Mʉkpanganɨa 1
1
Asɔɓɨɨ ɔkɨɔ ɓisi nɔ dɔdɔ
1Akɔ mʉkpanganɨa, Asɔɓɨɨ a꞉kɨa ɓisi nɔ dɔdɔ.
2Akɔ angbinga ngɨananɨ, dɔdɔ a꞉ɓio ta ɓɔ tubutubu nɔ kʉ ɓʉtʉʉ. Umomo wa꞉kuto monu kɔ ʉpɨa wɔ mipo ɓɔ nji. Nɔ Mʉtɨma wɔ Asɔɓɨɨ wa꞉ɓio akɔyɛnganaka ta ananɨ akʉʉ ɔ mipo. 3Kʉdɔ, Asɔɓɨɨ a꞉sugo ɓɔ: «Ʉwanga wɨchwɛanɨa!» Ga ʉwanga ɓɔ ngbaiii. 4Ɛ꞉na ɓɔ ʉwanga, wa꞉ɓio ɨkyɛmʉ yɛta iɗo. Kʉdɔ, ɔ꞉ʉnagbonyoko nɔ umomo. 5Ɔ꞉sʉa ʉwanga ino ɓɔ «ɓisi ɓɔta ɓʉyɛ», nɔ umomo ɓɔ «ɓisi ɓɔta ɓiye». Kʉdɔ, ya꞉ɓio tɨa nɔ ngbinga ngɨyɔ ikuɓa, nɔ ɨyɔ, ɨpasɨ. Ɓisi ngʉɓɔ pɛɨ, ʉɓɔnanɨ.
6Ga Asɔɓɨɨ ɓata ɓɔ: «Ifa mɛngana yɨchwɛanɨa ati ɔ mipo akɔnagbonyoko mipo ngʉka akʉʉ, nɔ ʉka ɛsɨ.» 7Ɔ꞉kɨa ifa ngɨyɛnɛnɨ ta ɓanɨ, nɔ, ɔ꞉nagbonyoko mipo ngʉka akʉʉ ɔ ifa, nɔ ʉka ɛsɨ ɔngɔ. Kʉdɔ, ya꞉kyananakɨa ta ɓanɨ. 8Ɔ꞉sʉa ifa ngɨyɛnɛnɨ ino ɓɔ «ɓisi». Kʉdɔ, ya꞉ɓio tɨa nɔ ngbinga ngɨyɔ ikuɓa, nɔ ɨyɔ ɨpasɨ. Ɓisi ngʉɓɔ ɓepini, ʉɓɔnanɨ.
9Asɔɓɨɨ ɔ꞉tɔsugo ɓata ɓɔ: «Mipo ngʉka ka amʉdʉʉ wɔ ɓisi kɨmɔmanakɨa ɨda mɛngana, nɔ ɨtaka yɛta kakau yɨchwɛanɨa.» Kʉdɔ, ya꞉kyananakɨa ta ɓanɨ. 10Ɔ꞉sʉa ɨtaka yɛta kakau ino ɓɔ «ɨtaka», nɔ, ʉmʉwa ngʉwa mipo ka꞉mɔmanakɨa-ɔɔ, ino ɓɔ «lipuu lɛta lɨkpɔkpɔ.» Ɛ꞉na ɓɔ yaka ngɨyɛnɛnɨ, ya꞉ɓio iɗo. 11Kʉdɔ, ga ɨyɔ ɓata ɓɔ: «Ɨtaka yɨɓaiso iju, nɔ lanja ngɨlɛ la꞊ɓio nɔ masɔɔ. Yɨɓaiso tɨa kʉ nɔ migbo yɔ matɨ di di di ngʉka komo lipumo nɔ masɔɔ amati ɔngɔ, akʉʉ ɔ ɨtaka ta iɓomu.» Kʉdɔ, ya꞉kyananakɨa ta ɓanɨ. 12Ɨtaka yɔ꞉ɓaiso iju, nɔ migbo yɔ lanja liɓomu ngɨlɛ lanɔ masɔɔ, nɔ migbo yɔ matɨ maɓomu ngʉka komo lipumo nɔ masɔɔ amati ɔngɔ ta ɓanɨ. Ɛ꞉na ɓɔ yaka ngɨyɛnɛnɨ, ya꞉ɓio iɗo. 13Kʉdɔ, ya꞉ɓio tɨa nɔ angbinga ngɨa ɔ ikuɓa, nɔ ɨyɔ ɨpasɨ. Ɓisi ngʉɓɔ ɓeetu, ʉɓɔnanɨ.
14Ga Asɔɓɨɨ ɓata ɓɔ: «Ɓayaka ɓɔta ɓajɛyɛ ɓɨchwɛanɨa akʉʉ ɓisi akɔnagbonyoko ɓisi ɓɔta ɓʉyɛ nɔ ɓisi ɓɔta ɓiye. Ɓayaka ngʉɓɔnanɨ ɓiɓio ndʉ ɓakɔkɔ animbiiso ɓangbinga ɓɔ mambɔ#1:14 mambɔ: pɔ ɓɔ mambɔ kɔ ɓana ɓɔ Asɔɓɨɨ, nɔ maɓisi, nɔ mago. 15Nɔ ɨɓɔ, ɓiɓio apɔya dɔdɔ anɨngwa inani akʉʉ ɓisi.» Kʉdɔ, ya꞉kyananakɨa ta ɓanɨ. 16Asɔɓɨɨ ɔ꞉kɨa ɨpá, ʉwanga ngʉwa wɔta ʉja, akɔkyɛndakiso ɓisi ɓɔta ɓʉyɛ, nɔ uyi, ʉwanga wɔta bele, akɔkyɛndakiso ɓisi ɓɔta ɓiye. Ɔ꞉tɔkɨa tɨa kʉ nɔ ndata. 17Kʉdɔ, a꞉kʉnapɨa akʉʉ ɓisi akɔpɔya dɔdɔ. 18A꞉kʉnapɨa akɔkyɛndakiso ɓisi ɓɔta ɓʉyɛ nɔ ʉɓa ɓɔta ɓiye nɔ, akɔnagbonyoko ʉwanga nɔ umomo. Ɛ꞉na ɓɔ yaka ngɨyɛnɛnɨ ya꞉ɓio iɗo. 19Kʉdɔ, ya꞉ɓio tɨa nɔ angbinga ɔ ikuɓa nɔ ɨpasɨ. Ɓisi ngʉɓɔ ɓɔgɨna, ʉɓɔnanɨ.
20Ga Asɔɓɨɨ ɓata ɓɔ: «Mipo kɨchwɛiso lɨkyɛmʉ ngɨlɛ la homuo nɔ ɨlɛ la naɗa lɨja nɔgbɛ, nɔ ɓanoi ɓɨbʉmbʉa akʉʉ ɔ ɓisi.» 21Asɔɓɨɨ ɔ꞉tɔkɨa ɓanama ɓɔta ɓakpɔkpɔ ngʉɓɔ mipo, nɔ migbo yɔ lɨkyɛmʉ liɓomu ngɨlɛ la homuo, nɔ ɨlɛ la naɗa amati ɔ mipo. Ɔ꞉kɨa tɨa kʉ nɔ migbo yɔ ɓanoi ɓaɓomu. Ɛ꞉na ɓɔ yaka ngɨyɛnɛnɨ, ya꞉ɓio iɗo. 22Asɔɓɨɨ ɔ꞉ɓukiokio akɔsugo ɓɔ: «Nɔteni ɓana nɔ ucheni, nɔ, uhuseni mipo kɔ ɓanesini, nɔ, ɓanoi ɓucho choni akɔ dɔdɔ.» 23Kʉdɔ, ya꞉ɓio tɨa nɔ angbinga ɔ ikuɓa nɔ ɨpasɨ. Ɓisi ngʉɓɔ ɓɔkʉ, ʉɓɔnanɨ.
24Ga Asɔɓɨɨ ɓata ɓɔ: «Dɔdɔ ɨchwɛiso migbo yɔ lɨkyɛmʉ di di di ngɨlɛ la homuo ndʉ ɓanama ɓɔ ndei kʉndʉ ɨɓɔ iju, nɔ ʉɓa, ɓanaɗa aɨsɨ. Kʉdɔ, ya꞉kyananakɨa ta ɓanɨ.» 25Asɔɓɨɨ a꞉kɨa migbo di di di yɔ ɓanama ngʉɓɔ iju ta ɓanɨ nɔ ʉɓɔ ndei, nɔ ʉɓa, ɓanaɗa aɨsɨ. Ɛ꞉na ɓɔ yaka ngɨyɛnɛnɨ ya꞉ɓio iɗo. 26Tɨa ambise ɔngɔ, ga Asɔɓɨɨ ɓɔ: «Tɨkieni ɓombi akɔ isisenio ngɨyeso, nɔ, akɔɓio kʉndʉ isu, nɔ, ɓiɓio ndʉ ɓangama akʉʉ dɔdɔ muɓomu, akʉʉ ɔ sipe, nɔ akʉʉ ɓanoi, nɔ akʉʉ ɓanama ɓɔ ndei, nɔ, akʉʉ ɔ ɓanama ɓaɓomu ngʉɓa ɓanaɗa aɨsɨ.» 27Asɔɓɨɨ a꞉kɨa ɓombi akɔ isisenio ngɨangɔ ta akɔ isisenio ngɨangɔ ingainga a꞉ɓʉkɨa ndʉ gue nɔ moi.
28Kʉdɔ, ɔ꞉ɓukiokio nɔ, ɔ꞉ɓusigio ɓɔ: «Nɔteni ɓana, nɔ, ucheni choni nɔ, uhuseni dɔdɔ-ɛɛ nɔ, ɓieni nɔ ʉpanʉ akʉʉ ɔngɔ-ɛɛ. Ɓieni ndʉ ɓangama akʉʉ ɔ sipe nɔ, akʉʉ ɔ ɓanoi nɔ, akʉʉ ɓanama ɓaɓomu ngʉɓa ɓanaɗa aɨsɨ.» 29Ɔ꞉tɔmatɨa ɓata ɓɔ: «Nɔninjo lanja liɓomu ngɨlɛ lanɔ masɔɔ akʉʉ ɔ ɨtaka, nɔ, matɨ maɓomu ngʉkɔ lipumo nɔ masɔɔ amati ɔngɔ, akɔɓio ndʉ idyo ngɨyeno. 30Nɔ tɨa akɔ ɓanama ɓaɓomu ngʉɓɔ dɔdɔ, nɔ akɔ ɓanoi ɓaɓomu, nɔ akɔ ɨkyɛmʉ iɓomu ngɨyɛ yanaɗa aɨsɨ, nɔ ɨyɛ ya homuo, nɔɓinjo ɨɓɔ lanja liɓomu ngɨlɔ iju, akɔɓio ndʉ idyo ngɨyeɓo.» Kʉdɔ, ya꞉kyanakɨa ta ɓanɨ. 31Asɔɓɨɨ ɛ꞉na ɓɔ yaka iɓomu ngɨyɛ a꞉kɨa, ya꞉ɓio iɗo nɔgbɛ. Kʉdɔ, ya꞉ɓio tɨa nɔ angbinga ɔ ikuɓa nɔ ɨpasɨ. Ɓisi ɓɔ mɛɗɨa, ʉɓɔnanɨ.
လက္ရွိေရြးခ်ယ္ထားမွု
Mʉkpanganɨa 1: buuN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021, Wycliffe Bible Translators, Inc.