ယောဟန် 20
20
ရှင်ပြန်ထမြောက်တော်မူခြင်း
1တနင်္ဂနွေနေ့နံနက်စောစော#20:1 မူရင်းဂရိကျမ်းတွင် “ရက်သတ္တပတ်၏ ပထမနေ့” ဟု ဖော်ပြထားသည်။ မှောင်လျက် ရှိနေသေးချိန်တွင် မာဂဒလမာရိသည် သင်္ချိုင်းဂူသို့ ရောက်လာရာ ဂူဝ၌ ပိတ်ထားသောကျောက်တုံးကြီးမှာ ဘေးဘက်သို့ လှိမ့်ဖယ်ထားပြီးဖြစ်သည်ကို မြင်လေ၏။ 2ထို့ကြောင့် သူသည် ရှိမုန်ပေတရုနှင့် ယေရှုချစ်တော်မူသည့် အခြားသောတပည့်တော်ထံသို့ ပြေး၍ “သူတို့သည် သခင့်အလောင်းတော်ကို သင်္ချိုင်းဂူမှ သယ်ယူသွားကြ၏။ မည်သည့်နေရာ၌ ထားကြသည်ကို မသိပါ” ဟု ဆိုလေ၏။
3ထိုအခါ ပေတရုနှင့် ထိုတပည့်တော်သည် သင်္ချိုင်းဂူရှိရာသို့ ပြေးသွားကြ၏။ 4ထိုသို့သူတို့နှစ်ဦး အတူပြေးကြရာ ထိုတပည့်တော်သည် ပေတရုကို ကျော်၍ သင်္ချိုင်းဂူသို့ ဦးစွာရောက်လေ၏။ 5ထိုအခါ သူသည် ငုံ့၍ကြည့်သော် ပိတ်ချောထည်များ ရှိနေသည်ကို မြင်လေ၏။ သို့သော် သူသည် ဂူထဲသို့ မဝင်ဘဲနေ၏။ 6ထိုအချိန်တွင် သူ၏နောက်မှ လိုက်လာသော ရှိမုန်ပေတရုသည် ရောက်လာ၍ ဂူထဲသို့ ဝင်သော် ပိတ်ချောထည်များ ရှိနေသည်ကိုလည်းကောင်း၊ 7ယေရှု၏ခေါင်းတော်၌ ပတ်စည်းခဲ့သောပဝါသည် ထိုပိတ်ချောထည်နှင့်အတူမရှိဘဲ တစ်နေရာတွင် သီးခြားလိပ်လျက်ရှိနေသည်ကိုလည်းကောင်း မြင်လေ၏။ 8ထို့နောက် သင်္ချိုင်းဂူသို့ ဦးစွာရောက်သည့် အခြားတပည့်တော်သည်လည်း ဂူထဲသို့ ဝင်၍ ထိုအရာကို မြင်သဖြင့် ယုံကြည်လေ၏။ 9ထိုအချိန်တိုင်အောင် သူတို့သည် ယေရှုသေခြင်းမှရှင်ပြန်ထမြောက်ရမည်ဟူသော ကျမ်းစကားကို နားမလည်ကြသေးချေ။ 10ထို့နောက် ထိုတပည့်တော်နှစ်ဦးတို့သည် အိမ်သို့ပြန်ကြ၏။
မာဂဒလမာရိကို ကိုယ်ထင်ပြတော်မူခြင်း
11မာရိသည် သင်္ချိုင်းဂူအပြင်တွင် ရပ်၍ ငိုကြွေးလျက်နေ၏။ ထိုသို့ ငိုကြွေးရာမှ ဂူထဲသို့ ငုံ့၍ ကြည့်သော် 12အဝတ်ဖြူကို ဝတ်ဆင်ထားသော ကောင်းကင်တမန်နှစ်ပါးသည် ယေရှုအလောင်းတော်ထားရာနေရာ ခေါင်းရင်း၌ တစ်ပါး၊ ခြေရင်း၌ တစ်ပါး ထိုင်နေကြသည်ကို မြင်လေ၏။ 13သူတို့က “အို နှမငယ်… အဘယ်ကြောင့် ငိုကြွေးနေသနည်း” ဟု မာရိကို မေးကြ၏။ မာရိက “ကျွန်မ၏ သခင်ကို သူတို့သယ်ယူသွားကြပြီ။ မည်သည့်နေရာ၌ ထားသည်ကို ကျွန်မမသိပါ” ဟု ဖြေ၏။
14ထိုသို့ဖြေပြီးမှ နောက်သို့ လှည့်ကြည့်ရာ ယေရှုရပ်တော်မူလျက်ရှိသည်ကို မြင်လေ၏။ သို့သော်လည်း ယေရှုဖြစ်တော်မူသည်ကို မာရိမသိချေ။ 15ယေရှုက “အို နှမငယ်… အဘယ်ကြောင့် ငိုကြွေးသနည်း။ မည်သူ့ကို ရှာသနည်း” ဟု မာရိကို မေးတော်မူ၏။ မာရိသည် ယေရှုကို ဥယျာဉ်စောင့်ဟု ထင်မှတ်၍ “အရှင်… ကိုယ်တော်သည် သူ့ကို သယ်ယူသွားခဲ့လျှင် မည်သည့်နေရာ၌ ထားသည်ကို ကျွန်မကို ပြောပါ။ ကျွန်မ သွား၍ ယူပါမည်” ဟု ဆို၏။
16ယေရှုက “မာရိ” ဟု ခေါ်လျှင် မာရိသည် လှည့်၍ ဟေဗြဲဘာသာဖြင့် “ရဗ္ဗုနိ” ဟု ထူးလေ၏။ (ရဗ္ဗုနိ၏ အဓိပ္ပာယ်သည် ဆရာကို ဆိုလို၏။)
17ယေရှုက “ငါသည် ခမည်းတော်ထံသို့ မတက်ရသေးသဖြင့် ငါ့ကို မထိနှင့်ဦး။ ငါ့တပည့်တို့#20:17 မူရင်းဂရိကျမ်းတွင် “ငါ့ညီအစ်ကိုတို့” ဟု ဖော်ပြထားသည်။ထံ သွား၍ ‘ငါ့အဖဟူသော သင်တို့၏အဖ၊ ငါ့ဘုရားသခင်ဟူသော သင်တို့၏ ဘုရားသခင်ထံသို့ ငါတက်သွားရမည်’ ဟူ၍ ပြောလော့” ဟု မိန့်တော်မူ၏။
18မာဂဒလမာရိသည် သွား၍ “သခင့်ကို ငါမြင်ခဲ့ရပြီ” ဟု တပည့်တော်တို့ကို ဆိုပြီးလျှင် ယေရှုမှာကြားတော်မူသောအရာများကို ပြောပြလေ၏။
တပည့်တော်တို့ကို ကိုယ်ထင်ပြတော်မူခြင်း
19တနင်္ဂနွေနေ့ညနေတွင်#20:19 မူရင်းဂရိကျမ်းတွင် “ရက်သတ္တပတ် ပထမနေ့၏ညနေ” ဟု ဖော်ပြထားသည်။ တပည့်တော်တို့သည် ဂျူးခေါင်းဆောင်များကို ကြောက်ရွံ့သဖြင့် အခန်းတံခါးများကို ပိတ်၍ စုဝေးနေကြ၏။ ထိုစဉ် ယေရှုသည် ရုတ်တရက်ကြွလာ၍ သူတို့အလယ်တွင် ရပ်တော်မူလျက် “ငြိမ်းချမ်းပါစေ” ဟု နှုတ်ဆက်တော်မူ၏။ 20ထိုသို့နှုတ်ဆက်တော်မူပြီးနောက် မိမိလက်တော်နှင့် နံဘေးတော်တွင် ရရှိခဲ့သော ဒဏ်ရာများကို ပြတော်မူ၏။ တပည့်တော်တို့သည် သခင်ဘုရားကို တွေ့မြင်သောအခါ ဝမ်းမြောက်ကြ၏။ 21တစ်ဖန်ယေရှုက “ငြိမ်းချမ်းပါစေ။ ခမည်းတော်သည် ငါ့ကို စေလွှတ်တော်မူသကဲ့သို့ ငါသည် သင်တို့ကို စေလွှတ်၏” ဟု တပည့်တော်တို့အား မိန့်တော်မူ၏။ 22ထို့နောက် ယေရှုသည် တပည့်တော်တို့အပေါ် လေကို မှုတ်တော်မူလျက် “သန့်ရှင်းသောဝိညာဉ်တော်ကို ခံယူကြလော့။ 23တစ်စုံတစ်ဦး၏ အပြစ်ကို သင်တို့ခွင့်လွှတ်လျှင် ထိုသူသည် အပြစ်လွှတ်ခြင်းကို ခံရ၏။ သင်တို့ခွင့်မလွှတ်လျှင် ထိုသူသည် အပြစ်လွှတ်ခြင်းကို မခံရ” ဟု မိန့်တော်မူ၏။
သောမကို ကိုယ်ထင်ပြတော်မူခြင်း
24ယေရှုကြွလာတော်မူသောအခါ တပည့်တော်ဆယ့်နှစ်ပါးထဲမှ တစ်ပါးဖြစ်သူ အမြွှာပူး#20:24 မူရင်းဂရိကျမ်းတွင် “ဒိဒုမု” ဖြစ်သည်။ဟု အမည်တွင်သော သောမသည် တပည့်တော်တို့နှင့်အတူ မရှိပေ။ 25ထို့ကြောင့် တပည့်တော်တို့က “ငါတို့သည် သခင့်ကို မြင်ကြရပြီ” ဟု သောမအား ပြောပြကြ၏။ သို့သော် သောမက “အရှင့်လက်တော်တို့၌ သံရိုက်ရာကို မမြင်ရ၊ ထိုသံရိုက်ရာကို လက်ညှိုးဖြင့်မတို့ရ၊ နံဘေးတော်ကို လက်ဖြင့် မစမ်းရလျှင် ငါမယုံ” ဟု ဆို၏။
26ရှစ်ရက်ကြာသော် တပည့်တော်တို့သည် တစ်ဖန်စုဝေးကြ၏။ သောမသည်လည်း ထိုသူတို့နှင့်အတူ ရှိ၏။ သူတို့သည် တံခါးများကို ပိတ်ထားကြ၏။ သို့သော်လည်း ယေရှုသည် ယခင်ကဲ့သို့ ရုတ်တရက်ကြွလာ၍ သူတို့အလယ်တွင် ရပ်တော်မူလျက် “ငြိမ်းချမ်းပါစေ” ဟု နှုတ်ဆက်တော်မူ၏။
27ထို့နောက် ယေရှုသည် သောမအား “သင့်လက်ညှိုးဖြင့် ဤနေရာကို စမ်း၍ ငါ့လက်တို့ကို ကြည့်လော့။ သင့်လက်ဖြင့် ငါ့နံဘေးရှိ ဒဏ်ရာကိုလည်း စမ်းကြည့်လော့။ သံသယမဖြစ်နှင့်။ ယုံကြည်လော့” ဟု မိန့်တော်မူ၏။
28သောမက “အကျွန်ုပ်၏သခင်… အကျွန်ုပ်၏ဘုရားပင် ဖြစ်ပေ၏” ဟု ပြန်၍လျှောက်၏။
29ထိုအခါ ယေရှုက “သင်သည် ငါ့ကို မြင်ရ၍ ယုံကြည်၏။ ငါ့ကို မမြင်ဘဲ ယုံကြည်သောသူတို့သည် မင်္ဂလာရှိ၏” ဟု သောမအား မိန့်တော်မူ၏။
ဤကျမ်းစာကို ရေးသားရခြင်း၏ရည်ရွယ်ချက်
30ဤကျမ်းစာတွင် မရေးထားသောအခြားနိမိတ်လက္ခဏာများစွာကိုလည်း ယေရှုသည် တပည့်တော်တို့ရှေ့တွင် ပြုတော်မူ၏။ 31သို့သော် ယေရှုသည် ဘုရားသခင်၏ သားတော် ခရစ်တော်#20:31 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏ အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။ဖြစ်ကြောင်း သင်တို့ယုံကြည်ကြစေရန်နှင့် ထိုသို့ ယုံကြည်၍ နာမတော်၏တန်ခိုးအားဖြင့်#20:31 မူရင်းဂရိကျမ်းတွင် “ကိုယ်တော်၏နာမတော်၌” ဟု ဖော်ပြထားသည်။ အသက်ကို ရရှိကြစေရန် ဤကျမ်းစာကို ရေးသားရခြင်းဖြစ်၏။
လက်ရှိရွေးချယ်ထားမှု
ယောဟန် 20: BCB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
