Luu 18
18
Jusu po̍ tèwànynɔ̌ ke kɛɛ̍n-a nɛnǎ
1Wɛ̀ Jusu po̍ nɛnǎ dě ɔ̍ kòà we̍ ka u̍h-a gbǐh bɔ̌-a mɛ̌-ɛ, wɛ̀ u̍h kɔn u̍h iě-a ba̍le ti̍ kli̍hgbɛ̍ we̍-ɛ. 2Ɔ̍ la̍a̍, “Kɛɛ̍n due bo ɔ̀ tǐn dǒ wlɔ̀ due di̍i̍. Ɔ̍-ɔ ple̍ Nyɔsoa jǔ, iě ɔ̍ bla̍ nyɔ̍ jlǐhɛ̍ dlǔ. 3Nɛ̀ tèwànynɔ̌ due nɛ dǒ wlɔ̀ laa̍ di̍i̍, ɔ̍ po̍ dě ɔ̍ we̍ wìè-i. Ɔ̍ la̍a̍, ‘Dbǎkà, nyɔ̍ ke ǐn ke à blě-a sà-tìh-ɛ, ìè ɔ̍ kɛ̀n sà ìè ǐn nyǐ lě.’ 4Ɔ̍ nu̍ nynɔ̌ laa̍ jla̍-a i̍ dǒ ti̍ gbɔ̍ di̍i̍. Wɛ̀ ɔ̍ la̍a̍ dě ɔ̍ chɛ̀ we̍, ‘Nɛ̌ ple̍ Nyɔsoa jǔ, wɛ̀ ǎn bla̍ nyɔ̍ jlǐhɛ̍ dlǔ-a chɛ̀ gbɛɛ. 5Jɛ tèwànynɔ̌ la ɔ̍ bɛ̌ɛ ǐn wɔ̍ɔ̍n i̍, ǎn mu̍ ɔ̍ kɛ̀n nyǐ. Pò ǐn se̍ ɛ̍ nu̍-ɛ, nɛ̀ ɔ̍ mu̍ da̍a ji̍ ke̍ ma̍u̍ ɔ̍ iě ǐn se̍na̍.’ ”
6Wɛ̀ Joi la̍a̍, “Mɔ̀ po̍-e dounᵻ, mɔ̀ iě dɛ̍ kɛɛ̍n la ɔ̀ se̍-a i̍ slɛ̌-ɛ bla̍-a wɔ̌n. 7Doǒ bo Nyɔsoa-a nyɔ̍ ùh-a ba̍le-a ɔ̍ wlù ke sɔ̀n-ɛ, ɔ̍ se̍ u̍h kɛ̀n nyǐ-i mu̍ ae? Àe̍e̍ nɛ̀ ɔ̍ mu̍ tlɛ̀n dǒ u̍h sɔ̍n we̍ po̍ la̍-a ae? 8Ǎn sèàɛ̍ mɔ̀ wlùh, ɔ̍ mu̍ u̍h kɛ̀n nyǐ suei̍. Jɛ pò Nyi̍ɔ̍-a Jǔ ji̍-ɛ, nɛ̀ ɔ̍ mu̍ ɔ̍ wlùh gbaɛ blě nyɔ̍ da̍a kmɔ̌ we̍ jɛɛ ae?”
Jusu po̍ Fɛlesii jǔ ke taa̍sìh sà jǔ-a nɛnǎ
9Jusu po̍ nɛnǎ la ke dě nyɔ̍ ùh gbaɛ-a u̍h-a chɛ̀ wlùh ka u̍h nu̍-a i̍ slɛ̌-nyɔ̍ wɛ̀ u̍h-u jě-a nyɔ̍ duuh dɛ̍ɛ̍ we̍. 10Ɔ̍ la̍a̍, “Jɔ̍gbauᵻ sɔɔ̌n bo ùh mu̍ dě Nyɔsoa-a slaǎ sà gbò sɔ̀n u̍h iě ba̍le. Due nu̍ Fɛlesii jǔ, iě dɔɔ nu̍ taa̍sìh sà jǔ. 11Fɛlesii jǔ nyna i̍ iě ɔ̍ ba̍le dǒ ɔ̍ chɛ̀ we̍. Ɔ̍ la̍a̍, ‘Nyɔsoa, ǐn po̍ ìn tlɔ̌ wɛ̀ ǐn se̍ nyɔ̍ duuh ùh nu̍-a klǎn kɔn nyɔ̍ ke, telě wa̍ nyɔ̍ ke, nynɛ̌à nu̍ nyɔ̍-ɛ wɔ̀. Wɛ̀ ǐn se̍ taa̍sìh sà jǔ-a chɛ̀ la wɔ̀, nɛ̀ ǐn po̍ ìn tlɔ̌. 12Ǎn nu̍ jlǔh po̍-ɛa sɔɔ̌n dǒ dɔɔ̌dlǔ due di̍i̍. Dɛ̍ᵻ kli̍hgbɛ̍ ǎn jě-aɛ, ǎn sà-o ɛ̀ po̍-a pùè-ɛ dǒ ìn we̍.’ 13Jɛ taa̍sìh sà jǔ nyna-ɛ nya̍, ɔ̍ se̍ ɔ̍ dlǔ-a chɛ̀ ja̍i̍ dǔ. Iě ɔ̍ tba̍ gbǎ wlì, ɔ̍ la̍a̍, ‘Nyɔsoa, jě ǐn wɔɛ, mɔ̍ gblɛ̍n sɔ̀ɛ̀n nu̍ nyɔ̍ o.’ 14Ǎn sèàɛ̍ mɔ̀ wlùh, jɔ̍gbau la, ti̍ ɔ̍ mu̍-a gbò we̍-ɛ, ɔ̍ slɛ̌ i̍ dě Nyɔsoa jlǐh ɛ̍ sìì Fɛlesii jǔ. Dɛ̍nu̍ɛ, nyɔ̍ jɔ dǔ-a ɔ̍ chɛ̀ ja̍i̍-ɛ, nɛ̀ ɔ̍ mu̍ wlù ja-ɛ. Nɛ̀ nyɔ̍ jɔ ja-a ɔ̍ chɛ̀ wlù-ɛ, nɛ̀ ɔ̍ mu̍ ja̍i̍ dǔ-iɛ.”
Jusu tè nynuu̍plìh sɔ̍n dlǔ
(Matio 19.13-15; Maɛ 10.13-16)
15Wɛ̀ nyɔ̍gbei-a ja u̍h-a nynuu̍pli dǒ Jusu we̍ ɔ̍ iě u̍h sɔ̍n dlǔ tè. Ɔ̍ kòà juo-ao dɛ̍ i̍-ɛ, wɛ̀ u̍h po̍ nyɔ̍ laa̍ bɔ̌ i̍. 16Jɛ Jusu dǎ nynuu̍plìh laa̍ dě ɔ̍ we̍. Iě ɔ̍ la̍a̍, “Mɔ̀ bɔ̌ nynuu̍plìh la u̍h iě nɔ̌ ǐn we̍ ji̍. Mɔ̀ bɔ̌ u̍h wìè-i sà-a. Dɛ̍nu̍ɛ, nyɔ̍ ùh nɛ-a ka-ɛ, u̍h bo ùh kɔn dǒ Nyɔsoa-a kmɔ̌ wlu̍ i̍ kɔn-ɛ we̍. 17Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ jɔ se̍-a Nyɔsoa-a kmɔ̌ wlu̍ i̍ kɔn-ɛa tìh i̍ gbɛ̍n mu̍ ka jǔwɛ-ɛ, nɛ̀ ɔ̍ se̍-e i̍ sǐ mu̍.”
Kǎ pàn-nyɔ̍ ke Nyɔsoa-a kmɔ̌ wlu̍ i̍ kɔn-ɛ nɛ ka
(Matio 19.16-30; Maɛ 10.17-31)
18Wɛ̀ Juu nyɔ̍-a wlu̍ i̍ kɔn nyɔ̍ due tèle Jusu i̍. Ɔ̍ la̍a̍, “Dlǔtu chɛ̀, dɛ̍we̍ iě nu̍ wɛ̀ iě kmɔ̌ sie feɛ blě ɛ?”
19Iě Jusu la̍a̍ dě ɔ̍ we̍, “Dɛ̍nu̍ àn dǎɛ ǐn nyɔ̍ chɛ̀ ɛ? Nyɔ̍ chɛ̀ dɔɔ se̍ nɛ, Nyɔsoa due gbài̍ bo ɔ̀ nu̍ nyɔ̍ chɛ̀. 20Ìn juo ka telě dǎ-a, ɛ̍ la̍a̍, ‘Bɔ̌ nynɛ̌à-a nu̍-ɛ, bɔ̌ nyɔ̍ gbe̍ja̍a̍ po̍-ɛ, bɔ̌ jlǐ-ɛ, bɔ̌ nyɔ̍ si̍h i̍ tùi-ɛ, nɛ̀ ìn jě ìn de̍ ke ìn baa dɛ̍ɛ̍.’ ”
21Wɛ̀ ɔ̍ la̍a̍, “Sɔ dě ǎn jǔwɛ blǐ ǐn tè-o telě kli̍hgbɛ̍ la i̍ se̍e̍.”
22Jusu wɔ̌n-a wlu̍ la-ɛ, iě ɔ̍ la̍a̍ dě ɔ̍ we̍, “Dɛ̍ due gbài̍ bo ìn se̍ nu̍ ke. Mu̍ ìè àn kɔn-dɛ̍ᵻ kli̍hgbɛ̍ ple̍, ìè i̍h-a wlǐ nyɔ̍gbà nyɔ̍ jii̍ gblè, nɛ̀ àn mu̍ pàn dě ja̍i̍wlɔ̀. Nɛ̀ ìn ji̍ ìè dǒ ǐn de̍e̍ gbǎ.” 23Jɛ jǔ wɔ̌n-a wlu̍ la-ɛ, sɔ ɛ̍ po̍ ɔ̍ wlùh seɔn. Dɛ̍nu̍ɛ, ɔ̍ pàn-ɛ kaa̍.
24Jusu gbɛ̀n-a ɔ̍ ja̍-ɛ, iě ɔ̍ la̍a̍, “Ɛ̍ mu̍-u kma kaa̍ wɛ̀ pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ. 25Ɛ̍ mu̍-u kma pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ, ɛ̍ sìì gbo̍ kɛ̍ɛ̍n bli-a dě mɛnɔ̍-a gbɔ̀ di̍i̍ jii-ɛ.”
26Nyɔ̍ ùh wɔ̌n-a ìh la-ɛ, iě u̍h la̍a̍, “Nɛ̀ nyɔ̍we̍ bo ɔ̀ mu̍-o pǔh ɛ?”
27Jɛ Jusu la̍a̍, “Dɛ̍ ɛ̀ kmu-a dǒ nyi̍ɔ̍ we̍-ɛ, nɛ̀ ɛ̍ se̍ kmu dǒ Nyɔsoa we̍.”
28Wɛ̀ Pitɛ la̍a̍, “Gbɛ̀n-e, à tǎli à gbòᵻ i̍ wɛ̀ à gbǎ dǒ ìn de̍e̍.”
29Wɛ̀ Jusu la̍a̍ dě u̍h we̍, “Tìh-a taǐn ǎn sèàɛ̍ mɔ̀ wlùh, nyɔ̍ jɔ tǎli-a ɔ̍ gbò o, nynɔ̌ o, de̍di̍i̍ᵻ o, de̍ ke baa o, ɛ̍ ke ɔ̍ nynuu̍ ke dǒ Nyɔsoa-a kmɔ̌ wlu̍ i̍ kɔn-ɛa tìh we̍-ɛ, 30nɛ̀ ɔ̍ mu̍ i̍h-a dɔu jě da̍a ti̍laa kmɔ̌ di̍i̍, wɛ̀ ɔ̍ iě kmɔ̌ sie feɛ jě dě kmɔ̌ delee di̍i̍.”
Jusu sà ɔ̍ mɛ̌ɛ tìh i̍ dɛ
(Matio 20.17-19; Maɛ 10.32-34)
31Jusu chɛn-ɛ ɔ̍ kòà-a pùè jɔ̌ sɔɔ̌n gbɔ̍i̍, iě ɔ̍ la̍a̍ dě u̍h we̍, “À mu̍ la̍ dǒ Juluslɛn wlɔ̀ di̍i̍. Dɛ̍ᵻ kli̍hgbɛ̍ ìh Nyɔsoa-a tu̍owli po̍ nyɔ̍ chlǐh-a dǒ Nyi̍ɔ̍-a Jǔ pùn-ɛ, i̍h-a mu̍ la̍ chɛ̀-ɛ gbǎ. 32Ɔ̍ mu̍ kwlǎ sà-ɛ dě ùh se̍-a Juu nyɔ̍-ɛ we̍. Wɛ̀ u̍h iě ɔ̍ jlii̍h kɛ̍n i̍ nui, u̍h iě ɔ̍ chlèe, wɛ̀ u̍h iě ɔ̍ tɔ̍n gbà. 33U̍h-a mu̍ ɔ̍ bla̍, wɛ̀ u̍h iě ɔ̍ dbǎ. Jɛ pò wǐh ta̍a̍n sì-ɛ, nɛ̀ ɔ̍ mu̍-e wlǔh.”
34Jɛ ɔ̍ kòà se̍ dɛ̍ ɔ̍ bla̍-a i̍ wɔ̌n, ɛ̍ mǎ-ɛ dě u̍h di̍i̍ i̍. Sɔ u̍h se̍ dɛ̍ Jusu bla̍-a juo.
Jusu pǔh-i jɔ̍gbau ɔ̀ dɔ̌-aɛ
(Matio 20.29-34; Maɛ 10.46-52)
35Jusu-a nyni̍-a la̍ dǒ Jɛwlekoo wlɔ̀ di̍i̍-ɛ, nɛ̀ dɔ̌-jɔ̍gbau due tè i̍ dǒ wìè wɔ̍i̍n ɔ̍ slɔ̀-ɛ. 36Ɔ̍ wɔ̌n-a nyɔ̍ dɔu-a sì i̍ slɛ̀-ɛ, iě ɔ̍ tèle tìh i̍, ɔ̍ la̍a̍, “Dɛ̍ bo ɛ̀ gbǎ ɛ?”
37Wɛ̀ u̍h sèàɛ̍ ɔ̍ wlùh, u̍h la̍a̍, “Jusu ɔ̀ sɔ-a dǒ Naaslɔɛ wlɔ̀ di̍i̍-ɛ bo ɔ̀ sì.”
38Wɛ̀ ɔ̍ we̍le, ɔ̍ la̍a̍, “Depe-a Jǔ Jusu, jě ǐn wɔɛ lě.”
39Iě nyɔ̍ ùh wɔ̀-a nya̍-ɛ po̍ ɔ̍ bɔ̌ i̍. U̍h sèàɛ̍ ɔ̍ wlùh ɔ̍ iě tìi̍n nɛ. Jɛ ɔ̍ gbǎ dě de̍ i̍ dǒ we̍le la̍. Ɔ̍ la̍a̍, “Depe-a Jǔ, jě ǐn wɔɛ lě o.”
40Wɛ̀ Jusu nyna i̍, iě ɔ̍ sèàɛ̍ nyɔ̍ wlùh u̍h iě jɔ̍gbau laa̍ dǒ ɔ̍ we̍ ja. U̍h kɔǎɛn-a ɔ̍ Jusu i̍-ɛ, iě Jusu tèle ɔ̍ i̍, 41“Dɛ̍ àn pɔ̀n iě nu̍ dǒ ìn we̍ ɛ?”
Ɔ̍ la̍a̍, “Nyɔ̍ klaa, ǎn pɔ̀n iě i̍ jě.”
42Wɛ̀ Jusu la̍a̍ dě ɔ̍ we̍, “Jě i̍. Àn wlùh gbaɛ-ɛ bo ɛ̀ pǔh-i m̀.”
43Dǒ ɔ̍ jlǐh nyna iě i̍h pɔ̀ni. Wɛ̀ ɔ̍ gbǎ dǒ Jusu de̍e̍ iě ɔ̍ bɛ̌-ɛ Nyɔsoa-a nynɛ̌ i̍. Nyɔ̍ kli̍hgbɛ̍ jě-a ɛ̀ la-ɛ, iě u̍h po̍ Nyɔsoa tìhwe̍.
अहिले सेलेक्ट गरिएको:
Luu 18: KDNT
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
The New Testament in Western Krahn published as KU̍O̍ DELEE © The Bible Society in Liberia, 1999.
