फिलेमोन 1:17-25

त्‍यसो हुँदा मलाई साझेदार सम्‍झन्‍छौ भने मलाई झैँ उनलाई स्‍वागत गर। यदि उनले केही बिराएका छन् भने या केही तिर्नुपर्ने कुरा छ भने मेरो नाउँमा राखिदिनू। म पावल, आफ्‍नै हातले लेखेर भन्‍छु, त्‍यो मै तिर्नेछु। तिमीले आफ्‍नो जीवन पनि मबाटै लिएको मैले भनिरहनुपर्दैन। यसकारण भाइ, प्रभुमा मेरो लागि पनि यो गरिदेओ। ख्रीष्‍टमा मेरो हृदय आनन्‍दले भरिओस्। लेख्‍दालेख्‍दै पनि मलाई पूरा विश्‍वास छ, तिमीले मैले भनेको गरिदिन्‍छौ र अझ बढी पनि गरिदिन्‍छौ। यसको साथसाथै अर्को कुरो, तिमीहरूको प्रार्थनाले म पनि तिमीकहाँ आउन पाऊँला भन्‍ने आशा राखेको छु र मेरो लागि पनि बस्‍ने ठाउँ मिलाइदेओ। येशू ख्रीष्‍टको लागि मसँग कैदी भएका इपाफ्रासबाट तिमीहरूलाई अभिवादन छ। मसँगै काम गर्ने मर्कूस अनि अरिस्‍तार्खस, डेमास र लूकाको पनि अभिवादन छ। प्रभु येशू ख्रीष्‍टको अनुग्रह तिमीहरूका आत्‍मामा रहोस्।