Yoano 6
6
1Habafwile yino myanda Yesu bayile adi’eshia dia Ngadileo, dingi eshina nyi bu Tibuliase. 2Biabia, kibumbu kia bantu kibamulondele, mwanda abamwene bilengeleshi bie, bibadi akitshi kwi basha masungu. 3Yesu bakamine ku ngulu, bashalele hanka na bana-be-ba-bukishi. 4Binyibinyi, Mpashika, nyi bidibwa bia kusehela bia Bena Yudea yibadi hehi.
5Hababandulukile Yesu meso E, bamwene kibumbo kikata akitiki kwadi E, balungwile Fidiho, eshi: Atukaula mampa kwi kunyi akuha’ba, bādi? 6Bamutwele munda kumwihusha mwanda wa kumutompa, mwanda E na mwinyi badi mwiukye bia kyebe kukita. 7Fidiho bamwalulwile’shi, Sunga mampa aulwe ku nfalanga nkama ibidi kwi baha muntu kahela, muntu kahela, ta bakalombana, ooo. 8Umune, a bana-be-ba-bukishi, Andeleo, mukwabo na Shimona Petelo, bamwambile’shi, 9Kuno kwi mukinga mulume, e na mitanda itano yia mampaa baale, na tushiho tubidi tuhela; anka bino namu bi na minyi, na bantu be bungi bino’ba? 10Yesu bambile’shi: Shadishai bantu. Binyibi lubishi lwi bungi lubadi kwanka. Biabia, balumi bu binunu bitano abashalele. 11Yesu batambwile mitanda ya mampa, habatumbwile, beyabile kwi bana-be-ba-bukishi, n’abo namu babahele babadi bashale; na tushiho namu bungi bu biababadi a bakyebe. 12Habaikwite, balungwile bana-be-ba-bukishi’shi: Kongolai bihese bibashala, ta nushimishanga sunga nkimune. 13Henyihaha, babebisangwile, bebiomeka bisele bikumi na bibidi, biaula ndaa, na bihese bia mitanda yitano ya baale yibashele kwa badile. 14Binyibiabia, baba bana balume, hababamwene kino kilengeleshe kibakitshine Yesu, babambile’shi: Binyibinyi, uno’u ngi’awa mutemukye akafikye hano-ha-nsenga.
15Habeukyile Yesu ’shi abakyebe kumuata ha bukoho, na ku mutwesha mbufumu, bakatukile, bayile dimo ku ngulu buhenka bwe. 16Habahone nguba, bana-be-ba-bukishi babaikile kwishiba. 17Abatwele’mbwato, ababukile adi’eshia ku Kahanamu. Bufuku bubayile, na Yesu ta badi mubande kufika kwabadi. 18Mema abadi atenkatenka mwanpa wa kihahi kikata kibahukile. 19Biabia, habaitshile bwato kihimo bu kilometre inanka su itano, abamwene Yesu atambuka hanundu ha mema, afiki kwihi na bwato, n’abo abakwatshibwe na moo. 20Anka E bebalungwile’shi: Nami uno, ta nutshinanga. 21Biabia, abasangulukile kumutwesha ’mbwato: kahindji naka bwato bubafikye ku mahia kwa bubendanga.
22Hadi’efuku dia maloba bantu abadi bemane adi’eshia di’eshiba, hababamwene’shi kubakutshikwa bungi bwato, anka abwa bubatwelele bana-be-ba-bukishi; Yesu namu ta mwende mu bwato na bana-be-ba-bukishi hamune, anka bana-be-ba-bukishi nyi abayile abo ba na bene: 23(Anka kubafikile angi mato ku Tibelease, hehi ku kihindji kia babadile mampa, habatumbwile Nfumwetu.) 24Binyibiabia, habamwene bantu’shi Yesu tabadi kwanka, sunga bana-be-ba-bukishi, abo namu abaikile ’mato, babafikile ku Kahaneuma mu kukimba Yesu. 25Hababamwene dingi eshia di’eshiba, abamwihwishe’shi, Labi bofikile kuno nguba bi nkunyi? 26Yesu bebalulwile’shi: Binyibinyi, binyibinyi, nenwambashi, Tanunkimbila ha mwanda nubamwene bilengeleshe biande, ng’anka mwanda nubadile mitanda, nwa yikuta.
27Tanufubilanga bidibwa abinyanga, anka ku bia kwikala mpa na ku muwa wa ikala-ika; abikenuha Mwan’a Muntu, mwanda E batudilwe kitundwilo kwi Yaiya Efile Mukulu na mwinyi. 28Binyibiabia, abamwihwishe’shi, Tukita na minyi bia tudi akukita mifubo y’Efile Mukulu? 29Yesu bebalulwile’shi: Uno nyi mufubo w’Efile Mukulu’shi, nukumine mwadi E abatumine. 30Binyibiabia abamwihwishe’shi: A nkitundwilo kinyi kio kitshi, tumone, tukukumine? A nkinyi kio fubu? 31Bashyetu-kulu babadile māna mu kabaka, bu bibafundjibwe’shi: E bebahele bidibwa bia mwiilu. 32Biabia Yesu bebalungwile’shi: Binyibinyi, binyibinyi, nenulungula’shi, Mosesa ta mwinuhe abia bidibwa bia mwiilu, anka Shami E nuheya bidibwa bia binyibinyi bia mwiilu. 33Mwanda bidibwa bi’Efile Mukulu, nyi ngyawa baikile mwiilu, aha be ha nsenga muwa.
34Binyibiabia abamwalulwile’shi: A Mwanana, etuhe bino bidibwa bia mafuku oso. 35Yesu bebalungwile’shi: Nyi biashi bia muwa; e afiki kwandji ta kamono nsala, n’e ankumina, ta kekala na nyota sunga ngihela. 36Anka nenulungwile’shi: Nubamwene namu ta nwibankumine. 37Boso babampele Yaiya abakafiki kwandji, n’e afiki kwandji ta nkamubingi, ayoyo. 38Mwanda nkimufikile mwiilu kukita bu mwankyebela, anka amukyebela bantumine. 39Bino nyi abikyebe eshimba dia bantumine’shi: ku bioso biampele, tankashimisha sunga nkimune; anka nkekisangula h’efuku dia nkonko. 40Bino nyi abikyebe eshimba dia bantumine’shi; muntu ese atala Mwana, amukumina, akekala na muwa wa ikala-ika; n’ami nankamubusha kwifuku dia nkonko. 41Binyibiabia Bena Yudea babadi abamūñuna, mwanda E bebalungwile’shi, Ami nyi biashi bibafikile mwiilu. 42Abaihwishe’shi: Ta ngwinyi Yesu, mwan’a Yosefe, shye na nyina atwibeuku? A biabia nkinyi’shi, āmbashi, natukile mwiilu? 43Binyibiabia Yesu bebalulwile’shi: Tanwiununanga munkatshi mwenu. 44Ta kwi muntu sunga ngumune euku kufika kwandji, anka su Yaiya bantumine, amukaka: n’ami nankamubusha kwifuko dia nkonko. 45Kibafundjibwe mu (mikandaya) batemukye’shi: Boso abakalambukishwa kw’Efile Mukulu. Binyibiabia, muntu ese bahushishe bayiyile kwi Yaiya, afiki kwandjimi. 46Takwi muntu bamwene Yaiya anka E bafikile kw’Efile Mukulu, E nyibawene Yaiya. 47Binyibinyi, binyibinyi nenwambashi: Awa akumina mwimi e na muwa wa ikala-ika, 48Ami nyi binyi biashi bia muwa. 49Bashenu babadile māna mu kabaka, babafwile. 50Bino nyi biashi abifikā mwiilu’shi, muntu akebidi takafu. 51Ami nyi binyi biashi bia niuwa, bibal’ikile mwiilu: su muntu adi bino biashi, akekala na muwa wa ikala-ika: na binyi biashi biankebaha, nyi mbidi yande, biankahanyina ku muwa wa ba-hano-ha-nsenga. 52Binyibiabia, Bena Yudea babelene mpaka’shi, Au muntu euku kwituha mbidi ye tweyidia na minyi? 53Biabia Yesu bebalungwile’shi: Binyibinyi, binyibinyi, nenwamba’mishi, Su ta nwibadia mbidi ya Mwan’a Muntu, na kutoma mas’E, ta nwi na muwa munda mwenu. 54Ese adi mbidi yande, atomo mase ande, e na muwa wa ikala-ika: n’ami nankamubusha kwifuku dia nkonko. 55Mwanda mbidi yande nyi bidibwa binyibinyi, na mase ande nyi kia kutoma binyibinyi. 56Awa adi mbidi yande, atomo mase ande, emubombele mwimi, n’ami namu mwadi. 57Bi bantumine Yaiya a muwa, n’ami namwene muwa kwi Yaiya; anka biabia yawa akandji, na mwinyi akekala na muwa kwandjimi. 58Uno nyi binyi biashi bibafikile mwiilu: ta hamune’nka bashenukulu babadile, māna, babafwile; ’ādi bino biashi akekala na muwa wa ikala-ika. 59Bino bintu bebiakwile mu kitumbwilo, habadi alambukisha mu Kahaneuma. 60Binyibiabia bangi ba bana-be-ba-bukishi, habahushishe biabia, tabakula’shi: Uno mwanda wi bukoho, nanyi euku kwiushingula?
61Habeukile Yesu munda we’shi, bana-be-ba-bukishi abeunyinga, bebehwishishe: Uno mwanda awinukokosha su?
62Su anukamona Mwan’a Muntu akamina mubadi kwibedi, a na minyi? 63Nyi Kikudi akihana muwa, mbidi tayikita kintu: myanda yanyinulungula, ngia kikudi nayamuwa. 64Anka kwi bangi hanudiha bashi bakumine. Mwanda Yesu badi mwiukye kumbangilo abo tababadi bakumine, n’awa akamusokola. 65Biabia, E bakwile’shi: Nyi ha uno mwanda nenulungwile’shi: Muntu teuku kwifwila kwandji, anka su nkimuhebwe kwi Yaiya.
66Ku kia kihindji banabe-ba-bukishi be bungi babalukile kunyima, tambende n’e dimo. 67Biabia Yesu behwishe bekumi na babidi’shi: Anwe namu anukyebe kwenda su?
68Henyihaha Shimona Petelo bamwalulwile’shi: A Mumu, atukēnde kwi’nyi? Obe we na misambo ya muwa wa ikala-ika. 69Atwe atuku mina na kwiuka’shi: Obe we Kidisitu, A Kishila’ Efile Mukulu a muwa. 70Yesu bebalulwile’shi: Ami nkinusangwile ekumi na babidi be? anka umo’enu nga diabola. 71Badi akula ’Yudasa Isakadiota mwan’a Simono: mwanda ne badi akyebe kumusokola, e biabadi mwikale umune a ku be kumi na babidi.
अहिले सेलेक्ट गरिएको:
Yoano 6: NTLK52
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1952 Alliance Biblique de la République Démocratique du Congo
