यहोशू 10:12-14

परमप्रभुले इस्राएलीहरूलाई एमोरीहरूमाथि विजय दिनुभएको दिन यहोशूले परमप्रभुसित कुरा गरे। इस्राएलीहरूको सामु उनले भने, “हे सूर्य, तँ गिबोनमाथि, र हे चन्‍द्र, तँ अय्‍यालोन बेसीमाथि, अडेर बस्!” इस्राएली जातिले आफ्‍ना शत्रुलाई विजय नगरेसम्‍म सूर्य अडिरह्यो अनि चन्‍द्र रोकियो। यो याशारको पुस्‍तकमा लेखिएको छ। सूर्य आकाशको बीचमा अडिबस्‍यो र एक दिनभरि अस्‍ताएन। त्‍यसको अघि वा पछि कहिल्‍यै पनि त्‍यस्‍तो दिन भएको छैन जब परमप्रभुले मानिसका कुरा मान्‍नुभएको थियो। परमप्रभुले इस्राएलपट्टि लागेर युद्ध गर्नुभयो!