko ikii ke epaago.
27Meime ikii jupi gaagaa tiga tijake euga ume-wo tija?
28Magijo ka ikiija ka makii agijo maida make gaagaa? Gei tapa ka pi kodo epeepite gai, ejaigai kodo. Okei kei tai na beu, daana gaa gonai na beu.
29Kodeja ani kitii, Suleman kipi maija diiti pagaadagaida ko, kei pi kei ena ma ena dani beu.
30Kodeja kou danite Ugatameja gei tapa diiti awipi ko, ito naago kidi tojake aweetaa naago bodija jookogai agijo kodo; no, beu mee? ikii agijo kijamakii, kowaa kei, epaapate maakodo gai beu bagee.
31Okai kouja, ikii gaagaa te tai, wegaate mana ko, Inii magijo nai? juwa, Inii má uwo nai? juwa, Inii magijo má maida makii? juwa.
32Kei utoma ojaa bageido bopi kepai agijo kouja. Kodeja kou agijoudo utoma ikiija gai peu kodo epaawado ka Ikiitai epi kidi.
33Kodeja ikii ke okaija jakimakita makiida ma, maakodo bokouto ma tiga bopi kepajawii; tijake kei utoma ikeepa kijaawii.
34Okai kouja ikii gaagaa te tai, aweetaa naago ka mana maida make. Aweetaa naago ka gaagaa kodo kou naago gaagaa tija kouja. Naago gakita ka gaagaa tijaija tiki kojoka.
अहिले सेलेक्ट गरिएको:
MATIUS 6: EKG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
