ဆာလံကျမ်း 106
106
အစ္စရေးလူမျိုးတို့ ဘုရားသခင်အပေါ်သစ္စာမဲ့ကြခြင်း
1ထာဝရဘုရားကို ချီးမွမ်းကြလော့။ ထာဝရဘုရားသည် ကောင်းမြတ်တော်မူ၍
ကိုယ်တော်၏မေတ္တာကရုဏာတော်သည် အစဉ်အမြဲတည်သောကြောင့် ကျေးဇူးတော်ကို ချီးမွမ်းကြလော့။
2ထာဝရဘုရား၏အစွမ်းတန်ခိုးတော်များအကြောင်းကို မည်သူထုတ်ဖော်ပြောဆိုနိုင်မည်နည်း။
ကိုယ်တော်၏ဂုဏ်ကျေးဇူးတော်အပေါင်းကို မည်သူဖော်ပြနိုင်မည်နည်း။
3တရားမျှတသောအမှုကိုစောင့်ထိန်း၍ ဖြောင့်မတ်သောအမှုကို
အစဉ်အမြဲပြုကျင့်သောသူတို့သည် မင်္ဂလာရှိကြ၏။
4-5အို ထာဝရဘုရား၊ အကျွန်ုပ်သည် ကိုယ်တော်ရွေးကောက်သောသူတို့၏ ကောင်းကျိုးချမ်းသာကို
မြင်နိုင်စေရန်လည်းကောင်း၊ ကိုယ်တော့်လူမျိုးတော်၏ဝမ်းမြောက်ခြင်း၌
ပါဝင်ဝမ်းမြောက်နိုင်စေရန်လည်းကောင်း၊ ကိုယ်တော်၏အမွေတော်၌
ဂုဏ်ယူဝါကြွားနိုင်စေရန်လည်းကောင်း၊ ကိုယ်တော်၏လူမျိုးတော်ကို
ကျေးဇူးပြုတော်မူသောအခါ အကျွန်ုပ်ကိုသတိရတော်မူပါ။
သူတို့ကို ကယ်တင်တော်မူသောအခါ အကျွန်ုပ်ကိုလည်း စာရင်းဝင်စေတော်မူပါ။
6အကျွန်ုပ်တို့သည် အကျွန်ုပ်တို့၏ဘိုးဘေးများနှင့်အတူ အပြစ်ပြုကြပါပြီ။
ဒုစရိုက်ကိုပြုကြပါပြီ။ ဆိုးယုတ်သောအမှုကိုပြုကြပါပြီ။
7အကျွန်ုပ်တို့၏ဘိုးဘေးများသည် အီဂျစ်ပြည်၌ရှိစဉ် ကိုယ်တော်၏အံ့ဖွယ်သောအမှုတို့ကို
ဂရုမပြုခဲ့ကြပါ။ သူတို့သည် ကိုယ်တော်၏ကြီးမားသော မေတ္တာကရုဏာတော်ကို
မအောက်မေ့ဘဲ ပင်လယ်အနီး၊ ပင်လယ်နီအနီးတွင် ပုန်ကန်ခဲ့ကြပါ၏။
8သို့သော် ကိုယ်တော်သည် မိမိ၏အစွမ်းတန်ခိုးတော်ထင်ရှားစေရန်
မိမိ၏နာမတော်ကိုထောက်၍ သူတို့ကိုကယ်တင်တော်မူ၏။
9ကိုယ်တော်သည် ပင်လယ်နီကို ဆုံးမတော်မူရာ ၎င်းသည်ခန်းခြောက်လေ၏။
ထို့နောက် တောကန္တာရကိုဖြတ်သကဲ့သို့ နက်ရှိုင်းသောရေထုကို ဖြတ်၍
သူတို့ကိုပို့ဆောင်တော်မူ၏။
10မုန်းသောသူ၏လက်မှ သူတို့ကိုကယ်တင်တော်မူ၍
ရန်သူ၏လက်မှ သူတို့ကိုရွေးနုတ်တော်မူ၏။
11ရေသည် သူတို့၏ရန်သူများကိုဖုံးလွှမ်းသဖြင့် ရန်သူထဲတွင်
အသက်ရှင်ကျန်ရစ်ခဲ့သူတစ်ဦးမျှမရှိပေ။
12ထိုအခါ သူတို့သည် ကိုယ်တော်၏ကတိတော်ကိုယုံကြည်လျက်
ကိုယ်တော်၏ဂုဏ်ကျေးဇူးတော်ကို သီကျူးကြ၏။
13သို့သော် သူတို့သည် ကိုယ်တော်ပြုတော်မူသောအမှုတို့ကို အလျင်အမြန်မေ့လျော့ကြ၏။
ကိုယ်တော်၏အကြံဉာဏ်ကိုလည်း မစောင့်မျှော်ဘဲ
14သူတို့သည် တောကန္တာရ၌ အလိုဆန္ဒပြင်းပြကြ၍
ကန္တာရမြေ၌ ဘုရားသခင်ကိုစမ်းသပ်ခဲ့ကြ၏။
15ထိုအခါ ကိုယ်တော်သည် သူတို့တောင်းသောအရာကို သူတို့အား ပေးတော်မူသော်လည်း
သူတို့အပေါ်၌ ပိန်ချုံးခြင်းဝေဒနာကို သက်ရောက်စေတော်မူ၏။
16သူတို့သည် စခန်းထဲတွင် မောရှေနှင့်
ထာဝရဘုရား၏သန့်ရှင်းသောသူဖြစ်သည့်အာရုန်ကို ငြူစူကြသောအခါ
17မြေသည် ကွဲအက်လျက် ဒါသန်ကိုမျို၍
အဘိရံနှင့်အပေါင်းပါတို့ကို ဖုံးအုပ်လေ၏။
18မီးသည်လည်း သူတို့၏အပေါင်းပါထဲတွင် တောက်လောင်၍
မီးလျှံသည် ဆိုးယုတ်သောသူတို့ကို လောင်ကျွမ်းခဲ့၏။
19သူတို့သည် ဟောရပ်တောင်နားတွင် နွားသငယ်ရုပ်ကို သွန်းလုပ်၍
ထိုသွန်းလုပ်သောရုပ်တုကို ရှိခိုးကိုးကွယ်ကြ၏။
20ထိုသို့ဖြင့် မိမိတို့၏ဘုန်းအသရေကို
မြက်စားသောနွား၏ရုပ်တုနှင့် လဲလှယ်ကြ၏။
21-22အီဂျစ်ပြည်၌ ကြီးမားသောအမှုများ၊
ဟာမပြည်၌ အံ့ဖွယ်သောအမှုများ၊
ပင်လယ်နီ၌ ကြောက်ရွံ့ဖွယ်သော အမှုများကို
ပြုတော်မူသောအရှင်တည်းဟူသော မိမိတို့အား ကယ်တင်တော်မူသောဘုရားသခင်ကို
သူတို့သည် မေ့လျော့ကြ၏။
23ထို့ကြောင့် ကိုယ်တော်သည် သူတို့ကိုဖျက်ဆီးမည်ဟု မိန့်တော်မူ၏။
သို့ရာတွင် ကိုယ်တော်ရွေးကောက်တော်မူသော မောရှေသည်
ရှေ့တော်မှ ကျိုးပေါက်မည့်နေရာတွင်ရပ်လျက်
သူတို့ကိုဖျက်ဆီးမည့် ကိုယ်တော်၏အမျက်ဒေါသကို တားဆီးခဲ့၏။
24တစ်ဖန် သူတို့သည် ကိုယ်တော်၏ကတိတော်ကို မယုံ၊
သာယာသောပြည်ကို အလေးမထားဘဲ
25မိမိတို့၏တဲများတွင် ညည်းတွားကာ
ထာဝရဘုရား၏စကားတော်ကို နားမထောင်ခဲ့ကြချေ။
26ထို့ကြောင့် ကိုယ်တော်သည် သူတို့ကို တောကန္တာရထဲတွင်
ကျဆုံးစေမည်ဟူ၍လည်းကောင်း၊
27သူတို့၏သားစဉ်မြေးဆက်တို့ကို အပြည်ပြည်အရပ်ရပ်သို့ကွဲလွင့်စေလျက်
လူမျိုးခြားတို့အလယ်တွင် ကျဆုံးစေမည်ဟူ၍လည်းကောင်း
လက်တော်ကိုမြှောက်၍ကျိန်ဆိုတော်မူ၏။
28တစ်ဖန် သူတို့သည် ဗာလပေဂုရဘုရားကို မှီဝဲဆည်းကပ်၍
လူသေတို့အားပူဇော်သောယဇ်ကို စားကြ၏။
29ထိုသို့ မိမိတို့၏အပြုအမူများဖြင့် အမျက်တော်ထွက်စေသဖြင့်
သူတို့အလယ်တွင် ကပ်ရောဂါဖြစ်ပွားလေ၏။
30သို့သော် ဖိနဟတ်သည်ထ၍ ကြားဝင်ဖြေရှင်းပေးသောကြောင့်
ကပ်ရောဂါသည်ငြိမ်းလေ၏။
31ထိုအမှုကြောင့် သူသည် မျိုးဆက်အစဉ်အဆက်
အစဉ်အမြဲဖြောင့်မတ်သည်ဟု အသိအမှတ်ပြုခြင်းခံရ၏။
32သူတို့သည် မေရိဘစမ်းရေအနားတွင်လည်း အမျက်တော်ထွက်စေကြသဖြင့်
မောရှေသည် သူတို့ကြောင့် ဒုက္ခရောက်ရ၏။
33အကြောင်းမူကား ကိုယ်တော်၏ဝိညာဉ်တော်ကို သူတို့ဖီဆန်ကြသောကြောင့်
သူသည် မိမိနှုတ်ဖြင့် မဆင်မခြင်ပြောဆိုမိခဲ့၏။
34လူမျိုးခြားတို့ကို ဖျက်ဆီးရန် သူတို့အား ထာဝရဘုရားမိန့်တော်မူသည့်အတိုင်း
သူတို့သည် မပြုဘဲ
35လူမျိုးခြားတို့နှင့် ရောနှောဆက်ဆံ၍
ထိုသူတို့၏ဓလေ့ထုံးစံများကို သင်ယူကြ၏။
36မိမိတို့အတွက် ထောင်ချောက်ဖြစ်စေမည့်
ထိုသူတို့၏ရုပ်တုများကိုလည်း ဝတ်ပြုကြပြီး
37မိမိတို့၏သားသမီးများကို
နတ်ဆိုးတို့အား ပူဇော်ကြ၏။
38ထိုသို့ ခါနာန်ရုပ်တုများအား မိမိတို့သားသမီးတို့ကိုပူဇော်ခြင်းအားဖြင့်
အပြစ်ကင်းသောသွေးတည်းဟူသော ထိုသားသမီးတို့၏သွေးကိုသွန်း၍
ထိုပြည်ကို သွေးဖြင့်ညစ်ညူးစေကြ၏။
39သူတို့သည် မိမိတို့ပြုသောအမှုများဖြင့် မိမိတို့ကိုယ်ကိုညစ်ညူးစေ၍
မိမိတို့၏အပြုအမူများဖြင့် ဖောက်ပြန်မှားယွင်းကြ၏။
40ထို့ကြောင့် ထာဝရဘုရားသည် မိမိ၏လူမျိုးတော်အပေါ်အမျက်ထွက်၍
မိမိ၏အမွေတော်ကို စက်ဆုပ်ရွံရှာတော်မူ၏။
41ကိုယ်တော်သည် သူတို့ကိုလူမျိုးခြားတို့၏လက်သို့ အပ်တော်မူသဖြင့်
သူတို့ကိုမုန်းသောသူတို့သည် သူတို့ကိုအုပ်စိုးကြ၏။
42သူတို့၏ရန်သူများသည်လည်း သူတို့ကိုညှဉ်းဆဲ၍
သူတို့သည် ရန်သူတို့လက်အောက်၌ရှုံးနိမ့်ကြရ၏။
43ကိုယ်တော်သည် သူတို့ကို အကြိမ်ပေါင်းများစွာ ကယ်နုတ်ခဲ့သော်လည်း
သူတို့သည် မိမိတို့အကြံဉာဏ်အားဖြင့် ပုန်ကန်ပြီး မိမိတို့ဒုစရိုက်အားဖြင့် ယိုယွင်းနိမ့်ကျသွားကြ၏။
44သို့သော် သူတို့၏ဟစ်ကြော်သံကို ကိုယ်တော်ကြား၍
သူတို့၏ဆင်းရဲဒုက္ခကို ကြည့်ရှုတော်မူ၏။
45ထိုအခါ သူတို့အတွက် မိမိ၏ပဋိညာဉ်တော်ကို သတိရလျက်
မိမိ၏ကြီးမားသော မေတ္တာကရုဏာတော်နှင့်အညီ စိတ်တော်ပြောင်းလဲ၍
46သူတို့ကို ဖမ်းဆီးခေါ်ဆောင်သွားသောသူ အပေါင်းတို့သည်
သူတို့ကိုသနားစုံမက်ကြစေရန် ပြုတော်မူ၏။
47အကျွန်ုပ်တို့၏ဘုရားသခင် ထာဝရဘုရား၊ ကိုယ်တော်၏သန့်ရှင်းသောနာမတော်ကို ချီးမွမ်း၍
ကိုယ်တော်၏ဂုဏ်ကျေးဇူးတော်ကို ထောမနာပြုနိုင်မည့်အကြောင်း အကျွန်ုပ်တို့ကို ကယ်တင်တော်မူပါ။
အကျွန်ုပ်တို့ကို တိုင်းနိုင်ငံတို့ထဲမှ ခေါ်ယူစုစည်းတော်မူပါ။
48အစ္စရေးလူမျိုး၏ဘုရားသခင် ထာဝရဘုရားသည် ထာဝရကာလမှထာဝရကာလတိုင်အောင်
မင်္ဂလာရှိပါစေသော။ လူမျိုးအပေါင်းတို့သည် အာမင်ဟုဆိုကြပါစေသော။ ဟာလေလုယ။
လက်ရှိရွေးချယ်ထားမှု
ဆာလံကျမ်း 106: MSBU
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative