Maqtaeq 26
26
Yeqsur-anr Saef-eu Laer Jawq-eu
Mk 14:1-2; Lk 22:1-2; Yh 11:45-53
1Khoerngae, heulof-aer pyeuflar-euq mae. Yeqsur garkawv khoerdeuq dawqtawvluf maeqnaeqghaq ngae, aqyawf-euq zaqlanr deuq-anr heulof-aer aernaeq-euq mae, 2“Nyiq nan dzeur-euq nar-aq, Baqsaqkaq yawbui bui-eu aryamq keuvlar mae laer nawmaf siqnya-eu mae. Khoerngae, Tsawrhaq-euq Zaqyo-aq, aqcawq-euq aqlaf-euq lafkhoer ya’anr-ir-awr, lafyaq-euq khoertav yabi taftaeq taef-a.”
3Khoerngae, pirma aqyuif deuq, zanr maeq-eu deuq hawr-eu mirkhanq-euq aqyuif aqtsu deuq, Gaqyaqpar laer kur-eu pirma yawhuiq ghaq-euq nymr-anr uiqler-euq mae. 4Aqyawfmaf aqjox-aer ghae-awr nae jaqmyawf maershuir-euq lafkhoer, Yeqsur-anr nyaef-awr yasaefni bawqdzaq-euq mae. 5Aerkhawf, aqyawfmaf aer-eu, “Yawbui builuf ngae, aqyawf-anr taqnyaef law siq. Khoerlof-aer janr nar-aq, mirkhanqzaq luiqgha lar-eu gar yayanr nga.”
Yeqsur-anr Tsir Yawsaw Shaevdav-euq
Mk 14:3-9; Yh 12:1-8
6Yeqsur, Beqtaqnir pu-anr jawr-eu coiqdoi narhaw-euq Sirmoq-euq nymr-anr jawrluf ngae, 7zaqmiq aqbur tiq ghaq arpoeq zawr khav-eu tsir yawsaw danq-eu lopyur martsaf tiq tsaf ciq-awr lar-euq mae. Yeqsur hawqjawq jawqluf ngae, aqyawf-euq uqduq-anr shaevdav naeq-euq mae.
8Aqyawf-euq zaqlanr deuq hawmawr ngae, nuima paerpaer-aer heulof-aer aer-eu mae, “Aqjeq mirnae tox-aer lavcawv-eu le? 9Tsir yawsaw teu, pyur ghawqmya’ni anqza nya-awr, shaqzaq zanqzaq-anr bifnaeq nya-eu beu.”
10Yeqsur, aqyawf maf-euq nuinoeq-anr siqnya-awr heulof-aer aernaeq-euq mae: “Aqjeq mirnae zaqmiq aqbur heughaq-anr lavbanq-eu le? Aqyawf, ngaq-euq gharduq gar yawmuiq jeq mrnaeqlaf luf-euq mae. 11Aqjeq mirnae aernar-aq, shaqzaq zanqzaq-aq, nawmaf naeq-aer aqmyanluf jawr taef-a. Aerkhawf, ngar, nawmaf naeq-aer aqmyanluf jawr-eu maqngeur. 12Aqyawf, ngaq-euq mawrdo-anr tsir yawsaw shaevdav naeqlaf-euq heu-aq, ngaq-anr bafpanq-eu gharduq laeqhmq-eu mae. 13Ngar, nawmaf-anr aqdirma-aer aernaeq nyar, mirtsaq tanqkhawr doeni guiqlanqdawq heu, khar maeqkeuv-ir gar, zaqmiq aqbur heughaq nae mr-euq garkawv heu khawf maeqnaeq-awr, aqcawq, aqyawf-anr noeqkeuv taef-a.”
Yurdav, Yeqsur-anr Anqdzaq-euq
Mk 14:10-11; Lk 22:3-6
14Khoerngae, ghaqkhaer 12 ghaq-euq lafkhoer keuq-eu Yurdav Irsaqgaqliqoq laer kur-eu ghaq, pirma aqyuif deuq jawr-eu gar le-awr narhaq-eu, 15“Ngar, aqyawf-euq mawrdo, nawmaf-euq aqlaf-euq lafkhoer a’naeq nar-aq, nawmaf, ngaq-anr pyur armyavni bifcoer-eu le?” Khoerngae, aqyawfmaf, aqyawf-anr pyur 30 byav bif-euq mae. 16Khoerngae nae nar-aq, Yurdav, aqyawf maf-euq aqlaf-anr Yeqsur a’naeq-eu aqmyan yaeflar-eu nga laer jawqluf-eu mae.
Baqsaqkaq Dzaqbyawr Dzaqtaf-euq
Mk 14:12-21; Lk 22:7-23; Yh 13:21-30
17Daeqtseq maqdawv-euq kaqmur dzaq-eu yawbui bui-eu ardanqbae ngae nan, zaqlanr deuq, Yeqsur jawr-eu gar lar-awr narhaq-eu, “Baqsaqkaq dzaqbyawr dzaqnya’ni, nawr, nga’maf-anr nawq-euq gharduq aqgeugar bi laeqhmq-ir mawf-eu nya?” 18Yeqsur aerkhof naeq-eu, “Nawmaf, meuq-anr jawr-eu tsawrhaq tiq ghaq jawr-eu gar ir-awr, aqyawf-anr heulof-aer aernaeq-awq, ‘Saqlaq aer-eu, “Ngaq-euq aryamq keuvlar-euq mirnae, ngar, nawq-euq nymr-anr ngaq-euq zaqlanr deuq naeq-aer Baqsaqkaq yawbui yabui nga.” ’ ” 19Khoerngae, Yeqsur nae aqyawf maf-anr khaer-euq lof-aer zaqlanr deuq Baqsaqkaq dzaqbyawr lavdawv-ir-euq mae. 20Uqcif cifle ngae, Yeqsur, ghaqkhaer 12 ghaq naeq-aer hawqjawq jawqluf-eu mae. 21Aqyawfmaf dzaqluf ngae Yeqsur aer-eu, “Ngar, nawmaf-anr aqdirma-aer aernaeq nyar, nawmaf-euq lafkhoer-euq tiq ghaq, ngaq-anr anqdzaq taef-a.” 22Aqyawfmaf noeqshaq duidui-eu lafkhoer, danqbae-awr tiqghaq sair tiqghaq, aqyawf-anr narhaq-eu, “Sanqpaq-or! Ngar-a laq?”
23Yeqsur heulof-aer aerkhof naeq-euq mae: “Ngaq-anr anqdzaq-eu ghaq-aq, ngaq naeq-aer khmqmaq tiq khmq-euq lafkhoer laefdzaq taef-a. 24Tsawrhaq-euq Zaqyo-aq, Yaerbof-euq lafkhoer aqyawf-euq garkawv boftaq-euq lof-aer ya ghofler-eu mae. Aerkhawf, Tsawrhaq-euq Zaqyo-anr anqdzaq-euq ghaq-aq, ghawqshar shaq-aer ya ghaesaef taef-a. Khoerghaq maq daefle-euq lawnmr-aq, aqyawf-euq gharduq muiqdzaeq-eu mae.”
25Khoerngae, Yurdav, Yeqsur-anr anqdzaq-euq khoerghaq narhaq-eu, “Saqlaq-or! Ngar-a lor?” Khoerngae, Yeqsur, aqyawf-anr aernaeq-eu, “Nawr aer-eu lof-aer mae.”
Sanqpaq-euq Cifhawq Dzaqbyawr
Mk 14:22-26; Lk 22:15-20; 1Glt 11:23-25
26Aqyawfmaf dzaqluf ngae, Yeqsur, kaqmur yur-awr, Miqyaer-euq guiqlanq-anr jaceuq-euq mae. Khoernar-aq, kaqmur ngawqpyaeq-awr zaqlanr deuq-anr ciqnaeq-awr aer-eu, “Heu-aq, ngaq-euq mawrdo ma. Yur-awr dzaq-awq.”
27Khoernar-aq, aqyawf, khmqmaq ciq-awr, Miqyaer-euq guiqlanq-anr par jaceuq-euq mae. Khoernar-aq, aqyawf maf-anr ciqnaeq-awr heulof-aer aernaeq-euq mae: “Nawmaf yawqghaq navluf heu dawr-awq. 28Aqjeq mirnae aernar-aq, heu-aq, dawqma sarjax yawshuif-anr taf-eu ngaq-euq shiq ma. Tsawrhaq ghawqmya ni-euq iqbax pyaeqnaeq nya’ni ngaq-euq shiq bi yoerle ma. 29Ngar, nawmaf-anr aernaeq nyar, ngaqDa uvlanr-eu jeq-euq lafkhoer, ngar, nawmaf naeq-aer tiqkawv lof-aer aqgaf dzaruir yawshuif yadawr taf-eu arnan maq keuvlar-euq khoerkeuvni, ngar, aqgaf arsiq-euq dzaruir maqpar dawr ma.”
30Aqyawfmaf jaceuq-eu dawqcar carghaq-euq nar-aq, dov-ir-awr Saqloq gawqjawq paw le-euq mae.
Beqtuvluv, Yeqsur-anr Maqsiq Laer Pyaer Taef-a
Mk 14:27-31; Lk 22:31-34; Yh 13:36-38
31Khoerngae, Yeqsur, aqyawf maf-anr heulof-aer aernaeq-euq mae, “Nymrcif nawmaf yawqghaq navluf, ngaq-euq baqda’nae sanqtiftif taef-a. Aqjeq mirnae aernar-aq, Yaerbof-euq lafkhoer heulof-aer boftaq-euq mae,
‘Ngar, yawr bo-eu ghaq-anr diq ngae,
Yawrmaf-euq yawrdeuq caevbyavjir taef-a.’ (Zkl 13:7)
32Aerkhawf, ngar ghofdaeflar ghaq-euq nar-aq, nawmaf-euq maeqhu nae Gaqliqlaer mirkhanq-anr le ma.”
33Beqtuvluv aer-eu, “Aqcawq yawqghaq navluf, nawq-euq baqda’nae sanqtiftif jir-euq khawf, ngar-aq maqtif.”
34Yeqsur, Beqtuvluv-anr aernaeq-eu, “Ngar, nawq-anr aqdirma-aer aernaeq nyar, nymrcif yapoer maq doerlar-euq minav-aer, nawr, ngaq-anr maq siqnya nya laer smq pov keuvni pyaer taef-a.”
35Beqtuvluv, Yeqsur-anr aernaeq-eu, “Ngar, nawq naeq-aer tiqkawv lof-aer yashir-eu khawf, ngar, nawq-anr maq siqnya nya laer tiqjeq ghaenae-iq maqaer.” Zaqlanr dawqtawvluf khawf khoerlof-aer aer-eu mae.
Geqseqmaqnir Yarkmr-euq Lafkhoer Guiqlanq Shar-euq
Mk 14:32-42; Lk 22:39-46
36Khoernar-aq, Yeqsur hawr-eu zaqlanr deuq, Geqseqmaqnir laer kur-eu tsanr-anr irkeuv-euq mae. Yeqsur, zaqlanr deuq-anr aernaeq-eu, “Nawmaf heugar nuirtawq-awq, ngar khoerpaw guiqlanq shar-ir la.” 37Aqyawf, Beqtuvluv hawr-eu Zeqbeqdaer-euq zaqyo nyiq ghaq sheuq-awr ir-euq mae. Khoerngae, aqyawf noeqshaq duidui-eu uqtaf, nuima-euq lafkhoer shaqzanq naf duidui-awr, aqyawf maf-anr aernaeq-eu, 38“Ngaq-euq nuima saflar noeqshaq-eu shir shaw-iq mir-a, nawmaf heugar ngaq naeq-aer yawbeur beur-aer lof-awq.”
39Aqyawf maeqhu paw uicuiv irjiv-awr, mirtsa awbyav-awr nae guiqlanq shar-eu, “NgaqDa-or! Ghaenya nar-aq, khmqmaq heukhmq, ngaq-anr nae bidzeur-ir naeqlaf-awq. Aerkhawf, ngar nuima tsaq-eu lof-aer taqbi pyeuf. Nawr nuima tsaq-eu lof-aer bipyeuf law.”
40Aqyawf, zaqlanr deuq jawr-eu gar ghoflar ngae, aqyawfmaf yufkhav taq-euq gar ya’mawr-awr, Beqtuvluv-anr heulof-aer aernaeq-euq mae, “Nawmaf, ngaq naeq-aer naqliq tiq laf taef-aer khawf yawbeur beur-aer maq lofcoer nya lor? 41Nawmaf murjur jur-eu gar maqya tawvlerni, yawbeur beur-aer lof-awr, guiqlanq sharshar-aer jawr-awq. Nawmaf mrmawf-eu nuima anr-eu khawf, shiqshaq paw-aq, ghaqbyaev byaev-eu nga.”
42Aqyawf parir-awr guiqlanq parshar-eu, “NgaqDa-or! Ngar khmqmaq heukhmq-anr maqdawr-euq khoer-aq maqjir nar-aq, nawr nuima tsaq-eu lof-aer bipyeuf-awq.” 43Aqyawf par ghoflar ngae, aqyawfmaf myavnuiv maq byaedir coer-aer, yufkhav taq-euq gar parya mawr-euq mae. 44Yeqsur, aqyawf maf-anr bi jawryaf-awr, aqyawfmaf jawr-eu gar nae parir-awr, smq pov tiqpov aqyawf tiqdawq parshar-euq mae.
45Khoernar-aq, aqyawf, zaqlanr deuq jawr-eu gar ghoflar-awr heulof-aer aernaeq-euq mae, “Nawmaf nymq-mr keuvni yufyuf-aer ghaqnaq naqluf-eu le siq lor? Hawsher-eq, Tsawrhaq-euq Zaqyo-anr anqdzaq-awr, iqbaxzaq-euq aqlaf-euq lafkhoer a’naeq-eu aryamq keuvlar-euq ngar-a. 46Tur-awq, le kar-eur. Hawsher-eq, ngaq-anr anqdzaq-euq ghaq oekeuv shaw-iq ngar-a.”
Yeqsur-anr Nyaef-euq
Mk 14:43-52; Lk 22:47-53; Yh 18:3-11
47Yeqsur khoerlof-aer aernaeqluf ngae, ghaqkhaer 12 ghaq-euq lafkhoer keuq-eu Yurdav laer kur-eu ghaq oekeuv-euq mae. Micaer baf-awr darkawq gheuluf-eu tsawrhaq bafmaf khawf, aqyawf naeq-aer oeluf-eu mae. Pirma aqyuif deuq hawr-eu mirkhanq-euq aqyuif aqtsu deuq nae aqyawf maf-anr khaerghae lef-euq mae. 48Yeqsur-anr anqdzaq-euq khoerghaq, tsawrhaq khoerdeuq-anr bisiq bimawr-eu jeq heulof-aer aernaeq taq-euq mae, “Ngar maeqsaw aqsur ghaq-anr saw nar-aq, khoerghaq mae de-eq, nawmaf, aqyawf-anr nyaef-awq.”
49Yurdav oekeuv-euq naeq-aer Yeqsur jawr-eu gar ir-awr, “Saqlaq-or! Nawr nuisar of luf-ur” laer aer-awr, aqyawf-anr maeqsaw saw-euq mae. 50Yeqsur, aqyawf-anr aernaeq-eu, “Cawq-or! Nawr aqjeq janrle-euq le laer janr-awq.” Khoerngae, tsawrhaq khoerdeuq oe-awr, Yeqsur-anr nyaeftaeq taq-euq mae.
51Yeqsur naeq-aer jawrluf-eu tiq ghaq, aqlaf nae micaer ghawrdov-awr, pirma yawhuiq ghaq-euq kuirlaf zaqkhav-anr coerghae-awr nae, aqyawf-euq naqpaf tiq pyawq coertsaevdzae naeq-euq mae.
52Khoerngae, Yeqsur, aqyawf-anr heulof-aer aernaeq-euq mae, “Nawq-euq micaer, tawvkhawv-anr soeqanr-awq. Micaer-anr kharghoe-eu tsawrhaq-aq, micaer khaeq-anr yashir taef-a. 53Nymq-mr, ngar jawr-eu gar mqtav ghaqkhaer 12 maf dzaeqni khaerghae lef-awq laer ngar, ngaqDa-anr maqshar nya-ar laer nawr noeq-eu le lor? 54Ngar khoerlof-aer shar nar-aq, heulof-aer pyeuflar taef-a laer boftaq-euq Yaerbof khoerdeuq aqjox-aer byanlarnya nmr-mq?”
55Khoerngae yamq-anr, Yeqsur, tsawrhaq-euq baqmaf khoermaf-anr heulof-aer aernaeq-euq mae, “Nawmaf, tanrjoe-anr nyaef-ir-eu lof-aer micaer baf-awr darkawq gheu-awr ngaq-anr nyaefle-euq le lor? Ngar yawqnan navluf uqduq tanqnymr nymrma-euq lafkhoer nuir-awr maeqnaeq tsovnaeq-eu khawf, nawmaf, ngaq-anr maqnyaef-a. 56Aerkhawf, Miqyaer gharduq ngaeqdan-eu deuq-euq sanqbof-euq lafkhoer boftaq-euq lof-aer byanlarni, heudeuq dawqtawvluf pyeuflar-euq mae.” Khoerngae, zaqlanr dawqtawvluf, aqyawf-anr byaerdzae yaf-awr caevbyov jir-euq mae.
Khavma Armur, Yeqsur-anr Yarkhaq Dar-euq
Mk 14:53-65; Lk 22:54,63-71; Yh 18:12-14,19-24
57Khoerngae, Yeqsur-anr nyaef-euq tsawrhaq khoerdeuq, Yeqsur-anr pirma yawhuiq ghaq Gaqyaqpar jawr-eu gar sheuqghae-euq mae. Zanr maeq-eu deuq hawr-eu aqyuif aqtsu deuq khoergar uiqlar taq-awr jawr-eu mae. 58Beqtuvluv-aq, pirma yawhuiq ghaq-euq nymr-euq povka keuvni, Yeqsur-euq maeqnan ardzaeq-aer maqkaq-eu gar cantae luf-eu mae. Arsaq aqjox-aer saqlar-eu nga laer haw-eu gharduq, povka urler-awr, khoergar, lofpir-eu kuirlaf deuq naeq-aer nuirluf-eu mae.
59Pirma aqyuif deuq, aqyuif aqtsu deuq hawr-eu khavma armur murlan-aer, Yeqsur yashirni, aqyawf-euq garkawv maqtsaq maqdawr-eu sarkir sharpov luf-eu mae. 60Aerkhawf, Yeqsur-euq yawbanq maq povmawr nya-aq. Maqtsaq maqdawr-eu sarkir kamq-eu tsawrhaq ghawqmya ghaq maeqshi paw oeoe-aer sarkir kamq-eu khawf, Yeqsur-euq yawlaeq maq povdov nya-a. Arsaq saqlar ngae, maqtsaq maqdawr-eu sarkir kamq-eu tsawrhaq nyiq ghaq maeqshi paw dovlar-awr aer-eu, 61“Tsawrhaq teughaq, ‘Ngar, Miqyaer-euq uqduq tanqnymr nymrma-anr pyavdzae-awr, smq nan-euq lafkhoer tsovpar ma’ laer aer-eu mae.”
62Khoerngae, pirma yawhuiq ghaq tur-awr Yeqsur-anr narhaq-eu, “Tsawrhaq heudeuq, nawq-euq khoertav iqbax taqtaq-aer sarkir kamq-eu gar, nawr tiqjeq-iq maq aerkhofnaeq lor?” 63Aerkhawf, Yeqsur ciqcurni jawr-euq mae. Khoerngae, pirma yawhuiq ghaq, aqyawf-anr par narhaq-eu, “Daefluf-eu Miqyaer-euq tsawrmyanr-euq uqmov ngar, nawq-anr bikamq ma. Nawr, Miqyaer-euq Zaqyo, Kali laer kur-eu khoerghaq ma lor laer nga’maf-anr aernaeq laf-awq!”
64Khoerngae, Yeqsur, aqyawf-anr aernaeq-eu, “Nawr aer-eu lof-aer ngeur ma. Ngar, nawmaf-anr aernaeq nyar, aqkar,
Tsawrhaq-euq Zaqyo, Baoq-euq armar paw nuirluf-eu gar nawmaf ya’mawr-awr, mqtav-euq mqdmr-anr dziq-awr zafka le-eu gar khawf ya’mawr taef-a.” (Jc 110:1; Dyl 7:13)
65Khoerngae, pirma yawhuiq ghaq maeqtsoeq gheupyaq-awr aer-eu, “Aqyawf, Miqyaer-anr yaeqbawq saerlu-aer aer-eu nga! Aqduimaf tsawrkaq povpov-aer aqjeq ghae-eu parshaq-eu? Aqyawf, Miqyaer-anr yaeqbawq saerlu-aer aer-eu gar, nymq-mr nawmaf ya gaqghaq-euq mae. 66Nawmaf aqjox-aer noeq-eu nya?” Khoerngae, aqyawfmaf aerkhof naeq-eu, “Aqyawf shir-eu geux mae.”
67Khoerngae, aqyawfmaf, Yeqsur-euq myavpyawq-anr duqkhaq khashaeq-awr, aqyawf-anr ter-euq mae. Tiqpavnav deuq, aqyawf-anr aqlaf nae taev-awr aer-eu, 68“Kali-or! Nawq-anr taev-eu aqsur ghaq la laer Miqyaer gharduq ngaeqdan-eu tsawrhaq lof-aer nga’maf-anr aernaeqlaf sher-eq?”
Beqtuvluv, Yeqsur-anr Maqsiq Laer Pyaer-euq
Mk 14:66-72; Lk 22:54-62; Yh 18:15-18,25-27
69Beqtuvluv lafnyir paw jav-eu povka-anr nuirluf ngae, kuirlaf zaqkhav aqbur tiq ghaq, aqyawf jawr-eu gar oe-awr aer-eu, “Nawr khawf aqmyanmyan Gaqliqlaer tsawrhaq Yeqsur naeq-aer jawr-euq tsawrhaq ngar-a.”
70Beqtuvluv, aqyawfmaf dawqtawv luf-euq maeqshi pyaer-eu, “Nawr aqjeq ngaeqluf-eu laer ngaq-anr maq siqlar nya.”
71Khoernar-aq, Beqtuvluv dov-ir-awr, ghovkhaeq-anr irkeuv ngae, kuirlaf zaqkhav aqbur nuighaq, aqyawf-anr parmawr-awr, khoergar jawr-eu tsawrhaq deuq-anr aernaeq-eu, “Teughaq-aq, Naqzaqlaer tsawrhaq Yeqsur naeq-aer jawr-euq tsawrhaq mae.”
72Beqtuvluv kamq-eu lafkhoer tiq pov parpyaer-eu, “Ngar, tsawrhaq khoerghaq-anr maq siqnya nya!”
73Tiqkhaeq parkar-ir-euq nar-aq, khoergar yawfluf-eu deuq, Beqtuvluv jawr-eu gar lar-awr aer-eu, “Nawr-aq, aqdir aqmar aqyawf maf-euq armur-euq lafkhoer keuq-eu tiq ghaq ngar-a. Aqjeq mirnae aernar-aq, nawr dawq ngaeq-eu gar narhaq khawf byacaevni siqlar-eu beu.”
74Khoerngae, Beqtuvluv yawqhar yawqha yaqkhaer yaqyaq-aer kamq-eu lafkhoer aer-eu, “Ngar, tsawrhaq khoerghaq-anr maq siqnya nya ler!” Beqtuvluv khoerlof-aer aerghaq-euq naeq-aer, yapoer doerdov laf-euq mae.
75Khoerngae, Beqtuvluv, Yeqsur nae aqyawf-anr, “Yapoer maq doerlar-euq minav-aer, nawr, ngaq-anr maq siqnya nya laer smq pov keuvni pyaer taef-a” laer aernaeq-euq dawq khoerdawq-anr noeqdov lar-euq mae. Khoermirnae, aqyawf dov-ir-awr, nuima cawv-eu lafkhoer ngoer duidui-euq mae.
अहिले सेलेक्ट गरिएको:
Maqtaeq 26: AKA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
2018 ©
Bibles International ®
The Bible Society of Baptist Mid-Missions
