Mak 3
3
Jisas nanda' aman lagel nendela'anai bo'ona nemaf anama sapoma noma'wanai Sabat
(Mt 12:9-14; Lu 6:6-11)
1Anona nemaf Jisas nafe' nawis ipat esis Juda sa'i basef sapeinai, nati anona aman lagel ananinai naga' nail nape. 2Ea' enis safe' sagolopa basef kwamaimi ma senda'mana basef. Ea' satolona naep maimailana ma siti nonda' aman anama bo'ona nemaf anama Sabat?
3Ea' Jisas na'ipa aman anama lagel ananinai naga' nailanai na'i, “Ine' hafel nitu naep epes hiesi la'afena sitilina.” 4Ea' Jisas nahali'as na'i “Mi'uli lu'unai ape'inai na'iam na'imama? Ape' monda' waf bu'unai nemaf anama sapoma noma'wanai o monda' waf aonai? Ape' migiambama esis sope ambal namunai napeis mohas soga'?”
Ea' esis ina sa'i anom basef, owa'. 5Ea' Jisas nafela naep natilis tulif ea', nogawa esis opalef mase' sandaiwa'ma seme' basef. Na'ama okom ananinai wandafuna ma esis. Ea' nati esis uwahipis na'ipa aman anama lagel ananinai naga' nailanai na'i, “Dowa lagel ine'inai usi'ina.”
Ea' nandowanai nataga bo'ona wapoti'. 6Ea' amam dambami Farisi mohafel mafe' maloma anom amam epes hiami Heroti, ma'i basef mandame'mama moha Jisas noga'.
Amam nematawa hiesi sunduwa'anima sape felefele'ama walemb batupa'manai lu'unai Galili
7Ea' Jisas naloma alupumi ananimi makawaha wambel anama mafe' walemb batupa'manai lu'unai Galili. Ea' amam nematawa hiesi safi'i etap hiagoma Galili sailana safe'. 8Esis safi'i hiagoma. Enis safi'i wambel hiagoma Judia, enis safi'i Jerusalem, enis safi'i etap hiagoma Idumea, ea' enis sape walemb Jordan gani wa'ol saloma enis safi'i wambel biefina Tair naloma Saidon, esis hiesi safi'mai anan. Same' basefa amamaga Jisas nanda'ami, na'ama safi'mai Anan. 9Ea' Jisas nati amam nematawa hiesi endilisi sape. Ea' na'ipa alupumi ananimi na'i, “Na'ama esis safafa'asowe. Anona bot nola ma ae' ma elata etoma i'ipasa basef.” 10Anan fowa' nanda' hiesi isima awes nanda'asi sataga bo'wes. Ea' dei' awes nanda'asi sanda' gwagwasi'ma etin safe'ma anan sehapilana ma seataga bo'wes. 11Maina nemaf ambagof awami mape epesi mati Anan mogawana, ea' mowa ma'oh etap felefele'ma anan opafunama, ea' mofalana mehip ma'i, “Ine' nogalomana Godi.” 12Ea' na'ipa ambagof awami mehipa amam ina mowalapa Anan mi'ipasana mi'i anan nogalomana Godi, owa'.
Jisas nandandepa alupumi ananimi 12-peleim
(Mt 10:1-4; Lu 6:12-16)
13Jisas nafe' nondowasa' halaf, ea' nofala amam amama Anan okom na'iami mafi'mai Anan. 14Ea' nandandepa amam 12-peleima la'ela'ef mope molomana, ama nambimb nosapa'am mefe' mi'ipasa basef. Amam 12-peleim nandandepam Aposel. 15Na'ipam nase'ama pepel ma meatofa ambagof awami mape epesi. 16Amam 12-peleim nandandepami, agof amamumi amama. Saimon agel wa'ana Pita, 17ea' Jems Sebedi nogalomana, naloma owalomana Jon, nase'ama agof wa'am Boanerges. Agel anama ofagema na'ama, nogamana otaga dililu bugalagw. 18Ea' Andru, Filip naloma Bartolomyu, Matyu, Tomas, naloma Jems nogalomana Alfiusi, naloma Tadius naloma Saimon. Aman anama Saimon anan epes hiesi Seloti.#3:18 Niti futnot Matyu 10:4. 19Ea' Judas Kariotinai, aman anama nafe' nawalapa Jisasa naumbih.
Anom ma'i Jisas nanda' maol naloma Belsebul
(Mt 12:24-32; Lu 11:14-23; 12:10)
20Jisas nafe' anona ipat, ea' esis hiesi safi'i wapoti'. Ea' naloma alupumi ananimi ina ata' ma' gwa'aimi, owa'. 21#Jo 10:20Esis wambota Jisasi same' basef amama ma Anan naloma alupumi ina ma' gwa'aimi, ea' safi'i sa'i so'wana. Ea' sa'i, “Anan ambagof awami manda'ana dei' nahaga nagaol.”
22 # Mt 9:34; 10:25 Anom mawalipasa mi'uli Godi mapani Jerusalem makini'i mambaso'am ma'i, “Ambal aonai Belsebul nape Jisas. Ea' Anan natofa ambagof awami ma pepel Belsebuli.”#3:22 Belsebul agel wa'ana Satan.
23Ea' Jisas nofalai esis safi'i saitu felefele'ma anan na'ipasa anom basef womun etina esis na'i, “Satan ina natofa anan atona, owa'. 24I'i enis anona wambel hiagoma esis etis sondawaloga biefisa sopa', ina nambimb la'ifis, owa'. Esis sandawaloga biefis ea' ina la'ifis. 25I'i enis epes hiesi anona wambota sape ipat atotona sondawaloga epes biefis sopa', esis sandawaloga biefis, ina nambimb sope la'ifis, owa'. Sandawaloga biefis ea'. 26I'i wambota Satani sondawaloga biefis sopa', ina la'ifis, owa'.”
27“Enin epen ina la'ifina nefe' nuwis ipat anona aman la'ifinai napeinai nokowalefa nefa' amamaga ananimi, owa'. Enin ata' nili' nombalo'ana ma nowa'ana tatala'ina, anan la'ifina ma niowis nokowalefa nefa' amamaga ma'oh ipat aman anama.”
28-30Amam mawalipasa mi'uli Godi mambaso'am manda' findiwana ma'i, “Anona ambal aonai nagiambama Jisas nanda' maol ananinai.”
Ea' Jisas na'ipam na'i, “Endilisi etis ae' a'ipipa, anona nemaf God nokwaha waf aonai naninani hianai noloma basef findiwaimi hiami amam nematawa sanda'ami hi'ilam. Ea' emi epen nenda' basef findiwama Ambal Bu'unai Godi, God anona nemaf owa'etin endilisi ma nokwaha findiwa anama aonai ma epen inima nanda'anai, owa'. Findiwa aonai la'ela'ef nopein dei' nefe' anona nemaf wapoti' la'ela'ef nope.”
Mama'wana Jisasi kwaloma owapana ananimi
(Mt 12:46-50; Lu 8:19-21)
31Nemaf anama Jisas naloma epes hiesi sape salomana ipat nomon. Ea' mama'wana kwaloma owapana ananimi safi'i sataga saitu ande'. Ea' sa'ipa enis sawis sa'ipana sa'i Jisas nuwisi ande' nefe'ma esis. 32Ea' isima hiesi sape salomanai sa'ipana sa'i, “Ine' neme', mama'wena ine'ikwi kwaloma owapena ine'imi safi'i saitu ande' sa'i solomena si'i.”
33Ea' Jisas nagwamasa basef na'ipas na'ama na'i, “Mama'we owape ae'asi emi egafis?”
34Ea' Anan nati esis amam nematawa sape salipana na'ipas na'i, “Piti mama'we kwaloma owape ae'asi isima. 35Emi egafis saila okom Godi ma sila waf Ananinai, isima mamase owape henitiame ae'asi.”
လက္ရွိေရြးခ်ယ္ထားမွု
Mak 3: aojF
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2013, Wycliffe Bible Translators, Inc. All rights reserved.