Mak 1
1
Jon napisi'as embel nawalipasa basef Godi
(Mt 3:1-12; Lu 3:1-9,15-17; Jo 1:19-28)
1-2Basef amama bu'wamima Jisas Krais, Anan nogalomana Godi. Basef amama mohafel mataga si'i anona profet fowa'inai Aisaia nanda'am mape buk.
Aisaia na'i basef amama na'i,
“God na'ipa Jisas na'i, ‘Ine' neme'. Anona nemaf ae' esapa' anona aman nofa' basef Ae'ami nili' nefe' nendondombamena eaf ine'inai.
3Anona etap wafiguma fatauguma malogel anona amani anona nemaf ni'i basef na'ama ni'i, “Ipe' pendondomba eafa Dembinai.” ’ ”
4Ea' Jon napisi'as embel nafe' anagon wafiguma fatauguma nawalipasa basef amam nematawa hiesi na'ipas na'i, “Ipa pewa' alafugaha waf aonai pemboma opalef ma God pefa' baptaisa God nekwahomepa waf aonai panda'anai.” 5Ea' esis hiesi sape etap hiagoma Judia saloma amam nematawa hiesi sape Jerusalemi hi'alas safi'mai Jon sa'i some' basef ananimi. Esis sawalapa waf aonai esis sanda'anai, ea' Jon napisi'as walemb Jordan. 6Jon nala anom klos sanda' auf anom mafis lu'wami kamelim sanda'am, ea' nowaho'am let sanda' agwahup mafisina sanda'anai, nagundisana. Gwa'aimi na' gwamu'wis maloma aupimbel aolupumi. 7Ea' nawalapa basef na'i, “Anona aman nambimb nigi'ma ae' niefi'i, anan la'ifinai nikila' ae'. Ae' ina aman bu'uwei ma eatagaha mandelefa su ananimi, owa'. Nambimb Anan nese'epa Ambal Bu'unai Godi nope opalef ipe'imi nomon. 8Ae' apisi'ipa embel atom wafimi ea' Anan owa'. Nambimb Anan nupisi'ipa Ambal Bu'unai Godi nuwisipa nope nolomepa.”
Jon napisi'a Jisas walemb Jordan
(Mt 3:13-17; Lu 3:21-22)
9Nogota anama Jisas nakwaha Nasaret etap hiagoma Galili nafi'i. Ea' Jon napisi'ana embel walemb Jordan. 10Jisas nakwaha embel walemb nandegiai, nati heven uta nandausi' alihina ma Anan, nati Ambal Bu'unai Godi nafi'mai anan si'i amil mai'una nufia' nisila'manai. 11Ea' anona maf na'i natagai heven na'i anom basef na'i, “Ine' nogalome. Ae' okom nainailina endilisi. Okom ae'anai bo'ona endilisi ma ine'.”
Satan nagwamba Jisasa nonda' waf aonai
(Mt 4:1-11; Lu 4:1-13)
12-13Ea' Ambal Bu'unai Godi nofa' Jisas nafe' anona etap fatauguma wafiguma mafis atom aolupumi maituma nape nimeguf 40-peleim, aon si'inai tu'waninai. Ea' Satan nafi'i nagwambana na'i Jisas nonda' waf aonai. Nagwambana ma ea', amam ensel mafi'i mumafi Jisas magiambamana.
Jisas nafela maol nanda'ana gani etap hiagoma Galili
(Mt 4:12-17; Lu 4:14-15)
14Nemaf anama amam manda' Jon nanda' kalabus, Jisas nafe' etap hiagoma Galili nanda' maol nawalapa basef bu'wami Godi na'ipasam 15na'i, “Nemaf anama felefele' netaga ma epes hiesi siowis wambota Godi numafias. Na'ama dei' ipe' pemboma opalef pefe'ma God pewa' alafugaha waf aonai.”
Jisas nofala amam biami biam ma milana mefe'
(Mt 4:18-22)
16Jisas naila akata nafe' etin walemb batupa'manai lu'unai Galili, nati amam biam Saimon naloma owalomana Andru. Amam mala anemb magi agof manda' bisinis. 17Ea' Jisas natolom na'ipam na'i, “Ipe' pifi'i pembalo'a basef ae'ami pila Ae'. Fowa' ipe' pagi agof, ea' dei' ihi'ambepa pefe' pi'ipa enis epes sila ae'.”
18Ea' mame'ana makwaha anemb ma'oh, mailana mafe'. 19Ea' nindiki'ah nafo'o felefele' ma akata nati Jems naloma owalomana Jon, Sebedi batausana. Amam matoma bot mape magundisa anemb amamumi. 20Ea' Jisas natolom nofalam mehip mame'ana. Ea' mohafel mehip makwaha amamaga amamumi hi'alam ma'oh, ea' mailana mafe.
Jisas natofa ambal aonai nape anona amani
(Lu 4:31-37)
21Jisas naloma alupumi ananimi Jems naloma Jon, Saimon naloma Andru mafe' Kaperneam mape. Nemaf anama esis Juda sapoma noma'wanai, Jisas nao'wam mafe' mawis ipat esis Juda sa'i basef sapeinai ea' na'ipasa basef amam nematawa. 22Esis same' basef ananimi ea' gegelalasis kwapete'as endilisi. Anan ina nawalipas si'i amam falafumi ma'ipas, owa'. Anan na'ipasa basef la'ifimi si'i amam agufumi ma'ipas. Amam mawalipasa mi'uli Godi ina mawalipas na'ama si'i anan, owa'.
23Nemaf anama anona aman nape nalomas ipat anama, ambal aonai napeinai ea' mehip etin ambal anama noga na'i mehip na'i, 24“Jisas ine' Nasaretinai, ine' nafi'i na'i nenda' maina afa'? Nafi'i ma nehambombagafa? Ae' egawena ine' aman bu'winai Godi.”
25Ea' Jisas ninifalom na'i, “Ine' ambalip aonai, feso'mena kwaha aman anama fo'o.”
26Ea' ambal anama aonai nakoto'ana kwapete'ana nanda'am ge'ala mehip nakwahona nawisi nafe'. 27Ea' amam nematawa hiesi gegelalasis sandakoto'ma ea' sanda'ipama sa'i, “Amama main de'im? Amama anom basef dambaimi. Anan natofa ambagof awami na'ipam si'i anona aman la'ifinai. Amamaga hiami mame' basef Ananimi. Ambagof awami wapoti' mame' basefana makwaha epes mafa' mafe'.”
28Ea' basef amama ma maol Jisas nanda'ana mafe'agon hi'alagon wambel hiagoma nape nomona etap hiagoma Galili.
Pita nandagi'mokwi awasi'w alop nifina ea' Jisas nanda'akw ambo'okw
(Mt 8:14-15; Lu 4:38-39)
29Jisas naloma alupumi biamibiam ananimi mohafel makwaha ipat anama ea' mafe' wambel Saimoni Endrui ea' mawis ipat amamunai. Jems naloma Jon wapoti' mafe' malomam. 30Ea' esis sa'ipa Jisasa Saimon nandagi'mokwi awasi'w kwa'oh, alop akwa'unai nifina. 31Ea' Jisas nafe'ma akwa'w nahapila lagel akwa'unai nafela'w kwataga bo'okw, kwanda'masa gwa'aimi esis.
Jisas nanda' amam nematawa awes nanda'asi sataga bo'wes
(Mt 8:16-17; Lu 4:40-41)
32Ea' aon nowala naso', esis sofa'ai epes awes naninani nanda'asi saloma enis ambagof awami mapeisi safi'mai Jisas. 33Ea' esis hiesi sape wambel lu'unai safi'i saitu felefele'ma uta ipat si'ina. 34Ea' Jisas nanda' amam namatawa hiesi awes nanda'asi bo'wes, natofamasa anom ambagof awami mapeisi ea' sataga bo'wes. Ambagof awami mogawa Jisas anan nogalomana Godi. Na'ama nasopama malogof ambagof amama awami faso'mam tol mape.
Jisas nase'asa basef nafe' etap hiagoma Galili
(Lu 4:42-44)
35Wafilu kuhimbita atona owamb ata' nail, Jisas nohafel nakwaha ipat anama napoma. Anan atona nohafel nafe' anama wafiguma ea' nape nanda' betena God. 36Saimon naloma anom alupumi ananimi mohafel matimana owa', ea' magolopana magi'mana mafe'. 37Magolopana mafe'ma matolona ma'ipana ma'i, “Epes hiesi sagolopena.”
38Ea' Jisas nagwamama basef na'ipam na'i, “Dei' ata' ali'aso, afa' ofe' wambel hianai nape felefele'i. Ae' ata' i'ipasa basef bu'wami esis. Maol anama atona Ae' afi'manai anama.”
39Na'ama nase'asa basef nafe'agon hi'alagon wambel hiagoma etap hiagoma Galili, nase'asa basef bu'wami nomon ifagw esis Juda sa'i basef sapaimi natofamasa ambagof awami mape enis epesi mandahi' mawisi mafe'.
Aman awasinai alop ananinai nambu'wanai, Jisas nanda'ana bo'ona
(Mt 8:1-4; Lu 5:12-16)
40Ea' anona aman awesinai alop nambo'anai nafi'i felefele'ma Jisas nindiwa nembawa notawa na'ipana mehip na'i, “I'i ine' ni'i a'e, nenda' ae' etaga bo'awe.”
41Ea' Jisas nati anan uwahipina nawomana lagela anan na'i, “Ae' a'i a'e ma ine' netaga bo'wena.”
42Ea' dei' atef aman anama alop nambu'wi nataga bo'ona.
43Ea' Jisas dei' etef nasapa'ana na'ipana mehip 44na'i, “Ina nefe' ni'ipa enin epen ni'i ae' anda'ena bo'wena, owa'. Ine' fo'o nihi'ambana alop ine'inai ma aman anama pris. Ea' nese'ana amama anan nondolalima God ea' ine' ninifelana ma nataga bo'wena si'i mi'uli Ananinai fowa' Moses na'ipasanai na'i. Ama amam nematawa hiesi sotolona sogawa ine' ambo'wena.”
45Owa'etin. Aman anama na'ipasam mafe'agon hi'alagon amam nematawa hiesi sogawa anan nataga bo'ona. Ea' Jisas ina nafe' nawis anona wambel ma naep hiesi, owa'. Na'ama hiesi sifi'i sili'akwana. Ea' ina nawis anona wambel lu'unai, owa'. La'ela'ef nape anama wafiguma atogon. Ea' nambimb esis amam nematawa sape ganigani safi'mai anan.
လက္ရွိေရြးခ်ယ္ထားမွု
Mak 1: aojF
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2013, Wycliffe Bible Translators, Inc. All rights reserved.