Ta je huliwa 5
5
1KE haba ke baga Anania ien, me Safairo a âiân, ödru me ûco ke hnyei, 2me behânâ duöngâ ke keihen hwaban, ke e khana minya momo, me hom ke keihen, me ip e hnyi je hnyeûcan je aposetolo. 3Ke haba Peteru ame ha, ka habe, Anania lö, ieû ga Satana ame ounöngötâ hnyekom, me u me he ka thoi ka Hanu Kap, me behânâ duöngâ ke keihen hwaban hnyei. 4Hawa, ca ânyâm ehac kʼ ödra tiga ca ûco? ke hwaban hnâm hna ûco, hawa ca hamâm bala bi he ka muso? ieû gam u me ûnykûme ûnyi eang hnyi hnyekom? u me ca thoi ka at, ke ka Khong bi. 5Ke a long ut Anania hofuc e, me e ame ū but a ga mokcu: me ame o but ot ae gan hmâ kodra hia adre me long. 6Me ame todrö wahidröu ka lan e, ke adre me sam e hnyou ai me konâm.
7Ke hwaban e, helâ me kun ta awa, me ame didro âiân, ke ca khana hna ânyâ. 8Haba Peteru ame ha ka momo ka habe, Ha thö könya, hawa, wale thibi ang hwaban hnyei obe ûco? Ke haba momo ame ha, ka habe, E, wale thibi e. 9Haba Peteru ame ha kâu, ka habe, Ieû gabu ae tha hnyekubu he ka cubec Hanon Than? wâ bi, eû hnyi hwanuma tavat adre me konâm âiâm, ke adre me he minya ka sam u. 10Me ame ie û but momo hnyi li hnyeûcan kʼ ame mokcu: ke ame didro wahidröu me wâ e a mokcu, me adre me sam but hnyou ai, me tha konâm me âiân. 11Me ame o but ot ae gan hmâ ka ekalesia hia, mʼ ödra hia minya adre me long ûnyi e.
12Ke se hia ta je haten me ûöman adre me ânyâ unyin tavat ge je hnyamen ta je aposetolo; ke ödrin e labö ûkhacaköu hia hnyi poretiko anyi Solomona. 13Ke ca hwege hnyekon keihen he ka tha e mödrin; haba tavat, me adre me ogânʼ ödrin; 14ke se hia obaga me omomo adre me labageju ka Than me hwege tot he ka tha hien mödrin; 15waleling mʼ adre me hom ta je komok ka hnyi je getheniny taun, me ip ödrin hon je hna mokut me je tap, me me na omi hnedrong keihen ge hmenu Peteru, e ka he. 16Ke ame o but minya keihen ae se hia ûhedra hnyi ta je taun igigilo Jerusalema, adre me hom ta je komok, me tavat minya ame oveci ödra hnen je hanu ae kong: ke adre me ve omeli ödra hia.
17Me ame todrö at bihut ae nua, mʼ ödra hia a tha ödra mē, (wale hnyat hanen ta je Sadukaio), ke ödra unöngöt ge ihuhnyinköu, 18mʼ adre me kât je aposetolo, me ip ödrin hnyin uma ceat. 19Ke ame khong je hwanumen uma ceat hnen angela anyin Than hnyi hnyinghet, me hum ödrin dut hnyou ai, me ha, ka habe, 20He thʼ öbun ka tot hnyi uma kap, me khetâ ka tavat ta je hofuciny Möt eling. 21Ke ödrin e long ut, me ödrin e didro ka hnyin uma kap hnyi hnyomakatu kong, me ûne. Ke ame o but at bihut ae nua, me tavat a tha e mē, me hawâ ûkhacaköuâ tavat ûhnenamö, me tavat musi hia unyin at Isaraela, me e ame ûkhûnöng ka hnyi uma ceat he ka hum ödrin. 22Me ame be but lathnyaba, ke ba at ut hnyi uma ceat; me ödrin e hmetu me thumetu, ka habe, 23Ohmun e wâ but uma ceat, kʼ adre me hlöng wia, kʼ ame tot eû hnyi je hwanuma tavat tue: ke ohmun e hia but khong, me ba at ohmun e wâ hnyin. 24A long ut hofuc e hnen taben uma kap me je taben tavat bihut, me ödrin e loloâ gadrin ame ne he ka hawâ bi. 25Me ame o but ke at he ka thumetu ödrin, ka habe, Wâ bi, haba hnyat öbun e ip ödrin hnyin uma ceat, me ödrin e tot hnyin uma kap me nâ tavat. 26Me ame tha he but taben me je lanyin, me hum ödrin, wiʼ ödrin, anyin a ödrin e outen tavat, wâ adre nye lûʼ ödrin ge veto. 27Ke ödrin e hia but hum ödrin dut, me adre me otilʼ ödrin dö hnyi hnyimakan ûhnei. Me at bihut ae nua ame hnei ödrin, ka habe, 28Ohmun e hûna wia köbun, mʼ öbun e ca he ka ûne hnyi ien e: ke wâ bi, öbun e ounöngötâ Jerusalema ge hnobun hna ûne, ke öbun e ûnykûme he ka jönihmun dren at e. 29Haba Peteru me je aposetolo ödrin e thu, ka habe, E ûcû kohmun he ka long hoton Khong hon at. 30Haba Khongon lakamötâ e ame otilö Iesu, waleji öbun e hlingâ me uhno hnyi ûö. 31E thibi at Khong ame ogöranyâ hnen hnyamen a metân hnân Than me At ûhomeli, me me he ka ham ka at Isaraela ietra, me hna thang ta je hulo. 32Ke ohmun ang hnyat ohnathoâ ta je ûnyi e; ke helâe minya Hanu Kap, waleji hnen Khong hna ham kodra tavat adre me long hoton. 33Adre hia but long e, me adre me hmönyidra gan hmâ, me behlingʼ ödrin. 34Ke ame todrö ke at, at Faresaio, hnyi ûhnenamö, Gamaliela ien, at ame ûnö hnanyibu, ke e lung so ka tavat hia, ke e ame hûna he ka bödra ka kunâ hnyat eling hnyou ai hnyi ûen ae okhulit. 35Ke haingen kodra, ka habe, At Isaraela lö, wâ eâu öbun hna he ka ânyâ ka hnyat ang. 36Anyin a hnyi je bong ehac a o thö Theuda, me ha, a e at ae beönua; me ame ûhkacaköu kâu tavat ae se hia, helâ me foa haded; ke adre me hlingâ e; ke haba tavat hia adre long hoton me adre me vese but, me hiʼ ödra bi. 37Hwaban at eling ame o but Juda at Galilaia hnyi ûen he ka sihnalimen tavat, me lelo kâu keihen tavat: kʼ ame hia minya ju; me adre me vese hia but tavat adre me long kâu. 38Ke walang ang inya oge me ha köbun, ka habe, ûsâkâûö but me hnyat ang, me hnʼ ödrin dut: anyin a ne ûnyi ge at hwakecin ang, me huliwa eang, ame he ka hia thiju: 39ke a ne ûnyi e ge Khong, e ca khanʼ öbun he ka ohia; wâ adre nye ö ʼbun, öbun e vat me Khong. 40Me adre me ogâ e: ke adre hia but hawâ je aposetolo me osi ödrin, me hûna ködrin he ka ca fuc hmetu hnyi iö Iesu, me adre me hnʼ ödrin dut. 41Me ödrin e he but ûhedrin hnyi hnyimakan tavat ûhnenamö, me senyin anyin adre me hna ködrin he ka kong can Ien. 42Ke ödrin e ca menâ bi hnyi je bong hia be ka ûne, me kheti Iesu Keriso hnyi uma kap me ta je hnyaba.
अहिले सेलेक्ट गरिएको:
Ta je huliwa 5: IAAI
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
maintained by the British and Foreign Bible Society
