Mak 2
2
Jisas nagiambama anona aman lagufi bo'wagah maga'anai ambo'ona
(Mt 9:1-8; Lu 5:17-26)
1Anom nimeguf mafe'ma ea', Jisas notanima nafe' Kaperneam. Ea' esis same' basefa Anan nafi'i nape ipat. 2Ea' amam nematawa hiesi sandakolas ipat anama napeinai asi'ina ea'. Na'ama uta owa' anagon nogal nopoma sefe' siowisi. Ea' na'ipasa basef bu'wami Godi ma esis. 3Ea' anom amam biamibiam manda' balata malai anona aman lagof bo'wagah maga' mefa'ana ma'i mefe'ma Jisas. 4Ipat asi'inama amam nematawa hiesi saitu sili'akw, ea' ina anagona mofa'ana muwis mofe' felefele'ma Jisas, owa'. Ea' malata ipat ilif ande'ana mapisila bogwan ilif mala aman anama awes nanda'anai naloma lahis nowala nomon Jisas naituma.
5Nogota anama Jisas nati biamibiam nagawa amam mombale'efana ma'i anan la'ifinai ma nigiambama aman anama notaga bo'ona. Ea' na'ipa aman anama na'i, “Ine' epen ae'inai. Waf aonai ine' nanda'anai Ae' akwahomenana ea'.”
6Ea' anom dambami mawalipasa mi'uli Godi mape mame'ana. Opalef amamumi aoma basef ananimi. Na'ama amam nomonas matamea ma'i, 7“Dei' maina Jisas na'iam na'ama? Anan nanda' God findiwana. Owa' etina anona aman la'ifinai ma neakwaha waf aonai epes sanda'anai. God atona nakwa waf aonai.”
8Dei' atef Jisas nogawa nomonas amamumi negawam okom ananinai, ea' na'ipam na'i, “Dei' maina ukup ipe'imi mape na'ama? 9Dei' amamaga maim ipe' pa'i ahifima Ae'? Ae' la'ifiwei ma i'ipa aman anama awesinai, i'i ‘Ae' ekwahomena waf aonai ine' nanda'anai’, o i'ipana, i'i, ‘fela lahis ine'imi nehafel nefe'.’ Ipe' pa'i maim ahifima ae'? 10Ae' a'i ipe' pegawa ae' ataga epen endelisiwei, la'ifiwei ma ekwahomasa waf aonai hianai amam nematawa sape etap anae' sanda'anai. Ae' a'i ihi'ambepa ae' la'ifiwei ma enda' amamaga amama.” Ea' na'ipana na'i,
11“Ae' a'ipina, ine' hafel fela lahis ine'imi fo'o ipat ine'inai.”
12Ea' esis saitu satolona sati anan nohafel mehip nafela lahis ananimi nefa'am nafe'. Ea' amam nematawa hiesi gegelalasis kwapete'as, safela agel Godi lu'una sa'i, “Fowa' ape' ina mati anom amamaga si'i na'ama, owa'etin.”
Jisas nofala Livai
(Mt 9:9-13; Lu 5:27-32)
13Ea' Jisas notanima naila akata nafe' walemb batupa'manai lu'unai Galili. Amam nematawa hiesi safi'mai anan na'ipasa basef bu'wami God. 14Jisas nohafel nafe' ea', nati anona aman Livai, Alfius nogalomana nape ipat sanda' takisa. Aman anama nofa'asa otamba amam nematawa hiesi.
Ea' Jisas nofalana na'i, “Ine' fi'i nila ae'.”
Ea' nohafel nailana nafe'. 15Ea' Jisas naloma alupumi ananimi ma' gwa'aimi ipat Livai maloma amam hiami manda' waf aonai. Anom mofa' takisi, anom manda' waf aonai amam maloma Jisas ma' gwa'aimi. Amam amama mailana etin. 16Ea' amam dambami mawalipasa mi'uli Godi amam Farisi mati Jisas na' gwa'aimi naloma amam manda' waf aonai maloma amam amama mofa' takisi. Ea' mahali' alupumi ananimi ma'i, “Dei' maina anan nape naloma amam mofa' takisi maloma amam amama manda' waf aonai ma' gwa'aimi etifigin?”
17Ea' Jisas name'am na'ama na'ipam na'i, “Epes bu'wasi ina safe'ma dokta, owa'. Isima awes nanda'asi etis safe'ma dokta. Ae' ina afi'i ma efala epes isima bu'wasi, owa'. Ae' afi'i ma efala isima sanda' waf aonai.”
Waf anama amam Farisi maloma alupumi Joni makwaha gwa'aimi ma monda' beten
(Mt 9:14-17; Lu 5:33-39)
18Anona nemaf amam amama alupumi Joni maloma anom alupumi Farisi makwaha gwa'aimi ma monda' beten andeande'. Ea' enis epes safi'i sa'ipa Jisas sa'i, “Dei' maina amam alupumi Joni maloma alupumi amam Farisi makwaha gwa'aimi ma manda' beten, ea' alupumi ine'imi owa' mokwaha gwa'aimi?”
19Ea' Jisas nagwamama basef na'i, “I'i enis sonda' anom gwa'aimi lu'wami ma enis aman nemata'w bias sendase'ama, ipe' pa'i esis alupisi atuwasi sondaiwa'ma gwa'aimi amama? Owa'etin. Nemaf anama esis bias sondase'ama, alupisi asasisi sandanifela sea' gwa'aimi solomas. 20Ea' anona nemaf enis epes sofa' aman anama naso' nemata'wi nefe' laoguma, wila esis sokwaha gwa'aimi, ea' dei' ata' owa'.”
21Ea' Jisas nanda' anom basef wamun etina luwaguf na'i, “Ina andeande'ma peatopa' lowaf namunai pigundisana neloma anona lowaf apinai, owa'. I'i penda'am na'ama, nambimb lowaf anama namunai pele'etana nehape' apinai nogal notaga lu'una.”
22Ea' na'i anom basef wapoti' na'i, “Ina enin epen nakolo'wa embel wain dambainai agwahup mafinina mowala agwahup apinai si'i botowagof, owa'etin. I'i enin nenda'am na'ama, embel wain motef hiami, mohape' agwahup anama pele'etana ea' wain kolo'olam hi'ilam. Na'ama owa'. Enin nakolo'am agwahup dambainai atona.”
Nemaf Sabat esis Juda sapoma noma'wanai
(Mt 12:1-8; Lu 6:1-5)
23Anona nemaf esis Juda sapoma noma'wanai Sabat, Jisas nafe' nawis anona aof sawa witanai ea' nawis. Ea' alupumi ananimi mafe' malomana magi anom wit maufi magwa'am. 24Ea' anom dambami Farisi ma'ipa Jisas ma'i, “Neme'. Alupumi ine'imi manda'am na'ama ma main? Amam mosambala mi'uli ma nemaf anama mapoma noma'wanai, Sabat.”
25Ea' Jisas na'ipa amam Farisi na'i, “Ipe' owa' pegawa basef mape Baibeli ma waf fowa' gani king Devit nanda'anai. Nemaf anama Devit naloma alupumi ananimi gwa'aimi a'am nolomaham. Ipe' pegawa basef amama ea'. 26Nemaf anama Abiata nape dembinai pris nali'ma amam prisi, Devit nolomahana nawis ipat Godi na' bret anama mondolalima Godanai. Mi'uli ape'inai lu'unai na'i amam pris atom mea'ana. Enis epes owa'. Ea' Devit na'ana nagwa'ana naso' alupumi ananimi magwa'ana etin.”
27Ea' Jisas na'ipa amam Farisi wapoti' na'i, “God nali' nanda' epes ea' nagi' na'ipasa nemaf sapoma noma'wanai Sabat ama nigiambamas. Ina nanda' epesa sagi'ma basefa Sabat, owa'. 28Ae' atowe ataga epen endilisiwei ape Dembiwei ma amamaga hiami. Ea' ape Dembiwei ma nemaf anama Sabata i'ipipa maina maol andeande'ma pila basef penda'ana nemaf anama.”
လက္ရွိေရြးခ်ယ္ထားမွု
Mak 2: aojF
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2013, Wycliffe Bible Translators, Inc. All rights reserved.