Gén 18
18
Ri Jehová xubij chire ri Abraham chi nibek'oje' jun ti ruk'ajol
1Ri Jehová xuk'ut-ri' jun bey chik chuwech ri Abraham akuchi ek'o-wi ri li'aj paten-che' ri k'o pa rulew ri Mamré, chuchi' ri rachoch ri banon rik'in tzieq, toq rija' nimujan juba' roma ri k'aten. 2Toq xuyek-q'anej ri rujolon jari' toq xerutz'et e oxi' achi'a', e pa'el-apo chunaqaj. Jari' toq xyakatej-el junanin chiri' chuchi' ri jay richin xeberuk'ulu' y xuqasaj-qa-ri' k'a pan ulew chikiwech. 3Y rija' xubij chire jun chike rije': Táta, matiox richin yixq'ax juba' wik'in, 4wi rix niwajo' yin ninteq ruk'amik ya' richin nich'ej ri iwaqen y yixuxlan na el juba' chuxe' re jun che' re'. 5Utz xiben richin xixq'ax-el re kere', yin xtink'en-pe iway y kixwa' na k'a el richin nik'oje-el juba' iwuchuq'a' y k'ari' xkixbe, roma ri' kan utz xiben richin xixq'ax-el wawe', xcha' ri Abraham.
Utz, tabana' k'a ri nabij, xecha' rije'.
6K'ari' junanin xbe ri Abraham pa jay rik'in ri Sara y xubij chire: Chi'anin tabana' kaxlan-wey, tamuba-qa jun ka'i' arroba k'ej chayun y tachaq'arisaj, xcha'. 7K'ari' ri Abraham junanin xbe akuchi ek'o-wi ri rawej y xberuk'ama-pe jun nima-alaj achij wákix ri más jebel y xberuya' kan chire jun rusamajel richin nuben rutzil. Y re samajel re' kan chi'anin k'a xbe richin xberubana'. 8Chuqa' xuya-apo ri mantequilla, ri leche y ri ti wákix ri banon chik rutzil; y rija' xk'oje-apo kik'in richin xutz'et achike nik'atzin chike toq rije' yewa' chuxe' ri che'.
9Y toq xekolaj xkibij chire ri Abraham: ¿Akuchi k'o-wi ri Sara ri awixjayil?, xecha'.
Y ri Abraham xubij: Wawe' k'o-wi, k'o pa jay, xcha'.
10Y jun chike rije' xubij: Ke taq wa juna' apo xkipe chik awik'in y jari' toq ri awixjayil k'o chik jun ti ral, xcha'. Rokik ri' ri Sara ruya'on ruxikin chirij ri ruchi-jay ri k'o-pe chirij ri Abraham. 11Y ri Abraham y ri Sara janila chik e rijita'q, y ri Sara xa xtane' yan k'a ri ruyabil ri richin chi ik'.
12Y roma ri' toq rija' xa xtze'en-qa ruyon y xubij: ¡K'ari' ta k'a xtik'oje' jun wal yin, xa maneq chik wuchuq'a'!, xa janila chik in ri'j y chuqa' ri wachijil kan janila chik ri'j, xcha-qa.
13Y jari' toq ri Jehová xubij chire ri Abraham: ¿Achike roma ri Sara xa xtze'en ri chiri' pa jay y xubij-qa pa ránima, chi man nunimaj ta chi xtibek'oje' jun ral, roma xa janila chik ri'j? 14¿Kan k'o kami k'a jun ri man ta yitikir ninben yin? Man keri' ta. Y roma ri' ri juna' apo xkinoqaqa chik awik'in, y jari' toq ri Sara xalex yan ri ti ral chiri', xcha' chire.
15Y toq ri Sara k'o chik apo chiri', xubij chire ri Jehová: Ni, maneq xitze'en yin, xcha'. Keri' xubij roma xuxibij-ri'.
Y ri Jehová xubij: Man keri' ta, rat xa kan xatze'en, xcha' chire.
Ri Abraham nich'on rik'in ri Dios pa kiwi' ri aj-Sodoma
16Xeyakatej k'a el ri e oxi' achi'a' chiri' y xetzu'un-qa pa Sodoma; y ri Abraham beneq k'a kik'in. 17Y ri Jehová xubij-qa pa ránima: K'atzinel richin ninbij chire ri Abraham ri ninbenbana', 18roma kan qitzij na wi chi ri Abraham xtibe'ok jun nimalej tata'aj richin jun nimalej tzobaj winaqi' y kan xtik'oje' k'a uchuq'a' pa kiq'a' chuwech re ruwach'ulew y roma rija' xtinya' urtisanik pa kiwi' konojel ruwach'ulew. 19Kan q'alaj chik chinuwech chi rija' kan xtuk'ut kan chikiwech konojel ri ralk'ual y ri rijatzul chi k'o chi nikitaqej ri niqa' chinuwech yin, roma rije' k'o chi pa ruchojmilal xtikiben ronojel y jebel chuqa' ruchojmirisaxik xtikiben chike ri yebanatej, richin keri' yin Jehová xtinya' ronojel ri nusujun chire ri Abraham, xcha-qa. 20Y roma ri' ri Jehová xubij chire ri Abraham: Roma ri sujunik chikij ri aj-Sodoma y ri aj-Gomorra xa xk'iyer y ri kimak kan nik'o chik ruwi'. 21Roma ri' jare' xkixule-qa chila', richin ninbentz'eta' wi kan keri' nikiben achi'el ri apowineq chinuwech. Y wi man keri' ta, xtinwetamaj k'a ri', xcha'.
22Y chiri' k'a xkich'er-wi kan ki' ri e oxi' achi'a' kachibilan ri Abraham. Ri e ka'i' xebe-qa pa Sodoma, jak'a ri Abraham k'a xk'oje' na kan chiri' rik'in ri Jehová. 23K'ari' xjel-apo ri Abraham rik'in ri Jehová y xubij chire: ¿Kan xke'ak'is kami el konojel ri winaqi' ri utz kibanobal junan kik'in ri itzel taq kibanobal? 24Rik'in juba' xa ek'o ta e kawineq lajuj ri utz kibanobal. ¿Kan xke'ak'is kami el ri winaqi' y ri tinamit ri'? ¿Kan man xtakuy ta kami rumak ri Sodoma koma ri e kawineq lajuj ri'? 25Rat kan at choj-wi y man naben ta keri', chi xtak'is ta ruk'aslen ri utz rubanobal kik'in ri itzel taq kibanobal. Chi junan ta naben chike. Y roma rat kan at choj-wi, kan tabana' k'a ri ruk'amon, xcha' ri Abraham chire ri Dios.
26K'ari' ri Jehová xubij: Wi xkenwil ta e kawineq lajuj winaqi' ri utz kibanobal chupan ri Sodoma, xtinkuy k'a ronojel rumak ri tinamit ri' koma rije', xcha'.
27Jak'a ri Abraham xubij chire: Yin xa in poqolaj y xa in ulew y jun k'ixbel ninben chawech y rat kan at jun k'aslik Dios. 28Rik'in juba', k'a ek'o ta wo'o' nrajo' chike ri e kawineq lajuj ri utz kibanobal. ¿Kan xtak'is kami ronojel koma rije'?, xcha'.
Y ri Jehová xubij: Man xtink'is ta ronojel wi xkenwil e kawineq wo'o' ri utz kibanobal, xcha'.
29Y ri Abraham xubij chik apo jun bey: Rik'in juba' xaxe ta e kawineq ri utz kibanobal, xcha' rija'.
Y ri Dios xubij: Man xtink'is ta koma ri e kawineq ri utz kibanobal, xcha'.
30Y ri Abraham xubij chik: Man ta xtinyek awoyowal yin, nata' Dios, re yich'on chik apo jun bey. Rik'in juba' xaxe ta e juwineq lajuj winaqi' ri utz kibanobal, xcha' ri Abraham.
Y ri Jehová xubij: Man xtink'is ta ronojel koma ri e juwineq lajuj, xcha'.
31Jak'a ri Abraham xukamuluj-apo rubixikil: Nata' Dios, takuyu' juba', chi jun k'ixbel ri ninben chi chaq yich'on-apo. Rik'in juba' xaxe ta e juwineq ri utz kibanobal ri ek'o, xcha' rija'.
Y ri Jehová xubij: Man xtink'is ta ronojel koma ri e juwineq, xcha'.
32Y ri Abraham xukamuluj chik apo rubixikil: Man ta xtinyek awoyowal yin, nata' Dios, xaxe chik re jun bey re' xkich'on-apo. Rik'in juba' xaxe ta e lajuj ri utz kibanobal ri ek'o, xcha' ri Abraham.
Y ri Jehová xubij: Ni, man xtink'is ta ronojel koma ri e lajuj winaqi' ri', xcha'.
33Toq ri Jehová xtane' kan richin nitzijon rik'in ri Abraham, rija' xbe, y ri Abraham xtzolin-el pa rachoch.
လက္ရွိေရြးခ်ယ္ထားမွု
Gén 18: KQC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Kaqchikel Bible © Bible Society in Guatemala, 2003.