Maatteeo 11

Yeesu hĩ Yõaannẽ Batitta

(Tigiil ꞌLuuka 7:18-35)

1Ma baa ẽdẽcaak Yeesu ngaatĩ ẽtẽrꞌthĩ nuyyiook cĩgĩnnĩg ĩĩn õmmõtõ hĩ ꞌramma ho ẽlẽk, ikia ĩtĩnga nĩngaata ũũk illimanõõ nẽ irrioon nyeemuut ꞌcĩ abũnnaa ꞌtaaũnnioohĩĩ cĩg ꞌGalileea.

2Ma baa athĩhĩ Yõaannẽ dtiic ꞌcĩ adĩman Krĩstõ, baa nga aaĩ nẽẽ baabuuthatõõ ho, ikia ĩꞌthõ nuyyiook cĩgĩnnĩg, 3hõõt hijinit Yeesu hĩĩttĩk, “Nganiit ꞌcĩ hereeyyi ho? Hode occa nga hẽrẽẽanna eet umwa ꞌcĩ ꞌrĩĩng?”

4Ẽdẽcĩ Yeesu ĩhõõggõ anneek, “Õõt uduktaak Yõaannẽ thooꞌthiok ꞌcĩg athiknu niig nẽ icittu ho. 5Ĩcĩttĩ rubenniaaha, õtõõcõ ꞌngoolliaha, ũbũttaathõ eeta ꞌcĩg adak helleggeri, ĩthĩktõ eeta ꞌcĩg adĩĩtĩ ĩĩna, ũrũgta daakiaha nẽ illimanoothĩk nyeemuut ꞌcĩ abũnnaa eet ꞌcĩg appĩĩrna. 6Aggatan Nyekuci eet ꞌcĩ hõllõngaa abũrra nganĩĩt, hĩnĩngĩtĩ thõõth ꞌcĩ hadticani naana.”

7Ma baa ĩtĩngaacõ nuyyiooha cĩg Yõaannẽ õõta, iꞌthianaaĩ Yeesu ijin lothippit thõõth cĩ Yõaannẽ ĩĩnnĩk, “Eet baa ꞌcĩ aaĩ hutuno ꞌcĩ ooyyu acinnu niig horrwatõõ ꞌcĩ õdõhõhĩĩ kak ko? Aaĩ baa nẽẽ hĩ ĩhaõõcĩ aagõõng uuni uuhan ngõõtĩ? 8Má aitiõõ, nganĩ thĩ baa ꞌcĩ ooyyu acinnu niig ko? Eet ꞌcĩ ahimti ceremwaanĩĩ ꞌcĩg ẽllẽẽmĩthĩ? Aitiõõ, eeta ꞌcĩg ahimit ceremwa ꞌcĩg ẽllẽẽmĩthĩ, aattĩg olooyyiohĩĩ cĩg habueetu. 9Nẽẽthĩ, ne ꞌthẽk baa dẽẽdẽ ꞌcĩ ooyyu acinnu niig ko? Põrõvẽtaac? Haduhaakuung dĩdĩ, ĩllõõan nẽẽ põrõvẽtaac. 10Ĩnõõnnõ baa eheeddi ꞌBuuhaa cĩ Nyekuci aĩ,

“ ‘Hĩꞌthõõakii hatĩ naa Nyekuci nganiit ꞌthooyyiahit caannĩ

ꞌcĩ aku akũmaneek ꞌgõõl cunni.’#Tigiil ꞌBuuk cĩ Malaaki 3:1

11Haduhaakuung dĩdĩ, aitiõõ eet umwaa ꞌcĩ arrittiaa looccaa nĩĩcĩ ꞌcĩ maka ĩllõõan Yõaannẽ Batitta tõõ. Nẽẽthĩ, ẽẽtĩ ꞌcĩ hidici habuccieetaa cĩ hẽẽtkujjieen, maka nẽẽ ĩllõõan Yõaannẽ. 12Nganĩngĩtĩ waathinniook baag Yõaannẽ Batitta ĩꞌthõng hĩĩ noho, ĩtĩlĩth habuccieet cĩ hẽẽtkujjieen ꞌtirriaanaa ꞌcĩ maka gẽrrẽẽt nẽ aattĩg eeta ꞌcĩg adiim õõĩ habuccieet nicci ꞌtirriaana. 13Hĩnĩngĩtĩ, õthõõth põrõvẽtaaꞌnya vẽlẽk hĩ nyattal cĩ Mũũꞌtha, thooꞌthiok ꞌcĩg au edeeꞌnyia ĩĩn dĩdĩ, ĩꞌthõng huppwaanna Yõaannẽ. 14Nẽ má adiimmu elemmu thõõth icci, ĩĩn Yõaannẽ Eliijja#11:14 Eliijja: Baa ĩĩn nẽẽ põrõvẽtaac cĩ Nyekuci ꞌcĩ baa õkõõĩ Nyekuci hẽẽtahujjieen rũgẽtẽẽt. Baa arittiaa nẽẽ baa ĩĩn irkiꞌnyia ꞌmiiaꞌnya tũrkũwwec baa nga hittirria Yeesu. Tigiil thõõth cĩnnĩ ꞌBuuhaa ꞌcĩ: 1 Habuẽẽt 17-21; 2 Habuẽẽt 1-3. 15Ẽẽtĩ ꞌcĩ aꞌnyak ĩĩna, aꞌnyĩĩk hĩthĩhõ jurrung.

16“Occa ꞌthẽk hĩthakꞌtheehi naa eet cĩg irkiꞌnyia iccig nganĩ? Aattĩg nẽẽg hĩ lohollia aagõõng iccioloongan ngaatĩ ꞌcuuho nẽ othooꞌthik ꞌgõõnõgĩ ĩĩttĩk,

17“ ‘Hadtaheekuung loboruẽẽt

nẽ hõllõngaa arugummu buúk,

hebeneekuung tegellwa cĩg ulwaanak

nẽ hõllõngaa aluyyu buúk.’

18Hĩnĩngĩtĩ, ma baa aku Yõaannẽ nẽ hõllõngaa aduhi hode ahũdĩ, ainnu hinnia ‘Aꞌnyak nẽẽ lori ꞌcĩ abathĩ!’ 19Ma baa aku Ngeertĩ Eeto aduhi nẽ ũhũdĩ, ainnu, ‘Ĩĩn ẽẽtĩ ciee lobolobbiaahit nẽ ĩĩ duuttiahit, ꞌgõõnĩ eet ꞌcĩg alũt occoro hĩ ꞌthẽccanniook.’ Nẽẽthĩ hinnianĩ, edeeꞌnyia ꞌgẽẽnyĩthĩ ꞌcĩ ĩĩn dĩdĩ, thooꞌthiohĩĩ vẽlẽk ĩcĩg adtican nẽẽnĩ.”

ꞌTaaũnniook ꞌcĩg hõllõngaa ẽlẽmĩ Yeesu

(Tigiil ꞌLuuka 10:13-15)

20Nĩngĩtĩ aku alĩĩllĩkĩ Yeesu ꞌtaaũnniook baag adticanĩ nẽẽ thooꞌthiok ꞌcĩg ĩnaat eeta, hĩnĩngĩtĩ baa abũrĩ eeta ngaatĩ ũũnnĩkĩ ꞌthẽccanẽẽt cĩggĩĩng. 21“Pĩĩrnanĩt hĩ ngagiit eet cĩg Korathini hĩ cĩg Beꞌthaida.#11:21 Korathin hĩ Beꞌthaida: Baa aattĩg eet cĩg ꞌJudeei ꞌtaaũnnioohĩĩ cĩg. Nẽẽthĩ, baa aattĩg eeta ꞌcĩg hõllõngaa ĩĩn ꞌJudeei ꞌtaaũnaa cĩ ꞌTire hĩ ꞌThidõõnẽ. Má baa hĩĩ ꞌcĩ hadticanĩĩ naa thooꞌthiok baag ĩnaat eeta ꞌtaaũnnioohĩĩ cugguung, hĩĩ ꞌcĩ baa hadticanĩĩ ꞌtaaũnnioohĩĩ ꞌcĩg abathĩ ĩĩcĩg ꞌTire hĩ ꞌThidõõnẽ, occa ꞌyioko baa ũtũngteek nẽẽg ꞌthẽccanẽẽt cĩggĩĩng baa hũnũũk nẽ itihimit ceremwa cĩg ulwaanak nẽ ujuhanit hatiꞌtheet ootinii cĩggĩĩng, hĩĩ terethiinit ꞌcĩ edeethini nẽẽg ꞌthẽccanẽẽtĩĩ cĩggĩĩng. 22Nẽẽthĩ haduhaakuunga, mẽẽn hatĩ ukẽẽnĩtĩ cĩ Nyekuci kõr cĩ decciaanĩt cĩ lootu, hĩ eet cĩg ꞌtaaũn cĩ ꞌTire hĩ cĩg ꞌThidõõnẽ hĩllõõan cunuung. 23Nẽ niig eeta cĩg Kapernaumĩ, ammuku niig ainnu odongiinnu hatĩ niig õdõlanit hẽẽtkujjieen? Aitiõõ, ooyyu hatĩ niig looccaa cĩ daakiahu. Má baa hĩdĩmattĩ thooꞌthioha baag ĩnaat eeta ꞌtaaũnaa cunuung, ꞌtaaũnaa cĩ ꞌThõõdõmĩ, occa ꞌyioko nga aaĩ ꞌtaaũnĩ niccia hĩĩ noho. 24Nẽẽthĩ haduhaakuunga, mẽẽn hatĩ ukẽẽnĩtĩ cĩ Nyekuci kõr cĩ decciaanĩt cĩ lootu hĩ eet cĩg ꞌThõõdõmĩ hĩllõõan cunuung.”

Iita hĩ nganĩĩt nẽ iyyiomattu

(Tigiil ꞌLuuka 10:21-22)

25Ma kõr niccia, õthõõth Yeesu ĩĩ, “Hadihiꞌthii naa nganiit Baaba caannĩ, Makayyioohit cĩ hẽẽtkujjieen hĩ cĩ lootu, hĩnĩngĩtĩ agunyuthi nii hẽlẽggĩ iccig vẽlẽk hĩ eet ꞌcĩg ĩĩn ꞌgeeꞌnyiak, hĩ ꞌcĩg illimattĩ vẽlẽk nẽ eteretheehu lõhõlĩ ꞌcĩg kidicig. 26Eei Baaba, hĩnĩngĩtĩ baa ĩĩn ciee thõõth ꞌcĩ accamanaa niina.

27“Baa aaꞌnya nganĩĩt Baaba hẽlẽggĩ vẽlẽk. Aitiõõ ẽẽtĩ ꞌcĩ aga Ngeerĩnĩ tõõ, Maaꞌnyĩ dioo ꞌcĩ aga nẽ aitiõõ ẽẽtĩ ꞌcĩ aga Maaꞌnyĩ tõõ, Ngeerĩnĩ dioo ꞌcĩ aga, hĩ eet baag ẽbẽra Ngeerĩnĩ, hátĩ hagaacõ nẽẽg buúk ĩnõõnnõ.

28“Iita hĩ nganĩĩt niig vẽlẽk eeta ꞌcĩg ippiirriau dtiicanẽẽnnĩĩ ĩĩcĩg adĩddĩngĩĩ hĩ ngaatĩ irriongannu ijjio ꞌcĩg adĩddĩngĩĩ, haaꞌnyuung hatĩ naa nĩngĩtĩ iyyiomannu. 29Elemit dtiic ꞌcĩ haaꞌnyuung naana nẽ aanytaangu hillimanuung ngagiita, hĩnĩngĩtĩ tarbal nganĩĩt ꞌthĩnĩt nẽ hatĩ ummuddiaau ꞌyiomman cĩ loriẽẽt cugguung. 30Hĩnĩngĩtĩ abũnnaa dtiici ꞌcĩ haaꞌnyuung naana nẽ õõlõlĩĩ dtiici ꞌcĩ haaꞌnyuung naa ĩdĩmanit.”

अहिले सेलेक्ट गरिएको:

Maatteeo 11: did

हाइलाइट

शेयर गर्नुहोस्

कपी गर्नुहोस्