ယေရမိအနာဂတ္တိကျမ်း 35

ရေခပ်အမျိုးသားပုံဥပမာ

1ယောရှိမင်းကြီး၏သားတော် ယုဒဘုရင်ယောယကိမ်မင်းကြီးအုပ်စိုးချိန်တွင် ထာဝရဘုရား၏နှုတ်ကပတ်တော်သည် ယေရမိထံသို့ ရောက်လာ၍ 2“သင်သည် ရေခပ်အမျိုးသားတို့ထံ သွား၍စကားပြောလော့။ သူတို့ကို ထာဝရဘုရား၏အိမ်တော်အခန်းတစ်ခုသို့ ခေါ်လာ၍ စပျစ်ဝိုင်ကိုတိုက်လော့”ဟု မိန့်ဆို၏။

3ငါကလည်း ဟာဗဇိညာ၏သားဖြစ်သော ယေရမိ၏သား ယာဇညာနှင့်တကွ သူ့ညီအစ်ကိုများ၊ သူ့သားများအပါအဝင် ရေခပ်တစ်မျိုးသားလုံးကို ခေါ်၍ 4ဘုရားသခင်၏လူ ဣဂဒါလိ၏သားဖြစ်သော ဟာနန်၏သားတို့ အခန်းသို့ သွား၏။ ထိုအခန်းသည် ထာဝရဘုရား၏အိမ်တော်အတွင်းရှိ ရှလ္လုံ၏သား တံခါးစောင့်မာသေယနေသောအခန်း၏အပေါ်ထပ်၌ရှိသော အကြီးအကဲများ၏အခန်းနှင့်ကပ်လျက်ရှိ၏။ 5ထို့နောက် စပျစ်ဝိုင်အပြည့်ထည့်ထားသောကရားနှင့်ခွက်တို့ကို ရေခပ်အမျိုးသားတို့ရှေ့၌ချပေး၍ “စပျစ်ဝိုင်သောက်ကြပါ”ဟု ငါဆို၏။

6သူတို့ကလည်း “အကျွန်ုပ်တို့သည် စပျစ်ဝိုင်ကိုမသောက်ပါ။ အကျွန်ုပ်တို့ဘိုးဘေး ရေခပ်၏သားယောနဒပ်က ‘သင်တို့မှစ၍ သင်တို့သားစဉ်မြေးဆက်တိုင် စပျစ်ဝိုင်ကို တစ်သက်လုံးမသောက်ရ။ 7အိမ်မဆောက်ရ။ မျိုးစေ့မကြဲရ။ စပျစ်ခြံမစိုက်ပျိုးရ။ မပိုင်ဆိုင်ရ။ သင်တို့အသက်ရှင်သမျှကာလပတ်လုံး တဲဖြင့်သာနေရမည်။ သို့ပြုလျှင် ဧည့်သည်အဖြစ် သင်တို့တည်းခိုနေထိုင်ရသောထိုပြည်၌ အသက်တာရှည်မည်’ဟု မှာထားလေပြီ။ 8အကျွန်ုပ်တို့ဘိုးဘေး ရေခပ်၏သားယောနဒပ် မှာထားသမျှစကားတို့ကို အကျွန်ုပ်တို့နာခံပါ၏။ အကျွန်ုပ်တို့နှင့် အကျွန်ုပ်တို့၏မယား၊ သားသမီးတို့သည် အသက်ရှင်သမျှကာလပတ်လုံး စပျစ်ဝိုင်ကို မသောက်ကြပါ။ 9အကျွန်ုပ်တို့နေထိုင်ရန် အိမ်ကိုလည်း မဆောက်ကြပါ။ အကျွန်ုပ်တို့၌ စပျစ်ခြံ၊ လယ်၊ မျိုးစေ့တို့လည်း မရှိပါ။ 10အကျွန်ုပ်တို့သည် အကျွန်ုပ်တို့၏ဘိုးဘေးယောနဒပ် မှာထားသမျှအတိုင်း လိုက်နာပြုကျင့်၍ တဲများ၌သာနေထိုင်ကြပါ၏။ 11ဘေဘီလုံဘုရင် နေဗုခဒ်နေဇာမင်းကြီးသည် ဤပြည်ကို လာတိုက်သောအခါ အကျွန်ုပ်တို့က ‘ခါလဒဲစစ်သည်၊ ဆီးရီးယားစစ်သည်တို့၏ရန်ကြောင့် ဂျေရုဆလင်မြို့သို့သွားမည်’ဟု ဆိုလျက် ဂျေရုဆလင်မြို့သို့ သွားရောက်နေထိုင်ကြပါသည်”ဟူ၍ ပြန်လည်ပြောဆိုလေ၏။

12ထာဝရဘုရား၏နှုတ်ကပတ်တော်သည် ယေရမိထံသို့ ရောက်လာပြန်၍ 13“အစ္စရေးလူမျိုး၏ဘုရားသခင် ကောင်းကင်ဗိုလ်ခြေအရှင်ထာဝရဘုရားက သင်သည် ယုဒပြည်သူ ဂျေရုဆလင်မြို့သားတို့ထံသွား၍ သူတို့အား ‘ထာဝရဘုရားက ငါဆုံးမပဲ့ပြင်သောစကားကို သင်တို့နားမထောင်ကြ။ 14ရေခပ်၏သားယောနဒပ်က မိမိအမျိုးသားတို့အား စပျစ်ဝိုင်မသောက်ရဟု မှာကြားခဲ့သည့်ပညတ်ကို သူတို့စောင့်ထိန်းကြ၏။ ရေခပ်အမျိုးသားတို့သည် သူတို့ဘိုးဘေး၏စကားကို နားထောင်လျက် ယနေ့ထိတိုင် စပျစ်ဝိုင်မသောက်ဘဲနေကြ၏။ သင်တို့မူကား ငါအကြိမ်ကြိမ်ဆင့်ဆိုသော်လည်း ငါ့စကားကိုနားမထောင်ကြ။ 15ငါ့အစေအပါးပရောဖက်တို့ကို သင်တို့ထံ အကြိမ်ကြိမ်စေလွှတ်၍ သင်တို့နှင့် သင်တို့ဘိုးဘေးတို့အား ငါပေးသောပြည်၌ သင်တို့နေထိုင်ရမည့်အကြောင်း သင်တို့အသီးသီး ဆိုးညစ်သောလမ်းမှ ပြန်လာကြ။ သင်တို့၏အကျင့်စရိုက်များကို ပြုပြင်ကြ။ အခြားဘုရားများနောက်သို့မလိုက်နှင့်၊ ဝတ်မပြုနှင့်ဟု ဆင့်ဆိုစေခဲ့သော်လည်း သင်တို့ဂရုမစိုက်၊ နားမထောင်ကြ။ 16ရေခပ်၏သား ယောနဒပ်၏သားစဉ်မြေးဆက်တို့သည် သူတို့အားမှာကြားထားခဲ့သည့် သူတို့ဘိုးဘေးတို့၏စကားကို လိုက်နာကြသော်လည်း ဤလူမျိုးမူကား ငါ့စကားကို နားမထောင်ကြပါတကားဟူ၍ မိန့်တော်မူသည်’ဟု ဆင့်ဆိုလော့။ 17အစ္စရေးလူမျိုး၏ဘုရားသခင် ကောင်းကင်ဗိုလ်ခြေအရှင်ဘုရားသခင်ထာဝရဘုရားက ‘ကြည့်ရှုလော့။ ယုဒပြည်သူ ဂျေရုဆလင်မြို့သားတို့သည် ငါမိန့်ဆိုသော်လည်း ငါ့စကားကို နားမထောင်ကြ၊ ငါခေါ်သော်လည်း သူတို့မထူးကြသောကြောင့် ငါမိန့်ဆိုခဲ့သည့်အတိုင်း ဘေးအန္တရာယ်အလုံးစုံကို သူတို့အပေါ် ကျရောက်စေမည်’ဟူ၍ မိန့်တော်မူသည်”ဟု မိန့်ဆို၏။

18ယေရမိကလည်း ရေခပ်အမျိုးသားတို့အား “အစ္စရေးလူမျိုး၏ဘုရားသခင် ကောင်းကင်ဗိုလ်ခြေအရှင်ထာဝရဘုရားက ‘သင်တို့၏ဘိုးဘေးယောနဒပ်၏စကားကို သင်တို့နားထောင်ကြလေပြီ။ သူပညတ်ထားသည်ကို သင်တို့စောင့်ထိန်းလေပြီ။ သူမှာကြားခဲ့သည့်အတိုင်း သင်တို့လိုက်လျှောက်ကြလေပြီ’ဟု မိန့်တော်မူ၏။ 19ထို့ကြောင့် အစ္စရေးလူမျိုး၏ဘုရားသခင် ကောင်းကင်ဗိုလ်ခြေအရှင်ထာဝရဘုရားက ‘ရေခပ်၏သားယောနဒပ်အမျိုးသားတို့သည် ငါ့ရှေ့မှောက်၌ အစဉ်မပြတ် အမှုထမ်းရလိမ့်မည်’ဟူ၍ မိန့်တော်မူသည်”ဟု ဆင့်ဆိုလေ၏။

လက်ရှိရွေးချယ်ထားမှု

ယေရမိအနာဂတ္တိကျမ်း 35: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

ယေရမိအနာဂတ္တိကျမ်း 35