आमोस 5:4-15

परमप्रभुले इस्राएलका मानिसहरूलाई भन्‍नुहुन्‍छ, “मकहाँ फर्की आओ र तिमीहरू बाँच्‍नेछौ। बेर्शेबामा पूजा गर्न नजाओ। मलाई बेथेलमा नखोज, बेथेल व्‍यर्थको हुनेछ। गिलगालमा नजाओ, त्‍यहाँका मानिसहरू देश निकालावास हुनेछन्।” परमप्रभुकहाँ जाओ र तिमीहरू बाँच्‍नेछौ। नत्र त आगोको मुस्‍लोझैँ उहाँ योसेफको सन्‍तानमाथि खस्‍नुहुनेछ। आगोले बेथेलका मानिसहरूलाई भस्‍म पार्नेछ र आगो निभाउन कसैले पनि सक्‍नेछैन। न्‍याय बिगार्ने र मानिसहरूका हक खोसी ठग्‍नेहरू, तिमीहरू नाश हुनेछौ। परमप्रभुले तारामण्‍डल बनाउनुभयो, किरकिटी र मृगशिरा तारा-समूह बनाउनुभयो। उहाँले अँध्‍यारोलाई उज्‍यालो र दिनलाई रात बनाउनुहुन्‍छ। उहाँले समुद्रको पानीलाई बोलाएर पृथ्‍वीमाथि खन्‍याइदिनुहुन्‍छ। उहाँको नाम परमप्रभु हो। उहाँले बलियाहरू र तिनका किल्‍लाहरू नाश गर्नुहुन्‍छ। जसले अन्‍यायको विरोध गर्छ र अदालतको अघि साँचो बोल्‍छ, तिनीहरूलाई तिमीहरूले घृणा गर्छौ। तिमीहरूले गरीबलाई सताएका छौ र तिनीहरूका अन्‍न लुटेका छौ। यसकारण आफूले बनाएका पत्‍थरका सुन्‍दर भवनहरूमा तिमीहरू बास गर्न पाउनेछैनौ र आफूले लाएका सुन्‍दर दाखबारीको दाखमद्य पिउन पाउनेछैनौ। तिमीहरूको पाप यति डरलाग्‍दो छ र यति साह्रो अपराध तिमीहरूले गरेका छौ भन्‍ने कुरा मलाई थाहा छ। तिमीहरू असल मानिसहरूको खेदो गर्दछौ, घुस लिन्‍छौ र न्‍याय खोज्‍न न्‍यायालयमा आएका गरीबहरूलाई बाधा दिँदछौ। यसकारण यस्‍तो खराब समयमा चुपचाप भएर बस्‍नु नै बुद्धिमानी कुरा हो। भलाइ गर्ने, खराब नगर्ने सङ्कल्‍प गर र तिमीहरू बाँचौला। तब तिमीहरूले दाबी गरेअनुसार परमप्रभु सर्वशक्तिमान् परमेश्‍वर साँच्‍चै तिमीहरूका साथमा रहनुहनेछ। दुष्‍टतालाई घृणा गर, भलाइलाई प्रेम गर र न्‍यायालयमा निष्‍पक्ष न्‍याय गर। यस जातिका मानिसहरू, जो अझै बाँचिरहेका छन्, तिनीहरूमाथि सायद परमप्रभुले कृपा गर्नुहुनेछ।