He Ekeny Gál Alb Fimiká 1
1
ˈDéé hót erkob warˈgateelloká
1-2Tíáfeles, warˈgat chia erkob yú veereká he lullé giri Yíésu hí mé gáá kodhdhe-, hí eekemey-, tá hí gálaat oonisie-, tá ˈjíig kúlích muí úr mé gaa nieká yú gaa veere. Kúlích kinaallá mu hátlé úr mé ma níinyká, mu gállé giri waaˈde-, muí alb fafieká muí Hím Naasan Waaˈgiet af ki tie. 3Aalé mú manyjasinyle ubaa kúfáchle el ˈdaal, mu gállé waaˈde kinaal af burnayká hol yé ˈdu gáá ˈdeey, tá hé burnay-, máálle hát geđi luolká ˈduuwle gaalí kiimisatká muí gáál argisie. Rám tomonaam afur kinaal mu gáál hol yé ˈdú gáá ˈdeeđieká mu Guch Waaˈgiet ˈdeenyle huogodhe. 4Af tikiˈd mu hátlé gáál hol ˈgar golmoteká mu gáál hatal geey, kieye, Ha hí Yerúsalem gaa kíiny, hé hí ye af gaa maalle-, yú hogodhe-, ˈJaachú hí ye af iđie-, yú hí ka shiguoká esée. 5Yuána bie he gálaat gim nannie, tá itín rám iraam mán ka chiimetallá Hím Naasan Waaˈgieto Waag hí gim nanniyya, muí yie.
Yíésu úr mé nie
6Aalé gál alb fimiká ubaa Yíésu hol ˈdu gáá yimieká, gaal mú heete, Máá Guđo, kúún aalé káána gál Yisirayello kansím hol ˈdu gáá nanniyya? gaalí yie. 7Mu gáál geey, kieye, Hééllá bárle ubaa aflé giri ali kí ˈdeˈdeen-, ˈJaachú hí hemuritle taak ki koyká hé hé kíchia hí gaa ijoká mán. 8Aalé Hím Naasan Waaˈgiet hí ˈdu gáá leeteka, fargogínt haí aargiˈda. Itín ˈjien Yerusalem, lés Yuuˈdia lullé, tá lés Samaria, tá ˈjíig les ameenylé ki taalká ˈdeenychú gálaat ha hí gaa maalsicha, muí yie.
9Mu ˈdeenyéél beeteká hátlé gaalí dhaˈgameká úr mé nie, nyáˈdow hí buanne, gáál in ki bađay. 10Gaal hátlé mu bííylé mé nieká gaa dhaˈgameká gál naama đafaraam eegedhká fadhdhe mare ál tikiˈde kinaal đo gáál láá kí ˈdie, 11kieye, Gál Galilaaya, háteka hí ál ˈgiiyya-, hí úr gaa dhaˈgasannóol? Yíésu Waag hí gaa eetééllá hát tikiˈde hí argiyya-, he ur Waaˈgiet mé níéllá in geđi hol kí naadha, gaalí yie.
Matías gaalí ál Yuuˈdas gaa koy
12Aalé gaal Gúm Saano Salabká hol gáá nadhe, Yerúsalemle mé nie. (Sieny kinaallá he sieny mé gaaw-, gáál nyátálleka gaalí Kúlích Hef ˈGisanká gaa seseenká.) 13Aalé gaal é kí ˈdieká ˈbíllé biiy ˈdug yiel he gaa ijeká feˈjie. Gaal ííni kinaallá he mú Bétiro, Yuána, Yákob, Ánˈduru, Fílib, Tómas, Bartolomáyo, Matááyo, Yákob giri iny Alfaayaká, ubaa Símon giri gálaat ˈjegeduoká, tá aalé Yúúˈdas giri iny Yakobká. 14Gaal bar lulle ubaa gál ˈdiet, tá Yíésu ˈjiellé ubaa Yíésu nyaaramlé hol Waag ˈgar vivite.
15Af kinaal Bétiro les gaa kie, gál giri nyaaram-, Yíésu iiy yieká hurt ki ˈdie. Gál kinaallá amú kúˈd tikiˈde tómón eiy naama giri hol ˈdú gáá yimieká. 16Aalé mu kieye, Nyaaramchú, he veerit Waaˈgiet gon hé ˈduwayye, giri kíssóótí Hím Naasan Waaˈgiet hí ˈDáwuˈd a geer gaa kaayye-, giri ˈdeeny Yuuˈdas-, máálle gál Yíésu ˈgiliˈgayká Yíésu ˈdú eeyká. 17Yúúˈdas kinaallá úba hé túóykúnno gaa yiel, hé fayam Waaˈgiet úba ki hol ˈgar sisidhe. 18-20ˈDeeny Hím Naasan Waaˈgiet hí ˈDáwuˈd a geer gaa kaayye-, gaalí warˈgat Arramká gaa veereká hatallá he chie:
Mú egemle gaalí hayo,
ha máádhat hí el meenyle hóson,#1:18-20 Warˈgat Arram 69:25
warˈgát hí chie, Bétiro hí yie.
(Hé kinaallá hé ˈduway, af giri Yúúˈdas birellé ˈgíérích ađaabiet ki argeká les hidhdhe-, ál kinaal mu úr gáá ˈjie-, le ˈdoy-, geer hí eiy fuadhe-, nyimereem lulle hí gáá leedheká. Héétí gál Yerusalem lulle úba hí maaleká, gaal ál kinaal meeny he shieká Hakelˈdáma. Hakelˈdáma gáál afleka hélle kieye, Ál fasiet.)
Aalé Bétiro geđi kieye, ˈDeeny ˈDáwuˈd warˈgat Arramká hí hoteká úba kieye,
Máá eiy hé mú álle eet,#1:18-20 Warˈgat Arram 109:8
he chie.
21-22Aalé mú tikiˈd kí ká eew, kí ál Yuuˈdas kinaal gaa kuo. Máá kinaallá hé máá ameeny Yíésu Yuána hí bie gim gaa nie-, Yíésulle ke hol ˈgieká tá ˈjíig kúlích muí úr mé gaa nieká ke hol af ijeká onnow. Máá kinaallá Yíésu uushich yé gaa ˈdímle kí misikirle hol ˈgar yeet, Bétiro hí gáál yie.
23Aalé gaal gáál naam hol ki koy, Yúósef giri gaalí Barsábas yegie-, Yóstos léká ubaa Matías. 24Aalé gaal Waag vite, kieye, Máá Guđo, kúúni gálaat lulle gerle og. Gál naamáállá máá feˈdoká nyí ka argísish. 25Mú ál gálle Yíésu hí alb fafuo-, Yúúˈdas hí ká hay-, muí állé fedeká mé gaa níéllá nyí gaa koyyo, gaalí yie. 26Aalé gaal gál naama kinaal koiy ki ˈdoy,#1:26 Koiy ˈdony bar kinaalloká amú waaro gaalí ˈdarame. Matías kot hí ˈdú ˈdoyye. Mú gaalí gál tomon a takach alb fimi-, Yiesuká ˈdú kaay.
अहिले सेलेक्ट गरिएको:
He Ekeny Gál Alb Fimiká 1: dsh
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
