Maqtaeq 25
25
Miqdaf Dafshawr Tser Ghaq
1“Khoermirnae, mqtav mirkhanq-aq heulof-aer dur taef-a. Yawqha-euq tsirkhmq ciq-awr, yoshuif-anr halaq ler-eu miqdaf dafshawr tser ghaq-anr dur taef-a. 2Aqyawf maf-aq, yawlaf ngaq ghaq hawr-eu yawganr ngaq ghaq mae. 3Yawlaf deuq-aq, tsirkhmq ciqghae-euq khawf, tsir maq ciqghae-aq. 4Aerkhawf, yawganr deuq-aq, tsirkhmq ciq-awr, tsir danq-eu martsaf khawf ciqghae-euq mae. 5Yoshuif oemya-euq mirnae, aqyawfmaf dawqtawvluf yufyoer ngeurlar-awr yufkhav-euq mae.
6“Saerghanr caelar ngae, aqcawq gur-eu, ‘Yoshuif oekeuv-euq ngar-a, nawmaf, aqyawf-anr halaq lar-awq!’
7Khoerngae, miqdaf dafshawr khoerdeuq dawqtawvluf turlar-awr, yawqha-euq tsirkhmq yawqha lavnyaev-euq mae. 8Khoerngae, yawlaf deuq, yawganr deuq-anr shar-eu, ‘Nga’maf-euq tsirkhmq miv-ir shaw-iq-eu mirnae, nga’maf-anr tsir uicuiv bifnaeq laf-awq.’
9Khoerngae, yawganr deuq aerkhof naeq-eu, ‘Nga’maf-euq gharduq maqngeur nar-aq, nawmaf-euq gharduq maq lofler-eu paq. Nawmaf tsir anq-eu tsawrhaq jawr-eu gar ir-awr yawqha-euq gharduq zeurlaq-ir-awq.’
10Aqyawfmaf zeur-ir luf ngae, yoshuif oekeuv-euq mae. Laeqhmqdan taq-euq khoerdeuq-aq, aqyawf naeq-aer oermr bar-eu yawbui-anr urler-euq mae. Khoernar-aq, larghov piqtaeq-euq mae.
11“Khoerngae, miqdaf dafshawr khoerdeuq ghofkeuv lar-awr, ‘Sanqpaq-or! Sanqpaq-or! Nga’maf-anr larghov pannaeqlaf sher-eq’ laer gur-eu mae.
12Aerkhawf, aqyawf aerkhof naeq-eu, ‘Ngar, nawmaf-anr aqdirma-aer aernaeq nyar, ngar, nawmaf-anr maq siqnya nya.’
13“Nawmaf, Tsawrhaq-euq Zaqyo zafka le-eu arnan aryamq khoer-anr maq siqnya-eu mirnae, yawbeur beur-aer jawr-awq.
Tsawrhaq Smr Ghaq-anr Jeqgaf Bigaf-euq
Lk 19:11-27
14“Mqtav mirkhanq-aq heulof-aer dur-eu mae. Tsawrhaq tiq ghaq garmanr kaq-eu gar dov-ir-eu laer ghae ngae, aqyawf-euq kuirlaf zaqkhav deuq-anr kur-awr, aqyawf-euq myawqganq deuq aqyawf maf-anr biftaq yaf-euq mae. 15Aqyawf, aqyawfmaf mrnya-eu gar haw-awr, tiq ghaq-anr-aq, pyur 5,000 byav, tiq ghaq-anr-aq 2,000 byav, tiq ghaq-anr-aq 1,000 byav laer bifnaeq yaf-awr, tiqpov taef-aer garmanr kaq-eu gar ir-euq mae. 16Pyur 5,000 byav za-euq khoerghaq, dov-ir-awr jeqgaf gaf-ir-awr 5,000 byav gafjeuq-euq mae. 17Khoerlof-aer durni, pyur 2,000 byav za-euq khoerghaq khawf 2,000 byav gafjeuq-euq mae. 18Aerkhawf, pyur 1,000 byav za-euq ghaq-aq, aqyawf-euq yawsanr ghaq nae bifnaeq-euq pyur khoer yur-awr, mirtsaq-anr duqpanqzaf taq-euq mae.
19“Ghawqmyanrni dzeur-ir-euq nar-aq, kuirlaf zaqkhav khoerdeuq-euq yawsanr ghaq ghoflar-awr, aqyawfmaf naeq-aer pyur nanqmyaq sawx-euq mae. 20Pyur 5,000 byav za-euq khoerghaq, jirjeuq 5,000 byav khawf yurlaf-awr aer-eu, ‘Sanqpaq-or! Nawr, ngaq-anr pyur 5,000 byav biftaq yaf-euq mae. Hawsher-eq, ngar 5,000 byav gafjeuq-euq ma.’
21Yawsanr ghaq, aqyawf-anr aernaeq-eu, ‘Yawmuiq ngar-a, muiq-awr sarjax zif-eu kuirlaf zaqkhav-or! Nawr yawnyir yawcuiv jeq-anr sarjax zif-eu mirnae, ngar, nawq-anr ghawqmya jeq-anr hawlanr-eu ghaq bigeuf ma. Nawq-euq yawsanr-euq laqkhaq caer-eu jeq-euq lafkhoer urlar-awq.’
22Pyur 2,000 byav za-euq khoerghaq khawf lar-awr aer-eu, ‘Sanqpaq-or! Nawr, ngaq-anr pyur 2,000 byav biftaq yaf-euq mae. Hawsher-eq, ngar 2,000 byav gafjeuq-euq ma.’
23Yawsanr ghaq, aqyawf-anr aernaeq-eu, ‘Yawmuiq ngar-a, muiq-awr sarjax zif-eu kuirlaf zaqkhav-or! Nawr yawnyir yawcuiv jeq-anr sarjax zif-eu mirnae, ngar, nawq-anr ghawqmya jeq-anr hawlanr-eu ghaq bigeuf ma. Nawq-euq yawsanr-euq laqkhaq caer-eu jeq-euq lafkhoer urlar-awq.’
24“Pyur 1,000 byav za-euq khoerghaq khawf lar-awr heulof-aer aer-eu mae, ‘Sanqpaq-or! Nawr-aq, nuima yawghanr mae laer ngar siqnya ma. Nawr, nawq nae maqka-euq gar yaeqdzaq-awr, nawq nae maqsaeq-euq gar tawvuiq-eu mae. 25Ngar guv-eu mirnae, nawq-euq pyur, mirtsaq-anr duqpanqzaf taq-awr bijav-euq ma. Haeq, heu-aq, nawq-euq pyur khoer mae.’
26“Khoerngae, Yawsanr ghaq, aqyawf-anr heulof-aer aerkhof naeq-euq mae, ‘Zawr cawv-awr yawdoer doer-eu kuirlaf zaqkhav-or! Ngaq nae maqka-euq gar, ngar yaeqdzaq-awr, ngaq nae maqsaeq-euq gar, ngar tawvuiq-eu mae laer, nawr siqnya-eu jeq mar-iq, 27ngaq-euq pyur teu yur-awr, pyur parnaeq-eu deuq jawr-eu gar yurtaq-ir lawnmr-aq ghaq-eu ngar-a. Khoerlof-aer janr-euq lawnmr-aq, ngar ghoflar ngae, ngaq-euq pyur jeqma hawr-eu jirjeuq khawf zakhof taef-a.
28Aqyawf-euq pyur teu yurkhof-awr, 10,000 byav jav-eu ghaq-anr bifnaeq-awq. 29Aqjeq mirnae aernar-aq, kharjav-eu tsawrhaq-anr par biflanq naeq-awr, aqyawfmaf javkuflar taef-a. Maqjav-eu tsawrhaq-anr-aq, aqyawf kharjav-eu jeq khawf yabi yurdovjir taef-a. 30Gardanr maqtsoeq-eu kuirlaf zaqkhav teughaq-anr lafnyir paw zanrtsuini ghae-eu gar gheudzae-ir-awq. Aqyawf khoergar jawr-awr, noeqshaq duidui-eu lafkhoer ngoerngoer-aer seuq yateuf taef-a.’
Yawr Hawr-eu Cifmyaef
31“Tsawrhaq-euq Zaqyo, aqyawf-euq yawshaef khanqsaer-euq lafkhoer, shawr-eu mqtav ghaqkhaer dawqtawvluf naeq-aer zafkale ngae, aqyawf, aqyawf-euq yawshaef khanqsaer jav-eu nuirmanq-anr nuir taef-a. 32Mirkhanq-euq tsawrjeuq dawqtawvluf, aqyawf-euq maeqshi uiqlar taef-a. Yawr bo-eu ghaq, cifmyaef-euq lafkhoer nae yawrdeuq-anr tserpav dov-eu lof-aer, aqyawf, tsawrhaq khoerdeuq-anr tserpav taef-a. 33Yawrdeuq-anr-aq, aqyawf-euq armar paw bijawr taef-a. Aerkhawf, cifmyaef deuq-anr-aq, arcar paw bijawr taef-a.
34Khoernar-aq, Sanqpaq, armar paw jawr-eu deuq-anr heulof-aer aernaeq taef-a: ‘NgaqDa-euq guiqlanq za-euq tsawrhaq deuq-or! Lar-awq. Mqbae mirbae bae ngae nae, nawmaf-anr of-eu jeqbir pyeuf-eu mirkhanq-anr jawrlar-awq. 35Aqjeq mirnae aernar-aq, ngar hawq maef ngae, nawmaf, ngaq-anr bidzaq naeqlaf-awr, ngar ircuf maef ngae, nawmaf, ngaq-anr bidawr naeqlaf-euq uqtaf, ngar maqsiq maqsux-eu tsawrhaq pyeuf ngae, nawmaf, ngaq-anr hageuf naeqlaf-euq mae. 36Ngar nermyawvni jawr ngae, nawmaf, ngaq-anr bidm naeqlaf-awr, ngar nar ngae, nawmaf, ngaq-anr bosav naeqlaf-euq uqtaf, ngar kuv-anr urluf ngae, nawmaf, ngaq-anr hawle-euq mae.’
37“Khoerngae, tsaq-awr dawr-eu tsawrhaq deuq heulof-aer aerkhofnaeq taef-a: ‘Sanqpaq-or! Nawr hawq maef ngae, nga’maf mawr-awr, nawq-anr aqmyan bidzaq-euq la? Nawr ircuf maef ngae, nawq-anr aqmyan bidawr-euq la? 38Nawr maqsiq maqsux-eu tsawrhaq pyeuf-awr shaq-eu gar mawr-awr, nawq-anr aqmyan ha-euq la? Nawr nermyawvni jawr ngae, nawq-anr aqmyan bidm-euq la? 39Nawr nar ngae maqaer, kuv-anr ur ngae maqaer, nga’maf mawr-awr aqmyan hawle-euq la?’
40Khoerngae, Sanqpaq khoerghaq, aqyawf maf-anr aerkhof naeq-eu, ‘Ngar, nawmaf-anr aqdirma-aer aernaeq nyar, nawmaf nae ngaq-euq aqyuif aqnyir heudeuq-euq lafkhoer nae nyirdzaeq dzaeq-eu tiq ghaq-anr janrnaeq-euq khoer-aq, ngaq-anr janrnaeq laf-euq mae.’
41“Khoernar-aq, Sanqpaq, arcar paw jawr-eu deuq-anr heulof-aer aernaeq taef-a: ‘Yaqkhaer yaq-eu gar yadaq-eu tsawrhaq deuq-or! Ngar jawr-eu gar nae dov-ir-awr, naef sanqpaq hawr-eu aqyawf-euq ghaqkhaer deuq-euq gharduq laeqhmq taq-euq jawrduq, miv-ir-eu maqbaw-eu miqdzaq-euq lafkhoer ur-ir-awq. 42Aqjeq mirnae aernar-aq, ngar hawq maef ngae, nawmaf, ngaq-anr maqbi dzaq naeqlaf-aer, ngar ircuf maef ngae, nawmaf, ngaq-anr maqbi dawr naeqlaf-aq. 43Ngar maqsiq maqsux-eu tsawrhaq pyeuf-awr shaq ngae, nawmaf, ngaq-anr maq hageuf-aer, ngar nermyawvni jawr ngae, nawmaf, ngaq-anr maqbi dm naeqlaf-aq. Ngar nar ngae maqaer, kuv-anr ur ngae maqaer, nawmaf maq hawle naeqlaf-aq.’
44“Khoerngae, aqyawfmaf, aqyawf-anr heulof-aer aerkhofnaeq taef-a, ‘Sanqpaq-or! Nawr hawq maef-eu, ircuf maef-eu, maqsiq maqsux-eu tsawrhaq pyeuf-awr shaq-eu, nermyawvni jawr-eu, nar-eu, kuv-anr ur-eu gar nga’maf ya’mawr-awr, nawq-anr maq cawba naeqni byaer-euq aqmyan jav-eu la?’
45Khoerngae, sanqpaq, aqyawf maf-anr heulof-aer aerkhofnaeq taef-a, ‘Ngar, nawmaf-anr aqdirma-aer aernaeq nyar, tsawrhaq heudeuq-euq lafkhoer nae nyirdzaeq dzaeq-eu aqgeu ghaq-anr maqkaq, nawmaf maq janrnaeq-euq khoer-aq, ngaq-anr maq janrnaeq-euq gar dur-eu mae.’
46Aqyawf maf-aq, mqmaq maqbyav yarzir darnaeq-eu lafkhoer ya’ur-ir-awr, tsaq-awr dawr-eu tsawrhaq deuq-aq, mqmaq maqbyav yarzir daef-eu lafkhoer ya urler taef-a.”
अहिले सेलेक्ट गरिएको:
Maqtaeq 25: AKA
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
2018 ©
Bibles International ®
The Bible Society of Baptist Mid-Missions
