ယေရမိအနာဂတ္တိကျမ်း 34

ဇေဒကိကို ယေရမိဆင့်ဆိုသောစကား

1ဘေဘီလုံဘုရင်နေဗုခဒ်နေဇာမင်းကြီးနှင့် သူ၏စစ်သည်အားလုံး၊ သူ၏လက်အောက်ခံတိုင်းနိုင်ငံများ၊ လူမျိုးများအားလုံးသည် ဂျေရုဆလင်မြို့ရွာရှိသမျှတို့ကို တိုက်ခိုက်လာစဉ် ထာဝရဘုရားထံတော်မှနှုတ်ကပတ်တော်သည် ယေရမိထံသို့ ရောက်လာ၍ 2“အစ္စရေးလူမျိုး၏ဘုရားသခင်ထာဝရဘုရားက သင်သည် ယုဒဘုရင်ဇေဒကိထံသို့သွား၍ ထာဝရဘုရားက ‘ကြည့်ရှုလော့။ ငါသည် ဤမြို့ကို ဘေဘီလုံဘုရင်လက်သို့အပ်မည်။ သူသည် ဤမြို့ကို မီးရှို့လိမ့်မည်။ 3သင်သည် ဘေဘီလုံဘုရင်၏လက်မှလွတ်မြောက်မည်မဟုတ်။ ဖမ်းဆီးခြင်း အမှန်ခံရမည်။ ထိုဘုရင်လက်အောက်သို့ ရောက်ရလိမ့်မည်။ သူနှင့် မျက်နှာချင်းဆိုင် တစ်ယောက်ကိုတစ်ယောက်ကြည့်ပြီး စကားပြောရလိမ့်မည်။ ဘေဘီလုံမြို့သို့ လိုက်ပါသွားရလိမ့်မည်’ဟူ၍ မိန့်တော်မူသည်ဟု ပြောကြားလော့။

4အို ယုဒဘုရင်ဇေဒကိမင်းကြီး၊ ထာဝရဘုရား၏စကားတော်ကို နားထောင်လော့။ ထာဝရဘုရားက ‘သင်သည် ဓားဖြင့်သေရမည်မဟုတ်။ 5သင်သည် ငြိမ်းချမ်းစွာသေရလိမ့်မည်။ ရှေးယခင် သင့်ဘိုးဘေးဘုရင်တို့ကို ပြုပေးသကဲ့သို့ နံ့သာပေါင်းကိုရှို့လျက် အလို သခင်ဟု ငိုကြွေးမြည်တမ်းကြလိမ့်မည်။ ငါကိုယ်တော်တိုင် သင့်အဖို့ မိန့်ဆိုထားခဲ့ပြီ’ဟူ၍ မိန့်တော်မူသည်”ဟု မိန့်ဆို၏။

6ပရောဖက်ယေရမိကလည်း ဂျေရုဆလင်မြို့ရှိ ယုဒဘုရင်ဇေဒကိမင်းကြီးအား ဤစကားအလုံးစုံကို ဆင့်ဆိုလေ၏။ 7ထိုအချိန်ကား ဘေဘီလုံဘုရင်နှင့် သူ၏စစ်သည်များက ဂျေရုဆလင်မြို့နှင့် ယုဒပြည်၌ကျန်ရှိသောမြို့များဖြစ်သည့် လာခိရှမြို့၊ အဇေကာမြို့တို့ကို တိုက်ခိုက်နေသောအချိန်ဖြစ်၏။ ဤကျန်ရှိသောမြို့တို့သည် ယုဒခံတပ်မြို့များဖြစ်၏။

လူတို့နှင့် သူတို့၏ကျွန်များ

8ဇေဒကိမင်းကြီးက ဂျေရုဆလင်မြို့သားအပေါင်းတို့နှင့်ပဋိညာဉ်ဖွဲ့ပြီး ကျွန်ဘဝမှလွတ်မြောက်ပြီဟု ကြေညာပြီးနောက်မှ ထာဝရဘုရား၏နှုတ်ကပတ်တော်သည် ယေရမိထံ ရောက်လာပြန်၏။ 9ကျွန်ယောက်ျား၊ ကျွန်မိန်းမဖြစ်သည့် ဟေဗြဲအမျိုးသား၊ ဟေဗြဲအမျိုးသမီးတို့ကို အသီးသီးလွတ်မြောက်ခွင့်ပေးရမည်။ ဂျူးလူမျိုးတို့တွင် မည်သူမျှ ကိုယ့်အချင်းချင်းကျွန်မပြုရ။ 10ပဋိညာဉ်ဖွဲ့ရာတွင် ပါဝင်သောအကြီးအကဲများနှင့် ပြည်သူပြည်သားအပေါင်းတို့က ကိုယ့်ကျွန်ယောက်ျား၊ ကျွန်မိန်းမတို့ကို လွတ်မြောက်ခွင့်ပေးရမည်။ ဘယ်သောအခါမှ ကျွန်ပြန်မပြုရဟူသောပဋိညာဉ်ပါအချက်ကို သဘောတူနာခံ၍ ကျွန်တို့ကို လွှတ်ပေးကြ၏။ 11ထို့နောက်မှ သူတို့စိတ်ပြောင်း၍ လွတ်မြောက်သွားသောကျွန်ယောက်ျား၊ ကျွန်မိန်းမတို့ကို ပြန်ခေါ်ပြီး ကျွန်ယောက်ျား၊ ကျွန်မိန်းမအဖြစ် ကျွန်ပြန်ပြုစေကြ၏။

12ထို့ကြောင့် ထာဝရဘုရား၏နှုတ်ကပတ်တော်သည် ယေရမိထံသို့ ရောက်လာပြန်၍ 13“အစ္စရေးလူမျိုး၏ဘုရားသခင်ထာဝရဘုရားက ‘ငါသည် သင့်ဘိုးဘေးတို့ကျွန်ခံရာအီဂျစ်ပြည်မှ သူတို့ကိုထုတ်ဆောင်လာခဲ့စဉ်က သူတို့နှင့်ပဋိညာဉ်ဖွဲ့၍ 14သင့်ထံ ကိုယ့်ကိုယ်ကိုယ် ကျွန်အဖြစ်ရောင်းလိုက်သော ဟေဗြဲအမျိုးသားချင်းတို့ကို သတ္တမနှစ်အဆုံးတွင် လွတ်မြောက်ခွင့်ပေးရမည်။ သင့်ထံ ခြောက်နှစ်အစေခံပြီးလျှင် သူ့ကိုလွတ်မြောက်ခွင့်ပေးရမည်ဟု ဆိုသော်လည်း သင်တို့၏ဘိုးဘေးတို့သည် ငါ့စကားကို နားမထောင်ကြ၊ ဂရုမစိုက်ကြ။ 15ယခုတွင် သင်တို့သည် နောင်တရ၍ ငါ့မျက်မှောက်၌ မှန်သောအရာကို ပြုကြ၏။ အိမ်းနီးချင်းအချင်းချင်းအား လွတ်မြောက်ခွင့်ရပြီဟု ကြေညာကြ၏။ ငါ့နာမဖြင့်ခေါ်ဝေါ်သမုတ်သော ငါ့အိမ်တော်၊ ငါ့မျက်မှောက်တွင် ငါနှင့်ပဋိညာဉ်ဖွဲ့ကြ၏။ 16ထို့နောက်မှ သင်တို့စိတ်ပြောင်း၍ ငါ့နာမကို ရှုတ်ချကြ၏။ သင်တို့အားလုံးသည် ကျွန်ယောက်ျား၊ ကျွန်မိန်းမတို့ကို သူတို့သဘောအတိုင်း လွတ်မြောက်ခွင့်ပေးပြီးမှ သူတို့ကိုပြန်ခေါ်၍ ကျွန်ယောက်ျား၊ ကျွန်မိန်းမအဖြစ် ကျွန်ပြန်ပြုစေကြ၏’ဟု မိန့်တော်မူ၏။

17ထို့ကြောင့် ထာဝရဘုရားက ‘သင်တို့သည် ကိုယ့်ညီအစ်ကိုချင်း၊ ကိုယ့်အိမ်နီးချင်းအတွက် လွတ်မြောက်ခွင့်ကြေညာရာ၌ ငါ့စကားကို နားမထောင်ကြ’ဟု မိန့်တော်မူ၏။ ထာဝရဘုရားက ‘ကြည့်ရှုလော့။ ဓားဘေး၊ ငတ်မွတ်ခေါင်းပါးခြင်းဘေး၊ ကပ်ရောဂါဘေးတို့ဖြင့် သင်တို့အတွက် လွတ်မြောက်ခွင့်ကို ငါကြေညာမည်။ မြေကြီးပေါ်ရှိ တိုင်းနိုင်ငံအားလုံးက သင်တို့ကို ကြောက်လန့်စရာအဖြစ် မြင်ကြလိမ့်မည်’ဟု မိန့်တော်မူ၏။ 18နွားသငယ်ကိုထက်ဝက်ခြမ်းပြီး အလယ်၌ ဖြတ်လျှောက်၍ ငါ့ရှေ့၌ပဋိညာဉ်ဖွဲ့ခဲ့ပြီးမှ ထိုပဋိညာဉ်ပါအချက်ကို မပြုကျင့်၊ ပဋိညာဉ်ကို ချိုးဖောက်သောသူဖြစ်သော 19နွားသငယ်ထက်ခြမ်းအလယ်၌ လျှောက်သွားသော ယုဒလူမျိုးအကြီးအကဲများနှင့်တကွ ဂျေရုဆလင်မြို့အကြီးအကဲများ၊ နန်းတွင်းအကြီးအကဲများ၊ ယဇ်ပုရောဟိတ်များနှင့် ပြည်သူပြည်သားအားလုံးတို့ကို 20သူတို့အသက်ကို ရန်ရှာသောသူတို့၏ရန်သူတို့လက်သို့ ငါအပ်မည်။ အလောင်းကောင်တို့သည် ကောင်းကင်ငှက်၊ မြေတိရစ္ဆာန်တို့အတွက် အစာဖြစ်လိမ့်မည်။ 21ယုဒဘုရင်ဇေဒကိမင်းကြီးနှင့် သူ၏မှူးမတ်များအား သူတို့အသက်ကိုရန်ရှာသော သူတို့၏ရန်သူဖြစ်သည့် ဆုတ်ခွာသွားသောဘေဘီလုံဘုရင်၏စစ်သည်တို့လက်သို့ ငါအပ်လိုက်မည်။ 22ထာဝရဘုရားက ‘အကယ်စင်စစ် ငါသည် ရန်သူတို့ကိုအမိန့်ပေး၍ ဤမြို့သို့ ပြန်လာစေမည်။ သူတို့သည် ဤမြို့ကို တိုက်ခိုက်သိမ်းပိုက်၍ မီးရှို့ကြလိမ့်မည်။ ငါသည် ယုဒမြို့ရွာတို့ကို နေထိုင်သူမရှိ၊ လူသူကင်းမဲ့ရာအရပ်ဖြစ်စေမည်’ဟူ၍ မိန့်တော်မူသည်”ဟု မိန့်ဆို၏။

လက်ရှိရွေးချယ်ထားမှု

ယေရမိအနာဂတ္တိကျမ်း 34: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

ယေရမိအနာဂတ္တိကျမ်း 34