Yoano 5
5
1Hakubahu bino kubadi bidibwa bia kusehela bia Bena Yudea; na Yesu bakamine ku Yelusalema. 2Mu Yelusalema hehi ku kibelo kia mukoko, kubadi edindji dia mema, dibatemunwa mu edimi dia Bena Hebelu, bu Beteseda; dibadi na bitanda bitano. 3Mu binyi bitanda mubalele kibumbu kikata kia bantu na masungu, bampofu, balemane na balumina, abadi abaindjilanga kusanyisha kwa mema. 4Mwanda mwiikeilu baikile mwanka ha kihindji na kihindji mwidindji dia mema, mu kusanyisha mema: biabia, hakusanyisha mema, muntu ese aiki mwanka kwibedi bahwishwa busungu bubadi n’abo, su nkinyi su nkinyi. 5Kubadi muntu kwanka badi mukumbo bihwa makumi asatu na bihwa mwanda. 6Yesu habamumwene mulale, na hakwiuka’shi tabaishishe anka biabia, bamwihwishe’she: Okyebe kwikala mukumbeno su? 7Uno muntu mubofule bamwalulwile’shi: A Mwanana, nki na muntu a kunyikisha mwidindji ahasana mema: anka hankiafiki, mungi taikile kumpala kwande. 8Yesu bamulungwile’shi: Ebwe, weboshe lusala lwobe, tambuka. 9Kahindji naka, muntu tadi mukumbenwe, bebwesheshe lusala lwe, batambukile; diadia efuku dibadi dia Sabado.
10Henyihaha Bena Yuda balungwile mwinyi bahashibwe’shi; Nyi efuku dia Sabado: nyi nkishila obe kutwala lusala lwobe. 11Bebalulwile’shi: Winyi ba mpashishe, na mwinyi bandungwile’shi: Eboshe lusala lwobe, otambuke. 12Henyihaha, babamwihwishe’shi: A muntu kinyi bakulungula biabia’shi: Ebosha lusala lwobe, otambuke?
13E badi muhashishwe, ta mwiukyele nanyi bamuhwishishwe: mwanda Yesu bahwile kukunguluka, mwanda kibumbu kibadi ku kiakia kihindji. 14Kumongo, Yesu bamusañene mu ntempelo, bamulungwile’shi: Talanga, bohashibwe, tosolanga mwanda dimonyi, su kingi kintu nkikile kino akikafika kodibe. 15Muntu yawa bakatukile, balungwile Bena Yuda’shi: Nyi Yesu abampashishe. 16Nyi ha uno mwanda Bena Yuda abasabule Yesu, abakimbile kumwiha, mwanda E bakitshine yaya myanda h’efuku dia Sabado.
17Anka Yesu bebalulwile’shi: Shami afubā kwibedi mpaa na bino, n’ami namu nafubu. 18Binyibiabia, Bena Yuda abakambile kukimba kumwiha, tañanka mwanda E bashulwile kishila kia Sabado, ooo, E namu batemuna’shi: Efile Mukulu bu Nshye na mwinyi, biabia E bahwandjikishe E na mwinyi hamune n’Efile Mukulu. 19Binyibiabia Yesu bebalungwile’shi: Binyibinyi, binyibinyi, nenwambashi; Mwinyi Mwana teuku kukita kintu, E na mwinyi, anka kiakia kiamwene Shye akitshi: mwanda abio bioso abikita Yaiya, anka biabia abikita Mwana hamune. 20Mwanda Yaiya e na Mwana kifulo, amulesha bintu bioso biākitā E na mwinyi: E nyi akamulesha mifubo yingi nyikile yino’shi, anwe anukakanya. 21Mwanda’nka bu Shye abusha bafwe, ebasangulā, anka biabia Mwana namu asangulā ese na Mwinyi akyebe. 22Mwanda Yaiya temukishā muntu, anka tabahele Mwana kwimukisha bimu bioso. 23Eshi, boso bakanemeka Mwana, anka hamune mwabanemeka Yaiya. Awa shi anemeka Mwana, ta munemeka Shye bamutumine. 24Binyibinyi, binyibinyi, nenwambashi: yawa ahusha mwanda wande akumina hadi E bantumine, e na muwa wa ikala-ika: takafiki ku kimu, ooo, anka tabakatukile ku lufu, bakilakila ku muwa. 25Binyibinyi, binyibinyi nenulungulu’shi: efuku adikafiki, na binobino di kwanka, adikahusha bafwe Eyi dia Mwan’Efile Mukulu, n’abo, abahusha abakekala na muwa. 26Mwanda bu Yaiya E na muwa mwi na mwinyi, biabia, E bahele Mwana kwikala na muwa mwi na mwinyi. 27E namu bamuhele matalwa kutshiba myanda ya bimu, mwanda E nyi Mwan’a muntu, 28Ta nukanyanga ha uno mwanda: mwanda kihindji akikafiki, mwanka’kio boso be mu mashama, abakahusha Ei diE: 29abakatuku, abo’shi abakitshine bibuwa, kwi lusangukilo lwa muwa n’abo abakitshine bibubi, kwi lusangukilo lwa kuhishibwa. 30Ami na mwinyi tañuku kukita kintu, bi nahusha biabia natshibi (mwanda) na kutshiba kwande nkululame; mwanda nki mukimbe (kukita) eshimba diande, anka’kikyebe eshimba dia Yaiya bantumine. 31Su netemuna ami na mwinyi, kwitemunwa kwande ta nkwa binyibinyi.
32Kwi mungi antemuna, ami, neuku’shi kutemuna kwe, kwantemuna, nyi kwa binyibinyi. 33Nubatumine kwi Yoano, e batemukile bia binyibinyi. 34Anka ami tantambula misambo kwi muntu anka nesamba yino myanda ha mwanda’nwe kuhashibwe. 35E badi etala aditembe n’etata ditoka soo: anwe nubakuminyine kikindji kusehela mwitata die.
36Ank’ami nyi na misambo yikile ya Yoano: mwanda bikitshino biba mpele Yaiya bia kuhudisha, bino bikitshino binakitshi, abintemusha’shi ng’Yaiya bantumine. 37Yaiya na mwinyi bantumine, bantemwine namu. Anwe ta nwibahushe Ei die, sunga kihindji kimune, sunga nkumona mbidi ye. 38N’anwe Ei die tandishale munda mwenu: mwanda’nwe ta nwibakumine a bantumine.
39Kimbai mu bifundjibwe, mwanda mwanka mwa nutentekesha’shi: twi na muwa waikala-ika: abio nyi abintemuna. 40N’anwe anutunu kufika kwandjimi, kwa nudi akutambula muwa. 41Tankumina kutambula kinemo kwi bantu, ooo. 42Anka nenwiuku’shi, ta nwi na kifulo ki’Efile Mukulu mundu mwenu. 43Nafikile mwishina dia Yaiya ande, tanwibankumine: su mungi afiki mwishina die na mwinyi, anukamukumina. 44Anwiuku kukumina na minyi, anwe’betumbishena, tanukyebe ntumbo ayifikye kwEfile Mukulu, ank’E na mwinyi? 45Ta nutentekeshanga’shi: Ami nankenuhīsha kwi Shami: akenuhīsha e kwanka, nyi Mosesa, anwibakuluhile. 46Mwanda, su nubadi akukumina Mosesa nubadi akunkumina’mi, mwanda e bafundjile mwanda wande. 47Anka su anwe ta nwibakumine bifu ndwe bie, anukakumina masimbo yande bi kunyi?
अहिले सेलेक्ट गरिएको:
Yoano 5: NTLK52
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1952 Alliance Biblique de la République Démocratique du Congo
