१ शमूएल 27:1-7

दाऊदले मनमनै भने, “एक न एक दिन शाऊलले मलाई मार्नेछन्। पलिश्‍तमा भागेर जानु मेरो निम्‍ति सबैभन्दा असल हुनेछ। तब शाऊलले मलाई इस्राएलमा खोजी गर्न छोड्‍नेछन् र मलाई डर हुनेछैन।” यसर्थ तुरुन्‍तै दाऊद र तिनका छ सय मानिसहरू माओकको छोरो गातका राजा आकीशकहाँ गए। दाऊद र तिनका मानिसहरू परिवारसहित गातमा बसोबास गर्न लागे। दाऊदका दुईवटी स्‍वास्‍नीहरू तिनीसित थिए– एउटी यिजरेलकी अहीनोम र अर्की नाबालकी विधवा कर्मेलकी अबीगेल। दाऊद भागेर गातमा गएका छन् भन्‍ने सुनेपछि शाऊलले तिनको खोजी गर्न छोडे। दाऊदले आकीशलाई भने, “यदि तपाईं मेरा मित्र हुनुहुन्‍छ भने मलाई बसोबास गर्न एउटा सानो सहर दिनुहोस्। मलाई हजुरसित राजधानीमा बस्‍ने केही जरुरत छैन।” यसकारण आकीशले दाऊदलाई सिक्‍लग सहर दिए। त्‍यसैकारण त्‍यस दिनपछि सदासर्वदा सिक्‍लग यहूदाका राजाहरूको सम्‍पत्ति भएको छ। दाऊद पलिश्‍तमा सोह्र महिनासम्‍म बसे।