Gén 46
46
Toq ri Jacob y konojel ri aj pa rachoch xebe pan Egipto
1Y ri Israel, ri rubini'an chuqa' Jacob, xuchop k'a el bey y xuk'uaj-el ronojel ri k'o rik'in. Y toq xapon k'a pa Beerseba, chiri' toq rija' xusuj jun kamelabel chuwech ri Dios ri ru-Dios chuqa' ri Isaac, ri rutata'. 2Y ri Dios xuq'alajirisaj-ri' chuwech chupan ri aq'a' ri' y xubij chire: Jacob, Jacob, xcha'.
Y ri Jacob xubij chire: Jare' ink'o wawe', xcha'.
3Y ri Dios xubij chire: Ja yin ri in Dios, ri ru-Dios chuqa' ri atata' Isaac. Man taxibij-awi' richin yabe pan Egipto, roma ri chiri', yin kan xtinben k'a chike ri awijatzul chi xke'ok jun nimalej tzobaj winaqi'. 4Y xkibe k'a awik'in pan Egipto y toq xkaken, ja ri José xtik'oje' chi'anaqaj, y chirij re' xtinben chike ri e awijatzul chi xketzolin chik pe pa Canaán, xcha' ri Dios chire.
5Y ri Jacob xuya' k'a kan ri ruwach'ulew Beerseba. Ri ralk'ual xkiya' k'a el ri kitata' pa carruaje ri ya'on-pe chike roma ri rey, y xekiya' k'a el chuqa' ri kixjayilal y ri kalk'ual. 6Xekik'uaj k'a el ronojel ri kawej y ronojel ri kibeyomel ri kibanon chik ri chiri' pa ruwach'ulew Canaán, richin chi xebe k'a pa ruwach'ulew Egipto, y keri' ri Jacob y konojel ri e rijatzul xebe pan Egipto. 7Konojel k'a xebe, ri ruk'ajol, ri rumi'al, y konojel rumam chi xten chi ala'.
8Y ri kibi' ri e rijatzul ri Jacob ri xebe-qa pan Egipto, ja re': Ri Rubén ri nabey ruk'ajol; 9Ri e ralk'ual k'a ri Rubén, je ri Janóc, ri Falú, ri Hezrón y ri Carmí.
10Ri e ralk'ual k'a ri Simeón, je ri Jemuel, ri Jamín, ri Ohad, ri Jaquín, ri Shoar y ri Saúl, ri ral ri jun ixoq aj-Canaán.
11Ri e ralk'ual ri Leví, je ri Guersón, ri Quehat y ri Merarí.
12Y ri e ralk'ual ri Judá, je ri Er, ri Onán, ri Selá, ri Fares y ri Zérah; ri Er y ri Onán xeken k'a kan chupan ri ruwach'ulew Canaán. Y ri ralk'ual ri Fares ja ri Jezrón y Jamul.
13Ri e ralk'ual ri Isacar, je ri Tolá, ri Puvá, ri Job y ri Simrón.
14Ri e ralk'ual ri Zabulón, je ri Sered, ri Elón y ri Jajleel.
15E waqxaqi' ruk'ajol ri Jacob ri xek'oje' rik'in ri Lea pa Padán-aram y ri ch'aqa' chik ri e riy y ri e ruxikin riy ri Lea e juwineq oxlajuj konojel. Y ri Dina ral chuqa' ri Lea.
16Ri e ralk'ual ri Gad, je ri Sefón, ri Jaguí, ri Suní, ri Ezbón, ri Erí, ri Arodí y ri Arelí. 17Ri e ralk'ual ri Aser, je ri Imná, ri Isuá, ri Isuí, ri Beriá y ri jun kana' rubini'an Sérah. Y ri e ralk'ual ri Beriá ja ri Jeber y ri Malquiel. 18Ri e ral-riy ri Zilpá, ri rusamajel ri Labán ri xusipaj-pe chire ri Lea, e waqlajuj k'a konojel.
19Ri e ral ri Raquel ri rixjayil ri Jacob, je ri José y ri Benjamín. 20Y ri e ralk'ual ri José ri xe'alex rik'in ri Asenat ri rumi'al ri Potifera, ja ri Manasés y ri Efraín. Rije' xe'alex pa ruwach'ulew Egipto. 21Y ri e ralk'ual ri Benjamín, je ri Bela, ri Béquer, ri Asbel, ri Guerá, ri Naamán, ri Ehi, ri Ros, ri Mupim, ri Hupim y ri Ard. 22Ri e kalk'ual ri Jacob y ri Raquel e kajlajuj konojel.
23Ri Dan xaxe jun ralk'ual xk'oje' y xubini'aj Jusim. 24Ri e ralk'ual ri Neftalí, je ri Jazeel, ri Guní, ri Jezer y ri Silém. 25Ri e ralk'ual ri Jacob, ri xek'oje' rik'in ri Bilhá, ri rusamajel ri Raquel e wuqu' konojel.
26Konojel k'a ri' ri e ruk'uan-el ri Jacob toq xbe pan Egipto, ri kan e rijatzul rija' e oxk'al waqi' konojel. Y man xe'ajlex ta ri e kixjayilal ri e ruk'ajol. 27Y ri e ralk'ual ri José ri xe'alex pan Egipto e ka'i'. Ri Jacob y konojel k'a ri aj pa rachoch ri xe'apon-qa chiri' e oxk'al lajuj konojel.
Toq ri Jacob y konojel ri aj pa rachoch xe'apon pan Egipto
28Toq xe'apon yan, xuteq-el ri ruk'ajol Judá richin xberubij chire ri José, richin keberuk'ulu' chupan ri ruwach'ulew Gosen. 29Y ri José kan xuben-wi ruchojmil ri carruaje richin chi niberuk'ulu' ri rutata' ri chiri' pa Gosen. Y toq xkik'ul-ki' rik'in, xuq'etej y janila xoq' chuwa-ruk'u'x. 30K'ari' ri Jacob xubij k'a chire ri José: Stape' xkiken k'a, wakami xatintz'et yan kan y xinwetamaj chi k'a at k'es na, xcha'.
31Y ri José xubij chike konojel ri rach'alal y chike ri aj pa rachoch ri rutata': Wakami kibe na richin ninbenya' rutzijol chire ri rey y xtinbij chire: Ri wach'alal y konojel ri aj pa rachoch ri nata' ri xek'oje' chupan ri ruwach'ulew Canaán, wakami xe'oqaqa wik'in re wawe'; 32xekik'en-pe ri kawej y ronojel ri k'o kik'in, roma ri kisamaj rije' ja ri yeyuq'un y yekik'iytisaj ri kawej, keri' xtinbij chire ri rey. 33Y toq xkixroyoj-pe ri rey y xtuk'utuj chiwe achike ri isamaj, rix xtibij k'a: 34Roj ri asamajela' kan oj yuq'unela' kichin karne'l pa qach'utinal-pe, achi'el ri samaj ri xkiben ri qati't-qamama', keri' xtibij chire, richin keri' xtuya' q'ij chiwe chi yixk'oje' kan wawe' pa Gosen, roma ri winaqi' aj-Egipto kan nimulun-kik'u'x yek'ase' kik'in yuq'unela' kichin karne'l, xcha' ri José.
လက္ရွိေရြးခ်ယ္ထားမွု
Gén 46: KQC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Kaqchikel Bible © Bible Society in Guatemala, 2003.