१ शमूएल 14:47-52

शाऊल इस्राएलका राजा भएपछि उनले आफ्‍ना सबै शत्रुहरूसित सबै ठाउँमा लडाइँ गरे। उनले मोआब, अम्‍मोन, एदोमका मानिसहरू, सोबाका राजा र पलिश्‍तीहरूसित लडाइँ गरे। जहाँजहाँ लडाइँ गरे, त्‍यहाँत्‍यहाँ तिनले जिते। उनले वीरतासाथ लडाइँ गरे र अमालेकीहरूलाई पनि हराए। उनले इस्राएलीहरूलाई सबै हमलाबाट बचाए। शाऊलका छोराहरू जोनाथन, यिश्‍वी, मल्‍कीशूअ थिए। तिनका जेठी छोरी मेराब र कान्‍छी छोरी मीकल थिए। उनकी रानी अहीमासकी छोरी अहीनोम थिइन्। उनका काका नेरका छोरा अबनेर सेनापति थिए। शाऊलका बुबा कीश र अबनेरका बुबा नेर अबीएलका छोराहरू थिए। शाऊलले आफ्‍नो जीवनकालभरि पलिश्‍तीहरूसित लडाइँ गर्नुपर्‍यो। यसकारण जहिले-जहिले कोही बलियो वा साहसी पुरुष भेट्थे, त्‍यही बेला उनले त्‍यसलाई आफ्‍ना सेनामा भर्ती गर्थे।