Yuána 19
19
Bilááto Yíésu oosle iiy yie
1Aalé Bilááto yuoy ˈdéé ki mure, giri gaal Yíésu egeet-, mú anakoto ki tuunoká. 2Yuoy đo shóte híí tág gaa niiyye, mú mé kaayye. Gaal mú đafar gielle-, búr korbiso mare kaay.#19:2 Gál kaansúo bar kinaalloká đafaraam kóórbiská ubaa shosam sibilaam-, gaalí waar ˈdabaanká ki ˈdaneká he fafadhdhe. 3Gaal mú bala ˈdiiđime, kieye, Kó ˈdúwa-, Kánsích Yuuˈdííllo! yiegie. Gaal úba mú tune.
4Bilááto geđi gál guguđo-, Yuuˈdiká yé ˈdú ˈdie, kieye, Bá dhaayyíe, yú hí mú yé ˈdu gáá ˈdeđúóllá, he giri itín hé muí ˈdeeneyká hát yú mú ma gaa árginyká hí kiimisatoká, gáál yie. 5Aalé Yíésu đafar gielle-, korbidheká ubaa hiiny gaalí sháásha tág gaa nie-, gaalí fieká yé kí ˈdie. Bilááto đo gáál geey, Bá dhaayyíe, mu hállá! yie. 6Gál guguđo-, suoryoká ubaa gállé kaansúoká tikiˈde mú aargiróóllá, kúóˈd ˈdoy, kieye, Mú ˈgór đarám yaalká ˈdug ˈdú yiesíe! Mú ˈgór đarám yaalká ˈdug ˈdú yiesíe! yie. Aalé Bilááto gáál ˈdéé hol ˈdú nie, kieye, Itín dhúrkícho mú eedhdhíe, mú ˈgór đarám yaalká ˈdug ˈdú yiesíe! Yú yáá hé muí ˈdeeney-, mú gaa argeká mán, yie. 7Aalé gál Yuuˈdiká điidhe, kieye, Nyíín nyáá nyí hemurít ˈgayya, ˈdaa giri mu hol Iny Waaˈgiet yegetká, mu gon hai kufe, gaalí yie.
8Bilááto héél maaleká đo geđi súm seerey, 9ˈbíl kansimoká geđi hol ˈdú nadhe. Mu Yíésu yiete, kieye, Kúún máá aleeye? yie. Tá Yíésu hé ˈdeeny níínní mú hol ˈdú nieká mán. 10Aalé Bilááto kieye, Kúún kó ye ma ká geđîny? Yú hát fargogint kuun ko ki fufuroká ubaa ko ˈgór đarám yaalká ˈdug ˈdú yegeská ˈguoká kó múog? mú yie. 11Yíésu mú ˈdéé hol ˈdú nie, kieye, Kúún Waag ko fargogínt úr ma gáá shiinyka, kó fargogint ˈgayyo-, ye he ki mumuˈdoká mán. Tá máá kúún ko ye ali ˈdu gáá kaay-, kuun ye chegesoká nyúógíchle hé nyúógíchkú ˈdú guđo, yie.
12Bilááto af kinaallá đo ˈgíérích he Yíésu ki fufuroká hol gaa ˈgeˈgedhe, kor gál Yuuˈdi warchane, kieye, Har máállá hayche-, mu sedheka, kuun af kinaalka, kó máá Kaisar muuniny. Ameeny máá hol kansich yegetká Káísarro kansimle egesheye! gaalí Bilááto yie. 13Bilááto héél maaleká Yíésu baaˈd yé ki ˈdeey, karallé hemuriti-, kansimo-, álle gaalí Shíígiant Waariet yeget mare yielká ˈdú yíéđie. Ál kinaallá af Heberewka, Gabádha, gaalí yegedhe. 14Hé kinaallá he aadh ˈgas tomon a naama burroká ˈjobínti. #19:14 Álláka Yuána aadh ˈgas le he yie. Yaalmit gál Rooma ubaa ˈDaasanach hí aadh ˈgas ki totoyoká hol ká eiyye. Aadh ˈgas gál Rooma hí le yegetallá ˈDaasanachka he aadh ˈgas tomon a naama. Kúlích kinaallá he kúlích gaalí Kúlích Hef ˈGisanká met les ˈdiđianká. Kúlích kinaallá úba he kúlích ˈjila Waag máállé ˈgasso-, urruká hí gáál ˈdug gaa nadheká. Aalé Bilááto gál guguđo-, Yuuˈdiká geey, kieye, Bá dhaayyíe! Kánsíchkícho hállá! gáál yie. 15Gaal đo kúóˈd ˈdoy, kieye, Mú állá gaa ée! Mú állá gaa ée! Mú ˈgór đarám yaalká ˈdug ˈdú yiesíe! gaalí yie. Aalé Bilááto gáál heete, kieye, Kánsích kíchia yú ˈgór đarám yaalká ˈdug ˈdú yegese? gáál yie. Gál guguđo-, suoryoká kieye, Kánsíchkínyo he Káísar, nyáá nyí kánsích éíy taaka mán, gaalí mú yie.
16Aalé el ˈdaal, Bilááto mú gáál shie, giri mú gaalí ˈgór đarám yaalká ˈdug ˈdú yegeská.
Yíésu hát gaalí ˈgór đarám yaalká ˈdug ˈdú ˈdoyká
Aalé yuoy Yíésu eete. 17Yíésu ˈgórlé đarám yaalká eedhdhe, gaal sedhe, ál gaalí Ál Me ˈGonte yegetká mé nie. Ál kinaallá af Heberewka, Golgóta, gaalí yegedhe. 18Yíésu ál kinaallá gaalí ˈgórlé đarám yaal kinaal ˈdug ˈdú ˈdoy, ˈgór gaalí les gaa eey, gaalí ˈdisse. Gál eiy naam úba gaalí ˈguor đarám ˈgieká eiy ˈdug ˈdú ˈdane, gaalí Yíésu ˈdinnam eiy koy.
19Bilááto ˈgór ˈbassoká đađáb gaa veere, ˈgór đarám yaal-, gaalí Yíésu ˈdug ˈdú ˈdoyká mé shurt ki ˈdoy. ˈGór ˈbasso kinaal héllé muí gaa veereká kieye,yíésu nasaretká, kánsích yuuˈdi, he chie. 20ˈDaa giri ál gaalí Yíésu ˈgór đarám yaalká ˈdug ˈdú ˈdoyká ˈjien Yerusalem kí ˈjobonoyyeká gál Yuuˈdi gúch he veerit kinaallá tuoy. He veerit kinaallá af Heberew, ubaa af Rooma, tá af Hellenno gaalí ki veere. 21Aalé gál guguđo-, Yuuˈdi-, suoryoká Bilááto geey, kieye, Ha Kánsích Yuuˈdi véériny. Máá hol Kánsích Yuuˈdi yegetká, véer, gaalí yie. 22Bilááto ˈdéé hol nie, kieye, Hé yú veereká ha yú veere, gáál yie.
23Aalé yuoy Yíésu ˈgór đarám yaalká ˈdug ˈdú ˈdoyyeká mú đafaraamle shuunnate, đafaraam kinaal met afur eiy ká fiiyye, tá eiy taat shuunnate. Aalé giel biiy geereká ká ˈgisate. Giel kinaallá is hí tikiˈde, hé dhaay hí toom iiyyeká mán. 24Gaal kieye, Giel ha ki eiy ˈdániny, kí hol koiy ki ˈduo, máá kot hí ˈdú ˈdoyyoká hí lilew, gaalí hol yie. Hééllá hatallá ˈdíéllá he ˈdeeny Waaˈgiet giri kieye, Gaal đafaraamchú hol gise, gielchú koiy ki ˈdodhdhe, yieká ˈduway.#19:24 Warˈgat Arram 22:18 Yuoy hé kinaallá ekeyche.
25Yíésu ˈgórlé đarám yaalká ˈjobintle hé ˈjielle ubaa ˈjielle nyaarle, héétí María giri min Kilobaká, tá María Magaˈdalaká hé hí ˈgie. 26Yíésu ˈjielle ubaa máá láli-, muí gielká ál kinaal ˈgie-, muí argeká, Yíésu ˈjielle vie, kieye, ˈJie, máá hí hol af ˈgiiyyáállá aalé he inykú, yie. 27Aalé mu máá giri láliká geey, kieye, Bá dháash, máállá aalé he ˈjiekú, yie. Ameeny kinaallá in máá lálííllá Yíésu ˈjielle máá ˈbíl geerle hote.
Kúfách Yiesu
28Aalé el ˈdaal, Yíésu hát he lulle đusieká ógká in kieye, Yú báre ˈgaa, yie. Mu hééllá hodhééllá he ˈdeeny Warˈgat Waaˈgiet hí hoteká ˈduway.#19:28 Warˈgat Arram 69:21 29Ál kinaallá hé óngʼólích ˈduuny bírigká hí gaa ijeká hí ije. Aalé gaal đafar gaa nyuro mare ˈgór mé ki hidhe, ˈduuny vinnaʼ kinaal ki tie, Yíésu af ki chiˈde. 30Yíésu ˈduuny kinaal ˈbuuteká kieye, He hé đue! yie, đo mé les ki ˈdoy, sidh hí yé gaa ˈdiiyye.
31Kúlích kinaallá he kúlích gaalí Kúlích Hef ˈGisanká met les ˈdiđianká. Aalé ˈdaa giri Kúlích Hef ˈGisan kinaal súm ˈdúwaká, gál guguđo-, Yuuˈdiká hé gál gaalí ˈguor ˈdug ˈdú ˈdaneká alb ˈgieká ma fediny. Aalé gaal Bilááto heete, giri yuoy gáál ˈgas gaa ˈgieˈgicho-, gáál gaalí ˈguor gaa babuoká.#19:31 Gáál gaalí ˈgas gaa ˈgieˈgúóllá he giri gaal ál ˈjob gáá kufunanká. 32Aalé gál giri yuoyóká ká yimie, gál gaalí Yíésu hol ˈguor đarám ˈgieká eiy ˈdug ki ˈdaneká mú tikiˈd er ˈdú siete, ˈgas gaa ˈgieˈgiche, máátí úba ˈdú siete, ˈgas gaa ˈgieˈgiche. 33Gaal Yíésu ˈdu gáá yimie-, mu kuf argeká, hé mú ˈgas ma gaa ˈgieˈgîny. 34Aaléka, gál yuoyóká mú tikiˈd Yíésu naan beet gaa veere, Yíésu đo fas ubaa bie hí gáá hele. 35Máá hééllá argeká he ˈduuwlé hogodho. Hé muí argééllá hé ˈdúwa. Máá kinaallá hé hogodhóóllá hát ˈdúwaká hé óg. Hééllá muí hogodhóóllá he giri itín úba hí iiy chegetoká. 36Hééllá hatallá ˈdíéllá he giri hé Warˈgat Waaˈgiet hí hote-, kieye, Mú lafle hé lafit tikiˈde gaalí gaa ˈgieˈguoká mán, chieká, ˈduuwawká. #19:36 Warˈgat Arram 34:20 37Warˈgat Waaˈgiet ali tikiˈd úba kieye, Gaal máá beet gaa veereká hai dhaˈgama,#19:37 Sakaría 12:10 he chie.
Yíésu galinylé
38Aalé héél el ˈdaal, Yúósef giri máá ˈjien Arimatayaká Bilááto heete, giri gón Yiesu egeetká. Yúósef he máá lali Yiesu, tá ˈdaa giri he gál Yuuˈdi kikiadheká íín ˈgerellé he yiel. Mú Bilááto hí ˈdéé met gaa eedhdheká, mu ká yimie, gón Yiesu eedhdhe. 39Máá Yúósef hol ˈgieká he Nikoˈdémos giri chuure tikiˈd Yíésu ˈdú sedheká. Nikoˈdémos henyit ubaa helb gaalí hol fie-, ilshám hí tomon seđ af ˈgayyoká nyuoˈdoká hé ˈgie. 40Aalé gaal gón Yiesu eedhdhe, gon đafaraam édh-, henyit ubaa helb ˈdú fafieká ki ˈdane. Hééllá he yaalmit gál Yuuˈdi hí hol gagaluoká. 41Ál gaalí Yíésu ˈgór đarám yaalká ˈdug ˈdú yies kinaallá ˈjobintle, hé les hí gaa iđe. Lés kinaallá hurtle hé liish waariet-, gaalí geer gaa ˈgodhe-, káána-, kálta gaalí máádhat ma ki galînyká hé hí gaa iđe. 42ˈDaa giri kúlích kinaallá he kúlích gál Yuuˈdi hí Kúlích Hef ˈGisanká met les gaa ˈdiđianká onnoyye-, tá ˈguoˈd liishó kinaal íín ka ˈjobonoyyeká gaal đo gón Yiesu ˈguoˈd liishó kinaal ki galie.
अहिले सेलेक्ट गरिएको:
Yuána 19: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
