LUKAS 24
24
Yesu ur pǝ wulli
(Mt 28:1-10; Mk 16:1-8; Yoh 20:1-10)
1Ne com damasyi ne zah'nan pim, ŋwǝǝ kŋ ur kalra ge zah palle, ɓaŋra nǝm tǝkine ɓǝrdi mai mo zyeɓra ɓo. 2Ge lwaara tǝsal ma coo zah pal fiŋ ge ɓo lalle. 3Danra ge pǝ palle, so lwaara suu Dǝɓlii Yesu gŋ ya. 4Tǝra ru so joŋ ɗǝne ya. Ne cok ah sǝ, kwora za gwa jurra pel ɓǝǝra, ɓaara mbǝro ɓo pǝfãi kaŋkaŋ. 5Ŋwǝǝ ah ɗuura galle, ɗǝmra zahpel ge sǝŋ, so zai faa nyi ra: We kyeɓ dǝɓ mai mo ne cee tǝgǝǝ za ma wul mor fẽene? 6Ka nyee yao, ur gin pǝ wul ɓe, we foo ɓǝ mai mo faako nyi we ne cok ka a no sǝr Galile,#Mt 16:21; 17:22-23; 20:18-19; Mk 8:31; 9:31; 10:33-34; Lu 9:22; 18:31-33 7faa: A ga soɓra We Dǝfuu ga nyi za faɓe' jolle, a ga ɓaara ko wo kpuu, so ne zah'nan sai ah a ga ur gin pǝ wulli. 8So ŋwǝǝ rai foora ɓǝ mai Yesu mo faa. 9Pii soora gin zah pal ge keera ɓǝ mai mo joŋ daŋ nyi za syee mor ah matǝ jemma tǝ vaŋno tǝkine za ki daŋ. 10Ŋwǝǝ mai mo ge keera ɓǝ ah nyi zapee: Maria ma Magdala, Yoana ne Maria mah Yakuɓ tǝkine ŋwǝǝ manyeeki ah mo ne ra daŋ. 11So zapee kwora ɓǝ ah na ɓǝ kolle, zyii nyiŋra ɓǝ ah ya. 12Ne cok ah Petar ur ɗuu kal ge zah pal ɗǝŋ ẽe cok ge gŋ, kwo fan ki ya sai zyim cẽe kan ɓo. So jin kal ge fah yaŋ ahe, kaa tǝ ɓǝ mai mo joŋ ɓo gǝriŋ.
Tǝ fahlii yaŋ Emaus
(Mk 16:12-13)
13Com moo sǝ ta za syee mor Yesu manyeeki ah gwa urra tǝ gara yaŋ ma lal ma ɗii ne Emaus, ɗǝk ah ne Jerusalem tǝgbana kilomeetǝr jemma tǝ vaŋno. 14Zai tǝ faara ɓǝ tǝ ɓǝ mai mo joŋ ɓo daŋ wo ki ga ne ko. 15Ne cok mo tǝ jakra ɓǝ ah mo tǝ faara ga ne ko, Yesu ne suu ah ge dai mor ɓǝǝ syee fahlii ne ra. 16Kwora ko ɓe, amma fan ki cak ra ka mo tǝra ko ka. 17Yesu fii ra: We tǝ faa ɓǝ fẽe kǝsyil ki tǝ fahlii ga ne ne? So mo uura o, zahpel ɓǝǝ daŋ 'nyah ya. 18Dǝɓ vaŋno kǝsyil za matǝ gwa a ɗii ne Klopas faa nyi ko: Amo syak ɓo mo ye dǝɓ yaŋ Jerusalem mai mo tǝ ɓǝ fan mai mo joŋ ɓo tǝgǝǝ zah'nan nyẽe ya ne? 19Fii ra: A fẽe ye joŋ ɓo ne? Zyiira zah ah faa: Fan mai mo joŋ ɓo wo Yesu ma yaŋ Nazaret mai ako ye mo profeto Masǝŋ, a pǝswah ne yeɓ ne ɓǝ pel Masǝŋ tǝkine dǝfuu daŋ. 20Zaluu za joŋzahsyiŋ ɓuu ne zaluu ɓuu manyeeki ah soɓra nyi zaluu ka mo ŋgoŋra kiita wul tǝl ahe, so ɓaara ko ge wo kpuu. 21Aru laŋ ru lǝŋ ako ye dǝɓ mai moo gin wǝǝ Israel gin pǝ cok gaɓɓe, amma fan mai mo joŋ ɓo zah'nan ah sai tǝ'nahko. 22Ŋwǝǝ manyeeki ah mo kǝsyil ɓuu ge zoora zah ma cee ɓuu ne ɓǝ ahe, kalra ge zah pal ne zah'nan pim, 23amma ge lwaara wul ah gŋ ya, so pii soora ge faara nyi ru, angeloi jurra nǝn ɓǝǝra, so faara nyi ra Yesu no ne cee. 24Za ɓuu manyeeki ah laŋ kalra ge zah pal ahe, ge lwaara ɓǝ ah tǝgbana mai ŋwǝǝ mo faara, amma kwora Yesu ya ta.
25So Yesu faa nyi ra: Awe za bai tǝtǝlli, we ga nyiŋ ɓǝ mai profetoen mo faara ɓo daŋ nekẽne? 26Kristu ka laa bone ah kǝpel daŋ ɗǝ, ko ga pǝ yǝk ah ba ya ne? 27So cuu mor ɓǝ mai mo ŋwǝǝ ɓo tǝl ah pǝ Ɗerewol Masǝŋ daŋ nyi ra, tǝŋ daga pǝ ɗerewol Mosus ŋhaa ne ɗerewol profetoen daŋ.
28Ne cok mo ge daira kah yaŋ mo tǝ gara gŋ gwari, Yesu joŋ tǝgbana tǝ yah pǝ̃ǝ kpǝ kalle. 29Zai pǝǝra ko faa: Mo kaa ne ru ɗao, lil joŋ ɓe, com tǝ yah dan laŋ o. Kal ge ɓǝr yaŋ ge kaa ne ra. 30Ne cok mo kaa zah taabǝl ne ra ka ren fanne, ɓaŋ tǝwaare, joŋ osoko nyi Masǝŋ tǝl ahe, so ɓǝl tǝwaa ah nyi ra. 31Nahnǝn ɓǝǝ gbǝr tǝl ahe, tǝra ko gur o, so Yesu rii nahnǝn ɓǝǝ syiksyik. 32So faara ɓǝ tǝgǝǝ ki: Ne cok mo tǝ faa ɓǝ ne na tǝ fahlii tǝkine cuu mor ɓǝ ma pǝ Ɗerewol nyi na daŋ, zahzyil man cwah na tǝgbana wii ya ne?
33So urra ne pel sǝ, pii soora kal ge yaŋ Jerusalem. Ge lwaara za syee mor Yesu matǝ jemma tǝ vaŋno tai ɓo wo ki tǝkine za syee mor Yesu manyeeki ah ra. 34Tǝ faara kǝsyil ɓǝǝra: Dǝɓlii ur pǝ wul ɓe 'manna, Simon kwo ko ɓe. 35Za matǝ gwa kŋ so keera mor ɓǝ fan mai mo joŋ wo ɓǝǝ tǝ fahlii tǝkine mai Yesu mo ɓǝl tǝwaa nyi ra mo so tǝra ko.
Yesu cuu suu ah nyi za syee mor ahe
(Mt 28:16-20; Mk 16:14-18; Yoh 20:19-23; Yeɓ 1:6-8)
36Ka tǝ faara ɓǝ ah faa ba, ne pel sǝ Yesu ge uu kǝsyil ɓǝǝ faa nyi ra: Jam mo yea tǝ ɓiiri. 37Amma ɗuura galle, suu coora coo daŋ, mor lǝŋra fan ye jur ɓo nǝn ɓǝǝra. 38Amma Yesu faa nyi ra: We ɗuu gal mor fẽene? Awe syesyel pǝ zahzyil ɓii mor fẽene? 39We ẽe jol ɓe ra tǝkine ɓal ɓe daŋ, ame yo. We juu me ne jol we laa o, fan ma jur nǝn dǝɓ ka yea ne nǝǝ ne woiŋ ya. 40Faa naiko, so cuu jol ah ra tǝkine ɓal ah daŋ nyi ra. 41Gak nyiŋra ɓǝ ah gwari sǝ ya, mor laara ɓo pǝ'nyah pǝlli, kaara ɓo gǝriŋ. Yesu fii ra: We no ne farel nyee ne? 42So nyira syiŋ maraa ah nyi ko. 43So nyiŋ re ne nahnǝn ɓǝǝra.
44So faa nyi ra: Ɓǝ mai me faa nyi we ne cok me yea ne we, ɓǝ mai mo ŋwǝǝ ɓo tǝ ɓe pǝ ɗerewol ɓǝ lai Mosus ne ɗerewol profetoen tǝkine ɗerewol Lǝŋ daŋ tǝ joŋ ga cok ah o. 45So Yesu gbǝr ɓǝ foo ɓǝǝra ka mo tǝra mor ɓǝ mai mo faa ɓo pǝ Ɗerewol Masǝŋ, 46faa nyi ra faa: Ɓǝ mai mo ŋwǝǝ ɓo pǝ Ɗerewol faa: Kristu a ga laa bone, so tǝgǝǝ zah'nan sai ah a ga ur gin pǝ wulli. 47A ga cuura ɓǝ toobii tǝkine ɓǝ rwah faɓe' ga lal pǝ tǝɗii ah nyi za sǝr daŋ, ɓǝ cuu ah a ga tǝŋ gin yaŋ Jerusalem. 48Awe ye za syedowal ɓǝ ahe. 49Ame ga pee fan mai Pa ɓe mo faa ɓǝ ah ɓo gin nyi we, amma we kaa yaŋ Jerusalem ŋhaa ka swah ma coksǝŋ mo ge tǝ ɓii ɗǝ.#Yeɓ 1:4
Yesu kal fah coksǝŋ
(Mk 16:19-20; Yeɓ 1:9-11)
50Yesu so zaŋ ra kal ge fah yaŋ Betaania ne ra, ɓaŋ jol ah tǝ ɓǝǝ ẽe ra.#Yeɓ 1:9-11 51Ne cok mo tǝ ẽe ra ẽe ba, so woŋ ki ne ra kal fah coksǝŋ. 52Juura pel wol ahe, so pii soora ge yaŋ Jerusalem, laara pǝ'nyah pǝlli. 53A gara yaŋ Masǝŋ cẽecẽe, a joŋra osoko nyi Masǝŋ.
လက္ရွိေရြးခ်ယ္ထားမွု
LUKAS 24: MUAR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Moundang © Alliance Biblique du Tchad, 1996.