यूहन्‍ना 7:37-43

चाडको आखिर र सबैभन्दा मुख्‍य दिनमा येशूले उभिएर सबैले सुन्‍ने गरी भन्‍नुभयो, “तिमीहरूमध्‍ये तिर्खाउनेहरू जति छौ, मकहाँ आएर पिओ। धर्मशास्‍त्रले भनेजस्‍तै ममाथि विश्‍वास गर्ने मानिसको हृदयबाट जीवन दिने खोलाहरू बगिरहनेछन्।” यो कुराचाहिँ येशूले आफूमाथि विश्‍वास गर्ने जतिले पाउने पवित्र आत्‍माको बारेमा भन्‍दै हुनुहुन्‍थ्‍यो किनभने त्‍यस बेलासम्‍म येशू स्‍वर्गमा नफर्किनुभएकोले परमेश्‍वरले पवित्र आत्‍मालाई पठाउनुभएको थिएन। येशूको कुरा सुनेर भीडमा भएका धेरै मानिसहरूले भने, “यी मानिस साँच्‍चै आउनुपर्ने अगमवक्ता नै हुन्।” कोही-कोहीले भने, “उहाँ त मुक्ति दिनुहुने राजा ख्रीष्‍ट नै हुनुहुन्‍छ।” तर कतिले भने, “के ख्रीष्‍ट गालीलबाट आउनुहुन्‍छ र? ख्रीष्‍ट त राजा दाऊदका सन्‍तान हुनुहुनेछ र दाऊदको गाउँ बेथलेहेमबाट आउनुहुनेछ भनेर के धर्मशास्‍त्रमा लेखिएको छैन र?” यसरी येशूको बारेमा मानिसहरूमा फाटो आयो।