Ioane 21
21
1HWABAN ta je ûnyi e haba Iesu ame ka omanenâ e bi hmetu ka laten hnyi köien Tiberia; ke walang hwakecin hnen hna omanenâ e bi. 2Ame ûkhacaköu thö Simona Peteru, me Toma ke ien Didumo, me Nathaniela at Kana hnyi Galilaia, me li laku Zebedaio, me ke li aten minya. 3Haingö Simona Peteru ködrin, ka habe, Oge me he but ka thut. Haingödrin kâu, ka habe, Ohmun a hnyi he. Ödrin e he but me ölö thö ka hnyi hu; ke ba hanidrin hnyi lit eling. 4Ke hnyi okubelit ame tot Iesu hnyi hobatköiö, ke ca khana laten me Iesu ling. 5Iesu ame ha ködrin, ka habe, Lakuk lö, e hu hanibun? Me ödrin e thu kâu, ka habe, E ba. 6Me haingen ködrin, ka habe, Thong ut ert hnyi ke keihen metân hu, mʼ öbun e ka wâ. Me ödrin e thong ut, ke walang ang, e ca khanʼ ödrin he ka lelo ert anyin ae se hia hmonyin ta je wâ. 7Haba aten waleji ame hnyok kâu Iesu, ame ha kö Peteru, ka habe, Than e. Ke a long ut Simona Peteru a Than e, me e ame khavâ anyin ûkot (anyin a ga uny), me e ame utut hnyiköiö ai. 8Ke e but ang keihen laten hon hu ae ûhnyûkong (e ca sâkâû gadrin hobatköiö, ame ne tu haded je kubit) adre me lelo tilâ ert me ta je wâ. 9Ke ödrin e o thö hot, ödrin e wâ meic alep, me je wâ hnyi hon, me areto. 10Iesu ame ha ködrin, ka habe, Hö jem ke je wâ öbun e hom walang ang. 11Me ame ölö thö Simona Peteru, me lelo ert hot ai, ae unöngöt ge ta je wâ ae gan a wan haded me fifte theri: ke a ca khekhe bi ert ge ta je wâ ae se hia. 12Iesu ame ha ködrin, ka habe, Ai öbun ka han. Ke ba ke at ge laten ae hwege hnyekon he ka hnö e, ka habe, U ia? anyin ae khanʼ ödrin a wale Than. 13Ame o Iesu, me hom areto, me je wâ, me ham ködrin. 14Wale hnö Iesu hna okun omanenâ e bi ka laten, hwaban hnen hna möt hmetu ûheny hnyi hna mok.
15Ke ödrin e hia but han haba Iesu ame ha kö Simona Peteru, ka habe, Simona nöku Jona, u me hnyok könya hon hnyat ang? Haingen kâu, ka habe, E, Than; u me wâ a inya oge me hnyok köu, E ame ha kâu, ka habe, Hûn bi ju halek je arenio. 16E ame olo ha kâu, ka habe, Simona nöku Jona, u me hnyok könya? Haingen kâu, ka habe, E Than u me wâ inya oge me hnyok köu. E ame ha kâu, ka habe, Tuö biju halek je mamoe. 17E ame ibi okun ba kâu, ka habe, Simona nöku Jona, u me hnyok könya? Peteru ame hmak hnyekon anyin a e okun dut ha kâu, kahabe, U me hnyok könya? Me e ame ha kâu, ka habe, Than lö u at ame wâ ta je ûnyi hia; u je wâ but a inya oge me hnyok köu. Iesu ame ha kâu, ka habe, Hān biju halek je mamoe. 18E hnathu, e hnathu, inya oge me ha köu, ka habe, Hnyi ânyâm hidröu, u me ka hamâm bi oweikö u, me he ka hnyi dok u me wem; ke u ka hingat ut, u me he ka inâ li hnyamâm, kʼ ame he ke at ka oweikö u, me hum u ka hnyi dok u me ca wem. 19E ame ha e, ame omanenâ bongon mok ame he ka moko me hnân ogânâ Khong. Ke a hia but ha e, e ame ha kâu, ka habe He hotuk. 20Peteru ame hwio thö me wâ aten ame hnyok kâu Iesu, ame he hoton, waleji at ame laba hnyi ûlainy hnyi ûen han, me ha, ka habe, Taböny Than ie at ame he ka alecuo u? 21Peteru ame wâ e, me e ame ha kö Iesu, ka habe, Than lö, ame he ka hawa at ang? 22Iesu ame ha kâu, ka habe, Oge ne wek e ame he ka ûlubahing ke ne o but oge me o, hnân eû köu? he bi u hotuk. 23Me ame lung igigilo hofuc e unyin je liamekeiny, a gʼ ame ca he ka mok aten eling: ke a ca ha Iesu kâu, a e ame ca he ka mok; ke so bi, Oge ne wek e ame he ka ûlubahing, ke ne o but e ame o, hnân eû köu? 24Walang aten at ame ohnatho ta je ûnyi e me sihnalimen: ke e khanʼ öta but ae hnathu.
25Ke se hia hmonyin minya bi ta je ûnyi a mâdrâ Iesu, ke adre ne tha sihnalimen hia, oge me ûnykûme e ca ûcû bi hmeledrany ka ta je tusi adre me he ka sihnalimen.
अहिले सेलेक्ट गरिएको:
Ioane 21: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
