Genese 6
6
1KE hnyi ûen ame hwân ka hu tavat ae se hia eang hmeledrany, ke adre hnokoâ lakudra je hlu, 2ke haba je lakon Khong adre me wâ je lakon tavat a je hlu a ödra hmanenang; me adre me hom me laöiödra je hlu ae ve wedra. 3Ke Iehova ame ha, ka habe, Ame ca he bala hanuk ba ûö hwege me at, anyin a e thibi unyin: ke so bi haba bonginy je bong ame he ka khaca haded ke twente ta je huna. 4Haba hnyi je bong eling e hu je Nefilim eang hmelen, me hnyi je bong minya a biliny, waleji hnyi ûen ame o but ta je lakon Khong ka lakon tavat a ta je hlu, ke adre me hnokoâ lakudra: haba tavat eling waleji tavat ae hwege ehac, me tavat ae lung. 5Ke a wâ but Iehova a e gan hmâ butmonuiny at eang hmeledrany, ke kong ut ta je hna ûnykûme hia eû hnyi hnyekudra hnyi ta ogo bong hia. 6Ke Iehova ame ietra a gʼ ame hia but op at eang hmelen, ke e hmak ut hnyekon. 7Ke Iehova ame ha, ka habe, Oge me he ka ohia at waleji oge hia but op, ûnyi hnyi kânâ; wale at, me menoiny hnyot, me ûnyi ame iyâû, me meno ame gâ ethö; anyin a khenyi but hnyekuk ge hnök hna up ödra. 8Ke haba Noa ame wâ so hnyi hnyimakö Iehova.
9Walang ta je dö anyi Noa. Haba Noa, at ae wisa, ke fâfâ but hnyi anyin ta je dö: haba Noa ame tha he me Khong. 10Ke Noa ame hnokoâ ta lakon a kun, jia Sema, ma, Hama, me Jafeta. 11Ke ikiki thö hmeledrany hnyi hnyimakan Khong; kʼame unöngötö hmeledrany ge ûkonguny. 12Ke Khong ame wâ hmeledrany, ke wâ bi a ikiki thö; anyin a hia but tavat hia oikikiâ dedra eang hmelen.
13Ke Khong ame ha kö Noa, ka habe, A o but hnyi hnyimakök obiny tavat hia thithö; anyin a unöngötö hmeledrany hnen ûkonguny ûnyi gadra; ke wâ bi oge me he ka tha ohiʼ ödra me hmeledrany. 14Tibet ju hobi köu aka ge utö a gofa; ke u me he ka ânyâ ta je hnyeule hnyin aka, ke u me he ka okeceâ eiö hnyin me hoton ge ouge. 15Ke walang hwakecin u ma tibet e, ka habe, kun ta haded kubit ibeûen aka, ke fifte kubit ûlauen, ke thöte kubit ibeûen gö-ranyai. 16U ma he ka tubeaka ethö hon, ke u ma he ka oumo e ethö hnyi kubit a khaca; ke u ma he ka bi hwanumen aka hnyi ke haten; ke u ma he ha ânyâ kun ta deö dek, khaca hnyikânâi, me ke at a loiny, me kuniny, eiö hnyin. 17Ke wâ bi, inya oge me he ka oûkhutukhavâ hmeledrany ge uoû, me me he ka ohia unyin hia ae hu hnyin homenâiny möt ûnyi eang hmelen; kʼ ame he ka mokcu ta je ûnyi hia thithö eang hmelen. 18Ke oge me he ka otilâ hmâ anyik ûhihinyköu möu; ke u ma he ka dit ka hnyi aka, u, me je lakom, me âiâm, me lâiân je lakom a tha ödrin möu. 19Ke u ma he ka hom ka hnyin aka ûsa lo li ûnyi hnyi ta je meno hia thithö, me me tha möt möu; ûsa khaca baga me momo. 20A je meno ame gâ, hoton bongudrin; me ta je meno a vak can, hoton bongudrin, me ta je ûnyi hia ame iyâûâ kânâ, hoton bongudrin, ame he ka o köu ûsa lo gadra hia, mʼ adre me möt. 21Ke u ma he ka hom köu ûnyi ge ta je jeû hia thithö hnân han, me ûkhöûnâ unyâm; kʼ ame he ka âm, me ö ʼdrin minya. 22Haba Noa ame ânyâ helâe; e ame ânyâ hoton ta je ûnyi hia Khong ame hûna kâu.
अहिले सेलेक्ट गरिएको:
Genese 6: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society