Gén 19
19
Ri itzel rubanik kik'aslen ri winaqi' aj-Sodoma y aj-Gomorra
1Y toq xqaq'ij yan qa ri q'ij ri', kere' k'a ri xbanatej: Ri e ka'i' ángel xe'apon k'a qa ri chiri' pa Sodoma, y ri Lot tz'uyul chiri' pan okibel richin ri tinamit Sodoma. Y toq rija' xerutz'et, xyakatej richin xeberuk'ulu' y xxuke' y xuqasaj-qa-ri' k'a pan ulew chikiwech. 2Y rija' xubij chike: Wakami k'a nink'utuj utzil chiwe richin yixbe chuwij pa wachoch richin yixuxlan y nich'ej iwaqen. Y chiri' niq'axaj-wi ri aq'a' y chua'q nimaq'a' xtichop chik k'a el ri ibey, xcha' chike.
Y rije' xkibij: Ni, pa bey yojk'oje-wi kan re junaq'a' re', xecha'. 3Jak'a ri Lot janila xuk'utuj chike richin yebe chirij pa rachoch y rije' xkinimaj rutzij. Y rija' xuben jun nimaq'ij kichin rije' y xuben kaxlan-wey ri maneq ch'amilej-q'or rik'in; y rije' xewa' k'a jebel.
4Y k'a man jani kekotz'e-qa, toq xe'apon konojel ri achi'a' ri e rijita'q y ri más k'a e ak'uala' na ri aj chiri' pa tinamit Sodoma, y xkisutij-rij ri jay. 5Xkoyoj k'a apo ri Lot y xkibij chire: ¿Akuchi ek'o-wi ri achi'a' ri xe'oqaqa awik'in re aq'a' re'? Ke'awelesaj-pe richin yojk'oje' kik'in, xecha'.
6K'ari' ri Lot xel-pe chikiwech y xujik' kan ruchi' ri rachoch, 7y xubij chike: Wach'alal, nink'utuj utzil chiwe chi man tich'ob richin niben itzel chike. 8Yin ek'o e ka'i' numi'al y re' man e k'ojewineq ta kik'in achi'a'. Xkenwelesaj-pe chiwech y tibana' kik'in ri achike ri niwajo'; jak'a chike ri achi'a' ri ek'o wik'in man jun tiben-el, roma xa ja yin ri xik'amon-pe kichin re wawe' pa wachoch, xcha' chike.
9Jak'a rije' xkibij: ¡Katel chiri' rat! Rat xa man at aj wawe' ta y kan nawajo' yatok jun to'onel qichin. Wakami k'a, más k'ayew xtiqaben chawe rat ke chuwech ri xtiqaben chike ri xe'oqaqa awik'in, xecha'. Jari' toq xeyakatej ri winaqi' e banoy ch'a'oj, chirij ri Lot y xejel-apo richin nikijoq' ri ruchi' ri rachoch. 10Kan jari' toq ri achi'a' ri ek'o pa rachoch ri Lot xkijeq juba' ri ruchi' ri jay, xkijik'-apo ri Lot y xkitz'apej chik kan ri ruchi' ri jay. 11K'ari' xkiben chike ri achi'a' richin xemoyir y xemoyir ri más e rijita'q k'a ri más k'a e ak'uala' na. Y re achi'a' re' xa nabey xekos y man xkil ta ri ruchi' ri jay.
12Y ri ka'i' achi'a' xkibij chire ri Lot: ¿Xaxe re' ek'o awik'in? ¿Maneq k'a jun aji', ch'aqa' chik ami'al ak'ajol o jun chik wineq ri kan awach'alal rat? Y wi ek'o, ke'awelesaj-el chupan re tinamit re', 13roma roj kan xtiqak'is re tinamit re', roma ri sujunik janila apowineq chuwech ri Jehová. Y roma ri' oj rutaqon-pe, xecha'.
14K'ari' ri Lot xeberutz'eta' ri xke'ok ruji', ri alaboni' ri achoq chike xeyatej yan el ri rumi'al, y xubij chike: Jo', qojel-el re wawe' chupan re tinamit re', roma ri Jehová xtiberuk'isa' re tinamit re', xcha' chike. Jak'a rije' xkich'ob chi xa yeruq'ol.
Ri Jehová xeruk'is ri Sodoma y ri Gomorra
15Y toq niseqer yan pe, ri ka'i' ángel xkipararej k'a ri Lot y xkibij chire: Kayakatej y chi'anin ri' tak'uaj-el ri awixjayil y la ka'i' ami'al, man xa kek'is kan wawe' chupan re rutojbalil rumak re tinamit, xecha'.
16Jak'a ri Lot man niniman ta k'a. Roma ri' xepe ri ka'i' ángel xkichop-el chi ruq'a' rija', ri ruq'a' ri rixjayil y ri kiq'a' ri e ka'i' rumi'al, roma ri Jehová kan janila xujoyowaj kiwech. Xekelesaj k'a pe chiri' y xekik'uaj k'a chuchi' ri tinamit y xekiya' kan chiri'. 17Y toq ek'o k'a chiri' chuchi' ri tinamit, jun chike ri ángel xubij chire ri Lot: Junanin ri' takolo-el ri ak'aslen. Man katzu'un kan chawij, ni man kapa'e' kan chupan la ruwa-taq'aj. Xa choj kabiyin la chuwa taq juyu' wi nawajo' nakol ri ak'aslen, roma rik'in juba' yaken, xcha'.
18Jak'a ri Lot xubij chike: Ni, wajaw yin. 19Rix kan janila utzil ibanon wik'in, y kan xijoyowaj nuwech, roma ri' xikol re nuk'aslen. Jak'a yin man yitikir ta ninkol-el-wi' k'a la chuwa taq juyu' la'. Man xa achike tink'uluwachij y yiken pa bey. 20Roma naqaj k'o la jun ko'ol tinamit la', akuchi utz xtinkol-el-wi'. Tiya' q'ij chuwe richin yibe chila' richin ninkol-el nuk'aslen, xcha' ri Lot chike.
21Y jun chike rije' xubij chire: Utz k'a, xtinben achi'el ri nawajo'. Man xtink'is ta k'a la ko'ol tinamit la'. 22Xa ja ri nik'atzin chi nakol yan el awi', roma yin man jun yitikir ninben, k'a toq rat xkatapon na chupan la ko'ol tinamit la', xcha' ri ángel chire. Y roma ri' xbix Sóar chire roma ko'ol ok.
23Y toq xel k'a pe ri q'ij jari' toq xapon ri Lot chiri' pa Sóar, 24k'ari' ri Jehová xuya-pe ri q'aq' rik'in chuwilej-abej y kan achi'el k'a job ri xuben pa kiwi' ri Sodoma y ri Gomorra. 25Y kan achi'el k'a xerupiskolij kan ri tinamit ri', kan man jun chik ketal xk'oje' ta kan, xeruk'is konojel ri winaqi', ronojel ri ruwa-taq'aj y ronojel ri k'o chuwech. 26Jak'a ri rixjayil ri Lot, xa kanajineq k'a kan y xpe rayibel rik'in richin xtzu'un chik kan chirij, y xa chiri' xk'oje-wi kan jumul, xok kan atz'an y xpa'e' kan achi'el jun wachibel.
27K'ari' ri Abraham nimaq'a' yan xbe-el akuchi xtzijon-wi rik'in ri Jehová. 28Jari' toq xerutz'et-qa ri Sodoma y ri Gomorra y xutz'et chi chijun ri pa taq'aj-qa, nibuqulin sib achi'el nibuqulin jun nimalej horno. 29Kere' k'a xk'uluwachitej toq ri Dios xeruk'is ri tinamit ri akuchi xk'oje-wi ri Lot. Ri Dios kan xuben k'a achi'el xuk'utuj ri Abraham chire y xerukol k'a pe ri Lot pa Sodoma toq achi'el xupiskolij kan ri' ri tinamit.
Ri kitikeribel ri tzobaj ri moabita y ri amonita
30Y ri Lot xpe k'a xibinri'il chire chi nik'oje' kan chupan ri tinamit Sóar, roma ri' rija' y ri e ka'i' rumi'al xebe-q'anej ri chuwa taq juyu' y chiri' xebek'oje-wi pa jun jul. 31Y k'o k'a jun q'ij toq ri nimalaxel rumi'al xubij chire ri chaq'laxel: Ri qatata' k'o yan chik k'iy rujuna' y man jun chik achin ri xk'oje' ta kan chuwech re ruwach'ulew richin xtik'ule' ta qik'in y yek'oje' ta qal. 32Wakami tiqabana' chire ri qatata' chi tuqumu' k'iy vino y qojk'oje' rik'in richin keri' xtik'oje' kan rijatzul qik'in, xcha' chire.
33Y ri aq'a' ri' kan xkiben k'a chire ri kitata' chi xutej k'iy vino y ja ri nimalaxel rumi'al ri xk'oje' kan rik'in. Jak'a ri Lot kan man jun xuna' ta toq xk'oje' kan rik'in, ni toq xyakatej-el. 34Y ri ruka'n q'ij ri', ri nimalaxel xch'on rik'in ri chaq'laxel y xubij chire: Rat awetaman chi ri chi'aq'a' iwir ja yin ri xik'oje' kan rik'in ri qatata'; y wakami re aq'a' re' tiqabana' chire ri qatata' chi tuqumu' chik k'iy vino, y ja chik rat ri xkak'oje' kan rik'in, richin keri' xtik'oje' kan rijatzul qik'in, xcha'.
35Y kan keri' wi xkiben chupan ri aq'a' ri', xkiben chire ri kitata' chi xuqum k'iy vino, y ja chik ri chaq'laxel ri xk'oje' kan rik'in. Jak'a ri Lot kan man xuna' ta toq xk'oje' kan rik'in, ni toq xyakatej-el. 36Y chi e ka'i' k'a xtani' ri' xeyawej kan chirij ak'ual y kan richin k'a ri kitata'. 37Y ri nimalaxel xk'oje' k'a jun ti ral ti ala' y re ak'ual re' xubini'aj Moab;*f17* y ri e rijatzul kan rija' xe'ok jun tzobaj winaqi' ri xkibini'aj chuqa' Moab. Y k'a keri' na kibi' etaman re q'ij re'. 38Y ri chaq'laxel xk'oje' chuqa' jun ti ral ti ala', y re ak'ual re' xubini'aj Ben-amí;*f18* y ri e rijatzul kan rija' xe'ok jun tzobaj winaqi' ri xkibini'aj chuqa' Amón. Y k'a keri' na kibi' etaman re q'ij re'.
လက္ရွိေရြးခ်ယ္ထားမွု
Gén 19: KQC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Kaqchikel Bible © Bible Society in Guatemala, 2003.