Genese 11
11
1KE khaca thibi hwan hmeledrany hia, me khaca thibi hofuc. 2Ke adre me tiga hok töt deiö, me adre me wâ ke dok ae thahon hnyi hnyei Sinara; ke adre me labā e. 3Ke adre me ûhaköuâ, ka habe, E so ate me op je veto kânâ, me le wia. Ke adre me hom veto kânâ me hnân veto, me hmudra hnân dröu. 4Ke adre me ha, ka habe, E so ate me otilâ ke taun, me tap ae beû hmâ bân hnyi dranyai, mʼ ate me ölungâ iöta; wâ adre nye ovesei ota hnyi hmeledrany hia. 5Ke Iehova ame utut ka wâ taun me tap, ame otilâ lakon tavat. 6Ke Iehova ame ha, ka habe, Wâ bi, khaca thibi hnyei ödra, ke khaca thibi hwen hodra hia; ke walang ûnyi adre me hwân he ka ânyâ: ke haba walang ang, ame ca he ka hmak ködra ke ûnyi adre me beânyâ. 7E so ate me utut me omonumonâ hwen hodra, me me ca khana ke at hofuc hwan ke at. 8Me Iehova ame ovesei ödra ûheny e ka hnyi hmeledrany hia thithö: ke adre me hna ju he ka otilâ taun. 9Anyin a wale, adre me hwenyi ien e, Babela; anyin a Iehova ame omonoâ eling hwan hmeledrany hia: ke Iehova ame ovesei odra ûheny e ka hnyi hmeledrany hia.
10Walang ta je dö anyi Sema, khaca haded hunai Sema, ke e ame knöku Afasada hnyi huna a loiny hwaban uoû: 11ke haba möt anyi Sema, hwaban hna hnöku Afasada, me thabûng haded ta je huna, ke e ame hnokoâ je lakon baga me hlu.
12Ke thöte faiv ta je hunainy möt anyi Afasada, ke e ame hnöku Sala: 13ke vak ta haded ke kun ta hunainy möt anyi Afasada hwaban hna hnöku Sala, ke e ame hnokoâ lakon je baga me hlu.
14Ke thöte ta je hunainy möt anyi Sala, ke ame hnöku Heberu: 15ke vak ta haded ke kun ta je hunainy möt anyi Sela, hwaban hna hnöku Heberu, ke e ame hnokoâ ta je lakon baga me hlu.
16Ke thöte foa ta je hunainy möt anyi Heberu, ke e ame hnöku Pelege: 17ke vak ta haded ke thöte ta je hunainy möt anyi Heberu hwaban hna hnöku Pelege, ke e ame hnokoâ lakon baga me hlu. 18Ke thöte ta je hunainy möt anyi Pelege, ke e ame hnöku Reu: 19ke lo li haded ke nain ta je hunainy möt anyi Pelege hwaban hna hnöku Reu, ke e ame hnokoâ lakon baga me hlu. 20Ke thöte tu ta je hunainy möt anyi Reu, ke ame hnöku Serugi: 21ke lo li haded ke seven ta je hunainy möt anyi Reu hwaban hna hnöku Serugo, ke e ame hnokoâ lakon baga me hlu.
22Ke thöte ta je hunainy möt anyi Serugo, ke e ame hnöku Nahora: 23ke lo li haded hunainy möt anyi Serugo hwaban hna hmöku Nahora, ke ame hnokoâ lakon baga me hlu.
24Ke twente nain ta je hunainy möt anyi Nahora, ke e ame hnöku Tera: 25ke khaca haded ke naintin ta je hunainy möt anyi Nahora hwaban hna hnöku Tera, ke ame hnokoâ lakon je baga me hlu. 26Ke sevente ta je hunainy möt anyi Tera, ke ame hnöku Aberama, me Nahora, me Harana.
27Ke walang ta je dö anyi Tera. Haba Tera ame hnöku Aberama, me Nahora, me Harana; ke Harana ame hnöku Lota. 28Ke ame mokcu Harana hnyi hnyimakö Tera a kamen hnyi hnyei adre hnokoâ e hnyin, wale Ure hnyi Kaledaia. 29Ke Aberama me Nahora ödru me ve hok âiân: haba ien öiö Aberama, me, Sarai; ke haba ien öiö Nahora, me, Mileka nöku Harana wale kamö Milika me kamö Iseka. 30Ke toûnyi Sarai, e ba nokon. 31Haba Tera ame hom Aberama a nokon, me Lota nöku Harana, a öbiny, me Sarai a ûngon, öiö Aberama a nokon; ke ödrin e tha he ûhedrin Ure hnyi Kaledaia ka he ka hnyi hnyei Kanana; ke ödrin e o but Karan me laba e. 32Ke haba ta je bongu Tera tu haded ke faiv je huna: ke Tera ame mokcu hnyi Karan.
अहिले सेलेक्ट गरिएको:
Genese 11: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society