Gén 45
45
Ri José xuq'alajirisaj-ri' chikiwech ri rach'alal
1Ri José kan man nukoch' ta chik ri roq'ej chikiwech konojel rusamajela' y xubij chike: Kixel-el chi'iwonojel wawe', xcha'. Y kan man jun k'a chike ri rusamajela' xk'oje' kan chiri' toq xuq'alajirisaj-ri' chikiwech ri rach'alal.
2K'ari' xsik'in-q'anej chi oq'ej y ri aj-Egipto xkak'axaj k'a y xbekitzijoj pa rachoch ri rey. 3Y ri José xubij k'a chike ri rach'alal: Ja yin ri in José. ¿K'a k'es ri nata'?, xcha'. Y rije' man jun xetikir xkibij chire roma janila kixibin-ki' chuwech. 4Y xubij k'a chike ri rach'alal chi kejel-apo rik'in. Y toq rije' xejel-apo rik'in rija' xubij chik jun bey chike chi ja rija' ri José ri kach'alal, ri xkik'ayij-pe pan Egipto. 5Wakami k'a, man kixbison ni man tiq'axon iwánima roma xinik'ayij-pe, roma re' kan ja ri Dios xbanon richin xiruteq-pe k'a kere', richin man yixken roma wayjal. 6Ka'i' yan juna' k'o-pe re wayjal chuwech re ruwach'ulew y k'a k'o wo'o' ri nikanej kan chiqij y chupan ri wo'o' juna', stape' xtiban qa tiko'n xa man xtiwachin ta. 7Roma ri' ri Dios xiruteq-pe re wawe', nabey chiwech rix, richin chi yek'oje' kan k'iy iwijatzul chuwech re ruwach'ulew, y richin chuqa' chi ninkol ri ik'aslen rix y man yixken ta roma wayjal. 8Roma ri', man ja ta rix ri xixtaqon-pe wichin wawe', kan ja ri Dios ri xitaqon-pe roma kan xirukusaj richin ninya' pixabanik chire ri rey y chuqa' richin chi xinok achi'el rajaw richin chijun ri rachoch, y xirukusaj chuqa' jun aj-raqen pa ruwi' chijun ruwach'ulew Egipto. 9Roma ri' ja tibek'ama' ri nata' y tibebij chire chi kere' rubin-pe ri ak'ajol José chiqe: Ri Dios xiruya' richin ninq'et-tzij pa ruwi' chijun ruwach'ulew Egipto. Wakami k'a katanpe wik'in chi'anin. 10Y xkak'oje' chupan ri ulew Gosen, richin naqaj yak'oje-wi chuwe yin, rat y konojel ri awalk'ual y ri awiy-amam, ri awawej y konojel ri ek'o awik'in. 11Richin man xkixwayjan ta, xkixintzuq re wawe' y kan man jun ri achike ta xtik'atzin chiwe, roma k'a k'o na wo'o' juna' wayjal; keri' tibij chire ri nata' y keri' chuqa' tibij chike ri ek'o pan iwachoch, xcha'. 12Y ri José xubij k'a chuqa' chike: Wakami chi'iwonojel rix y rat chuqa' Benjamín, xitz'et chi kan ja yin ri in José y ja yin xibin-el re ch'abel re' chiwe. 13Ja tibetzijoj k'a chire ri nata' ronojel ri nuq'ij ri ya'on wawe' pan Egipto y titzijoj chire ronojel ri xitz'et kan rix re wawe'. Anineq k'a kixbiyin richin nibek'ama' ri nata', xcha' ri José.
14K'ari' ri José xuq'etej k'a ri Benjamín y janila xoq'; chuqa' ri Benjamín xuq'etej ri José y janila xoq' rik'in. 15K'ari' xerutz'ubaj konojel ri rach'alal, y toq xeruq'etej, janila xoq'. Chirij re', k'ari' xetikir xech'on ri rach'alal rik'in.
Ri rey richin Egipto nuteq kik'amik ri e aj pa rachoch ri José
16Y xapon k'a rutzijol pa rachoch ri rey chi ri José xe'apon ri rach'alal rik'in. Ri rey y konojel ri rusamajela' ri e ximil pa samaj janila xekikot, y kan xqa' chikiwech chi xe'apon. 17Y ri rey xubij k'a chire ri José: Tabij chike ri awach'alal chi tikiya-el ejqa'n chikij ri kiej y ketzolin pa Canaán. 18Tikik'ama-pe ri atata' y konojel ri awach'alal richin yepe wawe' wik'in y xtinya' ri ulew más utz chike ri k'o wawe' pan Egipto y kan pa ruk'iyal k'a xtibekitija' ri más utz ri yewachin wawe'. 19Y ri rey xubij k'a chire ri José: Tabij-el chike chi tikik'uaj-el ri carruaje ri ek'o wawe', richin yekik'en-pe ri kixjayilal y ri kalk'ual y chuqa' ri itata' richin yepe re wawe'. 20Y man tikich'ob kan rij ri nik'oje' kan chila', roma ri beyomel richin re ruwach'ulew Egipto kan xtok chuqa' kichin rije', xcha' ri rey chire ri José. 21Y ri e ruk'ajol ri Israel kan xqa' wi k'a chikiwech ri xbix chike y keri' xkiben. Y ri José kan xuya' k'a el ri carruaje chike y xuben achi'el xbix chire roma ri rey, xuya-el kiway richin nikitej-el pa bey. 22Y ri José xuya-el jujun jal kitziaq chikijujunal ri rach'alal, jak'a chire ri Benjamín xuya-el wo'o' jal rutziaq y 300 raqen saqipueq. 23Y chire ri rutata' xuteq-el lajuj bur ri kik'uan-el jalajoj ruwech beyomel ri ek'o chiri' pan Egipto y lajuj chik bur ri kik'uan-el trigo y wey richin nutej-pe pa bey ri rutata'. 24Toq xerujech-el ri rach'alal xuchilabej-el chike chi man tikibanala-el oyowal pa bey.
Y rije' xkichop k'a bey. 25Xe'el k'a pe ri chiri' pan Egipto, richin xebe-q'anej pa kiruwach'ulew Canaán rik'in ri kitata'. 26Y xkiya' k'a ri utzilej rutzijol chire ri kitata' y xkibij chire: Ri José xa k'a k'es na y ja rija' ri okineq q'atoy-tzij pa ruwi' chijun ruwach'ulew Egipto, xecha'. Jak'a ri Jacob toq xrak'axaj ri' xpax ránima roma kan man nunimaj ta ri xkibij chire.
27Y rije' xkitzijoj chire ri kitata' ronojel ri rubin-el ri José chike; jak'a ri Jacob k'a toq xutz'et na ri carruaje ri e taqon-el roma ri José richin nibek'amer-pe, k'ari' janila xkikot ri ránima. 28Y jari' toq xubij: Man ruk'amon ta k'a chi xaxe xinwetamaj-qa chi ri nuk'ajol k'a k'es, kan yibe na chutz'etik, rokik k'a in k'es, xcha'.
လက္ရွိေရြးခ်ယ္ထားမွု
Gén 45: KQC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Kaqchikel Bible © Bible Society in Guatemala, 2003.