Yuána 20
20
Yíésu uushich yé gaa ˈdie
1Rám tiiyaká kúlíchlé erká bur af midhab biiy hátlé gaa dhátká María Magaˈdalaká kiiyye, uushich álle mé niiyye. Uushich af kí ˈdiiyyeká, uushich gaalí nyátáábá af gaa eeb! 2Aaléka đo suoyye, Símon Bétiro ubaa máá láli-, Yíésu hí gielká bííyle ˈdú ˈdoote, gáál geeyche, kieye, Máá Guđoká hé gaalí uushich gaa eedhdhe, mú ál gaalí sidheká nyáá nyí muog! chie.
3Aalé Bétiro ubaa máá láli-, Yíésu hí gielká kikite, uushich bííyle mé nie. 4Gaal hullaalle ˈdoˈdodhdhe, máátí Bétiro in ká ˈdie, er uushich af kí ˈdie, 5uushich ki ˈdoliteká đafaraam ali ija, kor hé uushich ma híliny. 6Símon Bétiro giri mú el gaa igireká đo mú láá nadhe, uushich hile, đafaraam ali ija arge. 7Mu úba đafar gaalí Yíésu mé ki ˈdaneká đafaraam gaalí mú gónle ki ˈdaneká taak gaa iiyye-, hol agum ˈdú ˈgeyyeká arge. 8Waaséél máá er uushich af kí ˈdieká úba uushich hile, mu hát uushich gaa láká ˈdúúw ˈdú ˈdie, iiy yie. 9Gaal hééllá met Yíésu hát geđi loolgonot-, uushich yé gáá ˈdeˈdeenká hé Warˈgat Waaˈgiet eiy ma gaa náásan.
Yíésu María Magaˈdallaká yé ˈdu gáá ˈdie
10Aalé gál lálííl đo eiy gale. 11María íín hé uushich láá taal, bebeen. Aalé hátlé bebeenneká đo uushich geer ki ˈdolisate, 12gál ˈgasso-, naama-, Waaˈgiet-, đafaraam eegedhká fadhdhe-, ál gaalí gón Yiesu iifieká ijeká argiyye. Mú tikiˈd ˈdaa meká he ki ije, máátí ˈdaa ˈgas metoká he ki ije. 13Aalé gál kinaal min yiete, kieye, Minnééllo! Háteka bebeennóol? yie. Min kieye, Gaal hé Máá chia Guđoká ali gaa eedhdhe, ál gaalí mú sidheká yáá muog, chie.
14Min héél hote-, hol gaa maˈdeká, máádhat ali yaal, mu hát he Yíésuká hé ma kimísan. 15Aalé Yíésu min yiete, kieye, Minnééllo! Háteka bebeennóol? Mááya hol gaa ˈgeˈgete? yie. María íín tawunyleka, máá mú heetééllá he máá ál kinaallá ˈdeˈdeenká, he chie, đo kieye, Máá guđo, har kúún mú eeteka, mú ál siteká ye ka géesh, mú eedhdhe, chie. 16Yíésu đo min vie, kieye, María! yie. María đo mú ˈdú suoyye, af Heberew ki ˈdayche, kieye, Rabóóni! chie. Rabóóni hélle kieye, Máá gáál he oonisuoká.
17Aalé Yíésu María geey, kieye, Ha ye chíran, yáá hátle ˈJaachú hol ma ˈdú náan. Sí, nyaaramchú géesh, yú ˈJaa chia-, ˈJaakícho-, Waag chia-, Waag kíchiaká hol ˈdú naadha, muí María yie.
18Aalé María Magaˈdalaká đuul gil faate, gál láliká fayám ˈdú site, kieye, Yáá Máá Guđoká nyí hol argiyye! chie. Min ˈdeeny Máá Guđoká hí geey-, Gáál ˈdú sit, muí yieká úba gáál geeyche.
Yíésu lalille yé ˈdu gáá ˈdie
19Kúlích kinaal gélgálle gál láliká ˈbíllo he gaa ije, tá ˈdaa giri gaal gál guguđo-, Yuuˈdiká kikiadheká gaal ˈbíl af ger ki kuokodhdhe. Yíésu gáál hurt yé gáá ˈdie, kieye, Naanná gaa yíéđía, yie. 20Mu héél hodheká đo gille ubaa beetle gáál argisie. Gál láliká Máállé Guđoká argeká súm ger hí gaa meedhe.
21Yíésu geđi kieye, Naanná gaa yíéđía! Hát yú ˈJaachú ye ali gáá kaayallá, yú úba alb haí fafaa, muí gáál yie. 22Mu hatal yieká đo Hím Naasanle gáál ki nie, kieye, Hím Naasan Waaˈgiet hí hillo. 23Itín máádhat ađaabanollé ˈguoká hí hayche-, hí mú ˈdú ˈjiiyyeka, máá kinaallá úba Waag haí ˈdú ˈjeenne. Tá har máádhat ađaabanollé ˈguoká hí ma hany-, hí mú ma ˈdú ˈjiinyka, máá kinaallá ađaabanolle hai ˈgaa, Yíésu hí gáál yie.
Yíésu Tómas yé ˈdu gáá ˈdie
24Gál láli-, tomon a naamaká tá máá giri Tómas ˈDíđumos léká, af giri Yíésu láli yé ˈdu gáá ˈdieká hé gáál gaa lalay. 25Aalé gál lálíítí mú geey, kieye, Nyáá nyí Máá kúnnaa Guđoká argiyye! yie. Tómas kieye, ˈDaab yú lilo misimaaramká mú gille ma gaa árginy-, gúmúrínychú ma ki gáágan-, ubaa gílchú mú beet ma ki gânká, yáá iiy ma yegen, yie.
26Ram síet ˈgiteká gál láliká geđi ˈbíllo hol ˈdú ije. Tómas úba hé gáál hol af ije. Gaal har úba ˈbíl af ger ki kuokodhdheka, Yíésu đo gáál hurt yé gáá ˈdie, kieye, Naanná gaa yíéđía! gáál yie. 27Aalé mu Tómas geey, kieye, Gúmúrínykú ka hélish, gilchú ki gáágat, dháash. Gílkú ka hélish, beetchú ki gat. Ha ye ki nannáan, ye iiy áat, Yíésu hí mú yie. 28Aalé Tómas kieye, Máá chia Guđo! Waagchú! muí Yíésu yie. 29Aalé Yíésu mú geey, kieye, ˈDaa giri ye ki argiyyeká in ye iiy chie? Gál ye ma árginy-, kor ye iiy yieká, ebá Waag hí ˈdú ˈguunúánne! mú yie.
30Yíésu hé éíy taaka-, gaalí af ˈdaˈdabo-, lalille met gaa eekemey-, máá hí warˈgatééllá úba gaa veere mánká hé tág burnay. 31Máá warˈgatééllá ka veerééllá hé he veerééllá, he giri itín Yíésu hát he Messíya-, Iny Waaˈgietká hí iiy chegeto-, tá hí mú iiy chieka, hí luolmit biiyoká mú meenyle ki aargiˈdoká.
अहिले सेलेक्ट गरिएको:
Yuána 20: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
