ယေဇကျေလအနာဂတ္တိကျမ်း 35
35
ဧဒုံပြည်ကိုဆန့်ကျင်၍ ပရောဖက်ပြုဟောပြောခြင်း
1တစ်ဖန် ထာဝရဘုရား၏နှုတ်ကပတ်တော်သည် ငါ့ထံသို့ရောက်လာ၍ 2“အချင်းလူသား၊ စိရတောင်သို့မျက်နှာမူပြီး ထိုတောင်ကိုဆန့်ကျင်၍ ပရောဖက်ပြုဟောပြောလော့။ 3ဘုရားရှင်ထာဝရဘုရားက ‘အို စိရတောင်၊ သင့်ကိုငါဆန့်ကျင်မည်။ ငါ့လက်ကိုဆန့်၍ သင့်ကိုဆန့်ကျင်မည်။ သင့်ကို လူသူကင်းမဲ့ရာ၊ ဆိတ်ညံရာ ဖြစ်စေမည်။ 4သင့်မြို့တို့ကိုလည်း ဖျက်ဆီးသဖြင့် သင်သည် လူသူကင်းမဲ့ရာ ဖြစ်လိမ့်မည်။ သို့မှ ငါသည် ထာဝရဘုရားဖြစ်ကြောင်း သင်သိလိမ့်မည်။
5သင်သည် ရှေးယခင်ကပင် အငြိုးထားခဲ့၏။ အစ္စရေးအမျိုးသားတို့ ဘေးဒုက္ခရောက်ချိန်၊ အပြီးသတ်ဒဏ်ခတ်ခံရချိန်တွင် သင်သည် သူတို့ကို ဓားလက်သို့အပ်လိုက်၏။ 6ထို့ကြောင့် ငါဘုရားရှင်ထာဝရဘုရား အသက်ရှင်သည်နှင့်အညီ အသက်သတ်ခြင်းအမှုကို သင်၌အပ်သဖြင့် သွေးကြွေးသည် သင့်ကိုလိုက်လိမ့်မည်။ လူအသက်သတ်ခြင်းကို သင်မြတ်နိုး#35:6 တိုက်ရိုက်ပြန်ဆိုလျှင် “သင်မမုန်း”။သောကြောင့် သွေးကြွေးသည် သင့်နောက်သို့လိုက်လိမ့်မည်။ 7ငါသည် စိရတောင်ကို ဆိတ်ညံရာ၊ လူသူကင်းမဲ့ရာ ဖြစ်စေမည်။ ထိုတောင်သို့ ဝင်ထွက်သွားလာသူမရှိအောင် ငါလုပ်မည်။ 8တောင်တန်းများပေါ်တွင် အသေကောင်များဖြင့် ပြည့်စေမည်။ တောင်ကုန်း၊ ချိုင့်ဝှမ်း၊ မြစ်ချောင်းများတွင်လည်း ဓားဖြင့်သေသောသူတို့ ပုံလျက်နေလိမ့်မည်။ 9လူသူကင်းမဲ့ရာ အစဉ်ဖြစ်စေမည်။ မြို့တို့တွင် နေထိုင်မည့်သူ ရှိတော့မည်မဟုတ်။ သို့မှ ငါသည် ထာဝရဘုရားဖြစ်ကြောင်း သင်တို့သိကြလိမ့်မည်။
10ထိုအရပ်တွင် ထာဝရဘုရားရှိလျက်နှင့် သင်တို့က ဤပြည်နှစ်ပြည်၊ ဤလူမျိုးနှစ်မျိုးကို ငါတို့သိမ်းပိုက်၍ ငါတို့အပိုင်ဖြစ်မည်ဟု ဆိုသောကြောင့် 11ငါဘုရားရှင်ထာဝရဘုရား အသက်ရှင်သည်နှင့်အညီ သင်သည် သူတို့အား ဒေါသစိတ်၊ မနာလိုစိတ်ဖြင့် အငြိုးထားခြင်းကြောင့် သင့်ကို ငါစီရင်မည်။ သင့်ကို ငါစီရင်သောအခါ ငါမည်သူဖြစ်ကြောင်း သူတို့ကိုသိစေမည်။ 12သင်သည် အစ္စရေးတောင်တန်းကို အရှက်ခွဲလျက် ထိုတောင်တန်းပျက်စီးပြီ၊ ငါတို့အစာဖြစ်လေပြီဟု ပြောဆိုသောစကားအလုံးစုံကို ငါကြားကြောင်း သင်သိရလိမ့်မည်။ 13သင့်နှုတ်ဖြင့် ငါ့အား ဆန့်ကျင်ပုတ်ခတ်သောစကား၊ မောက်မောက်မာမာပြောဆိုခဲ့သောစကားအလုံးစုံကို ငါကြား၏’ဟု မိန့်တော်မူ၏။
14ဘုရားရှင်ထာဝရဘုရားက ‘မြေကြီးတစ်ပြင်လုံးဝမ်းမြောက်နေစဉ် ငါသည် သင့်ကို လူသူကင်းမဲ့ရာဖြစ်စေမည်။ 15အစ္စရေးအမွေမြေသည် လူသူကင်းမဲ့ရာဖြစ်သောအခါ သင်ဝမ်းမြောက်သကဲ့သို့ သင့်ကို ထိုသို့ဖြစ်စေမည်။ အို စိရတောင်၊ သင်နှင့်တကွ ဧဒုံပြည်တစ်ပြည်လုံး လူသူကင်းမဲ့ရာ ဖြစ်စေမည်။ သို့မှ ငါသည် ထာဝရဘုရားဖြစ်ကြောင်း သူတို့သိကြလိမ့်မည်’ဟု မိန့်တော်မူ၏။
လက်ရှိရွေးချယ်ထားမှု
ယေဇကျေလအနာဂတ္တိကျမ်း 35: MSBU
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative