Luu 19

Jusu ke Saikeɔ

1Jusu sǐ-a dǒ Jɛwlekoo i̍-ɛ, nɛ̀ ɔ̍ chɛ̍n wlɔ̀ tìè. 2Nɛ̀ jɔ̍gbau due nɛ dǒ wlɔ̀-a chɛ̀ di̍i̍, ɔ̍ nynɛ̌ bo Saikeɔ. Ɔ̍ nu̍ taa̍sìh sà nyɔ̍-a dlǔtu, iě ɔ̍ pàn. 3Ɔ̍ pɔ̀n Jusu jě-ɛ i̍. Jɛ ɔ̍ kɔǎn ja̍, wɛ̀ nyɔ̍ɔ tìè i̍, sɔ ɔ̍ se̍ ɔ̍ jě-ɛ bɛ̌ɛ. 4Ɛ̍ tìh-ɛ, ɔ̍ gba̍ ple̍-ɛ dě wìè nya̍ tà Jusu-a mu̍-a jii-ɛ. Iě ɔ̍ jǎ dě tu̍ ja̍ wɛ̀ ɔ̍ iě Jusu jě. 5Jusu nyni̍-a dǒ tà-a chɛ̀-ɛ, iě ɔ̍ gbɛ̀n dě ja̍i̍, wɛ̀ ɔ̍ la̍a̍, “Saikeɔ, tèwe ìè tlìh. Dɛ̍nu̍ɛ, ǐn kɔn iě dě ìn blǐ gbò paɛ sèàn.”

6Wɛ̀ Saikeɔ tèwe ɔ̍ tlìh, iě ɔ̍ gba̍ Jusu gbò we̍ dǒ mɔna̍-a sǔh we̍. 7Nyɔ̍ kli̍hgbɛ̍ jě-a dɛ̍ la-ɛ, iě u̍h-a wlu-i wɔ̍ɔ̍n i̍. U̍h la̍a̍, “Jɔ̍gbau la, ɔ̍ mu̍ gblɛ̍n sɔ̀ɛ̀n nyɔ̍ blǐ koe la̍ wa.”

8Wɛ̀ Saikeɔ nyna i̍, iě ɔ̍ la̍a̍ dě Joi we̍, “Nyɔ̍ klaa, ǎn mu̍ ǎn kɔn-dɛ̍ᵻ kli̍hgbɛ̍-a fɔ̌ nyɔ̍gbà nyɔ̍ nyǐ. Nɛ̀ pò ǐn di̍ nyɔ̍ kanieǐ dǒ dɛ̍-o-dɛ̍ we̍-ɛ, nɛ̀ ǎn mu̍ ɛ̍ gbɔ̍ᵻ nyìɛ̍ wɔ̀ɔ̀ poe.”

9Wɛ̀ Jusu la̍a̍ dě ɔ̍ we̍, “Jɔ̍gbau la, ka ɔ̍ nu̍-a Eblaɛɛn-a jǔ ke-ɛ, pǔh-ɛ pa̍ nɔ̌ ɔ̍ blǐ gbò sèàn. 10Dɛ̍nu̍ɛ, Nyi̍ɔ̍-a Jǔ ji̍ kwlǎ sie nyɔ̍ i̍ pɔ̀n la̍-a ɔ̍ iě u̍h pǔh-i.”

Jusu po̍ kòo̍ wlǐ-a nɛnǎ

(Matio 25.14-30)

11Ti̍ u̍h-a po̍-a dě Jusu we̍ dounᵻɛ́, dǒ ɔ̍ poe nɛnǎ dě u̍h we̍. Ɔ̍ kɔǎɛn-a Juluslɛn i̍-ɛ, sɔ nyɔ̍ɔ jajeɛ̍ Nyɔsoa-a kmɔ̌ wlu̍ i̍ kɔn-ɛa mu̍ la̍ ji̍ de. 12Ɛ̍ tìh-ɛ, Jusu la̍a̍, “Jɔ̍gbau due ɔ̀ sɔ-a dě blǔh baa-a chɛǐ-ɛ bo ɔ̀ mu̍ dakɔ̍ de̍e̍ u̍h iě ɔ̍-e blǔh baa we̍i̍ nu̍, wɛ̀ ɔ̍ iě de̍ ji̍. 13Ɔ̍ wɔ̌an mu̍-u tìh-ɛ, iě ɔ̍ dǎ ɔ̍ pòi̍nynuu̍ bla̍-a pùè-ɛ. Jɔ-ɛ, nɛ̀ ɔ̍ nyǐ ɔ̍ kòo̍ wliɛ̍ due. Iě ɔ̍ la̍a̍ dě u̍h we̍, ‘Mɔ̀ po̍-e i̍h pɛlǔh te̍e̍ wɛ̀ iě ji̍.’ 14Jɛ ɔ̍ blǐ nyɔ̍ faɛn ɔ̍-ɛ, ɛ̍ kɔn u̍h dbo̍ ɔ̍ u̍h-a wlu̍ kwa̍ blě nyɔ̍ kɛ̍n i̍. U̍h la̍a̍, ‘À se̍ pɔ̀n jɔ̍gbau la ɔ̍ iě à wlu̍ i̍ kɔn.’

15“Jɔ̍gbau laa̍ u̍h nu̍ ɔ̍ blǔh baa we̍i̍, iě ɔ̍ ji̍ de̍ka. Wɛ̀ ɔ̍ sèàɛ̍ pòi̍nynuu̍ ɔ̍ nyǐ-a wlǐ-ɛ wlùh u̍h iě dě ɔ̍ we̍ ji̍ ɔ̍ iě dɛ̍ u̍h jě-a dǒ wlǐ laa̍ kɛ̍n-ɛ juo. 16Jɔ ji̍-a sàǐtòò-ɛ, ɔ̍ la̍a̍, ‘Nyɔ̍ klaa, ǐn jě pùè dǒ due ìn nyǐ-a m-ɛ kɛ̍n.’ 17Wɛ̀ ɔ̍ la̍a̍, ‘Ɛ̍ nmɔ jii̍, mɔ̀ pòi̍ju chɛ̀. Ka nyɔ̍-a tè-a la̍ ìn wlì dǒ dɛ̍ juwɛ we̍-ɛ, àn mu̍ wlɔ̀ᵻ gbàɛ̀ pùè wlu̍ i̍ kɔn.’ 18Iě ɔ̀ po̍-a sɔɔ̌n-ɛ ji̍. Wɛ̀ ɔ̍ la̍a̍, ‘Nyɔ̍ klaa, ǐn jě m̀m̌ dǒ due ìn nyǐ-a m-ɛ kɛ̍n.’ 19Iě ɔ̍ la̍a̍ dě ɔ̍ we̍, ‘Àn mu̍ wlɔ̀ᵻ gbàɛ̀ m̀m̌ wlu̍ i̍ kɔn.’ 20Wɛ̀ pòi̍ju dɔɔ ji̍, iě ɔ̍ la̍a̍, ‘Nyɔ̍ klaa, àn wliɛ̍ ìn siee-a m-ɛ la. Ǐn tè ɛ̍ i̍ nɛkɛ̌n nɛkɛ̌n dǒ pàa̍ngbaa mlǎ i̍. 21Dɛ̍nu̍ɛ, ìn kma wɔ̍n, ɛ̍ kɔn ǎn ple̍ ìn jǔ. Dɛ̍ ìn se̍-a kɔn-ɛ bo àn dǔ-u, iě àn gbǎn dɛ̍ ìn se̍-a tù-ɛ.’ 22Wɛ̀ ɔ̍ dlǔtu la̍a̍ dě ɔ̍ we̍, ‘Mɔ̀ kà kɔn pòi̍ju. Ǎn mu̍ ìn kɛ̀n sà dǒ àn chɛ̀-a wɔ̍i̍n wlu̍ kɛ̍n. Ìn juo ɛ̍-ɛ ka ǐn kma-a wɔ̍n iě dɛ̍ ǐn se̍-a kɔn-ɛ ǎn dǔ-a ɛ̍-ɛ, wɛ̀ dɛ̍ ǐn se̍-a tù-ɛ ǎn gbǎn-a ɛ̍-ɛ, 23dɛ̍nu̍ ìn se̍ ǎn wlǐ la dě pɛ̀ɛ̍n po̍ ɛ? Wɛ̀ ǐn ji̍-a ka de̍-ɛ, iě i̍h ke i̍h-a po̍ kɛ̍n i̍ jě de ɛ?’ 24Wɛ̀ ɔ̍ dlǔtu la̍a̍ dě nyɔ̍ ùh nyna doǒ i̍-ɛ we̍, ‘Mɔ̀ sà ɔ̍ wliɛ̍ la kwa̍a̍ mɔ̀ iě ɛ̍ ɔ̀ blě-a pùè-ɛ nyǐ.’ 25Wɛ̀ u̍h la̍a̍ dě ɔ̍ we̍, ‘Nyɔ̍ klaa, ɔ̍ blě pùè wa.’ 26Iě ɔ̍ la̍a̍, ‘Ǎn sèàɛ̍ mɔ̀ wlùh, nyɔ̍ kli̍hgbɛ̍ ùh blě-a dɛ̍-ɛ, nɛ̀ u̍h-a mu̍ dɛ̍ dɔu nyǐ-ɛ. Jɛ nyɔ̍ ɔ̀ se̍-a dɛ̍ blě-ɛ, ɔ̍ dɛ̍ juwɛ-a chɛ̀ ɔ̍ blě-a de-ɛ, ɛ̍ mu̍ ɔ̍ kwa̍a̍ sà-ɛ. 27Jɛ ǎn nyɛ̌-nyɔ̍ laa̍ ùh se̍-a pɔ̀n iě-a u̍h wlu̍ i̍ kɔn-ɛ, u̍h nɔ̀ɔ̍, mɔ̀ ja u̍h mɔ̀ iě u̍h dbǎ da̍a ǐn jlǐhwai.’ ”

Jusu sǐ Juluslɛn i̍

(Matio 21.1-11; Maɛ 11.1-11; Chɔɔn 12.12-19)

28Jusu wɔ̀-a ɛ̀ la bla̍-ɛ, iě ɔ̍ gbǎ dǒ u̍h jǔ ɔ̍ mu̍ Juluslɛn. 29Ɔ̍ kɔǎɛn-a Bɛfaji ke Bɛtani wlɔ̀ i̍ wɛ̀ dǒ Ɔle-Tu̍ᵻá Tlu̍h gbɔ̀ì-ɛ, iě ɔ̍ dbo̍ ɔ̍ kòà sɔɔ̌n nya̍. 30Ɔ̍ la̍a̍, “Mɔ̀ mu̍ dě wlɔ̀ nɛ-a dǒ à jǔ-ɛ di̍i̍. Pò mɔ̀ sǐ wlɔ̀ i̍-ɛ, mɔ̀-a mu̍ soo̍pà jǔ jě ɛ̍ mɔɛ i̍. Nyɔ̍-ɔ se̍a dǒ ɛ̍ kɛ̍n i̍ tè. Mɔ̀ pɔ̀ni ɛ̍ mɔ̀ iě ɛ̍ da̍a ja. 31Pò nyɔ̍ tèle mɔ̀ i̍, ‘Dɛ̍nu̍ mɔ̀-a pɔ̀ni ɛ̍ ɛ?’ Nɛ̀ mɔ̀ la̍a̍, ‘Dlǔtu-a pɔ̀n ɛ̍.’ ”

32Wɛ̀ ùh ɔ̍ dbo̍-a mu̍. Iě ka ɔ̍ nu̍-a u̍h wlùh sèàɛ̍-ɛ, wɛ̀ u̍h nu̍ ɛ̍ la̍a̍n jě-ɛ. 33U̍h-a pɔ̀ni-a la̍ soo̍pà laa̍-ɛ, iě ɛ̍ kɔn-nyɔ̍ la̍a̍ dě u̍h we̍, “Dɛ̍nu̍ mɔ̀-a pɔ̀ni ɛ̍ ɛ?”

34Wɛ̀ u̍h la̍a̍, “Dlǔtu-a pɔ̀n ɛ̍.” 35Wɛ̀ u̍h ja ɛ̍ Jusu. Iě u̍h slo̍ u̍h-a plɛ̀i̍ᵻ dǒ ɛ̍ kɛ̍n i̍. Wɛ̀ u̍h tè-e Jusu i̍ dǒ ɛ̍ kɛ̍n. 36Ɔ̍ na-ɛa dǒ ɛ̍ kɛ̍n-ɛ, wɛ̀ nyɔ̍ɔ slo̍ u̍h-a plɛ̀i̍ᵻ dǒ wìè-i.

37Jusu kɔǎɛn-ɛa Juluslɛn i̍ wɛ̀-ɛ, dǒ Ɔle-Tu̍ᵻá Tlu̍h tlìh la̍-ɛ, sɔ ɔ̍ kòà tlùgbei̍ laa̍ u̍h-a nu̍ la̍ mɔna̍ sǔh. Iě u̍h-a wǐi i̍, u̍h-a po̍ Nyɔsoa tìhwe̍ dǒ jbaɛdih u̍h jě-a wɛ̀-ɛ we̍. 38U̍h la̍a̍, “Pɔ̀ìě dǒ Blǔh Baa ɔ̀ ji̍-a dǒ Joi-a nynɛ̌ kɛ̍n-ɛ we̍. Wlùh-a i̍ tè-ɛ dě ja̍i̍wlɔ̀, nɛ̀ tìh-a i̍ bɛ̌-ɛ dǒ Nyɔsoa we̍.”

39Wɛ̀ Fɛlesii nyɔ̍-a duuh ùh nɛ-a dě nyɔ̍ tlùgbei̍ laa̍ nynɛ̌-ɛ, u̍h la̍a̍ dě Jusu we̍, “Dlǔtu, po̍ àn kòà la bɔ̌ i̍.”

40Jusu la̍a̍, “Bɔ̌ ǐn sèàɛ̍ mɔ̀ wlùh, pò u̍h-a jɛ nɛ tìi̍n-ɛ, sɔɔ̌ᵻá chɛ̀ la i̍h-a mu̍ i̍ wǐi.”

Jusu fìn-i Juluslɛn dlǔ i̍

41Ti̍ Jusu kɔǎɛn-ɛa Juluslɛn i̍-ɛ, ɔ̍ gbɛ̀n-a dě wlɔ̀-ɛ, wɛ̀ ɔ̍ fìn-i ɛ̍ dlǔ i̍. 42Ɔ̍ la̍a̍, “Sèàn weɛ̍ la, ǎn pɔ̀n mɔ̀-a chɛ̀ iě dɛ̍ ɛ̀ blě-a wlùh-a i̍ tè-ɛ juo de. Jɛ ɛ̍ mǎ-ɛ mɔ̀ jlǐh. 43Ɛ̍ mu̍ weɛ̍ kɔn dǒ mɔ̀ we̍, wɛ̀ mɔ̀-a nyɛ̌-nyɔ̍ iě mɔ̀ dě pìe̍e̍ po̍. Nɛ̀ u̍h-a mu̍ mɔ̀ de̍ ke nya̍ kaɛn. Wɛ̀ u̍h iě mɔ̀ gbɛ̍n fɔ̌ kli̍hgbɛ̍ we̍. 44U̍h-a mu̍ mɔ̀ ke mɔ̀-a nynuu̍-u gbɔ̀lɔ chɛ̀ɛ̌chɛ̀. U̍h se̍-o mɔ̀-a tɛ̌n si̍e̍ mu̍. Dɛ̍nu̍ɛ, mɔ̀ se̍ ti̍ Nyɔsoa ji̍-a mɔ̀ pǔh-i la̍-a juo.”

Jusu mu̍ dě Nyɔsoa-a slaǎ sà gbò sɔ̀n

(Matio 21.12-17; Maɛ 11.15-19; Chɔɔn 2.13-22)

45Wɛ̀ Jusu mu̍ dě slaǎ sà gbò sɔ̀n. Iě ɔ̍ po̍ dɛ̍ᵻ ple̍-nyɔ̍ sɔ̀n i̍. 46Wɛ̀ ɔ̍ la̍a̍ dě u̍h we̍, “Ɛ̍ chlǐh-ɛ dě Nyɔsoa-a wlu̍ di̍i̍. Nyɔsoa la̍a̍, ‘Ǎn gbò-a mu̍ ba̍le gbò nu̍.’ Jɛ mɔ̀-a nui ɛ̍ jlǐ-nyɔ̍-a tè la̍ we̍i̍.”

47Ka sɔ̀n-a sɛ̀n-aɛ, nɛ̀ kǎ Jusu-a po̍ nyɔ̍ nǎ dě slaǎ sà gbò sɔ̀n. Sɔ slaǎ sà nyɔ̍ klaaᵻ ke, telě nǎ poe nyɔ̍ ke Juu nyɔ̍-a dlǔtuᵻá pɔ̀n la̍ ɔ̍ dbǎ-a i̍ sǔh. 48Jɛ u̍h se̍ flɔn la̍ jě u̍h iě ɛ̍ nu̍. Dɛ̍nu̍ɛ, nɛ̀ nyɔ̍ kli̍hgbɛ̍-a tba̍ dounᵻá gbà blǔh u̍h-a po̍ dě ɔ̍ we̍ dounᵻ.

अहिले सेलेक्ट गरिएको:

Luu 19: KDNT

हाइलाइट

शेयर गर्नुहोस्

कपी गर्नुहोस्