Yuána 21
21
Yíésu lalille hol Bás Tiberiados ílung gaa arge
1Aalé hé kinaal el ˈdaal, Yíésu lalille Bás Tiberiados álle yé ˈdu gáá ˈdie. Mu hát gáál yé ˈdu gáá ˈdieká hatallá: 2Mú lalillé hol ˈgayyeká he Símon Bétiro, Tómas giri gaalí ˈDíđumos yegetká, Nadhániel giri ény Kanna-, lés Galilaaya gáá yimieká, ubaa hele Dhebeˈdaya, tá gál éíy taaka naama-, láliká. 3Aalé Símon Bétiro gáál geey, kieye, Yú áwuo seeme, yie. Gaal kieye, Muun áwúlkúnno áwuo ke hol ˈgar seeme, yie. Aalé gaal kie, kadich hile, kor chúúré kinaallá gaal hé béch he yieská mán.
4Bur a midhab-, biiy he biˈdeká, gál láliká máádhát ílung yaalká arge, kor gaal mu hát he Yíésuká hé ma kimísan. 5Aalé Yíésu gáál vie, kieye, Ummo, it béch níínní hí ka argiyyeká mân? yie. Gaal kieye, Mán, gaalí yie. 6Aalé Yíésu kieye, Buit kadich ˈdaa naaniet ki láa, béé haí cheese, gáál yie. Gaal hát muí geeyká ˈdieká, buit hergisan hí ká adhate, ˈdaa giri buit beeny burnayká ka ˈgiiliˈgayyeká. 7Aalé máá giri láli-, Yíésu hí gielká kieye, Bétiro, he har Máá kúnnaa Guđúa! yie. Bétiro ˈdeenyéél tákáma mú af gaa maale, đo đafarlé biiy ˈdugo-, fure-, ali iđieká seet ki ˈdanne, bie ki suoy. 8Aalé ˈdaa giri kadich ílung ma gaa faganâny-, fagintle hát gil tooson kúˈd naamaká, gál lálíítí kadich ílung ˈdu gáá ˈdeete, buit kí laađame.
9Kadich ílung ka ˈdoy-, gaal kadich gaa leedhe-, baaˈd yé ki ˈdieká, ˈduno boodoy-, beech hí gaa iifeká ubaa balashá arge. 10Aalé Yíésu gáál geey, kieye, Beeny hí chieská ˈbaal állá ka sidháa, yie. 11Símon Bétiro đo buit ílung ˈdú hergite. Buit kinaallá beeny guguđoká hí koch, béé túóyle kúˈd tikiˈde, tómón eiy chen, tá a seđe. Buit har úba beeny burnayallá ká ˈgiiliˈgayyeka, hé ma ˈgîn. 12Aalé Yíésu gáál geey, kieye, Ka yimedhíe, he chira mé ki ˈdóo, gáál yie. Gál láliká ˈdaa giri mu hát gáál Máállé Guđoká onnoyká ógká, hé máá hol yíé ˈdeey-, mú yiete-, kieye, Kúún mááya? mú yieká mán. 13Yíésu đo balashá eedhdhe, gáál balashá shie, gáál beech úba shie. 14Yíésu ameeny he uushich yé gáá ˈdieká, hééllá he gíl ki seđe-, mu lalille yé ˈdu gáá ˈdieká.
Yíésu Bétiro heegete
15Aalé gáál golol hí gaa đueká, Yíésu Bétiro tól eedhdhe, mú yiete, kieye, Símon, iny Yuana, kó ye gálallá ˈdú giel? yie. Bétiro kieye, Iiy-hí, Máá Guđo, kuun hát yú ko gielká, kó óg, yie. Yíésu kieye, Walachú ˈdeeˈdémo, yie. 16Yíésu geđi mú yiete, kieye, Símon, iny Yuana, kó ye giel? yie. Aalé Símon kieye, Máá Guđo, kuun hát yú ko gielká kó óg, yie. Yíésu kieye, Walachú ˈdíésish, yie. 17Yíésu gíl ki seđeká geđi mú yiete, kieye, Símon, iny Yuana, kuun kín kó ye giel? yie. Bétiro ˈdaa giri Yíésu hí a seđ ki yiete-, Kó ye giel? muí yieká, đo geer hí gaa ˈdeenedhe, kieye, Máá Guđo, kuun kó he lulle óg, hát yú ko gielká kó óg, yie. Yíésu kieye, Walachú ˈdeeˈdémo, mú yie. 18Aalé Yíésu mú geey, kieye, Yú ko ˈdúúw geeye, kúún ruorich onnoyyeká kó đafarkú higisate, alb feˈdeká seseenne. Tá af giri vinnamoká gil ha faata, máá eiy đafar hai ko higidha, ál ma fedinyká hai ko siidha, Yíésu hí mú yie. 19Yíésu hééllá hodhééllá kúfách Bétiro hí kufunan-, mu Waag ˈduuwayoká yaalmitlé he mú geey. Aalé Yíésu ˈdeenyéél hodheká mú geey, kieye, Ye el gáá véer, yie.
20Aalé Bétiro hol gaa madeká, máá giri láli-, Yíésu hí gielká gáál el gaa igira arge. Máá kinaallá he máá af giri gaal gólól biiy el ˈdaˈdká golmoteká Yíésu túmus ki koy-, kieye, Máá Guđo, máá ko gál ko oos ˈguoká ˈdu gáá egewallá he mááya? yieká. 21Aalé Bétiro máá kinaal argeká, Yíésu yiete, kieye, Máá Guđo, tá máál, hát hí háteeye? yie. 22Yíésu mú ˈdéé hol ˈdú nie, kieye, Har yú fedo-, mu les ˈdug ˈdú yíéđian-, ˈjíig af giri yú hol ká nannaatká đig kátaka, hé kinaallá meete kua hí gaa ija? Kúún ye el gáá véer! mú yie. 23ˈDeenyéél ˈdugaka, máádhat ˈdéé hótéél gál nyaaramká af ki veere, máá lálííllá hé ma kufuminy, gáál yie. Tá Yíésu íín hé kieye, Mu hé ma kufuminy, ma yéen. Mu hé hodheká kieye, Har yú fedo-, mu les ˈdug ˈdú yíéđian-, ˈjíig af giri yú hol ká nannaatká đig kátaka, hé kinaallá meete kua hí gaa ija? he yie.
24Máá lálííllá he máá hééllá ˈduuwle hogodho-, tá he veereká. Hééllá hát ˈdúwaká nyáá nyí óg. 25Yíésu hé éíy taaka burnayká úba eekemey. Hé kinaallá lulle gaalí véérinyka, yú tawueka, warˈgasam kinaallá hé les alb he hol ki yíéđuoká mán.
अहिले सेलेक्ट गरिएको:
Yuána 21: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
